“Alosyeje Ndamo Syambone kwa Ŵandu Wosope”

1. Ligongo cici tucisosekwa kulosya ndamo syambone pamsongano waupande wawukwisawu?

¹ Caka cilicose patukutenda msongano, ŵandu ŵajinji akusatenda nawe lung’wanu. M’yoyo yili yakusosekwa kuti yitendo yetu yiŵeje yakamulana ni Mlungu jwatukusamlambila. (Lev. 20:26) Yitendo yetu yambone, soni kawale ni kalisalalisye ketu, yilosyeje kuti tuli ŵakumkuya Klistu ŵasyesyene. Patucitendaga msongano waupande wawukwisawu, ana tucisosekwa kutenda cici kuti ‘citulosye ndamo syambone kwa ŵandu wosope’ ni kwacimbicisya Atati ŵetu ŵakwinani?—1 Pet. 2:12.

2. Ana pacitutendaga msongano waupande, tucikola upile wakulosya ndamo syetu syaciklistu ku malo gapi?

² Alosye Ndamo Syaciklistu: Cinonyelo catukusalosyana jwine ni mjakwe, soni mwatukusatendela yindu ni “ŵandu ŵangakulupilila,” yikusaŵa yakulekangana mnope ni msimu wa m’cilamboci. (Akolo. 3:10; 4:5; 2 Tim. 3:1-5) Patupite kumalo gakulila, tucisosekwa kutenda yindu mwalunda ni ŵakamula masengo ŵa kumaloko atamose paŵe yakusawusya yine. Tukaliŵalilagasoni kwayamicila ŵakukamula masengowo.

3. Ana acinangolo akwakumbusya kuti catende cici, soni ligongo cici?

³ Acinangolo cacisosekwa kwalolecesya cenene ŵanace ŵawo pali ku msongano, soni kumalo gakulila. (Miy. 29:15) Jwakulolela malo gane gakulila ŵalisalile liŵasa line kuti: “Tukusitwanonyela mnope jemanja. Maŵasa genu, soni ŵanace ŵenu akusalosya ndamo syambone mnope. Ŵakamula masengo akuno akusasala ya jemanja, soni tukusasacilila kuti jemanja mgambeje kwika akuno cijuma cilicose.”

4. Patuciŵa ku msongano, ana tucisosekwa kuwala catuli?

⁴ Kuwala Mwakuŵajilwa: Kawale ketu pa msongano kacisosekwa kuŵa kambone, soni kakuŵajilwa ngaŵaga mpela mwakusawalila ŵandu ŵa m’cilamboci. (1 Tim. 2:9) Atamose pa ndaŵi jakupumula mkaniwutande kapena pawumasile msongano, cacisosekwa kuwala mwakuŵajilwa. Tuciŵa ŵakusangalala kuwala baji jetu ja msongano yayicitendekasya kuti yikaŵa yakusawusya kulalicila naga papatikene upile. Kawonece ketu kambone, soni ndamo syambone syatucilosya pa msongano waupande wa 2014, tisicitendekasya ŵandu ŵa mitima jambone kuti alijiganye Baibulo nambosoni tisicimsangalasya mnope Yehofa.—Zef. 3:17.

Yakusosekwa Kuya pa Msongano Waupande wa 2014

◼ Ndaŵi ja Msongano: Masiku gosope gatatu, nyimbo jakutandila jicitandaga ndaŵi ja 8:20 kundaŵi. Pandaŵi jeleji jwalijose cacisosekwa kutama pa malo gakwe kuti msongano utande cenene. Lyamsano ni Lyakuŵeluka, nyimbo jakumalisya soni lipopelo yiciŵa ndaŵi ja 3:55 musi nambo Lyamlungu yiciŵa ndaŵi ja 2:50 musi.

◼ Msongano wa Yilambo: M’mikuli jine mucitendekwa msongano wa yilambo. Akusosekwa kumanyilila kuti ofesi ja nyambi jiŵilasile mimpingo soni acalendo ŵakuŵalanjika ligongo lya kunandipa kwa malo gakutama, malo gakwimika magalimoto, soni malo gagona. Naga ŵandu cacijawula ku msongano wa nganiŵasalila kuti ajawule cacitendekasya kuti cikuŵe ŵandu ŵajinji. Naga ngasakombola kwawula ku msongano wacacisosekwa kwawula, ngakusosekwa kusagula kwawula kumsongano wa yilambo.

◼ Kwakwimika Magalimoto, Soni Njinga: Kosope kwakucitendekwa msongano kuciŵa malo galulele gakwimika magalimoto, soni njinga. Tukwalimbikasya kuti cakamulaneje ni ŵawulinda. Acimisyene magalimoto, soni njinga cacisosekwa kulolecesya kuti asikiyile mkanajawule pa malo gawo gakutama.

◼ Kusunjilana Malo: Naga ayice ku malo ga msongano, akasawutucila kukutama pa malo gawo mpela yila kuti atenda kanganilana ni ŵandu ŵane. Msimu wangalinonyela wawukusatutendekasya kulongosya ya ŵane ukusalosya kuti tuli Aklistu ŵasyesyene, soni ukusatendekasya ŵane kumlumba Mlungu. (Yoh. 13:34, 35; 1 Akoli. 13:4, 5; 1 Pet. 2:12) Akusosekwa kwasunjila malo gakutama ŵandu ŵakutama nawo kumpepe, ŵayice nawo pa galimoto jimo, kapena ŵakwajiganya Baibulo. Pamsonganowo paciŵa malo gakutama ŵandu ŵacekulupe ni ŵalemale. Ligongo lyakuti maloga gali gakwana ŵandu ŵakuŵalanjikape, tipacisosekwa mundu jumo kapena ŵaŵilipe ŵakutama nawo kuti ŵakamucisyeje.

◼ Cakulya ca Musi: Cacisosekwa kujigala yakulya ya musi pakwika ku msongano mmalo mwakutyoka pandaŵi jakupumula ni kuja kulya kwine. Mpaka ajigale mpunga ŵetelece, cipisi, buledi, soni yakumwa. Ukana ngawukusosekwa pa malo ga msongano.

◼ Yakupeleka: Mpaka tulosye kuyamicila msongano mwakupeleka mbiya syakamucisya pa masengo ga pacilambo cosope. Naga akusaka kupeleka ceke, akusosekwa kucilemba kuti cikwawula ku “Association of Jehovah’s Witnesses of Malawi.”

◼ Mtela: Naga akusamwa mtela wa ulwele wine wakwe, akusosekwa kujigala wakwanila pakwika ligongo ngasiwupatikana kumsonganoko. Ŵandu ŵakusalitotela mtela wa ulwele wa suga akusosekwa kusamala kajase ka majakisoni. Ngakusosekwa kwasa ku malo gakwasila yiswani pamalo ga msonganogo.

◼ Kuŵambala Ngosi: Cacisosekwa kusamala kuti aŵambale ngosi syakwika ligongo lyakutelesya kapena kukuŵala. Ndaŵi syejinji ngosi syelesi sikusatendekwa ligongo lyakuwala sapato syelewu mnope. M’yoyo cacitenda cenene kuwala sapato syakuti cajendeje nasyo cenene.

◼ Ŵakulajilila Kupikana: M’malo gakuyicisyaga ngani sya pamsonganowu cacisigopolela mu ciŵeceto ca makono: Blantyre, Kasungu, Lilongwe, Luchenza, Magawa, Mkanda, Mangochi, Mzuzu, Mnadzi, Nchalo, Nkhata Bay, Songani ni malo ganesoni. Cimanyisyo ca yeleyi cacicisala kundaŵi lisiku lyandanda lya msonganowo.

◼ Yikuku ni Njinga sya Ŵanace: Ngakusosekwa kwika ni yindu yeleyi pa malo ga msongano.

◼ Pelefyumu: Ngakusosekwa kukamulicisya masengo pelefyumu jwamacili mnope pakwika kumsongano ligongo pakusaŵa ŵandu ŵane ŵakusaŵengana najo ligongo lya ulwele. M’yoyo mpaka tulosye kuti tukusitwanonyela ŵanduŵa mwakuŵambala kutenda yeleyi.—1 Akoli. 10:24.

◼ Fomu ja Akawonegane ni Mundu Aju (S-43): Naga pandaŵi ja msongano ŵamlalicile mundu jwine jwakwete lung’wanu lwakusaka kulijiganya yejinji, cacisosekwa kulemba ya mundujo pa fomu jakuti Akawonegane ni Mundu Aju. Fomujo akusosekwa kujipeleka kucipinda cakusunjila mabuku kapena cakampe mlembela jwa mpingo wawo pacaciwujila kunyumba kwawo.

◼ Malo Gakulila: Cacisosekwa kulosya ndamo syambone, soni kuwala cenene mwakuŵajilwa Mklistu. Yeleyi yicitendekasya kuti lina lya Yehofa licimbicikwe.

◼ Mafoni: Cacisosekwa kusimisya foni jawo kapena kujitega kuti jikasokonasya pa ndaŵi ja msongano.

◼ Kwambula Maloŵe: Yindu yakwambulila maloŵe ngayikusosekwa kuyilumbikanya ku yakwecesya maloŵe, soni ngayikusosekwa kusokonasya ŵandu.

◼ Kwambula Yiwulili: Naga akusaka kwambula yiwulili, ngakusosekwa kamulicisya masengo fulashi.

◼ Kulipeleka Kamucisya Masengo: Jwalijose jwakusaka kuti cakamucisye nawo masengo pamsongano calembesye lina lyakwe ku Dipatimenti Jakulolela Ŵakulipeleka Kamucisya Masengo. Ŵanace ŵangakwana yaka 16 mpaka akamucisye nawo masengoga mwakulongolelegwa ni nangolo jwawo kapena mundu jine jwamkulungwa.