Akuyeje Cisyasyo ca Ŵakulocesya—Sefaniya
1. Ana yindu yaliji wuli pandaŵi jele Sefaniya ŵaliji jwakulocesya, nambi tukulijiganya cici pa cisyasyo cakwe cambone?
1 Mkati mwa yaka ya m’ma 700 B.C.E., kulambila Baala kwaliji palipose ku Yuda. Mwenye Amoni juŵaliji jwakusakala ŵawulajigwe, ni Mwenye Yosiya, juŵaliji m’canda, ŵatandite kulamulila. (2 Mbiri 33:21–34:1) Ndaŵi jelejo, Yehofa ŵamsalile Sefaniya kuti alalicile kwa ŵandu ya utenga wakwelusya. Atamose kuti Sefaniya ŵaliji jwa mu msele wa mayimwene, jwalakwe nganagamba kuwusisa utenga wa Yehofa wakwelusya ulamusi wa Yuda, nambo ŵalalicilaga mwakulimba mtima. (Zef. 1:1; 3:1-4) Mwakulandana ni yeleyi, m’wejisoni tukusakuya kulimba mtima kwa Sefaniya, soni ngatukusakunda kuti ulongo utujonanjile kulambila kwetu Yehofa. (Mat. 10:34-37) Ana Sefaniya ŵalalicilaga utenga ŵatuli, soni ana yakuyicisya yakwe yaliji yatuli?
2. Ana tukusosekwa kutenda cici kuti citukulupuce pa lisiku lya ukali wa Yehofa?
2 Amsose Yehofa: Yehofape ni jwampaka ŵakulupusye ŵandu palisiku lya ukali wakwe. Ni ligongo lyakwe Sefaniya ŵalimbikasisye ŵandu kuti amsose Yehofa, asose cilungamo, soni asose kulinandiya ndaŵi mkanijimale. (Zef. 2: 2, 3) Yeleyi ni yatukusosekwa kutenda moŵa agano. Mpela Sefaniya, tukusiŵalimbikasya ŵandu kumsosa Yehofa, nambo tukusalolecesya kuti m’wejisoni “tukaleka kutumicila Yehofa.” (Zef. 1:6) Tukusamsosa Yehofa mwakulijiganya Maloŵe gakwe, soni mwakupopela kuti atulongoleleje. Tukusasosa cilungamo mwakulingalinga kuŵambala yitendo yakusakala. Tukusasosasoni kulinandiya patukupikanila malamusi galigose gakutyocela ku likuga lya Yehofa.
3. Ligongo cici tukusosekwa kola nganisyo syambone patukulalicila?
3 Yakuyicisya Yambone: Ŵandu ŵane ŵapikanile utenga wa Sefaniya. Jumo mwa ŵandu ŵaŵapikanilewo ŵaliji Yosiya juŵatandite kutenda yambone pameso pa Yehofa ali kam’canda. Kaneko Yosiya ŵatandite masengo gakwalekasya ŵandu kulambila mitembe. (2 Mbiri 34:2-5) Moŵa agano, atamose kuti mbeju sine sya Ucimwene sigwilile mumbali mwa msewu, sine petaka lya pacanya pa lwala kapena pamawukutu ga miŵa, nambo sine sigwilile petaka lyacajila ni sisogwele yisogosi. (Mat. 13:18-23) Tukwete cikulupi cakuti Yehofa cajendelecele kutukamucisya patukumisa mbeju sya Ucimwene.—Sal. 126:6.
4. Ligongo cici tukusosekwa ‘kwendelecela kwembeceya Yehofa’?
4 Ŵandu ŵane ku Yuda ŵaganisyaga kuti Yehofa ngaŵa mkutenda cilicose. Nambope, Yehofa ŵasalile ŵanduwo mwakusimicisya kuti lisiku lyakwe lyekulungwa liŵandicile. (Zef. 1: 12, 14) Jwalakwe ŵasalilesoni kuti cacakulupusya ŵandu ŵakutilila pa jwalakwe basi. (Zef. 3:12, 17) M’yoyo ‘patukwendelecela kwembeceya Yehofa,’ kwende wosope tumtumicileje Mlungu jwetu mwakamulana!—Zef. 3:8, 9.