Asaguleje Mwalunda Pakusaka Kutenda Majiganyo Gakonjechesya

1-2. (a) Ana ŵachinyamata akusasosekwa kusagula yindu yapi? (b) Ana maloŵe gakuti “majiganyo gakonjechesya” gakugopolela chichi? (Alole “Ngopolelo ja Maloŵega.”)

NAGA ali jwachinyamata komboleka ŵandu ŵajinji akusiŵawusya kuti, “Ana mkusaka kuti chimkamule masengo gapi pachimchikulapo?” Atamose kuti akusiŵawusya chiwusyochi, akusosekwa kumanyilila kuti kutenda utumiki wa ndaŵi syosope chili chindu chakusosekwa mnope paumi wawo. Nambope, chachisosekwa kukamulaga masengo ni chakulinga chakuti chakomboleje kulisamalila. (2 Ates. 3:10) Myoyo, ngatukukayichila kuti apano akusaganichisya ya masengo gachachikamulaga pachachikulapo.

² Panyuma pakumalisya majiganyo ga ku sekondale, ŵachinyamata ŵane akusakambilana ni achinangolo ŵawo mtundu wa masengo gampaka akamule. Panyuma pakukambilanaku, ŵachinyamata ŵane akusasagula yakutenda majiganyo gakonjechesya. Komboleka kuti wawojo akusaka kutenda majiganyoga. Naga yili myoyo, ana aganichisye majiganyo gampaka atende? Nganiji, chijilondesye mfundo sya m’Baibulo syampaka syakamuchisye kusagula yindu mwalunda pakuganichisya yakutenda majiganyo gakonjechesya. Atamose kuti nganiji jikusala mnope yampaka atende ŵachinyamata nambope mfundo syakwe mpaka simkamuchisye Mklistu jwalijose. Mfundosi mpaka syakamuchisyesoni achinangolo kulola yampaka atende pakwakamuchisya ŵanache ŵawo kuti asagule yindu mwalunda.

ANA AKUSOSEKWA KUTENDA MAJIGANYO GAKONJECHESYA?

3. Ligongo chichi Aklistu ŵane akusasagula yakutenda majiganyo gakonjechesya?

³ M’madela gane, mundu mpaka apate masengo ni kupochelaga mbiya syejinji atamose kuti nganatenda majiganyo gakonjechesya. Pele m’madela gane majiganyo gakonjechesya gakusamkamuchisya mundu kupata masengo gakusapochela mbiya syejinji kapena gakuti akamuleje kwa kandaŵi kamnono. Masengo mpela gelega mpaka gampe Mklistua ndaŵi jakwanila jakulalichila kapena jakutendela mautumiki gane. Nambope, Mklistu pakutenda majiganyoga akusosekwa kumanyilila kuti mpaka asosekweje kumalila ndaŵi jakwe jejinji, machili, soni mbiya.

4. Ana ŵani ŵakusosekwa kusagula naga Mklistu akusosekwa kutenda majiganyo gakonjechesya? (Alolesoni maloŵe gamwiŵanda.)

⁴ Baibulo jikusasala kuti mundu “jwalijose chachitwichila katundu jwakwe.” (Agal. 6:5) Yeleyi yikugopolela kuti Mklistu jwalijose jwachikulile, akwete udindo wakusagula naga akusosekwa kutenda majiganyo gakonjechesya.b Nambosoni, achinangolo akwete udindo wakusagula majiganyo gampaka atende ŵanache ŵawo. (Aef. 6:1) Konjechesya pelepa, malangiso gampaka ŵape ŵanacheŵa mpaka gakamuchisye kuti pachachikulapo chasagule yindu mwalunda panganiji.—Mis. 22:6.

5. Ana ni ndaŵi japi jele mundu mpaka atande kuganichisya yakutenda majiganyo gakonjechesya soni ligongo chichi? (Alolesoni chiwulili.)

⁵ Jwachinyamata mkanamalisye majiganyo ga ku sekondale akusasosekwa kuganichisya naga chachitenda majiganyo gakonjechesya. Jwalakwe mkanasagule yakutenda majiganyoga akusosekwa kukambilana kaje ni achinangolo ŵakwe. Kutenda yeleyi, mpaka kukamuchisye kuti awungunye soni amanyilile majiganyo gampaka atende. Nambosoni, mpaka yakamuchisye kumanyilila naga mwanacheju akusosekwa kulijiganya yindu yine yampaka yimkamuchisye kuti chapate masengo kapena yampaka yimkosechelesye kuti chatende chenene majiganyo gakonjechesya. Ana jemanjaji akusosekwa kusagula yakuti mwanache jwawo chatende majiganyoga mkanamalisye majiganyo ga ku sekondale? Yeleyi mpaka yigambe kujigalila mwayiŵelele yindu. (Mis. 21:5) Ŵachinyamata ŵane akusasagula yakumalisya kaje sukulu, kutanda kukamula masengo, soni kutanda upayiniya kaneko ni kuganichisyaga yakutenda majiganyo gakonjechesya. Atamose mundu pakusile mpaka asagulesoni yakutenda majiganyoga.

6. Ana ni chichi champaka chimkamuchisye mundu kuti asagule yindu mwalunda pakuganichisya yakutenda majiganyo gakonjechesya?

⁶ Ana ni chichi champaka chakamuchisye kuti asagule yindu mwalunda pakuganichisya yakutenda majiganyo gakonjechesya? Akusosekwa kumŵenda Yehofa kuti ŵakamuchisye. (Yak. 1:5) Kaneko, akusosekwa kuganichisya yindu yiŵili yakuyichisyayi: Chandanda, amanyilileje chakulinga chachikwatendekasya kusagula kutenda majiganyo gakonjechesya. (Sal. 26:2) Chaŵili, akusosekwa kugamanyilila chenene majiganyo gakusaka kutendago. (Mis. 14:15) Kwende sambano, tukambilane chenene yindu yiŵili yeleyi.

LIGONGO CHICHI AKUSAKA KUTENDA MAJIGANYO GAKONJECHESYA?

7. Ana Aklistu akusosekwa kusamala ni chichi pakuganichisya yakutenda majiganyo gakonjechesya?

⁷ Naga akuganichisya yakutenda majiganyo gakonjechesya, akusosekwa kuliwusya chiwusyo chakusosekwa mnope achi, ‘Ligongo chichi ngusaka kutenda majiganyo gakonjechesyaga?’ Ŵandu ŵajinji akusatenda majiganyo gakonjechesya ni chakulinga chakuti chapate masengo gakusaganonyela mnope kapena gakuti chapocheleje mbiya syejinji. Nambo ana kukola yakulinga yeleyi kuli kulemwa? Ngaŵa mnope. (1 Tim. 5:8) Nambope, Baibulo jikusatukalamusya kuti tukasiwonaga mbiya kuŵa syakusosekwa mnope kapena kuganisyaga kuti ni syampaka situchenjele. (Mis. 23:​4, 5; 1 Tim. 6:​8-10; 1 Yoh. 2:17) Amanyilile kuti unasi wawo ni Yehofa mpaka usokonechele soni mpaka aŵe ŵangasangalala naga chakulinga chawo chakutendela majiganyogo chili kusaka kusichila kapena kuŵa jwakumanyika.

8-9. (a) Ana Mklistu akusosekwa kugawonaga mwamti uli majiganyo? (Mateyu 6:33) (b) Ana tukulijiganya chichi pa yaŵaŵechete Josefina, Morine, soni Iris?

⁸ Sambano, ana akusosekwa agawoneje mwamti uli majiganyo? Kumtumichila Yehofa kuli kwakusosekwa mnope paumi wetu soni ngatukusosekwa kunda chilichose kutusokonasya kutenda yeleyi. (Mat. 22:​37, 38; Afil. 3:8) Myoyo, agawoneje majiganyo kuŵa litala lyakwakamuchisya kupata yakusosechela ya paumi kwineku ali mkumtumichila Yehofa ni mtima wawo wosope.—Aŵalanje Mateyu 6:33.

⁹ Kwende tulole yayakamuchisye ŵachinyamata ŵane kuti asagule yindu mwalunda pangani jakutenda majiganyo gakonjechesya. Josefina, jwa ku Chile, jwasasile kuti: “Natesile majiganyo gakonjechesya ni chakulinga chakuti chimbate masengo gakumba ndaŵi jakwanila ja kumtumichila Yehofa. Nambope, nganingunda kuti majiganyoga gasokonasye unasi wangu ni Yehofa.” Mlongo Morine jwasagwile yakuti akalijiganye kwa chaka chimo masengo gakutiŵa umbo. Ligongo chichi jwasagwile masengoga? Jwalakwe jwatite: “Chakulinga changu chaliji chakuti njawule kukwasosechelaga ŵakulalichila ŵajinji. Myoyo, nasagwile yakulijiganya masengo gampaka gangamuchisye kukwanilisya chakulingachi. Ndili malisisye kulijiganya, natandite kukamula masengo mwamti nasungaga mbiya pakukosechela kwawula kukwasosechelaga ŵakulalichila ŵajinji. Ndili njawile ku delaji, yanalijiganyisye yila yangamuchisye kuti mbate masengo.” Mlongo Iris juŵalijiganyisye kwa yaka yejinji kuti chaŵe dokotala jwakulola ya meno jwasasile kuti: “Kutenda majiganyo gakonjechesya kwana umbone wakwe. Nambope, nganikuŵa kumtendekasisye mundu kuŵa jwakusangalala. Naga tukuŵika kumtumichila Yehofa pamalo gandanda paumi wetu, jwalakwe chachilolechesya kuti tuli ŵakusangalala soni tukwete yindu yakusosechela pa umi.” Kusala yisyene, naga tukusakuwona kumtumichila Yehofa kuŵa kwakusosekwa mnope, tuchikombola kusagula yindu mwalunda yayichitendekasya kuti tuŵe ŵakusangalala mpaka kalakala.

AGAMANYILILEJE CHENENE MAJIGANYO GAKUSAKA KUTENDA

10. Ana yayili pa Detulonomo 32:29 mpaka yakamuchisye chamti uli pakuganichisya yakutenda majiganyo gakonjechesya?

¹⁰ Komboleka kuti pana masengo gakusasaka ali akamwile. Nambope, mpaka yiŵe chenene kuganichisya ya masengo gane chinga gakulandana ni gakusakago kapena gamtundu wine. (Awanichisye ni Misyungu 18:17.) Masiku agano, pana matala gejinji gampaka akuye mundu pakutenda majiganyo gakonjechesya gele nganigapagwa munyumamu. Mwachisyasyo, yikusaŵa yakomboleka kutenda majiganyoga kupitila pa Intaneti pakamulichisya masengo kompyuta. Akusosekwa kuganichisyasoni naga mpaka yiŵe yakomboleka kulipatila yakusosechela ya pa umi atamose yili mkuti nganatenda majiganyo gakonjechesya. Mwachisyasyo, mlongo Johanna jwa ku Finland, nganatenda majiganyo gakonjechesya. Jwalakwe jwatite: “Panagambile kumalisya sukulu natandite kukamula masengo soni kutenda upayiniya. Mwamti nakamulaga masengo gakulekanganalekangana. Nayiweni yakusatenda Yehofa pakukwanilisya maloŵe gakwe gakuti chachitukamuchisya kupata yindu yatukusosechela.” Akusosekwa akumbuchile kuti yiliyose yampaka asagule pangani jakutenda majiganyo gakonjechesya yikwete umbone ni yakusawusya yakwe. Myoyo aliwusyeje kuti: ‘Ana yindu yambone yampaka yipagwe ligongo lyakutenda kapena ngatenda majiganyoga yili yejinji kulekangana ni yakusawusya yampaka yipagwe?’ (Aŵalanje Detulonomo 32:29; 1 Akoli. 10:23) Kuti tupate kwanga kwa chiwusyochi, kwende tukambilane yindu yine yampaka yitukamuchisye.

11. Ligongo chichi yili yakusosekwa kuganichisya ya ndaŵi jampaka amalile pakutenda majiganyo ganegakwe? (Alolesoni yiwulili.)

¹¹ Ndaŵi jampaka amalile wiki jilijose. Aganichisyeje ya maawala gampaka amalile ali ku sukulu, kulijiganya masengo, soni kukamula masengo gane gaŵapele ku sukuluko. Panyuma pakuganichisya yeleyi, ana akuyiwona kuti chachikombolaga kupata ndaŵi jakutendela yindu ya usimu soni kukamula masengo gane gakukamuchisya liŵasa lya kumangwawo? (Afil. 1:10) Ana majiganyogo gachatendekasyaga kupela mnope nikulepelaga kukosechela misongano kapena kuŵalanga soni kulijiganya Baibulo? Yeleyitu ni yayamtendechele m’bale Jeroz, jwa ku India. Jwalakwe jwasasile kuti: “Yasawusyaga kuti mbicheje nganisyo syangu pa yindu ya usimu. Mwamti ndaŵi sine nganisimanikwaga pa misongano. Panguganichisya yeleyi, ngusayiwona kuti majiganyo ganatendaga gamalilaga ndaŵi soni machili gangu.” Nambope, pana majiganyo gane gele nganigaŵa gammalile mundu ndaŵi jejinji soni gane yikusakomboleka kugatenda kwa maawala gamnono pa lisiku. Kupwatika pelepa, panasoni gane gakuti ngamkusakola yakutenda yejinji yakuti mkatendele kunyumba. Mwachisyasyo, Rabeca jwa ku Mozambique, akusasangalala mnope ligongo lya mtundu wa majiganyo gaŵasagwile. Jwalakwe jwatite: “Majiganyo ganatendaga nalijiganyaga kwa maawala gaŵili pa lisiku. Yeleyi yakamuchisye kuti mbitilisye kutenda upayiniya wakutamilichika.”

12. Ana kuti akombole kukamulichisya masengo ndaŵi jawo mwalunda akusosekwa kuliwusya yiwusyo yapi? (Jwakulalichila 12:1)

¹² Ana chachimalisya majiganyogo chakachi? Ana majiganyogo gachajigalila myesi kapena yaka yilingwa? Ana kutenda majiganyogo kuchilosya kuti akukamulichisya masengo mwalunda ndaŵi jawo? (Aef. 5:​15-17) Naga wawojo ali jwachinyamata, ana majiganyogo gachapa upile wakutenda yejinji pakumtumichila Yehofa pali jwachinyamata? (Aŵalanje Jwakulalichila 12:1.) Ana pana malo gane gakusajiganya masengo gakusakago kwa myesi soni yaka yamnono? Mwachisyasyo, mmasukulu gane kapena mmalo gane gakwiganya masengo mpaka akalijiganye mwachitema mnope masengo gakusasaka nambo pa mtengo wambone kulekangana ni ku yunifesite. Mario jwa ku Chile, jwasasile kuti: “Majiganyo ganatesile galiji ga yaka yiŵili soni galiji gangadula kulekangana ni ga ku yunifesite. Nalijiganyaga kwa masiku mcheche pa wiki jilijose. Yeleyi yambele upile wakutenda upayiniya kwineku ndili mkutenda majiganyoga.”

13. Ana ni chichi champaka chitendekwe naga malo gakulijiganyila gali kwakutalikangana mnope ni kwakusatama?

¹³ Ana chakalijiganyeje kwapi? Naga yili yakomboleka mpaka alijiganyeje pa sukulu jajili chiŵandika ni kwakusatama. Nambo ana mpaka atende chichi naga sukulujo jili ku dela jine? Kapena yili mkuti chachisosekwa kusama ni kuja kutamaga ni ŵakulijiganya ŵane pa sukulujo? Akusosekwa akumbuchileje kuti naga akulekangana ni ŵandu ŵa m’liŵasa lyawo nikuti mpaka yisokonasye umi wawo wa usimu. Yeleyi mpaka yitendekwe mnopemnope naga kwakwawulako chakatameje ni ŵandu ŵakuti ngakusamtumichila Yehofa. (Mis. 22:3; 1 Akoli. 15:33) Matias, jwa ku Mozambique, jwatesile majiganyo gangasaka mbiya syejinji kwa chaka chimo. Nambope, akusaligamba ligongo lya yindu yaŵasagwileyi. Ligongo chichi? Jwalakwe jwatite: “Kwa chaka chosope chamtundu natamaga ku sukulu jakugonela kukoko. Mwamti lisiku lililyose nalinjidwaga kuti ndende yakusakala. Yampaka nasalile achimjangu yili yakuti mpaka atende chenene kusagula sukulu jajili chiŵandika ni kwakusatama.” Mlongo jwine jwa ku Russia jwasasile kuti: “Ligongo lyakuti natamaga yimpepe ni achinangolo ŵangu, yangamuchisye kuti ngasimana ni yakusawusya soni yakulingwa yangasimene nayo ligongo lyakutama yimpepe ni achimjangu ŵa ku sukulu.” Amanyilileje kuti yili yakombolekasoni kutenda majiganyo gakonjechesya kupitila pa Intaneti.

14. Ana mfundo ja pa Luka 14:28 mpaka jakamuchisye chamti uli pakuganichisya yakutenda majiganyo gakonjechesya?

¹⁴ Ana chachisosekwa mbiya silingwa? Majiganyo gane gakonjechesya gakusaŵa gakuchipa kapenasoni yikusaŵa kuti boma ni jampaka jikulipilile. Naga yili myoyo, nikuti kutenda majiganyogo mpaka kwakamuchisye kuti chapate masengo gakusagasaka. Nambope, ndaŵi sine kutenda majiganyo gakonjechesya kukusasakasoni kuti mpeleche mbiya syejinji. Tukuŵecheta yeleyi ligongo lyakuti ndaŵi sine mkusasosekwa kupata mundu jwine jwakuti akujiganyeje ni chakulinga chakuti akujitichisye pa sukulu jamkusaka kulijiganya. Ligongo lyakuti majiganyo gane gakusaŵa gakudula mnope, yikusatendekasya kuti ŵakulijiganya yajigalile yaka yejinji ali mkuwusya ngongole. Adilson jwa ku Mozambique, akusaligamba ligongo lya majiganyo gaŵasagwile. Jwalakwe jwatite: “Anganga ŵangu ŵaŵanelite ŵalijimaga mnope. Mwamti ndaŵi sine nganasumaga yakulya soni yindu yine yakusosechela pa umi ni chakulinga chakuti akombole kulipilila majiganyo ganatesile kwa yaka mcheche.” Myoyo, pakuganichisya yakutenda majiganyo gakonjechesya akusosekwa kuliwusya kuti: ‘Ana majiganyoga chigasache mbiya silingwa? Ana unejo soni liŵasa lyangu, chitukombole kulipila? Ana yili yakomboleka kutenda majiganyo gane gangasaka mbiya syejinji?’ (Aŵalanje Luka 14:28.) ‘Naga ngugwila mu ngongole, ana yichinjigalila yaka yilingwa kuti mbusye? Ana masengo gachinjikamulaga gachingamuchisya kupata mbiya syakwanila syakulisamalila jika soni kuwusya ngongole?’—Mis. 22:7.

15. Ligongo chichi yili yakusosekwa kuganichisya naga majiganyo gakusaka gachakamuchisya kupata masengo mwangasawusya?

¹⁵ Ana majiganyogo gachakamuchisya kupata masengo mwangasawusya? Akusosekwa kuganichisya mtundu wa masengo gele gakusaŵa gangasoŵa ku dela jakusatama kapena jakusaka ali asamile. Ana majiganyo gakutenda gachakamuchisya kupata masengo? Majiganyo gane ngagakusamkamuchisya mundu kukola umanyilisi wamasengo gakusaka. Mmalomwakwe, gakusagamba kumkamuchisya mundu kukola chiwulili cha masengogo. (Akolo. 2:8) Mlongo jwine jwa ku India jwasasile kuti: “Majiganyo ganatendaga nganigangamuchisya kugamanyilila chenene masengo ganasakaga. Yeleyi yatendekasisye kuti ngapata masengo gakamulana ni majiganyo ganatesile.” Ndaŵi sine mpaka mlijiganye chenene nambo ni kulepelaga kugapata masengo. Yeleyi ni yayamtendechele Sublime, jwa ku Central African Republic, juŵalijiganyisye kalinganye ka machini gakusisimisya mnyumba. Jwalakwe jwatite: “Kwangusatama ŵandu ŵajinji akusalinganyaga achimsyene yindu yawo payijonasiche. Myoyo yaliji yakusawusya kupata masengo.”

16. Ligongo chichi yili yakusosekwa kuganichisya masengo gampaka tukamule panyuma pakumalisya majiganyo?

¹⁶ Akusosekwa kuganichisyasoni masengo gachachikamulaga. Ana masengogo chachisangalalaga nago? (Jwak. 3:​12, 13) Ana malo gakukamulila masengogo gachiŵa gamti uli soni chachikamulaga ni ŵani? Ana chachikamulaga ku makampani kwele kukusanonyela kutendekwa ngosi, ŵandu akusatenda yindu mwampikisano, soni mabwana gakwe gachisakaga kuti atendeje yindu yejinji? Ana chachalipilaga mbiya silingwa? Ana sichiŵa syakwanila kusumila yindu yakusosechela? Ana chachisosekwa kupitilisya kulijiganya kuti masengogo gakamalila? Soni chiwusyo chine chakusosekwa mnope chili chakuti, ana masengogo gachapaga ndaŵi jakwanila ja kumtumichila Yehofa? (Jwak. 12:13) Yili yisyene kuti masengo pagakusoŵa nganituŵa tukombwele kupata masengo gatwagasakaga. Nambope, yampaka tusagule apano pa ngani ja majiganyo, mpaka yikwayesoni masengo gatuchikamula kusogoloku. Tabitha, jwa ku India, jwalijiganyisye kutota yakuwala kwa myesi 6. Jwalakwe jwatite: “Nasagwile yakutenda masengo gakutota yakuwala ligongo namanyililaga kuti chigangamuchisye kutenda upayiniya. Ndaŵi syosope ŵandu akusasaka kutotesya yakuwala soni ngusasagula ndaŵi jampaka ngamule masengoga. Kupwatika pelepa gangamalilaga mbiya syejinji.” Majiganyo gaŵatesile Tabitha gamkamuchisye kupata masengo soni kutenda upayiniya.

17. (a) Ana mpaka apate kwapi yindu yampaka yakamuchisye kusagula mwalunda pangani jakutenda majiganyo gakonjechesya? (b) Ana ni mfundo sya m’Baibulo syapi syampaka syakamuchisye panganiji? (Alole libokosi lyakuti “Mfundo sya M’Baibulo Syakusosekwa Kusiganichisya.”)

¹⁷ Munganiji, tulijiganyisye yindu yejinji yatukusosekwa kuyiganichisya naga tukusaka kutenda majiganyo gakonjechesya. Ana mpaka apate kwapi yindu yampaka yakamuchisye kusagula yindu mwalunda? Akusosekwa kuwungunya mtundu wa majiganyo gakusaka ku sukulu jajikusajiganya kapena pa webusayiti jawo. Awungunyejesoni kuti amanyilile masengo gampaka gasimanikwe. Mpaka ŵawusye ŵandu ŵaŵatesile majiganyogo kapena ŵakukamula masengo gakamulana ni majiganyogo. (Mis. 13:10) Ŵawusye jemanjaji kuti, “Ana majiganyoga kapena masengoga gakwete yakusawusya soni yambone yapi?” Akunguluchejesoni ni ŵandu ŵakumtumichila Yehofa mwakusangalala. (Mis. 15:22) Ana ni majiganyo soni masengo gapi gampaka ŵalimbikasye wawojo kutenda? Komboleka mpaka ŵasalile masengo gakuti wawojo chitandilile nganaganichisyejepo.

18. Ana tukusosekwa tukumbuchileje chichi?

¹⁸ Mpela mwatuyiwonele munganiji, kutenda majiganyo gakonjechesya kukwete umbone soni yakusawusya yakwe. Myoyo, akusosekwa kumŵenda Yehofa kuti akombole kusagula yindu mwalunda. Yili yisyene kuti majiganyo gakonjechesya mpaka gakamuchisye kuti chapate masengo nikupochelaga mbiya syakwakamuchisya kusumila yindu yakusosechela pa umi. Nambope, akumbuchileje kuti kuŵa paunasi wambone ni Yehofa ni kwampaka kwakamuchisye kuti aŵeje ŵakusangalala. (Sal. 16:​9, 11) Yehofa chapitilisye kwasamalila ŵandu ŵakwe mwangajigalila ya mtundu wa majiganyo gaŵatesile. (Aheb. 13:5) Nambi uli naga ali asagwile kuti atende majiganyo gakonjechesya? Ana ni chichi champaka chakamuchisye kuti apitilisye kuŵa paunasi wambone ni Yehofa pandaŵi jakutenda majiganyogo? Tuchipata kwanga kwa yiwusyo yeleyi mungani jakuyichisya.