YAMPAKA TUTENDE KUTI TUMALANE NI NDAMO JA KWAŴENGA ŴANE

2 | Akawuchisyaga Yakusakala

Yajikusajiganya Baibulo:

“Mundu naga akumtendela yakusakala, mkasimumwuchisya chakusakalacho. . . . Naga kuli kwakomboleka, mtameje mwa mtendele ni ŵandu wosope mpela mutimpakombolele, . . . mkasimwuchisya chakusakala, . . . Pakuti yilembedwe m’Malemba kuti, ‘Kuwuchisya kuli kwangu, uneji timbuchisye, akuti myoyo Ambuje.’”—ALOMA 12:17-19.

Ana Yeleyi Yikugopolela Chichi?

Atamose kuti mwachipago tukusatumbila ŵandu ŵane patulemwechesye, nambo Mlungu jwangasaka kuti tuwuchisyeje. Mmalomwakwe Mlungu akusasaka kuti tuŵeje ŵakuwusimana mtima ligongo pachangakaŵapa chamasye yindu yangali chilungamo yosope.—Salimo 37:7, 10.

Yakusosekwa Kutenda:

Ŵandu ŵakusiŵawuchisya achimjawo yakusakala, akusagamba kutendekasya kuti aŵenganeje mnope. Myoyo, naga mundu jwine ŵalemwechesye ngakusosekwa kumwuchisya. Awukamuleje mtima soni atendeje yindu yakuyikasya mtendele. Ndaŵi sine mpaka yiŵe chenene gamba kuyileka. (Misyungu 19:11) Sonitu ndaŵi sine yikusaŵasoni chenene kuja kusala nganijo kwa ŵandu ŵampaka ŵakamuchisye. Mwachisyasyo, naga mundu jwine ŵalemwechesye mnope mpaka akasale nganiji ku polisi kapena kwa ŵandu ŵane ŵakwete maudindo.

Naga mkuwuchisya yakusakala yikusaŵa kuti mkulilagasya jika

Nambi uli naga yili mkuwoneka kuti pangali yampaka atende kuti amasye nganiji mwamtendele? Kapena mwinesoni alinjile kutenda yakakombwele kuti amasye yayikutendekwayo nambo yikukanika? Ngakusosekwa kuganisya yakuti awuchisye. Ligongo naga akutenda yeleyi, yichitendekasya kuti nganijo jikule. Nambo naga ngakuwuchisya yichikamuchisya kuti pakapagwa uŵengani. Akusosekwa akulupilileje mnope yakusati Mlungu pakumasya yakusawusya. Myoyo, ‘amkulupilileje . . . [jwalakwe], nipo tachasamalila.’—Salimo 37:3-5.

Yayamtendechele Mundu Jwine—ADRIÁN

Jwalesile Kwawuchisya Ŵane Yakusakala

Adrián paŵaliji jwachinyamata, jwaŵengaga mnope ŵandu ŵane soni jwanonyelaga kumwuchisya mundu julijose jwamtandite. Jwalakwe jwatite, “Ndaŵi syejinji twamenyanaga pakamulichisya masengo wuti, mwamti ndaŵi sine ŵandekaga ndili miyasimiyasipe.”

Adrián ŵatandite kulijiganya Baibulo ali ni yaka 16. Jwalakwe jwaŵechetesoni kuti, “Pinapitilisyaga kulijiganya Baibulo, nayiweni kuti ngusosekwa kuchenga umi wangu.” Jwalakwe ŵasosekwe kuleka kwaŵenga ŵandu ŵane soni kutenda yachiwawa. Yiŵalijiganyisye palilemba lya Aloma 12:17-19, yamkamuchisye kuti akawuchisyaga ŵane. Jwalakwe jwatite, “Nayikene pakumanyilila kuti Yehofa chachityosya yakusakala yosope pandaŵi jakwe. Mwapanandipanandi, nakombwele kuleka yandewo yila.”

Lisiku line chilo, Adrián ŵasimene ni kagulu ka anyamata ŵachiswamba ŵaŵamenyanaga nawo kalakala. Jemanjaji ŵatandite kumputa Adrián. Kaneko jwakulongolela kaguluko jwatite, “Mwuchisye tulole!” Adrián jwatite, “Nasachililaga kuwuchisya.” Nambo mmalo mwakuwuchisya, jwaposile kwa Yehofa ni kutyoka pamalopo.

Jwalakwe jwasasilesoni kuti, “Lisiku lyakuyichisya, nam’weni jwakulongolela kagulu ka ŵachiswamba jula ali mkwika chapakutalichila nambo ali jika. Natumbile mnope mwamti nasakaga kumwuchisya, nambo napopesilesoni chamumtima kuti Yehofa angamuchisye kuwukamula mtima. Yasimonjesye mnope kumpikana mnyamatajo ali mkuŵecheta kuti, ‘Bwanawe yinatesile chilo yila, chonde mungululuchile. Unetu ngusachilila kuŵa mpela mmwejo, mwamti ngusaka kulijiganya Baibulo.’ Nasangalele mnope ligongo lyakuti nakombwele kuwukamula mtima. Kaneko nombenajo jwatandite kulijiganya Baibulo.”