JULAYI 27–OGASITI 2, 2026
NYIMBO NA. 56 Mkuyeje Yayili Yisyesyene
Alimbisyeje Unasi Wawo ni Yehofa Pakutenda Majiganyo Gakonjechesya
“Mulimose mwatujawulile pasogolo, kwende tupitilisye kwenda chenene m’litala lilyolyo.”—AFIL. 3:16.
CHAKULINGA CHA NGANIJI
Chitukambilane mfundo mcheche sya m’Baibulo syampaka syakamuchisye kuti alimbisye unasi wawo ni Yehofa pakuganichisya yakutenda majiganyo gakonjechesya.
1-2. (a) Naga asagwile yakutenda majiganyo gakonjechesya, ana akusosekwa kupitilisya kutenda chichi? (b) Ana maloŵe gakuti “kwenda chenene m’litala lilyolyo” gakusagopolela chichi? (Afilipi 3:16)
PANYUMA pakuti amalisisye majiganyo ga ku sekondale, ŵakutumichila ŵa Yehofa ŵane akusasagula yakutenda majiganyo gakonjechesya. Jemanjaji akusayiwona kuti majiganyoga, gachakamuchisya kupata masengo ni kupochelaga mbiya syakwakamuchisya pakumtumichila Yehofa. Naga asagwile yakutenda majiganyoga, ana mpaka atende chichi kuti chapitilisye kuŵa paunasi wambone ni Yehofa? (Yak. 4:8a) Yili yangalajila kuwusya kuti paŵaliji ku sekondale, ŵasimanaga ni yakusawusya yakulinga chikulupi chawo. Mwamti pandaŵijo ŵakombwele kupitilisya kumtumichila Yehofa mwakulupichika. Myoyo, pakwawula kukutenda majiganyo gakonjechesya, akusosekwa akapitilisye “kwenda chenene m’litala lilyolyo.”—Aŵalanje Afilipi 3:16.
2 Maloŵe ga Chigiliki gaŵagagopolele kuti “kwenda chenene m’litala lilyolyo,” ndaŵi syejinji ŵagakamulichisyaga masengo pakusala ya asilikali ŵakwenda mwadongosolo pakwawula kusogolo soni ngakulola munyuma. Myoyo, pakuganichisya yakutenda majiganyo gakonjechesya chachisosekwa kutenda yindu mpela asilikaliŵa. Chachisosekwa kupitilisya kwawula pasogolo pakumtumichila Yehofa yalumo ni abale ni alongo mmalo mwakuwujila munyuma. Munganiji, chitukambilane mfundo mcheche sya m’Baibulo syampaka syakamuchisye. Mfundo syelesi nganisiŵa syachilendo. Yili myoyo ligongo lyakuti aŵele ali mkusikamulichisya masengo munyumamu soni chachisosekwa kupitilisya kusikamulichisya masengo pandaŵi jachachitendaga majiganyo gakonjechesya soni pachachimalisya.
ALIMBISYEJE UNASI WAWO NI YEHOFA
3. Ana kutenda majiganyo gakonjechesya mpaka kukwaye chamti uli kumtumichila kwawo Yehofa?
3 Chakusawusya champaka asimane nacho. Kutenda majiganyo gakonjechesya mpaka kwatendekasye kuti atanganidweje mnope. Yeleyi mpaka yitendekwe ligongo lyakuti lisiku lililyose mpaka akoleje yakutenda yejinji. Ligongo lyakusaka kuti akomboleje mnope pa majiganyo gawo mpaka atande kukuwona kumtumichila Yehofa kuŵa kwangasosekwa. Yakuyichisya yakwe mpaka alepeleje kwawula ku misongano, kulalichila, kutenda lijiganyo lyapajika, soni kupopela.—Chiw. 2:4.
4. Ana ni chichi champaka chakamuchisye kuti “aŵeje ni yakutenda yejinji pa masengo ga Ambuje”? (1 Akolinto 15:58)
4 Aŵalanje 1 Akolinto 15:58. Kuti njinga jijende, mundu akusasosekwa kupitilisya kupalasa. Mwakulandanamo, kuti apitilisye kuŵa paunasi wambone ni Yehofa, akusasosekwasoni kupitilisya kumtumichila jwalakwe. Ni ligongo lyakwe Baibulo jikusatulimbikasya kuti ‘mŵeje ni yakutenda yejinji pa masengo ga Ambuje.’ Komboleka papikene maloŵe gakuti yakutenda yejinji atandite kuganichisya ya ndaŵi jakusamalila ali mkutumichila Yehofa. Kuganichisya yeleyi nganikuŵa kulemwa. Nambope, akusakola yakutenda yejinji ligongo akusayiwona kuti kumtumichila Yehofa kuli kwakusosekwa mnope. Myoyo, akagawonaga majiganyo gakutenda kuŵa gakusosekwa mnope kulekangana ni kumtumichila Yehofa. (Mat. 22:37) Mlongo jwine jwachisikana lina lyakwe Samantha jwasasile kuti, “Panatendaga majiganyo gakonjechesya naliŵichile chakulinga chakuti naga majiganyoga gakutanda kusokonasya unasi wangu ni Yehofa nikuti chingambe kugaleka.”
5. Ana akusosekwa kutenda chichi kuti atendeje yejinji pakumtumichila Yehofa?
5 Yakusosekwa kutenda mkanatande majiganyo gakonjechesya. Ndaŵi syosope akuwoneje kumtumichila Yehofa kuŵa kwakusosekwa mnope paumi wawo. Aliwusyeje kuti, ‘Ana ndesile yamti uli kuti ndaŵi syosope ngakomboleje kusimanikwa pa misongano, kwinjila mu utumiki, soni kutenda lijiganyo lyapajika?’ (Yos. 1:8; Mat. 28:19, 20; Aheb. 10:25) Akusosekwasoni kuliwusya kuti, ‘Ana panaliji ku sekondale nakombolaga chamti uli kutenda yindu yeleyi?’ Naga pandaŵijo pana yindu yine yele nganatendaga chenene, ana ni yindu yapi yakuyiwona kuti akusosekwa kuchenga pakuja kutenda majiganyo gakonjechesya? Aliŵichile chakulinga chakuti akatendeje yejinji pakumtumichila Yehofa pachakatendeje majiganyo gakonjechesya. Yisyene kuti chakasosekwe kulimbichila kuti akakombole majiganyogo. Nambo akaja kukunda kuti gakasokonasye unasi wawo ni Yehofa.a—Mat. 6:24.
6. Ana akusosekwa kuliwusya yiwusyo yapi kuti amanyilile naga akukuwona kumtumichila Yehofa kuŵa kwakusosekwa? (Alolesoni chiwulili.)
6 Pakutenda majiganyo gakonjechesya, akusosekwa aliwungunyeje mwakuwona mtima mwesi uliwose. Aliwusyeje kuti, ‘Ana apano ngupitilisya kukuwona kumtumichila Yehofa kuŵa kwakusosekwa? Ana ndaŵi syejinji ngusalepela kwawula ku misongano kapena ngusajawulako mwakuchelewa? Ana pandili pa misongano ngusanonyela kuganichisya mnope masengo ga ku sukulu? Ana ndandite kutenda misongano pa fidiyokofelesi mmalo mwakwawula ku nyumba ja Uchimwene?’ Akusosekwa kuliwusyasoni kuti, ‘Ana ndesile kunonyela kuŵalanga Baibulo soni kupopela mpela munatendelaga pandanda? Ana ngusagamba kwawula mu utumiki mwa mwambo soni ana ngusasaka kuti mbeluche mwachitema?’ Naga ayikopochele kuti atandite kutenda yine mwa yindu yeleyi, akusosekwa kongolela mwachitema. Akakunda kuti majiganyo gawo gatendekasye kuyiwona kuti kumtumichila Yehofa kuli kwangasosekwa mnope.
Akagawonaga majiganyo gawo kuŵa gakusosekwa mnope kupunda kumtumichila Yehofa (Alole ndime 6) )
“MCHENJELE NDAMO JENU JAKUGANISYA CHENENE”
7. Ana majiganyo gakonjechesya mpaka gasokonasye chamti uli kaganisye kawo?
7 Chakusawusya champaka asimane nacho. Ndaŵi sine majiganyo gampaka asagule, mpaka gatendekasye kuti alijiganye yindu yele m’Baibulo akusayikolanga kuti “lunda lwa ŵandu soni chinyengo changali mate.” Mwachisyasyo, mpaka atande kwajiganya kuti kwangali Mlungu soni kuti ŵandu nganatenda kupanganyidwa. (Akolo. 2:8) Ndaŵi sinesoni mpaka ŵajiganyeje kuti naga akusaka kuti yindu yajendeleje pa umi akusosekwa alidalileje jika. M’bale jwine jwachinyamata jwasasile kuti: “Patwaliji ku sukulu nganagamba kutujiganya mwampaka tukamulile masengo. Nambo ŵatujiganyagasoni kaganisye kele Yehofa ngakusakamulana nako. Mwachisyasyo, ŵatusalilaga kuti naga tukusaka kuti yindu yitujendeleje pa umi tukusosekwa tulidalileje jika. Yeleyi yandendekasisye kuyiwona kuti ngangusosechela chikamuchisyo cha Yehofa. Yakuyichisya yakwe, yasawusyaga kumdalila Yehofa pangutenda yindu.”
8. Ligongo chichi yili yakusosekwa ‘kuchenjela kaganisye kawo’? (Misyungu 5:1, 2)
8 Aŵalanje Misyungu 5:1, 2. Baibulo jikusatukalamusya kuti “mchenjele ndamo jenu jakuganisya chenene.” Mundu akusachichenjela chindu chakuchiwona kuti mpaka chijonasiche kapena chakuchiwona kuti mundu jwine mpaka achijiŵe. Satana yimpepe ni ŵandu ŵali kumbali jakwe, akusasachilila mnope konanga kaganisye ketu. (1 Pet. 5:8) Jemanjaji mpaka atutendekasye kukayichila yajikusasala Baibulo pangani ja yindu yambone kapena yakusakala, muŵatandile umi, soni yakuti kwana Mlungu. Yakusaganisya ŵandu ŵajinji pangani jeleji akusayiwona kuŵa ‘yapenani’ mnope. Nambo yisyesyene yakwe yili yakuti nganisyo syawo sili ‘syakuloŵela pameso pa Mlungu.’—1 Akoli. 3:18-20.
9. Ana akusosekwa kutenda chichi kuti achenjele kaganisye kawo?
9 Yakusosekwa kutenda mkanatande majiganyo gakonjechesya. Kuti achenjele kaganisye kawo, akusosekwa kulolechesya kuti mkanajawule kukutenda majiganyo gakonjechesya akukulupilila mnope kuti yajikusasala Baibulo yili yisyesyene. Aliwusyeje yiwusyo yakuti: ‘Ligongo chichi ngusakulupilila Mlungu? Ana ni chichi chachikusandendekasya kukulupilila kuti Baibulo jili Maloŵe gakwe? Ana ni chichi chachikusandendekasya kukulupilila kuti yajikusasala Baibulo pangani ja ndamo syambone yili yapenani mnope kulekangana ni mwakusayiwonela ŵandu kuchilamboku?’ Akusosekwa kuganichisyasoni mwayaŵelele yindu pandaŵi jiŵaliji ku sekondale. Ngatukukayichila kuti pandaŵijo ŵasimanaga ni yindu yayikasokonasisye kaganisye kawo. Aliwusyeje kuti: ‘Ana chijiganyo chakuti yaumi yatesile kuchenga kutyochela ku yindu yine chatandite kundendekasya kukayichila yakuti kwana Mlungu soni kuti jwalakwe ni juŵapanganyisye yindu yosope? Ana yasawusyaga kukana kutenda nawo ndamo syakusakala syaŵatendaga achimjangu ŵa ku sukulu?’ Naga ajanjile kuti elo pa yiwusyo yeleyi, ana ni chichi champaka atende kuti akulupilileje mnope kuti yajikusasala Baibulo yili yisyesyene soni kuti mpaka yakamuchisye? Myoyo, pakutenda majiganyo gakonjechesya akakunda kuti yakusaŵecheta ŵane yisokonasye kaganisye kawo nikutanda kukayichila yindu yakumanyilila kuti yili yisyesyene.—2 Tim. 2:16-18.b
10. Ana mpaka atende chichi kuti apitilisye kuchenjela kaganisye kawo?
10 Pandaŵi jakutenda majiganyo gakonjechesya, akusosekwa kupitilisya kuliwungunya. Aliwusyeje kuti: ‘Ana ndandite kuyiwona yindu yakusatenda ŵane kuti nganiyiŵa yakusakala mnope atamose kuti yakutendayo Yehofa akusaŵengana nayo? Ana ngusamanyilila kuti yindu yine yangulijiganya ku sukulu nganiyiŵa yisyesyene? Ana ngusakulupilila kuti uli Uchimwene wa Mlungupe wampaka umasye yakusawusya ya ŵandu?’ Kuti akombole kuchenjela kaganisye kawo akusosekwa anonyeleje kulijiganya Maloŵe ga Mlungu. Kulijiganya Baibulo soni kuganichisya yalijiganyisyeyo kuchakamuchisya kuti akulupilileje mnope kuti yakusalijiganya yili yisyesyene.—1 Tim. 4:15.
AKAMULICHISYEJE MASENGO NDAŴI JAWO MWALUNDA
11. Ligongo chichi mpaka yiŵe yakusawusya kukamulichisya masengo ndaŵi jawo mwalunda pakutenda majiganyo gakonjechesya?
11 Chakusawusya champaka asimane nacho. Kutenda majiganyo gakonjechesya mpaka kwatendekasye kuti akakolaga ndaŵi jakwanila. Mpaka aŵeje ŵakutanganidwa mnope pakukosechela mayeso kapena pakusaka kumalisya masengo ganegakwe pa ndaŵi jakwe. Naga ngakukamulichisya masengo mwalunda ndaŵi jawo, mpaka yitendekasye kuti aŵeje ŵakupela mnope soni alagasicheje nganisyo. Ni ligongo lyakwetu yili yakusosekwa mnope kuti pakutenda majiganyo gawo apatejesoni ndaŵi jakuchisamalila chilu chawo.
12. Ana ni yindu yapi yampaka asosekwe ‘kukamulichisya masengo chenene ndaŵi jawo’? (Aefeso 5:15, 16)
12 Aŵalanje Aefeso 5:15, 16. Ligongo lyakola yakutenda yejinji, mpaka yiŵeje yakusawusya ‘kukamulichisya masengo chenene ndaŵi jawo.’ Mwachisyasyo, kupwatika pakutenda majiganyo gawo, mpaka asosekwe kupata ndaŵi jakutenda yakusangalasya yimpepe ni Aklistu achimjawo soni ŵandu ŵa mwiŵasa mwawo. (Sal. 133:1; Mis. 18:1) Nambo chakusosekwa mnope pa yindu yeleyi chili kulimbisya unasi wawo ni Yehofa. (Mat. 6:33) Mpaka yisimanikwesoni kuti akusakamula masengo ganegakwe soni pandaŵi jakulandanajo mpaka asosekweje kutenda yindu yine yakulikamuchisya liŵasa lya kumangwawo. Konjechesya pelepa mpaka asosekwesoni kuchisamalila chilu chawo mwakutenda masewela gakulimbisya chilu soni kupata ndaŵi jakupumula. (Jwak. 4:6; 1 Tim. 4:8) Kuti akombole kutenda yosopeyi mpaka asosekwe kukamulichisya masengo mwalunda ndaŵi jawo.
13. Ana akusosekwa kutenda chichi kuti akamulichisyeje masengo mwalunda ndaŵi jawo?
13 Yakusosekwa kutenda mkanatande majiganyo gakonjechesya. Baibulo jikusatusalila kuti naga tukuliŵichila yakulinga, yindu yatukusaka kutenda yikusakomboleka. (Mis. 21:5) Kuganichisya mfundoji mpaka kwakamuchisye kuti mkanatande majiganyo gakonjechesya akole ndandanda jambone jakutendela yindu. Nikuti yeleyi yikomboleche akusosekwa kuganichisya muŵatendelaga yindu pandaŵi jaŵaliji ku sekondale. Mpaka aliwusye kuti: ‘Ana nakombolaga kupata ndaŵi jakutendela yindu yosope yakusosekwa mnope?’ Naga akuyiwona kuti pandaŵijo pana yindu yine yele nganatendaga chenene, akusosekwa kuganichisya yindu yampaka achenje apano kuti yindu yajendele chenene. Ndaŵi syosope alolechesyeje kuti akwete ndandanda jambone jakutendela yindu ni chalinga chakuti chindu chilichose achitendeje pa ndaŵi jakwe.c
14. Ana ni yiwusyo yapi yakusosekwa kuliwusya?
14 Pandaŵi jakutenda majiganyo gakonjechesya, akusosekwa aliwungunyeje ndaŵi syosope. Mpaka aliwusyeje kuti: ‘Ana ndandanda jangu jikungamuchisyaga kupata ndaŵi jakupumula mwakwanila soni kutenda masewela gakulimbisya chilu? Ana ngusapataga ndaŵi jakunguluka ni Aklistu achimjangu? Ana mpaka ngombole kumalisya masengo ga ku sukulu pandaŵi jakwe? Naga yikusasawusya, ana yeleyi yikutendekwa ligongo lyakuti ngusakola yakutenda yejinji kapena ligongo lyakuti ndili jwa mbwaji? Ana achimjangu soni ŵandu ŵa mwiŵasa mwangu akuyiwona kuti ngusosekwa kuchenga mwangutendela yindu?’ Naga akuyiwona kuti akusosekwa kuchenga mwakusakamulichisya masengo ndaŵi jawo, akusosekwa kutenda yeleyo mwachitema. Mpaka ŵaŵendesoni achimjawo ŵakusakombola kamulichisya masengo mwalunda ndaŵi jawo kuti ŵakamuchisye.—Mis. 11:14.
APITILISYE “KWENDA NI ŴANDU ŴALUNDA”
15. Ana ni chakusawusya chapi champaka asimane nacho pakutenda majiganyo gakonjechesya?
15 Chakusawusya champaka asimane nacho. Pakutenda majiganyo gakonjechesya, achimjawo ŵa mkalasi mpaka ŵaŵendeje kuti akatende nawo yindu yakusanonyela jemanjajo. Pane mpaka alinjidwe kuti ŵakuyeje jemanjaji. Yeleyi mpaka yitendekwe ligongo lyakuti akwete yaka yakulandana, akusanonyela yindu yine yakulandana, soni akusaŵa yimpepe mkalasi. Panesoni mpaka ayiwoneje kuti pana yindu yejinji yakulandana ni achimjawoŵa kulekangana ni mwayiŵelele ni ŵandu ŵa mumpingo mwawo. Nambope, akusosekwa kuŵa ŵakusamala. Akumbuchileje kuti jemanjaji agambile kuŵa achimjawo ŵa mkalasi. Nambo akusalekangana yindu yakusakulupilila. Myoyo, naga akumalila ndaŵi jejinji ali mkukunguluka ni jemanjaji, mpaka atande kujigalila kaganisye kawo. (1 Akoli. 15:33) Yeleyi ni yayamtendechele Michael, juŵalijiganyisye ya magesi kwa yaka 4. Jwalakwe jwatite, “Nakamulaga masengo lisiku lililyosye yimpepe ni achimjangu ŵele nganiŵachimbichisyaga achakongwe, ŵapikanilaga nyimbo syakusakala, soni ŵanonyelaga kutukana. Mwapanandipanandi, natandite kuyiwona yindu yaŵatendaga jemanjaji kuti nganiyiŵa yakusakala.”
16. Ana lilemba lya Misyungu 13:20 likutujiganya chichi?
16 Aŵalanje Misyungu 13:20. Baibulo jikusatusalila ya kogoya kwakukunguluka ni ŵandu ŵa ndamo syakusakala. Jikusatusalilasoni kuti “mundu jwakwenda ni ŵandu ŵalunda chachiŵa jwalunda.” Ana pelepa tukulijiganya chichi? Ŵanduwe tukusajigalila yitendo ya ŵandu ŵatukusakunguluka nawo chinga yiŵe yambone kapena yakusakala. Myoyo, akungulucheje ni ŵandu ŵakusamnonyela Yehofa mpela mwakusatendela wawojo.—Sal. 101:6, 7; 119:63.
17. Ana akusosekwa kutenda chichi kuti akakungulukaga ni ŵandu ŵa yitendo yakusakala?
17 Yakusosekwa kutenda mkanatande majiganyo gakonjechesya. Chachisosekwa kuti chaliŵichileje malile pakukunguluka ni achimjawo wa ku sukulu. Jwa Mboni jwine lina lyakwe Trenton jwasasile kuti: “Ngusinatendela yambone achimjangu ŵa mkalasi nambo patuŵelwiche ngangusakunguluka nawo. Ngusagamba kwawona mpela ŵandu ŵangusoma nawo basi nambo ngangusinajigala mpela achimjangu ŵapamtima.” Ana wawojo akusosekwa kutenda chichi kuti akatendeje yeleyi? Kuti apate kwanga kwa chiwusyochi, akusosekwa kuganichisyasoni yaŵatendaga paŵaliji ku sekondale. Akusosekwa kuliwusya kuti: ‘Ana panaliji ku sekondale natendaga yamti uli kuti ngakungulukaga mnope ni achimjangu ŵa ku sukulu?’ Naga ayiweni kuti pandaŵijo yindu yine nganatendaga chenene, ana ni yindu yapi yakusosekwa kuchenga apano? Akusosekwa kutenda yakomboleka kuti apitilisye “kwenda ni ŵandu ŵalunda” soni aŵambaleje kukunguluka mnope ni ŵandu ŵele ngakusamtumichila Yehofa.d
18. Ana akusosekwa kuliwusya yiwusyo yapi? (Alolesoni chiwulili.)
18 Pakutenda majiganyo gakonjechesya, ndaŵi syosope akusosekwa aliwungunyeje. Aliwusyeje kuti: ‘Ana apano ndandite kukunguluka mnope ni achimjangu ŵa mkalasi? Ana yangusaganisya soni kuŵecheta yitandite kulosya kuti ndandite kujigalila mwakusatendela yindu jemanjaji? Ana Yehofa mpaka asangalale pakumbona ndili mkukunguluka ni achimjangu ŵa mkalasiŵa?’ (Sal. 1:1) Naga ayikopochele kuti atandite kujigalila mwakusatendela yindu achimjawo ŵa mkalasi, akusosekwa kuchenga mwachitema. Alolechesye kuti akukunguluka ni ŵandu ŵakusamnonyela Yehofa. Nambosoni, atende yakomboleka kuti ŵalalichileje achimjawo ŵa mkalasi. Wawojo ni ŵali pa malo gambone gakwajiganya jemanjaji yakwamba Yehofa soni yajikusasala Baibulo.
Akalepelaga kwalalichila achimjawo ŵa mkalasi (Alole ndime 18)e
AKOSECHELEJE MKANIPAŴE
19. Ana mpaka akosechele chamti uli kumalana ni yakusawusya yampaka asimane nayo pakutenda majiganyo gakonjechesya? Apeleche chisyasyo.
19 Aganichisye chisyasyo achi: Tuwanichisye kuti pana mundu jwakusaka akajende mu ngalango. Atamose kuti ngakumanyilila yakusawusya yosope yampaka asimane nayo paulendowo, jwalakwe mkananyakuche mpaka asosekwe kuwala sapato syambone, soni yakuwala yampaka yimchenjele nyengo pajichenjile. Kupwatika pelepa, jwalakwe akusakola chakulinga chakuti akayiche kwakwawula. Yeleyi ni yampaka atendesoni wawojo pakutenda majiganyo gakonjechesya. Apitilisye kulimbisya unasi wawo ni Yehofa soni ‘awale yida yosope ya ngondo yakutyochela kwa Mlungu.’ Konjechesya pelepa, akumbuchileje chakulinga chachikwatendekasya kutenda majiganyo gakonjechesya. Chakulinga chawo chikaŵaga kusaka kusichila kapena kuŵa jwakumanyika kuchilamboku. Nambo chiŵeje kumsangalasya Yehofa pa yosope yakusatenda.—Aef. 6:11-13; 1 Akoli. 9:26, 27; 10:31.
20. Ana mpaka apitilisye chamti uli ‘kulilinga kuti alole naga akwendape m’chikulupi’?
20 Baibulo jikusatusalila kuti: “Mpitilisye kulilinga kuti mlole naga mkwendape m’chikulupi. Mpitilisye kulilinga kuti mmanyilile kuti mli mundu jwamtuli.” (2 Akoli. 13:5) Pakutenda majiganyo gakonjechesya akusosekwa atendeje yeleyi. Ndaŵi syosope akusosekwa aganichisyeje yindu yatukambilene munganiji. Mpaka atende yeleyi mwakuganichisya yiwusyo ayi: Ana ndaŵi syosope akusatenda yindu yakwakamuchisya kuŵa paunasi wambone ni Yehofa? Ana akusaŵambala kujigalila kaganisye ka ŵandu ŵa kuchilamboku? Ana akusalolechesya kuti akukamulichisya masengo mwalunda ndaŵi jawo? Ana akusakunguluka ni Aklistu achimjawo mmalo mwakukunguluka ni ŵandu ŵa kuchilamboku? Akusosekwa kuliwusya yiwusyo yeleyi chinga pali ku sukulu, kumasengo kapena kulikose. Aŵeje ŵakusimichisya kupitilisya kumkulupilila Yehofa payakutendekwa yiliyose yampaka asimaneje nayo. Sonitu Yehofa chachakamuchisya kuti yindu yajendeleje chenene naga akupitilisya kuŵa paunasi wambone ni jwalakwe.—Mis. 3:5, 6.
NYIMBO NA. 87 Ayiche! Mlungu Ŵalimbisye
a Kuti amanyilile yindu yine yakusosekwa kutenda kuti apitilisye kutenda yejinji pakumtumichila Yehofa, aŵalanje ngani ja Chichewa pa jw.org jamtwe wakuti “Kodi Ndiyenera Kuchita Chiyani Ndikabatizidwa?—Mbali Yoyamba: Pitirizani Kuchita Zinthu Zofunika.”
b Kuti amanyilile yindu yine yakusosekwa kutenda kuti achenjele kaganisye kawo, aŵalanje ngani jamtwe wakuti, “Tukakunda Kuti “Lunda lwa Chilambochi” Lutusokonasye’” mu Sanja ja Mlonda ja Meyi 2019.
c Kuti amanyilile yindu yine yakusosekwa kutenda kuti akamulichisyeje masengo mwalunda ndaŵi jawo, aŵalanje ngani ja Chichewa pa jw.org jamtwe wakuti “Zimene Achinyamata Amafunsa. . . Ndingatani Kuti Ndizigawa Bwino Nthawi Yanga?”
d Kuti amanyilile yindu yine yakusosekwa kutenda kuti asaguleje mwalunda ŵandu ŵakunguluka nawo, aŵalanje lijiganyo 48 lya mtwe wakuti “Tusaguleje Achimjetu Mwalunda” mu buku ja Asangalaleje Mpaka Kalakala.
e KULONDESYA CHIWULILI: Mlongo jwakulijiganya kutiŵa wumbo akumlalichila mjakwe jwa mkalasi.