Ŵandu 6 Miliyoni Awile ni Ulwele wa COVID—Ana Baibulo Jikusasala Yamtuli Yakwayana ni Nganiji?

Bungwe jakulola ya umi wa ŵandu pachilambo chosope (WHO), jisasile kuti pakwikanaga pa Meyi 23, 2022, ŵandu ŵakwana 6.27 miliyoni awile ligongo lya COVID-19. Nambo mwakamulana ni ngani jajakopweche pa Meyi 5, 2022, bungweji jasasile kuti chiŵalanjilochi mpaka chipunde pelepa. Jasasilesoni kuti chaka cha 2020 soni 2021, “ŵandu wosope ŵiŵawile ni ulwele wa COVID-19 . . . chiŵalanjilo chawo chaliji chiŵandika 14.9 miliyoni.” Ana Baibulo jikusasala yiliyose yakwayana ni milili jakogoya mpela jeleji?

Baibulo jasasile kala kuti kuchiŵa milili jakogoya

•  Yesu jwasasile kuti “masiku gakumalisya” kuchiŵa “milili.” —Luka 21:11, 2 Timoteyo 3:1.

Yaŵasasile Yesuyi yikukwanilichikwa masiku agano. Kuti amanyilile yejinji aŵalanje ngani jakuti “Ana Chimanyilo cha ‘Masiku Gambesi,’ Kapena Kuti ‘Ndaŵi Jakumalisya’ Chili Chichi?“

Baibulo jikusatulimbikasya

•  “Mlungu . . . jwakusatulimbisya mu yosope . . . akusatulimbisya mu yakusawusya yetu yosope.”—2 Akolinto 1:3, 4.

Utenga wa m’Baibulo ukusiwalimbikasyaga ŵandu ŵajinji ŵele ŵachibale ŵawo ŵawile. Kuti amanyilile yejinji alole ngani ja mtwe wakuti “Yampaka Atende Pawililwe—Yakusosekwa Kutenda Apano“ soni wakuti “Yindu Yakamuchisya Mnope Kwa Ŵawililwe.“

Baibulo jikusasala mwayichimalila yakusawusya yeleyi

•  “Uchimwene wawo uyiche. Yakusaka yawo yitendekwe pachilambo chapasi, mpela mwayikutendechela kwinani.”—Mateyu 6:10.

Pachangakaŵapa “Uchimwene wa Mlungu” chiwulolechesye kuti ‘pangali jwakuŵecheta kuti: ‘Une ngulwala.” (Maliko 1:14, 15; Yesaya 33:24) Alolele fidiyo jakuti Ana Uchimwene wa Mlungu Uli Chichi? kuti amanyilile yakwamba boma jakwinani nambosoni yajichitenda.

Tukwalimbikasya kuti alijiganye yejinji yakwamba yajikusasala Baibulo. Yindu yeleyi chiyakamuchisye wawojo ni liŵasa lyawo kuti apindule ni malangiso gambone soni yindu yachatutendele Mlungu kusogoloku.