YAMPAKA TUTENDE KUTI TUMALANE NI NDAMO JA KWAŴENGA ŴANE

1 | Tukaŵaga Ŵalusagu

Yajikusajiganya Baibulo:

“Mlungu jwangali lusagu. Jwalijose jwakusamjogopa jwalakwe ni kutenda yambone akumpochela, pangalolela kuti akutyochela mtundu wapi.”—MASENGO 10:34, 35.

Ana Yeleyi Yikugopolela Chichi?

Yehofaa Mlungu jwangatujelusya pakujigalila chilambo chatwatyochele, mtundu wetu, mwatukusawonechela, kapena ndamo syetu. Mmalomwakwe, jwalakwe akusalola yayili mumtima mwetu. Baibulo jikusati, ŵandu ‘akusalolaga yakusa kwa chilu, nambo . . . [Yehofa] akusalolaga ya mumtima.’—1 Samuele 16:7.

Yakusosekwa Kutenda:

Atamose kuti nganituŵa tukombwele kulola ya mumtima mwa mundu, nambope mpaka tukombole kumsyasya Mlungu ni kuŵaga ŵandu ŵangali lusagu. Tummanyilileje mundu jwalijose pajika mmalo mwakulola mtundu watyochele. Naga ayikopochele kuti akusiŵawona mwakulemwecheka ŵandu ŵamtundu wine kapena ŵatyochele chilambo chine, amŵendeje Mlungu kuti ŵakamuchisye kutyosya nganisyo syelesyo. (Salimo 139:23, 24) Naga akupopela kutyochela pasi pamtima kuti Yehofa ŵakamuchisye kuŵa ŵangali lusagu, jwalakwe chachapikanila lipopelo lyawo soni chachakamuchisya.—1 Petulo 3:12.

a Yehofa lili lina lya Mlungu.—Ekisodo 3:14, maloŵe gamwiŵanda.

“Chitandilile nganindameje mwamtendele ni msungu. . . . Sambano naŵele m’liŵasa lya pachilambo chosope lyele ŵandu ŵakwe akusanonyelana yisyesyene.”—TITUS

Yayamtendechele Mundu Jwine—TITUS

Jwalesile Kwaŵenga Ŵane

Titus jwaŵenganaga ni malamusi gagalimbikasyaga ya kusagulana mitundu, mwamti jwajinjile kagulu kachiwawa kakulimbana ni malamusiga. Jwalakwe jwatite, “Twajawulaga m’malo gaŵalekasyaga ŵandu ŵapiliwu kwawula, mpela ku mabala soni ku mahotelo ni chakulinga chakuti tukatandikasye ndewu.” Titus jwamanyilile kuti jwaŵengaga ŵandu ŵane mnope. Jwalakwe jwajonjechesye kuti, “Ndaŵi syosope pandandene ni mundu chinga jwamlume kapena jwamkongwe, unejo naŵaga mundu jwandanda kumputa mundujo.”

Titus jwatandite kuchenga ndamo syakwe paŵagambile kutanda kulijiganya Baibulo ni ŵa Mboni sya Yehofa. Paŵalasile Baibulo, yamyikaga pamtima. Maloŵe gagamkamwile mnope mtima gali gakwamba yaŵasasile Mlungu ya chilambo chasambano mwele ngasimupagwa “chiwa, chanasa, kulila, kapena kupikana yipwetesi.”—Chiwunukuko 21:3, 4.

Pandanda, Titus yamsawusyaga kuleka kwaŵenga ŵandu ŵane. Jwalakwe jwatite, “Yaliji yakusawusya kuti njenje kaganisye kangu soni yitendo yangu.” Nambo lilemba lya Masengo 10:34, 35, lyalikusasala kuti Mlungu ali jwangali lusagu lyamkamuchisye mnope.

Ana yakuyichisya yakwe yaliji yamtuli? Titus jwatite, “Panayiweni yakusati ŵa Mboni pakunonyelana, naliji jwakusimichisya kuti dini ja jemanjaji jili jisyesyene. Akusanonyelana pangajigalila mtundu kapena kawoneche kawo. Atamose mkanimbe kubatisidwa ni kuŵa jwa Mboni sya Yehofa, msungu jwine juŵaliji jwa Mboni jwambilasile kuti tukalye yimpepe yakulya kumangwakwe. Yaliji mpela kulugono. Chitandilile nganindameje mwamtendele ni msungu. Nambo pandaŵi aji, twalile yakulya yimpepe kunyumba jakwe. Sambano naŵele m’liŵasa lya pachilambo chosope lyele ŵandu ŵakwe akusanonyelana yisyesyene.”