Yiwusyo Yakutyochela kwa Ŵakuŵalanga
Ana ni “yakusaka” yapi yele Yehofa chachiyiŵika m’mitima ja ŵakulamulila ŵa yilambo pachangakaŵapa kusogoloku?
Pakwamba ya kutanda kwa yakusawusya yekulungwa, pa Chiwunukuko 17:16, 17 pakusati, “Misengo 10 jimwajiweni jila soni chilombocho, yichiŵengana ni lihulelyo. Yichilipapulanya lihulelyo ni kulileka lili makonope. Nambosoni yichilya mnowu wakwe ni kulitinisya ni moto. Mlungu ŵaŵisile yeleyi m’mitima jawo kuti jemanjaji atende yakusaka yakwe. Pakutenda yeleyi, Mlungu chachatendekasya kukwanilisya chakulinga chawo chimpepe, chakuti apeleche uchimwene wawo kwa chilombocho.” Pangani jeleji, munyumamu mabuku getu gaŵele gali mkusala kuti “yakusaka” ya Yehofa yele jwalakwejo chachiyiŵika m’mitima ja ŵakulamulila ŵa yilambo yili konanga dini jaunami.
Nambope, kapikane ketu ka lilembali kakusosekwa kuchenga. Mwamti “yakusaka” ya Yehofa yele jwalakwejo chachiyiŵika m’mitima ja ŵakulamulila ŵa yilambo yili yakuti jemanjajo chachipeleka “uchimwene wawo kwa chilombocho.” Nambo ana yeleyi yichikwanilichikwa chamti uli? Kwende tuganichisye yiwusyo yakuyichisyayi.
Ana ni ŵani ŵakwasala mu yakulochesyayi? Mu yakulochesyayi mwana “lihule” lyelesoni likusamanyika kuti “Babulo Jwamkulungwa.” Jwalakweju akusajimila uchimwene wapachilambo chosope wa dini jaunami. Mwanasoni ‘chilombo chechejewu’ chachikusajimila bungwe ja United Nations. Bungwe jeleji jatandite mu 1919 pakusaka kutamilikasya mtendele pachilambo chosope, mwamti jamanyikaga kuti League of Nations. (Chiw. 17:3-5) Nambosoni mwana “misengo 10” jajikusajimila maboma gosope gagakusachikamuchisya chilombo.
Ana pana mkamulano wamti uli pasikati pa lihule lila ni chilombo chechejewu? Lihuleli “litemi” penani pa chilombo chila, likupeleka upile kwa chilombocho soni kulinga kuchilongolela kapena kuchilamulila.
Ana yindu yichilimalila uli lihuleli? Chilombo chila pampepe ni misengo 10 jele jikusachikamuchisya chilombochi, “yichiŵengana ni lihulelyo.” Mwamti yichijigala chilichose chalyakwete soni kwalosya ŵandu wosope kuti lihulelyo lyaliji lyakusakala mnope. Mwamti kaneko yichilijonanga lihulelyo, yayichiŵa yakamulana ni yaŵasasile Yehofa kuti yichitendekwa. (Chiw. 17:1; 18:8) Jelejitu jichiŵa mbesi ja dini syaunami. Nambope, mkaniyitendekwe yeleyi, Yehofa chachigatendekasya maboma ga ŵandu kutenda yindu yine yakwe yanganiyitendekweje chitandilile.
Ana Yehofa chachigatendekasya maboma ga ŵandu kutenda chichi? Jwalakwe chachiŵika “yakusaka yakwe” m’mitima mwa misengo 10 kuti ‘chijipeleche machili soni ulamusi wawo kwa chilombo [chechejewu] chila.’ Yayikugopolela kupeleka machili gawo ku bungwe ja United Nations. (Chiw. 17:13) Ana yeleyi yikugopolela chichi? Ana yikugopolela kuti maboma ga ŵandu gachigamba kusagula jika kupeleka machili soni ulamusi wawo kwa chilombo chila? Iyayi. Tukuŵecheta yeleyi ligongo lyakuti yakulochesya yikusalosya kuti Mlungu msyene ni juchachatendekasya jemanjaji kutenda yeleyi. (Mis. 21:1; alole Yesaya 44:28) Mwamti yindu yeleyi yichitendekwa mwakwanguya mnope. Kaneko chilombochi chichijonanga dini syosope syaunami mwamti ngasisimanikwasoni.
Ana tujembecheyeje yamti uli kusogoloku? Tukajembecheyaga kuti tuchipikana ngani syakusala kuti maboma ga ŵandu gatandite kupeleka machili gawo ku bungwe ja United Nations mwapanandipanandi. Nambo tujembecheyeje kuti mwangajembecheya Yehofa chachigatendekasya maboma gosope ga ŵandu kupeleka machili gawo kwa chilombo chechejewu. Mwamti payichigamba kutendekwa yeleyi, tuchimanyilila kuti yakusawusya yekulungwa yisigele panandi kutanda. Apano yatukusosekwa kutenda yili kulingalinga kuŵa ‘mesope soni kuŵa ŵaganisya chenene’ ligongo pachangakaŵapa chipatendekwe kuchenga kwekulungwa.—1 Ates. 5:6.