Yehofa Aŵele Ali Mkunjiganya Kutandila Ndili Mnyamata

Nambo mkanimbitilisye uli nasalile kaje ya umi wangu. Napagwile ku Calgary m’chilambo cha Canada pandaŵi ja Ngondo Jaŵili ja Pachilambo Chosope. Yaka 75 yipiteyo, jwachinyamata jwine juŵaliji mpayiniya lina lyakwe Donald Fraser jwalalilichilaga. Jwalakwe ali ayiche ku nyumba, mayi ŵajitichisye kulijiganya Baibulo. Mayiŵa ŵanonyelaga mnope yaŵalijiganyaga. Nambope, nganatendaga yejinji mumpingo ligongo lyakuti ŵalwalaga. Atamose yaliji myoyo, mu 1950 ŵabatisidwe. Nambo chakutesya chanasa chili chakuti mkanipamale yaka yiŵili ŵajasiche. Pandaŵiji, baba ŵangu nganaŵa ŵa Mboni. Nambope, ŵakundile kuti abale ajendesye mwambo wa malilo ga mayi.

Pali pagambile kumala masiku gamnono chitendechele mwambo wa malilo, mlongo jwine jwachikulile juŵaliji jwamsagulwe lina lyakwe Alice jwambilanjile ku misongano ja mpingo. Mlongoju jwamanyililaga chenene ligongo lyakuti pandaŵi jele mayi ŵaŵaga ali chenene ŵanjigalaga ku misongano ja kumbesi kwa wiki. Naŵendile baba naga mpaka njawule ku misongano. Babaŵa ŵangundisye soni ŵasalile kuti chituŵe yimpepe nichakulinga chakuti akamyamichile m’bale juŵaŵechete ngani pa malilo ga mayi. Palisikuli twatendaga Sukulu ja Undumetume soni msongano wakosechela utumiki. Pakuŵapo kaliji kandanda baba kusimanikwa pamisongano, msongano wawatendekwe palisikuli waliji wambone mnope kwa ŵelewo. Yaliji myoyo ligongo lyakuti babaŵa ŵalijiganyisye mwampaka aŵechete mundu pa gulu ja ŵandu. Mwamti ŵasangalele mnope ni mwaŵaŵechetelaga abale ngani pamsonganowu. Kaneko babaŵa ŵasagwile yakuti asimanikweje pamsonganowu wiki jilijose. Sonitu mwapanandipanandi ŵatandite kusimanikwa pamisongano josope.

Pandaŵiji, jwakulolela Sukulu ja Undumetume jwatandaga kaje ni kuŵalanga mena ga ŵandu wosope ŵaŵalembesye mu sukulu mwamti jemanjaji ŵajangaga kuti, “Mbali.” Lisiku line ndili kumisongano, namsalile m’bale juŵalolelaga Sukulu ja Undumetume kuti nombene ngusaka chambilanje lina lyangu pamisongano ja wiki jakuyichisya. M’baleju jwayamichile mnope nambo nganambusya naga ngumanyilila yakuyichisya yakwe.

Nganimanyililaga kuti yanasakagayi yagopolelaga kuti chambeje ngani syakuti mbecheteje pamisongano. Chanasakaga une chaliji chakuti agambe kuŵilanga lina lyangu basi. Mu wiki jakuyichisya ŵaŵilasile lina lyangu mwamti najanjile mwakusangalala kuti, “Mbali.” Pambesi pamisongano abale ni alongo ŵayamichile mnope. Kaneko pali pamasile mawiki gejinji ŵambele ngani janajikolasile kundanda jila.

Natesile woga mnope ligongo pandaŵiji, mundu papochele ngani jwasosekwaga kuti akajiŵechete kwa maminisi 6 kapena 8. Pandaŵiji nganitugambaga kuŵalanga ngani sya m’Baibulo basi. Baba ŵangamuchisye kukosechela ngani jangu mwamti najilinjilile kwa maulendo 20 mkanimbe kujiŵecheta kumpingo. Ndili mbechete nganiji, jwakulolela Sukulu ja Undumetume jwambele malangiso gakamuchisya mnope. Kwa yaka yejinji, Yehofa aŵele ali mkujiganya pakamulichisya masengo baba ŵangu, abale ni alongo, soni gulu Jakwe.

YEHOFA JWAPITILISYE KUNJIGANYA

Ndili ngambile kutanda kulalichila mlongo Alice, jwanamkolasile kundanda jula ŵanjiganyisye yampaka ndendeje pakulalichila. Pandaŵiji, ŵatulimbikasyaga kuti tumŵalanjileje msyenenyumba malemba gatatu mkanituŵe kumpa buku. Myoyo pajikwanile ndaŵi jangu jakuti lalichile, mlongo Alice, ŵamsalilaga msyenenyumbajo chakulinga chatuyichile soni ŵasalilaga unejo kuti mbalanje lilemba lyandanda. Kaneko, napitilisyaga kukambilana ni mundujo soni kumŵalanjila lilemba lyaŵili soni lyatatu, kaneko nampaka buku. Pali papitile ndaŵi, nalijiganyisye yampaka ndende pangutanda kuŵechetana ni mundu. Baba ŵangu ali abatisidwe mu 1954, ŵapitilisye kunjiganya yampaka ndendeje pangulalichila. Pakuŵapo mayi ŵaliji ali ajasiche, babaŵa ŵatesile yakakombwele pakunjiganya kuti namnonyeleje mnope Yehofa. Kusala yisyene, misongano soni kulalichila ŵayiwonaga kuŵa yindu yakusosekwa mnope. Ndaŵi syosope namanyililaga kuti chitujawule ku misongano josope soni kuti kumbesi kwa wiki chitujawule kukulalichila.

Kusukulu ngaŵa kuti nakombolaga mnope. Nambope yindu yanalijiganyisye kweleko kwa yaka 12, yingamuchisye mnope paumi wangu. Mwachisyasyo, nalijiganyaga mnope masamu soni gilamala ja Chisungu. Kulijiganya Chisungu soni kulijiganya kalembe ka ngani, kungamuchisye mnope pautumiki wangutenda apano ku Dipatimenti Jakulemba Ngani.

Ŵandu ŵajinji akusambusya ligongo lyakwe ngusasinonyela mnope nyimbo. Achinangolo ŵangu ŵanonyelaga mnope nyimbo mwamti ndili ngwete yaka 7 natandite kulijiganya kwimba piyano. Nambo mundu juŵanjiganyaga ŵayiwonaga kuti ngangukombola. Myoyo ŵasalile baba kuti kuli kwambone ndeche kulijiganya kwimba piyano. Apano ngusapikanichisya ligongo lyakwe pandaŵijo kwimba piyano kwasawusyaga.

Pali pagambile kumala myesi jamnono, baba ŵapatile mundu jwine jwakuti anjiganyeje. Pandaŵiji sano, nalijiganyanga kwimba piyano soni kwimba nyimbo mwamti natandite kukombola. Panaliji jwachinyamata, najimbaga chenene nyimbo mwamti nawinile mipikisano jine. Chakulinga changu chaliji chakuti chimbe mundu jwakwiganya kwimba nyimbo soni chimbate mbiya syakwanila syakutandila upayiniya. Nambo kaneko nayikopochele kuti chinjonanje ndaŵi jejinji ndili mkulijiganya kwimba nyimbo soni kukosechela mayeso. Myoyo nalesi kulijiganyako nikutanda upayiniya wakutamilichika. Chelechitu chaliji chaka cha 1963.

NASANGALALAGA KUTENDA UPAYINIYA

Ndili ndesile upayiniya wakutamilichika kwa chaka chimo, ŵasalile kuti ngatendeje upayiniya wapadela ku Kapuskasing, Ontario. M’bale Daniel Skinner ni jwanatendaga najo upayiniya soni jwaliji jwamkulungwa kumbunda une. M’baleju jwanjiganyisye masengo gejinji ga mumpingo. Ndili ngwete yaka 20, nasagulidwe kuti mbe mu Komiti ja Utumiki ja Mpingo mwamti nasosekwaga kulijiganya yindu yejinji. Ndili jwakusangalala mnope kuti masiku agano gulu jetu jikusagombelechesya mnope kusosekwa kwakwajiganya abale ŵachinyamata. Naga abaleŵa akukamula masengo mwakulipeleka, Yehofa mpaka ŵakamulichisyeje masengo atamose ali akwete yaka yamnono.

Ku Kapuskasing kwakwete yakusawusya yakwe. Mu ndaŵi ja chuku kwasisimaga mnope. Une ni Dan twajesile chiŵandika malo galigose kudelaji. Nambope, chindu chakusangalasya mnope chachandendechele kweleku chaliji kusimana ni Linda Cole jwele kaneko jwaŵele Linda Splane.

Linda jwanonyelaga mnope kulalichila soni jwakwete maulendo gakuwilisya gejinji. Jwalakwe jwaliji jwakoloŵa magasa, jwakwapochela chenene ŵane, soni jwakunguluchika. Mamagwe lina lwawo Goldie, ŵaliji mlongo jwakulupichika. Pandanda babagwe Linda, lina lyawo Allen, ŵasisyaga ŵa Mboni sya Yehofa. Atamose yaliji myoyo, mamagwe Linda ŵakombolaga kumjigala jwalakwe ku Nyumba ja Uchimwene pampepe ni achalumbugwe ŵali John, ni Gordon. Mwamti ŵajiganyisye jemanjaji yampaka atendeje pakulalichila. Pandaŵi jine wosope pakwete patesile upayiniya. Pali papitile yaka, babagwe Linda ŵajitichisye kulijiganya Baibulo mwamti ŵalipelekaga mnope mumpingo.

Mu 1965, ŵambilasile ku Beteli ja ku Canada kuti ngajinjile mu Sukulu ja Utumiki wa Uchimwene jajatendekwaga kwa mwesi wamtundu. Ndili ku sukuluji ŵambele fomu jakuwuchisya kwinjila mu sukulu ja Giliyadi. Pandaŵiji nganisagamilaga yakutenda umishonale, nambope nalembile fomuji. Kaneko ŵanjitichisye kuti ngajinjile kalasi nambala 42 ja Giliyadi. Panaliji ku Giliyadi, alangisi ŵetu ŵatulembelaga malipoti gakulondesya mwatukutendela m’kalasi. Lipoti lyandanda lyanapochele lyaliji lyakulimbikasya kuti pandili ku sukuluji nalijiganye chindu chilichose champaka ngombole chakwamba gulu jetu. Pakuŵapo pandaŵiji nakwete yaka 21, nayiweni kuti malangisoga galiji ga pandaŵi jakwe.

Panaliji ku Giliyadi, twalijiganyisye yampaka tutende pakuŵechetana ni ŵakugulusya ngani pa wayilesi, pa TV, soni ŵakulemba nyusipepala. Nasangalalaga mnope pangulijiganya yeleyi. Nambope pandaŵiji nganimanyililaga kuti yatwalijiganyagayi yichingamuchisya kusogolo mpela mwachinjile pakwalondesya.

ŴANDUMISYE KU SENEGAL

Pali pagambile kumala masiku gamnono kutyochela patwamalisisye majiganyo ga sukulu ja Giliyadi, Une ni Michael Höhle, ŵatutumisye ku Africa chilambo cha Senegal kuti tukaŵe amishonale. Myoyo twanyakwiche ulendo wa ku utumiki wetu wasambano. Pandaŵiji ku Senegal kwapali ŵakulalichila chiŵandika 100.

Ndili ndesile utumiki wangu chiŵandika kwa chaka chimo, ŵambilasile kuti ngatumichileje ku ofesi ja nyambi kampepe pa wiki. “Ofesi ja nyambiji” jaliji m’kachipinda kane ku nyumba jaŵatamaga mmishonale. M’bale Emmanuel Paterakis, juŵalolelaga ofesi ja nyambiji, ŵangumbwisye kuti atamose kuti ofesiji jili ja mwana ngusosekwa ngumbuchileje kuti jikwimila gulu ja Yehofa m’chilambo cha Senegal. Lisiku line M’bale Paterakis ŵasalile kuti tukusosekwa tulembe chikalata chakwalimbikasya amishonale. Pandaŵiji nganitukola yipangiso yamakono yakutupiya yipepala. Myoyo, twasosekwaga kulemba chikalata chilichose pajikapajika. Gelega galiji masengo gekulungwa ligongo twasosekwaga kulolechesya kuti nganitulemwesya palipose patukulemba.

Panakosechelaga kuti njawuleje ku nyumba janatamaga chilo chalisikuli, M’bale Paterakis ŵambele yunifolopi. Jwalakwe jwasalile kuti, “David, gulu jimlemble chikalata achi.” Kaneko ndili mbugwile yunifolopijo, napatile chimo mwa yikalata yanalembaga yila. Yayandendecheleyi yanjiganyisye kuti ngusosekwa kujichimbichisya gulu ja Yehofa mwangajigalila kuti ofesi ja nyambi jili jekulungwa kapena ja mwana.

Nakwete achimjangu ŵajinji mumpingo wanasonganaga mwamti Lyakuŵeluka ligulo nakungulukaga ni jemanjaji. Twasangalalaga mnope mwamti mpaka apano ngusaŵechetanape ni jemanjaji. Chiŵecheto chekulungwa ku Senegal chili Chifulechi mwamti nalijiganyisye chiŵechetochi. Sonitu apano ngusachikamulichisya masengo pangwendela ma ofesi gane ga nyambi pachilambopa.

Mu 1968, Une ni Linda twaŵele pachitomelo. Kwa myesi jejinji naŵele ndili kusosasosa masengo nichakulinga chakuti Une ni Linda tupitilisye kutenda upayiniya ku Senegal. Nambo mabwana ga kweleku gagambaga kwalemba masengo ŵandu ŵakukoko mmalo mwakwalembasoni ŵandu ŵakwika. Pambesi pakwe, nawujile ku Canada kwele natesile ukwati ni Linda mwamti kaneko twapochele utumiki wasambano kuti tukaŵe apayiniya ŵapadela ku Edmundston, New Brunswick. Welewu waliji msinda wa mwana wawatesile malile ni Quebec.

KUTENDA UPAYINIYA KU NEW BRUNSWICK SONI KU QUEBEC

Pandaŵiji kudelaji nganikupagwa ŵakulalichila ŵakutyochela kukoko soni kwapali majiganyo ga Baibulo gamnono. Chalichi cha Katolika chaliji chakumanyika mnope soni chalongolelaga yakutendekwa yejinji paumi wa ŵandu. Chiŵandika nyumba jilijose ŵaŵisilepo chikwangwani chakuti Apano Akayika ŵa Mboni sya Yehofa. Pandaŵiji, nganitudandawulaga ya yikwangwani yeleyi mpela mwatukusatendela masiku agano. Myoyo, twalalichilaga nyumba jilijose chinga jikwete chikwangwani kapena nganijikola. Wiki jilijose chalichi cha Katolika chalembaga mu nyusipepala kuti, “Kwende tukasakule ŵa Mboni sya Yehofa soni twatopele mu dela ajino.” Pandaŵiji, kudela ja Edmundston kwapali ŵa Mboni sya Yehofa mchechepe. Unejo ni Linda pampele ni Victor soni Velda Norberg. Myoyo, twamanyililaga chenene kuti ŵakatolikaŵa akutusakula m’weji.

Ngusakumbuchila ya ndaŵi jele jwakulolela dela jwatujendele kandanda. Panyuma pakuti tutemi najo kwa wiki ja mtundu jwatusalile kuti, “Chindu chakusosekwa mnope champaka mtende pandaŵi ajino, chili kwakamuchisya ŵandu kuti atande kwawona mwakuŵajilwa ŵa Mboni sya Yehofa.” Myoyo, kutandila pandaŵiji, chelechi chaliji chakulinga chetu sonitu yakamuchisye mnope. Mwapanandipanandi, ŵandu ŵatandite kulola kulekangana pasikati pa ŵa Mboni sya Yehofa ŵaŵaliji ŵakulinandiya ni achimlongola ŵadini ja Katolika ŵaŵaliji ŵakunyada. Mwamti kaneko mumsindawu mwapali mpingo wamwana.

Panyuma pakuti tutemi mudelaji chiŵandika chaka cha mtundu, ŵatuŵendile kuti tukakamuchisye mpingo wine wekulungwa mu msinda wa Quebec. Twatemi ku mpingowu kwa myesi 6. Abale ni alongo kweleku ŵaliji ŵakwapochela chenene achalendo. Kaneko ŵatusalile kuti tukaŵe ŵakulolela dela.

Twaŵele tuli kumlolela dela ku Quebec kwa yaka 14. Jelejitu jaliji ndaŵi ja kusangalasya. Masengo gakulalichila ku Quebec gajendaga chenene. Mwamti ndaŵi syejinji patukwendela mpingo, twasimanaga kuti mwana maŵasa gejinji gagakulijiganya Baibulo soni ali mkutenda yakomboleka kuti abatisidwe.

KWAKUMBUCHILA ABALE NI ALONGO ŴAKULUPICHIKA

Yili yangasawusya kuti mundu atande kwanonyela abale ni alongo ŵakuŵecheta Chifulechi ŵakusatama ku Canada. Jemanjaji ali ŵandu ŵangasawusya, ŵakunguluchika, soni akusakupochela mwakusangalala. Nambope, ndaŵi sine yikusaŵa yakusawusya kuti ajitichisye mwachitema kulijiganya Baibulo, soni pane ŵandu ŵa mwiŵasa mwawo akusiŵasisya mnope. Ŵane mwa achinangolo ŵanganaŵa ŵa Mboni akusayikana pakwasalila ŵanache ŵawo kuti, “Mkusosekwa kusagula chindu chimo kulijiganya ni ŵa Mboni sya Yehofa kapena kutyoka pa mlango pano.” Atamose yaliji myoyo, ŵajinji mwa jemanjaji ŵapitilisye kuŵa ŵakulupichika kwa Yehofa. Yili yangakayikasya kuti Yehofa akusasangalala mnope ni jemanjaji.

Mbechetesoni panandi ya apayiniya ŵakutamilichika soni ŵapadela ŵaŵatumichile ku Quebec. Ŵajinji mwa jemanjaji ŵatyochelaga m’madela gane ga ku Canada mwamti ŵasosekwaga kulijiganya Chifulechi. Kupwatika pelepa, ŵasosekwagasoni kulijiganya ndamo ja ŵandu ŵa kweleko ŵaŵatendaga yindu pakujigalila yaŵajiganyisye achimlongola ŵa dini ja Chikatolika.

Ndaŵi syejinji apayiniya ŵapadela, ŵatumisyaga ku madela ga kumisi kwele kwaŵaga kuti kwangali ŵakulalichila. Ligongo lyakuti ŵandu ŵasagulanaga mnope yaŵaga yakusawusya kuti mpate malo gakutama soni masengo. Atamose ŵandu ŵagambile kulombana kwene, ŵasosekwaga kuti atameje yimpepe ni ŵandu chiŵandika 8 nichakulinga chakuti akomboleje kulipila nyumbajo. Yaŵaga yakusawusya kuti jemanjaji atameje pajika. Apayiniyaŵa ŵakamulaga masengo mwakulipeleka mnope. Myoyo, papatile mundu jwakumjiganya Baibulo, ŵatendaga yampaka akombole pakumkamuchisya mundujo. Nambo apano ku Quebec kwana ŵakulalichila ŵajinji ŵakutyochela kukoko mwamti ngakusosechela chikamuchisyo cha ŵakulalichila ŵakutyochela kwine. Myoyo, ŵajinji mwa apayiniya ŵala ajawile kumadela gane kwakukusosechela ŵakulalichila ŵajinji.

Pandaŵi jatwalolelaga dela, Lyakuŵeluka kundaŵi twanonyelaga kwenda ni ŵachinyamata mu utumiki. Yeleyi yatupaga upile wakumanyilila yakusawusya yakusimana nayo. Ŵane mwa ŵachinyamata ŵatwajendaga nawo mu utumiki, apano akutumichila m’yilambo yine mpela amishonale kapena akutenda ma utumiki gane m’guluji.

Pandaŵijo, mipingo jine nganijikombolaga kutuwuchisya mbiya syatwakamulichisye masengo pakusumila mawuta ga galimoto soni yakulya. Yeleyi yatendekasyaga kuti tukakola mbiya syakwanila pawukumala mwesi. Payakutendekwa yeleyi, twasosekwaga kumdalila mnope Yehofa. Jwalakwe ni juŵamanyililaga yindu yatukusosechela soni chakusangalasya nganatulekaga jika. Twakombolaga kutyoka pa mpingo wine ni kwawulasoni ku mpingo wine.

YANALIJIGANYISYE KWA ŴANDU ŴANE

Panaliji ku Quebec, nakwete upile wakulalichila pakamulichisya masengo wayilesi, TV, soni nyusipepala. Myoyo, ngusayamichila mnope kuti panaliji ku Giliyadi naliji ndili nalijiganyisye kala ya yindu yeleyi. Ndaŵi syejinji natendaga utumiki welewu ni M’bale Léonce Crépeault, juŵalijisoni jwakulolela dela. Mwamti jwalakwe jwamanyililaga chenene kuŵechetana ni ŵakugulusya ngani. Pakuŵechetana ni ŵandu ŵakwete maudindo ku malo gaguluchisya ngani, nganalilosyaga kuti akumanyilila yejinji. Mmalomwakwe, ŵaŵechetaga kuti: “Bwana, une ni ajanguŵa tugambile kuŵa ŵakulalichila basi. Myoyo, ngatukumanyilila yampaka tutende pakuŵecheta pa TV soni pa wayilesi. Nambope, atutumile kuti twamanyisye ŵandu ya msongano wekulungwa wakwete ŵa Mboni sya Yehofa. Myoyo, mpaka tuyamichile mnope chikamuchisyo chilichose champaka atupe.” Ligongo lyakuti m’baleju jwatendaga yindu mwakulinandiya, yakamuchisye kuti ŵa ma TV soni mawayilesi aŵeje ŵakusachilila kutukamuchisya.

Kaneko, ofesi ja nyambi jasagwile unejo ni M’bale Glen How, juŵaliji loya jwetu, kuti tulondesye ngani jinejakwe jakusawusya jele ŵakugulusya ngani akajiŵechete mnope. Yanalijiganyisye ku sukulu ja Giliyadi soni kwa M’bale Léonce yangamuchisye mnope. Walijitu upile kutenda utumiki welewu ni M’bale How. Mbaleju jwatendaga yindu mwakulimba mtima pakujichenjela gulu ja Yehofa mwa malamusi. Nambo chakusosekwa mnope chaliji chakuti ŵamnonyelaga mnope Yehofa.

Mu 1985 ŵasalile kuti ngaloleleje dela kungapililolyuŵa kwa Canada chiŵandika ni kwaŵatamaga baba. Yeleyi yambele upile wakuti ngomboleje kwasamalila. Babaŵa ŵajasiche pali pagambile kumala myesi jitatu. Nambope, twapitilisye kulolela dela kungapililolyuŵa kwa Canada mpaka mu 1989 pandaŵi jele ŵatuŵilasile kuti tukatumichileje ku Beteli ja ku United States. Pelepatu nikuti twaliji tuli tutesile utumiki wakulolela dela kwa yaka chiŵandika 19. Kwa yaka yosopeyi, twaŵele tuli mkutama mnyumba sya abale ni alongo ŵajinji soni kulya yakulya yaŵatutelechelaga. Tukusayamichila mnope koloŵa magasa kwa abale ni alongo ŵeleŵa.

KUTUMICHILA KU BETELI JA KU UNITED STATES

Ndili ngambile kwika ku Brooklyn, ŵasalile kuti ndumichileje ku Dipatimenti ja Utumiki. Ngusayamichila mnope yindu yanalijiganyisye ku dipatimentiji. Chindu chimo chanalijiganyisye chaliji chakuti ngoleje maumboni gakwanila mmalo mwagamba kuganisya kuti najipikanichisye chenene ngani jinejakwe. Kaneko mu 1998, ŵasalile kuti ngatumichileje ku Dipatimenti Jakulemba Ngani, kwele ngupitilisyape kulijiganya kulemba ngani. Kwa yaka yejinji, nakwete upile wakumkamuchisya m’bale John Barr, jwele jwaliji jwakulondesya masengo mu Komiti Jakulemba Ngani. Ndaŵi syosope, ngusayamichila yaŵanjiganyisye m’baleju pandaŵi jatwatumichilaga yimpepe. Kusala yisyene, jwalakwe jwaliji m’bale juŵajigalilaga chisyasyo cha Yesu Klistu.

Ngusaŵa jwakusangalala mnope kukamula masengo ni abale ni alongo ku Dipatimenti Jakulemba Ngani. Ndaŵi syosope, jemanjaji akusamŵenda Yehofa kuti jwalongoleleje pakutenda utumiki wawo. Sonitu akusamanyilila kuti yindu yambone yayikusatendekwa pautumiki wawo yikusatendekwa ligongo lyakuti Yehofa akwakamuchisya ngaŵaga ligongo lya lunda lwawo basi.

Une ni Linda twakwete upile wakwajendela abale ni alongo ŵetu ŵakulupichika m’yilambo yakwana 110. Pamaulendoga, tugaweni maumboni gakulosya kuti amishonale, abale ŵa mu Komiti ja Nyambi, soni wosope ŵakutenda utumiki wa ndaŵi syosope akusamnonyela mnope Yehofa. Tuyiwenisoni kuti ŵakulalichila ŵajinji akupitilisya kumnonyela Yehofa soni kuŵa ŵakulupichika kwa jwalakwe atamose kuti akutama m’yilambo yele mukutendekwa ngondo, akulagasidwa, soni kulaga ni usawuchi. Kusala yisyene, Yehofa akusiŵanonyela mnope jemanjaji.

Kwa yaka yosopeyi, ŵamkwangu Linda aŵele ali mkungamuchisya kuti ngomboleje kutenda chenene utumiki wangu. Linda akusiŵanonyela mnope ŵandu soni ndaŵi syosope akusalola yampaka atende pakwakamuchisya. Jwalakwe ngayikusamsawusya kutanda kuŵechetana ni ŵandu. Kupwatika pelepa, ŵakamuchisyesoni ŵandu ŵajinji kulijiganya yakwamba Yehofa soni kwakamuchisya ŵandu ŵaŵalesile kusongana kuti atandilesoni. Kusala yisyene ŵamkwanguŵa ali mtuka wakutyochela kwa Yehofa. Pakuŵapo Une ni ŵamkwangu tukukalambala, tukusayamichila mnope yakusatenda abale ni alongo ŵachinyamata pakutukamuchisya.—Mak. 10:​29, 30.

Panguganichisya yindu yandesile yaka 80 yipiteyi, ngusamyamichila mnope Yehofa. Kusala yisyene, ngusakamulana ni maloŵe gajwalembile jwamasalimo kuti: “Wawo Mlungu, wawojo aŵele ali mkunjiganya une kutandila ndili mnyamata, Mwamti mpaka apano ngupitilisya kulalichila yakwamba yindu yakusimonjesya yakusatendaga wawojo.” (Sal. 71:17) Pandaŵi josope jandili chiŵela umi, ndili jwakusachilila kupitilisya kulijiganya.