Achimbichisyeje Yasagwile Ŵane

1-2. Ligongo chichi ndaŵi sine yampaka tusagule kutenda mpaka yilekangane ni yampaka asagule Aklistu achimjetu?

ANA mundu jwine pakwete paŵajimbile magambo ligongo lya yindu yaŵasagwile kutenda? Ana kapena wawojo ŵamjimbile mundu jwine magambo ligongo lya yindu yaŵasagwile kutenda? Ngatukukayichila kuti ŵajinjiwe pakwete payitutendechele yeleyi.

² Ngatukusosekwa kusimonga naga ndaŵi sine yindu yatukusasagula kutenda yikusaŵa yakulekangana ni yampaka asagule Aklistu achimjetu. Ligongo chichi? Ligongo lyakuti ŵanduwe tuli ŵakulekangana soni tukusaganisya mwakulekangana. Kaganisye ketu kakusagumbidwa ligongo lya liŵasa lyatwakulile, ndamo jetu, soni yindu yatusimene nayo pa umi. Nambope, ngatukusosekwa kukunda kuti kulekangana kwa yindu yatukusasagula kusokonasyeje mtendele soni mkamulano wa mumpingo.—Aef. 4:3.

3. Ana mpaka tutende chichi naga Mklistu mjetu asagwile yindu yakuti ngatukukamulana nayo?

³ Mklistu mjetu pasagwile yindu yakuti ngatukukamulana nayo mpaka tusache kumkamuchisya kuti achenje nganisyo syakwe. Kapena mpaka tutande kwasalila ŵane kuti mjetujo asagwile yindu mwakulemwecheka. Mpaka tutendeje yeleyi ligongo lyakuti tukusitwanonyela mnope abale ni alongo ŵetu soni tukusasaka kuti yindu yajendeleje chenene. (Mis. 17:17) Ni ligongo lyakwe ngatukusasaka kuti asaguleje yindu yele panyuma pakwe mpaka alijimbeje nayo magambo kapena yampaka yisokonasye unasi wawo ni Yehofa.

4-5. Ana tukusosekwa kutenda chichi naga Mklistu mjetu akusaka kutenda yindu yakulekangana ni yatukatesile m’wejo?

⁴ Ana mpaka tusosekwe kumsalila Mklistu mjetu kuti yindu yasagwileyo ngatukukamulana nayo? Ndaŵi sine mpaka tusosekwe kutenda yeleyi nambo pane iyayi. Mwachisyasyo, naga tumanyilile kuti Mklistu mjetu akusaka kutenda yindu yele Baibulo jikusalekasya mpaka tusosekwe kumkamuchisya kuti achenje nganisyo syakwe. Mpaka tutende yeleyi ligongo lyakuti tukusamnonyela. (Mis. 27:​5, 6) Nambope, ana mpaka tutende wuli naga Mklistu mjetu asagwile kutenda yindu yele Baibulo ngajikusalekasya nambo yakuti m’wejo ngatukukamulana nayo? Kwanga kwa chiwusyochi kuli mu lilemba lyalikulongolela nganiji. Lilembali likuti, “Mkasimwajimbaga magambo ŵele ŵakwete nganisyo syakulekangana ni jemanja.”—Alo. 14:1.

⁵ Nambope, ndaŵi sine mpaka yiŵeje yakusawusya kuti tukamulane ni yasagwile Aklistu achimjetu. Myoyo, munganiji chitukambilane ligongo lyakwe tukusosekwa kuchimbichisya yasagwile Aklistu achimjetu soni chitulole mwampaka tutendele yeleyi. Nambo chandanda, kwende tukambilane yakutendekwa yine yampaka yisimanikwe kuti tukwajimba magambo Aklistu achimjetu chitamilecho yili mkuti akusosekwa kulisagulila jika yakutenda.

YAMPAKA YITENDEKASYE KUTI TUKAKAMULANA NI YASAGWILE ŴANE

6-7. Apeleche yisyasyo yampaka yitutendekasye kuganisya kuti yasagwile ŵane yili yakulemwecheka.

⁶ Tuyiweni kala kuti ndaŵi sine nganituŵa tukamulene ni yindu yasagwile ŵane. Yeleyi mpaka yitendekwe ligongo lya yindu yatusimene nayo paumi wetu kapena kwatwakulile. Mpaka tusacheje kuti ŵandu ŵane atendeje yindu mwakulandana ni m’weji. Nambotu yeleyi nganiyiŵa yikomboleche. Aganichisye yisyasyo ayi. Chandanda: M’bale mkanalijiganye yisyesyene, jwatamaga ni babagwe ŵaŵamwaga mnope ukana. Jwalakwe pakukunguluka ni Aklistu achimjakwe, akwawona ali mkumwa ukana. Yeleyi ngayikumsangalasya mwamti akwasalila jemanjajo kuti yakutendayo yili yakulemwecheka. Chisyasyo chaŵili: Mlongo juŵalwasile mnope kaneko ni kupola ulwelewo, apikene kuti pana mlongo jwine jwakulwala ulwele wakulandanawo. Mlongoju akusaka kumkamuchisya mjakwejo mwamti akumsalila kuti akusosekwa apochele chikamuchisyo cha mtela chakulandana ni chiŵapochele jwalakwe. Mwachisyasyo, akumsalila kuti akalyaga yakulya yamitundu jine kapena akamulichisye masengo mtela winewakwe kapenasoni mitela ja chikuda. Chisyasyo chatatu: M’bale mkanalijiganye yisyesyene jwaliji mu dini jinejakwe jaunami mwamti ngakusasakasoni kutenda chilichose chakamulana ni dinijo. M’balejo ngakusangalala panyuma pakupikana kuti m’bale jwine jwajawile ku mwambo wa malilo wawatendechele mu chalichi.a

⁷ Aganichisyesoni yisyasyo yine ayi. Chisyasyo cha mcheche: M’bale akumanyilila chenene malangiso gakuti pangali chakusawusya naga m’bale akusunga ndewu soni alongo kuwala matalawusa. Atamose yili myoyo, jwalakwe akwasalila abale kuti nganikuŵa kwakuŵajilwa jemanjajo kusunga ndewu soni alongo akusosekwa awaleje madilesi pakutenda yindu yakwayana ni kulambila. Chisyasyo cha msanu: Jwamkulungwa jwa mumpingo akummanyilila m’bale juŵatesile majiganyo gakonjechesya nambo kaneko jwalesile kumtumichila Yehofa. Ni yisimanikwe kuti mumpingo mwakwe mwana m’bale jwachinyamata jwakuganisya yakuti akatende majiganyo gakonjechesya. Jwamkulungwa jwa mumpingoju akumganichisya mnope m’bale jwachinyamatajo mwamti akulingalinga kumtendekasya jwalakwe yimpepe ni achinangolo ŵakwe kuchenga chakulingacho.

8. (a) Ana ni chichi champaka chimtendekasye nangolo kutanda kwajimba magambo achinangolo achimjakwe? (b) Ana yeleyi mpaka yikwaye chamti uli mpingo?

⁸ Aganichisyesoni chisyasyo achi chachikukwaya mnope achinangolo. Chisyasyo 6: Mpela nangolo akusatenda yampaka akombole kuti ‘ŵajamucheje [ŵanache ŵawo] soni kwajiganya yakwamba Yehofa.’ (Aef. 6:4) Nambope, achinangolo ŵane akusiŵakunda ŵanache ŵawo kutenda yindu yejinji kulekangana ni mwampaka atendele wawojo. Mwachisyasyo, jemanjaji mpaka ŵakundeje ŵanache ŵawo kuti ayicheje ndaŵi jilijose pa nyumba, atendeje magemu gele nganigaŵa gachiwawa, kapenasoni mpaka ŵape foni ali ŵachinandipile. Yakuyichisya yakwe ŵanache ŵawo mpaka ŵawoneje wawojo kuti ali ŵakalalisya yindu. Mpaka ŵawusyeje kuti, “ligongo chichi ngakusatenda yindu mpela mwakusatendela achinangolo ŵane?” Naga yeleyi yatendechele mpaka atande kwajimba magambo achinangolo ŵane. Nambope, akusosekwa akumbuchileje kuti, Aklistu ŵane pasagwile yindu yele m’wejo ngatukukamulana nayo mpaka yitendekasye kuti twawoneje mwakulemwecheka. Mwachisyasyo, mpaka tutande kuganisya kuti jemanjaji ngakusakamulichisya masengo chenene mbiya syawo soni kuti ngakusasagula chenene yakusangalasya. Nambope, tukusosekwa kusamala kuti yindu yatukusasaka m’wejo, yikatutendekasyaga kwawona mwakulemwecheka abale ni alongo ŵetu ni kusokonasyaga mtendele wa mumpingo.

9. Ana tukusosekwa kukumbuchila chichi? (Alolesoni chiwulili.)

⁹ Patusagwile yakulekangana ni yampaka asagule Aklistu achimjetu yangagopolelaga kuti yatusagwile m’wejo yili yambone pele yasagwile achimjetuwo nganiyiŵa yambone. (Alo. 14:5) Baibulo jikusatulimbikasya kuti ‘tukoleje nganisyo syakulandana.’ Yeleyi yikusagopolela kuti patukusagula yindu tukuyeje yakusatusalila Yehofa. Nambope, yeleyi yangagopolelaga kuti ndaŵi syosope chitusaguleje yindu mwakulandana pa yindu yele jwalijose akwete ufulu wakusagula. (2 Akoli. 13:11) Yindu yatukusasagula mpaka tuyiwanichisye ni ŵandu ŵali paulendo. Jemanjaji mpaka yiŵe kuti akwawula ku malo gamo nambo mpaka asagule kupitila matala gakulekangana. Jwalijose mpaka asagule litala lyakuliwona kuti lili lyambone soni lyakuti chakayiche mwangasawusya. Atamose yili myoyo, chakulinga chawo chikusaŵa chakuti akayiche ku malogo. Mwakulandanamo, pana yindu yejinji yele Aklistuwe tukusakola ufulu wakulisagulila jika yatukusaka kutenda. Nambope, chakulinga chetu chikusaŵa chakulandana. Wosope tukusasaka kusagula yindu yakumsangalasya Yehofa. Myoyo, ngatukusosekwa kwajimba magambo ŵandu ŵane payindu yele jemanjajo akwete ufulu wakulisagulila jika.—Mat. 7:1; 1 Ates. 4:11.

LIGONGO CHICHI TUKUSOSEKWA KUCHIMBICHISYA YASAGWILE ŴANE?

10. Mwakamulana ni Yakobo 4:​12, ana nganitukola udindo wakutenda chichi, soni ligongo chichi?

¹⁰ Baibulo jikusatusalila magongo gejinji gakututendekasya kuchimbichisya yasagwile achimjetu. Kwende tulole gane mwa magongoga. M’weji nganitukola udindo wakwawelusya ŵane payindu yele jwalijose akwete ufulu wakusagula. (Aŵalanje Yakobo 4:12.) Yehofa ni jwakwete udindo wakutusalila yatukusosekwa kutenda soni yangatukusosekwa. Yili myoyo ligongo jwalakwe ali Jwakupeleka Malamusi soni Jwakwelusya. Sonitu Aklistu achimjetu chachijanga kwa Yehofa payindu yakusasagula kutenda ngaŵaga kwa m’wejo. (Alo. 14:10) Tukumbuchileje kuti nganitukola udindo wakwajimba magambo kapena kwawelusya Aklistu achimjetu ligongo lyakuti asagwile yindu yakulekangana ni yatukasagwile m’wejo.b

11. Ana mpaka tutende yamti uli kuti mumpingo muŵeje mtendele? (Alolesoni chiwulili.)

¹¹ Yehofa akusasaka kuti ŵakutumichila ŵakwe aŵeje ŵakamulana ngaŵaga ŵakulandana pa chilichose. Sonitu jwalakwe akusasangalala ligongo lyakuti tukusasagula yindu mwakulekangana. Umboni wa yeleyi ukusawonechela mu yindu yaŵapanganyisye. Mwachisyasyo, nganituŵa tuyisimene yome yiŵili yayikusalandana pa chilichose. Agambe ganichisyasoni ya ŵanduwe. Pachilambopa pana ŵandu ŵakupunda 8 biliyoni. Nambope, nganituŵa twasimene ŵandu ŵaŵili ŵampaka alandane ndendende kawoneche kapena katende kawo ka yindu. Yeleyi yigamba kulosya kuti Yehofa jwatupanganyisye ŵanduwe kuti tutendeje yindu mwakulekangana. Jwalakwe ngakusasaka kuti tugambe kujigalila chilichose chakutenda mundu jwine. Nambo akusasaka kuti tutendeje yindu mwakamulana. Myoyo, Mklistu mjetu pasagwile yindu yakulekangana ni yatukasagwile m’wejo, tukatumbila. Mmalomwakwe, tulimbikasyeje mtendele. Mmalo mwakusiwona nganisyo syetu kuŵa syakusosekwa mnope tuyiwoneje kuti chakusosekwa mnope chili kuŵa ŵakamulana ni Aklistu achimjetu.—Alo. 14:19.

YAMPAKA TUTENDE KUTI TUCHIMBICHISYEJE YASAGWILE ŴANE

12-13. Ana tukusosekwa tukumbuchileje chichi naga tukuyiwona kuti mundu jwine “ajigele litala lyakulemwecheka”? (Agalatiya 6:1; alolesoni libokosi lyakuti “Naga Ngakukamulana ni Yasagwile Ŵane”)

¹² Aklistu achimjetu pasagwile kutenda yineyakwe. Aliwusyeje kuti, ‘Ana mjanguju “ajigele litala lyakulemwecheka” kapena yigambile kuŵa kuti asagwile mwakulekangana ni yangasagwile unejo?’ Naga Mklistu mjawojo “ajigele litala lyakulemwecheka” kapena kuti asagwile yindu yakulekangana ni yajikusasala Baibulo, akusosekwa kuliwusya kuti, ‘Ana uneji ni jwangwete udindo wakumkamuchisya mjanguju kapena mundu jwine mpela achakulungwa ŵa mumpingo ni ŵakusosekwa kumkamuchisya?’ Naga ayiweni kuti mpaka akombole kumkamuchisya, akusosekwa kukambilana najo mwakuwusimana mtima. (Aŵalanje Agalatiya 6:1.) Ni komboleka pakumkamuchisyapo mpaka ayikopochele kuti mjawojo nganajigala “litala lyakulemwecheka’ nambo yigambile kuŵa kuti yasagwileyo yikulekangana ni yakasagwile wawojo. Naga yeleyi yili yitendekwe, akusosekwa kuchimbichisya yasagwile mjawojo soni akamjimba magambo.—Alo. 14:​2-4.

¹³ Aganichisye chisyasyo achi: Tuwanichisye kuti wawojo ni mjawo ajawile kuti akasume yakulya. Ana mpaka amkanganichisye kuti asume yakulya yakulandana ni yasumile wawojo? Nganaŵa atesile yeleyi. Mpaka amleche kuti asume yakulya yakuyisaka. Ligongo lyakuti wawojo ngalya yakulya yasumile mjawojo, ngakusosekwa kudandawula chilichose. Mwakulandana ni yeleyi, wawojosoni nganaŵa akundile mjawojo pakwakanganichisya kuti asume yakulya yakusayinonyela jwalakwejo. Tukulijiganya chichi pelepa? Mpaka tulosye kuti tukusachimbichisya ŵane naga tukusakunda kuti asagule achimsyene yindu yakusaka kutenda mmalo mwakwasagulila.

14. Ana mpaka tutende chichi kuti tupitilisye kuŵa pamtendele ni Aklistu achimjetu patukusagula yakutenda? (1 Akolinto 8:​12, 13)

¹⁴ Pasagwile kutenda yindu yineyakwe. Mpaka akamuchisye kuti mumpingo muŵe mtendele naga akuŵambala kusagula yindu yampaka yakuŵasye ŵane. (Aŵalanje 1 Akolinto 8:​12, 13.) Ndaŵi sine mpaka amanyilile kuti yindu yakusaka kutenda yili “yakundidwa,” kapena kuti yakuŵajilwa. Nambo ana yinduyo mpaka ‘yiŵe yakamuchisya’ naga yili mkuti chiyakuŵasye abale ni alongo ŵawo?c (1 Akoli. 10:​23, 24) Payitendekwe yeleyi, ngakusosekwa kwamba kusagula yindu yakulisangalasya jika. Mmalomwakwe, aganichisye mwampaka apikanile Aklistu achimjawo ligongo lya yindu yakusakayo. (Alo. 15:1) Nambo ngati tukambilene kuti ŵandu ŵane akusasosekwa kuchimbichisya yindu yele jwalijose akwete ufulu wakusagula yakusaka kutenda? Elo ni mmomo. Jemanjaji akusasosekwa kuchimbichisya yindu yatusagwile mwakulandana ni mwatukusatendela m’weji pakuchimbichisya yasagwile jemanjajo. Nambope, tukusosekwa tukumbuchileje yajikusasala Baibulo pa Aloma 12:18. Lilembali likusatusalila kuti, “Mtendeje yiliyose yampaka mkombole kuti mtameje mwamtendele ni ŵandu wosope.” Myoyo, tupitilisye kutenda yampaka tukombole kuti tuŵeje pamtendele ni Aklistu achimjetu soni tuŵambaleje yindu yampaka yakuŵasye jemanjajo.

15. Ana achakulungwa mpaka akamuchisye chamti uli kuti mumpingo muŵeje mtendele? (1 Akolinto 4:6)

¹⁵ Achakulungwa ŵa mumpingo akusachimbichisya yasagwile ŵane. Achakulungwa mpaka akamuchisye kuti mumpingo muŵeje mtendele mwakuŵambala kutamilikasya malamusi pa yindu yele jwalijose akwete ufulu wakusagula, soni kulolechesya kuti ‘akukuya yayalembedwe m’Malemba.’ (Aŵalanje 1 Akolinto 4:6.) Yeleyi yikugopolelasoni kuti ngakusaŵecheta yindu yakulekangana ni malangiso ga m’Baibulo gagakusaŵa m’mabuku getu. Kupwatika pelepa, Mklistu mjawo paŵendile malangiso, achakulungwaŵa akusaŵambala kuŵecheta ya mumtwe mwawo. Mmalomwakwe, akusakamulichisya masengo Maloŵe ga Mlungu pakumkamuchisya.—Yes. 48:​17, 18.

16. Ana jwamkulungwa jwa mumpingo mpaka alosye chamti uli kuchimbichisya yalisagwile likuga lya achakulungwa?

¹⁶ Jwamkulungwa jwa mumpingo akusasosekwasoni kuchimbichisya yalisagwile likuga lya achakulungwa. Panyuma pakuti likuga lya achakulungwa lipopesile kwa Yehofa kuti ŵalongolele, liwungunyisye soni kukamulichisya masengo Malemba kaneko nikusagula yakusosekwa kutenda, jwamkulungwa jwalijose akusasosekwa kukamuchisya kuti yasagwileyo yijende chenene. Akusasosekwa kutenda yeleyi atamose yili mkuti achakulungwawo nganakamulichisya masengo nganisyo syakwe. (Aef. 5:17) Konjechesya pelepa, jemanjaji akusalolechesya kuti yindu yakusasagula yikukamulana ni yajikusasala Baibulo soni m’mabuku getu mmalo mwakukamulichisya masengo ya mumtwe mwawo. Mwachisyasyo, akusaŵambala kwamba kakamila maloŵe gampepe mu buku jetu ni chakulinga chakuti gakamulane ni nganisyo syawo. Mmalomwakwe, akusaŵalanga ngani josope ni chakulinga chakuti ajipikanichisye chenene.

17. Ana mpaka chitendekwe chichi naga tukusachimbichisya yasagwile ŵane?

¹⁷ Munganiji tuyiweni kuti ŵanduwe tukusalekangana yindu yatukusanonyela soni mwatukusatendela yindu. Kulekangana kweleku kuli kwambone. Ligongo lyakuti tukusatyochela madela gakulekangana soni tukwete ndamo syakulekangana, yikusakamuchisya kuti yindu mumpingo yijendeje chenene soni kuti tuŵeje ŵakusangalala patuli ni Aklistu achimjetu. Myoyo mmalo mwakukunda kuti kulekangana kweleku kuyikasyeje yakusawusya mumpingo, tuchimbichisyeje yasagwile kutenda ŵane. Yeleyi yichikamuchisya kuti mumpingo muŵeje mtendele soni tuchipitilisya kuŵa ŵakamulana ni Aklistu achimjetu.—Sal. 133:1; Mat. 5:9.