ANA AKUDANDAWULA NI KUKWELA KWA MITENGO JA YINDU?

Akoleje Chembecheyo

Ana mchilambo chakutama yindu yikwesile mnope mitengo nambo wawojo ngakusapata mbiya syejinji? Ana akudandawula ni yampaka atende pakulisamalila asyene soni liŵasa lyawo? Naga yili myoyo nikuti mpaka adandawuleje yakwamba sogolo jawo. Nambope atamose pandaŵi jakusawusya jeleji kukola chembecheyo mpaka kwakamuchisye mnope.

LIGONGO LYAKWE YILI YAKUSOSEKWA

Ŵandu ŵakwete chembecheyo ŵangagambaga kusachilila kuti yindu yambone yitendekwe basi. Chembecheyo chikusichapa machili jemanjaji kuti atende yampaka akombole kuti apilile ni mwayiŵelele yindu pandaŵijo. Mwachisyasyo ŵamlijiganye akusalosya kuti ŵandu ŵakwete chembecheyo . . .

akusapilila yindu payisawisye
akusachenga mwangasawusya
akusasagula yindu mwalunda yayikusiyakamuchisya kukola yilu yambone soni yindu yikusiyajendela chenene paumi wawo

YAMPAKA ATENDE

Chandanda, aganichisyeje yampaka jijile Baibulo pakwakamuchisya masiku agano. M’Baibulo mwana yindu yakusosekwa yampaka yakamuchisye kupilila yindu payikukwela mitengo. Yindu yeleyi mpaka yakamuchisye kuti akaliwonaga kuti nganakola pakamula. Nambosoni mpaka yakamuchisye kumanyilila yampaka atende apano kapena msogolo naga yindu yisawisye.

“Kuganichisya chenene kuchimlolela mmwejo, Soni kupikanichisya yindu kuchimchenjela.”—Misyungu 2:11.

Chaŵili, aganichisyeje yajikusasala Baibulo pakwamba yamsogolo. Naga akumanyilila kusosekwa kwa lunda lwalukusasimanikwa m’Baibulo, chachisaka kulijiganya yindu yejinji yajikusasala Baibulo pakwamba ya msogolo. Mwachisyasyo, chachimanyilila kuti Mlungu akusaka kuti tukole “sogolo jambone soni chembecheyo.” Nambosoni jwalakwe asasile chindu chakututendekasya kuti tukulupilileje ya chembecheyochi. (Yelemiya 29:11) Chindu chelechi chili Uchimwene wa Mlungu.

ANA UCHIMWENE WA MLUNGU NI CHICHI SONI UCHITENDA CHICHI?

Uchimwene wa Mlungu uli boma jajichilamulila chilambo chosope chapasi. (Daniyele 2:44; Mateyu 6:10) Pandaŵi jawuchilamulilaga Uchimwenewu uchimasya yipwetesi soni kulaga. Mwamti kuchiŵa mtendele soni yakulya yejinji mpela mwagakusalila malemba gakuyichisyaga.

“Chimchiŵa ŵakusangalala soni yindu yichimjendelaga chenene.”—Salimo 128:2.

“Jemanjajo [ŵali msika sya Uchimwene] ngasakamula masengo pachabe.”—Yesaya 65:23.

“Pachilambo chapasi pachiŵa tiligu jwamjinji.”—Salimo 72:16.

Ŵandu mamiliyoni gejinji akusakulupilila yindu yeleyi yayikusasimichisya kuti Mlungu “nganaŵa alambwisye.” (Tito 1:2) Myoyo alijiganye yajikusasala Baibulo. Chembecheyo chajikusapeleka mpaka chakamuchisye kupilila mundaŵi jakusawusya soni kuŵa ŵakusimichisya kuti pana sogolo jambone.