Ana Uchimwene wa Mlungu Uchitenda Chichi ni Yakusawusya Yachikusimana Nacho Chilengedwe?

“Pana yakusawusya yekulungwa yachikusimana nacho chilengedwe yayikwakwaya ŵandu, madela nambosoni yaumi yine. Mbungo syamachili syele sikutupilatupilape ligongo lyakuchenga kwa nyengo sikonanga nyumba nambosoni maumi ga ŵandu ŵajinji pachilambopa. Yaumi ya m’nyasa yekulungakulungwa yikulaga ligongo lya kutukutila kwakogoya soni yeleyi yikuyikasya woga [wakuti mpaka yiwe].”—Inger Andersen, pasi pa mlembela jwamkulungwa jwa bungwe ja United Nations nambosoni jwamkulungwa jwakulolela bungwe ja UN Environment Programme, 25 Julayi, 2023.

Ana maboma mpaka gakombole kumasya yakusawusya yeleyi pachilambo chosope? Ana gakwete machili gakutendekasya kuti yindu yitandilesoni kwenda chenene?

Baibulo jikusasala kuti pana boma jampaka jikombole kutenda yeleyi soni kuti bomaji jichimasya kwene yakusawusya yosope yakwayana ni chilengedwe pachilambopa. Jikusasala kuti “Mlungu jwakwinani tachitamilisya uchimwene,” wawuli boma jele jichilamulila chilambo chosope chapasi. (Daniele 2:44) Boma jelejo pajichitanda kulamulila, “tipachiŵa pangali chilichose chakupweteka kapena chakonanga” chilambo chapasi.—Yesaya 11:9.