Yampaka Yakamuchisye Achakongwe Ŵatendeledwe Ngasa

Maloŵega gakusasimanikwa kundanda kwa ngani ja Chichewa ja mtwe wakuti, “Kuteteza Akazi—Zimene Baibulo Limanena” jajikusasimanikwa pa jw.org. Linki jajili pasi pa nganiji jikusijasalila kuti mpaka atende dawunilodi PDF ja nganiji, mwamti mpaka ajipulite ni kuŵa kapepala ka mapeji gaŵili. Mlongo jwine jwa ku United States lina lyakwe Stacy jwasasile kuti, “Napulinte tumapepalatu kaneko une ni mlongo jwine twapite kukuleka tumapepalato kunyumba jakusatilila achakongwe ŵatendeledwe ngasa jajili mu dela ja mpingo wetu.”

Mundu jwakusakamula masengo kweleku jwamsalile mlongoju kuti ajawusye tumapepala twine ni chakulinga chakuti ŵape ŵandu ŵakusatamaga m’nyumbaji. Yakuyichisya yakwe ŵagawile tumapepala twine twakwana 40 pampepe ni tumakadi twakusala ya jw.org twakwana 30. Paulendo wakuyichisya, jwakusalolela ku nyumbaji jwaŵendile ŵa Mboni sya Yehofa kuti ŵalosye ŵanduwo mwalikusatendechela lijiganyo lya Baibulo.

Mlongo Stacy yimpepe ni alongo ŵane ŵaŵili ŵatesilesoni yakulandanayi ku nyumba jine. Mwamti ŵagaŵile tumapepala msano soni ŵasalile kuti ajawusye twine. Mundu jwine jwakusakamula masengo kweleko jwatite, “Tumapepalatu chitwakamuchisye achakongwe ŵakusatama akuno.” Jwajonjechesyesoni kuti, “Tukusosechela tumapepalatu.” Paulendo wakuyichisya, achakongwe ŵane ŵasakaga kulola mwalikusatendechela lijiganyo lya Baibulo. Mwamti pambesi pakwe ŵaŵili mwa achakongwewo ŵasachililaga ali atesile nawo misongano jakumbesi kwa wiki ku Nyumba ja Uchimwene.

Mlongo Stacy jwatite, “Twasangalele mnope ni yiŵatite ŵandu pakupochela tumapepalatu. Lyeleli lili litala lyambone lyakwasalila ŵandu ya Uchimwene wa Mlungu mnopemnope ŵaŵatendeledwe ngasa. Yatukwayiye mnope ni yiŵatite ŵandu pakusangalala ali apochele tumapepalatu. Nambosoni tukusangalala mnope ni yakuti Yehofa pakutupa upile patukupitilisya kwasalila ngani syambone achakongwe ŵaŵatendeledwe ngasa.”