Kuŵilanjila Ŵandu ku Msongano Waupande
1. Ana masengo gakuŵilanjila ŵandu ku msongano waupande wa 2014 gacitanda cakaci?
1 Mundu pakwaŵilanjila acimjakwe kapena liŵasa line ku cakulya capajika cicamjigalile ndaŵi, soni yindu yejinji pakucilinganya, akusaŵa jwakusangalala mnope pakwaŵilanga ŵanduwo. Mwakulandana ni yeleyi, paliji masengo gamakulungwa gakulinganya cindimba causimu cacicitendekwa pa msongano wetu waupande wa 2014. Kuli kusigele yijuma yitatu kuti msongano wetu utendekwe, Yehofa atupele upile wakuŵilanjila ŵandu ŵane kuti caŵe nawo pa msonganowo. Ana cici cacicitukamucisya kuŵilanjila ŵanduwo mwakusangalala?
2. Ana cici cacicitutendekasya kamula nawo masengo gakuŵilanjila ŵanduga?
2 Ganicisya yatukusapata pa cindimba causimu cakusatulinganyila Yehofa, kucitulimbikasya kuti tujigale nawo mbali mwakwanila pa masengo gakuŵilanjila ŵanduga. (Yes. 65:13, 14) Tukumbucilejesoni kuti masengo getu ga pacakaga gakusaŵa ni yakuyicisya yambone. Ŵandu ŵane ŵatucaŵilanjila caciyika kukutenda nawo msonganowo. Mwangasamala kandu ya winji wa ŵandu ŵataciyika ku msonganoko, mtawu wetu watucilosya pa masengo gakuŵilanjila ŵanduga wucimsangalasya Yehofa, soni ucilosya koloŵa magasa kwakwe.—Sal. 145:3, 7; Ciu. 22:17.
3. Ana tucigaŵila catuli tumapepala twakuŵilanjila ŵandu ku msongano?
3 Acakulungwa ŵa mumpingo alinganye mwawucigaŵilila mpingo wawo tumapepala twakuŵilanjila ŵandutu mumkuli wawo wosope. Akusosekwasoni asale naga caleceje tumapepalato pa nyumba syanganasimana ŵandu kapena ku malo gane. Kumbesi kwa cijuma, cacisosekwa gaŵila magasini pampepe ni tumapepalato naga yili yakomboleka. Naga Lyakuŵeluka lyandanda lya mwesiwo liciŵa m’ndawi jagaŵila tumapepala, cacisosekwa kwendelecelape gaŵila tumapepalato m’malo mwakutandisya majiganyo ga Baibulo. Patucimalisyaga masengo gakuŵilanjila ŵanduga, tuciŵa ŵakusangalala mnope ligongo lyakuti tujigele nawo mbali mwakulipeleka pa masengogo, soni kuti tuŵilanjile ŵandu ŵajinji kuti casimanikwe pa cindimba causimu catulinganyile Yehofa!