Maloŵe Gakumalisya Gakukambilana ni Ŵakusaka Kubatisidwa

Ubatiso ukusatendekwa pa misongano jekulungwa ja Mboni sya Yehofa. Pambesi pa ngani ja ubatiso, jwakuŵecheta nganijo chachasalila ŵakusaka kubatisidwa kuti ajime ni kwanga yiwusyo yiŵili yakuyichisyayi mwakwesya maloŵe, soni mwakupikanika chenene:

1. Ana alesile yakulemwa yawo, alipeleche asyene kwa Yehofa soni kwitichisya litala lyakwe lyakutukulupuchisya kupitila mwa Yesu Klistu?

2. Ana akumanyilila kuti kubatisidwa kwawo kukwatendekasya wawojo kuŵa jumo jwa Mboni sya Yehofa jwakamulana ni gulu ja Yehofa?

Kwanga mwakupikanika chenene yiwusyo yeleyi kwa ŵakusaka kubatisidwa kukulosya kuti “akusala pelanga” kuti akusakulupilila mbopesi ja Yesu, soni uli umboni wakulosya kuti alipeleche kwa Yehofa pelanga. (Alo. 10:​9, 10) Myoyo, ŵakusaka kubatisidwa akusosekwa kuyiganichisya mwalipopelo yiwusyo yeleyi mkanipaŵe kuti akajanje mwakamulana ni yasimichisye mumtima mwawo.

Ana alipeleche asyene kwa Yehofa mu lipopelo, kumsalila kuti chamtumichileje jwalakwe jika soni kuti kutenda yakusasaka jwalakwe chikuŵe chindu chakusosekwa mnope pa umi wawo?

Ana asimichisye kuti ajino jili ndaŵi jambone kwa wawojo kuti abatisidwe?

Ana yakuwala yakuŵajilwa pakubatisidwa yikusosekwa kuŵa yamtuli? (1 Tim. 2:​9, 10; Yoh. 15:19; Afil. 1:10)

Tukusosekwa kuwala “mwalunda ni mwakwenela” pakulosya kuti tuli “ŵakumlambila Mlungu.” Myoyo, ŵakubatisidwa ngakusosekwa kuwala yakuwala yakuwonechela mkati kapena yelembe maloŵe soni yakola yiwulili. Akusosekwa kuwala yakuwala ya ulemu, yakuchimbichika, yakuwoneka chenene soni yakuŵajilwa mwakamulana ni chakutendekwachi.

Ana mundu akusosekwa kulosya ndamo jamtuli pakubatisidwa? (Luk. 3:​21, 22)

Ubatiso wa Yesu uli chisyasyo cha ubatiso wa Chiklistu wawukusatendekwaga masiku agano. Jwalakwe ŵayimanyi kuti ubatiso uli wakusosekwa mnope. Yeleyi yawonechele pakatende kakwe ka yindu. Myoyo, malo ga ubatiso ngagakusosekwa kuŵa gakutendela ndamo syangaŵajilwa, malo gakunguluchila, litanda lyakojela kapena kutendela yindu yangachimbichisya ubatisowo. Mklistu jwasambano ngakusosekwa kutenda yindu mwakupelenganya mnope. Atamose kuti ubatiso uli chakutendekwa chakusangalasya, nambope akusosekwa kusangalala mwakuŵajilwa.

Ana kusongana mwakutamilichika soni kutenda yindu ni mpingo mpaka kwakamuchisye chamtuli kuti apitilisye kuŵa ŵakulipelekape kwa Yehofa?

Ana ligongo chichi kuli kwakusosekwa mnope kupitilisya kola ndandanda jambone ja lijiganyo lya pajika soni kulalichila mwakutamilichika pabatisidwe?

MALOŴE KWA ACHAKULUNGWA ŴA MUMPINGO

Naga jwakulalichila jwangabatisidwa akusala yakuti akusaka kubatisidwa, akusosekwa kumlimbikasya kuti alolesoni mtwe wakuti “Yiwusyo kwa Ŵakusaka Kubatisidwa,” yayikusimanikwa pa mapeji 185-207 m’bukuji. Amsalilesoni kuti aŵalanje mtwe wakuti “Utenga kwa Jwakulalichila Jwangabatisidwa,” wawukusimanikwa kutandila pa peji 182, wawukusala mwampaka jwakulalichilajo akosechele kukambilana ni achakulungwa ŵa mumpingowo. Mwakamulana ni yayili pa pejiji, jwakulalichila jwakusaka kubatisidwajo, komboleka kamulichisya masengo yalembile, soni mpaka awuguleje bukuji pakukambilana. Nambope, ngapakusosekwa kuti mundu jwine akambilane yiwusyoyi ni jwakusaka kubatisidwajo mkanachingangane ni achakulungwa

Jwalijose jwakusaka kubatisidwa, akusosekwa kumsalila jwakulondesya masengo ga achakulungwa wosope ŵa mumpingo. Naga mundujo aŵalasile mbali ja “Yiwusyo kwa Ŵakusaka Kubatisidwa,” jwakulondesya masengo ga achakulungwa wosope ŵa mumpingo chachimwusya naga jwalipeleche kwa Yehofa mu lipopelo kuti atendeje yakusaka Jwalakwejo. Naga mundujo jwalipeleche, jwakulondesya masengo ga achakulungwa wosope ŵa mumpingo chachilinganya yakuti achakulungwa ŵaŵili akambilane najo “Yiwusyo kwa Ŵakusaka Kubatisidwa.” Achakulungwaŵa akusosekwa kugaŵana mbalisi, jwine mbali 1 jwine 2. Ngakusosekwa kwembecheya kopoka kwa masiku ga msongano wa dela kapena wa chigawo kuti atande kukambilana mbaliji ni ŵakusaka kubatisidwa.

Mpaka akambilane najo mbali siŵilisi kwa awala jimpepe mbali jilijose, atamose kuti pangali chakulekasya naga pakusosekwa ndaŵi jakupunda pelepo. Mbali jilijose jikusosekwa kutanda ni kumalisya ni lipopelo. Jwakusaka kubatisidwa kapena jwamkulungwa jwa mumpingojo ngakusosekwa kosechela yiwusyoyi mwakuwutuka. Achakulungwa ŵaŵasagwile kuti akambilane yiwusyoyi akusosekwa kujiwona mbaliji kuŵa jakusosekwa mnope.

Ndaŵi syejinji yikusaŵa chenene kukambilana yiwusyoyi ni mundu jumo jumo. Mwakumkunda jwakubatisidwajo kwanga chiwusyo chilichose, jwamkulungwajo chachimanyilila naga mundujo akupikanichisya chenene yalijiganyisye, soni chachimanyilila naga ali jwakuŵajilwa kubatisidwa. Kumkunda jwakusaka kubatisidwajo kwanga chiwusyo chilichose, kuchimkamuchisya kuŵa jwagopoka. Ŵalombane komboleka kukambilana nawo pampepe.

Naga jwakusaka kubatisidwajo ali jwamkongwe, kukambilanako kukusosekwa kutendecheleje pamalo gakuti ŵane mpaka ŵawoneje nambo akapikanaga yakukambilanayo. Naga pakusosekwa kujigala mundu jwine kuti aŵe najo, akusosekwa aŵe jwamkulungwa jwa mumpingo kapena jwakutumichila jwakamuchisya, mwakamulana ni mbali jakukambilana, mpela mwakusalila ndime jakuyichisyaji.

Mipingo jajikwete achakulungwa ŵa mumpingo ŵamnono, jwakutumichila jwakamuchisya jwakuŵajilwa soni jwakusaganisya chenene mpaka akambilane ni ŵakusaka kubatisidwa yiwusyo ya mu Mbali 1, “Yikulupi ya Chiklilstu.” Achakulungwa ŵa mumpingope ni ŵakusosekwa kukambilana Mbali 2 jakuti, “Ndamo sya Chiklistu.” Naga mumpingo mwangali abale ŵa maudindo ŵakwanila, akusosekwa kumwusya jwakulolela dela kuti ŵakamuchisye naga yili yakomboleka kuti abale ŵa mpingo wawuŵandichile mpaka ŵakamuchisye.

Naga jwakusaka kubatisidwajo ali mwanache, nangolo jumo kapena wosope naga ali ŵakulupilila, akusosekwa kusimanikwapo mu mbali syosope siŵili. Naga nangolojo kapena achinangolowo nganaŵa akombwele kusimanikwapo, nikuti pakusosekwa kusimanikwa achakulungwa ŵaŵili kapena jwamkulungwa ni jwakutumichila jwakamuchisya, (mwakamulana ni mbali jakukambilanajo).

Achakulungwawo chachilolechesya kuti jwakusaka kubatisidwajo akupikanichisya chenene yijiganyo yandanda ya m’Baibulo. Konjechesya pelepa akusosekwa kusimichisya kuti jwakusaka kubatisidwajo akusayamichila usyesyene, soni akusachimbichisya gulu ja Yehofa. Naga mundujo ngakupikanichisya yijiganyo yandanda ya m’Baibulo, achakulungwawo chachilinganya yakuti mundujo amkamuchisyesoni kuti chaŵajilwe kubatisidwa ndaŵi jine. Ŵane mpaka asosekwe kwapa ndaŵi jakwanila kuti alosye kuti akusagawona masengo gakulalichila kuŵa gakusosekwa kapena kulosya kuti akusapikanila mwajikusajendechesya yindu gulu. Yili kwa achakulungwawo kuyigaŵa chenene yiwusyoyo mwakamulana ni ndaŵi jakwete kuti alole naga kuli kwakuŵajilwa kuti mundujo abatisidwe kapena iyayi. Atamose kuti ndaŵi sine mpaka achelewe pa yiwusyo yine, akusosekwape kukambilana yiwusyo yosope.

Achakulungwa ŵaŵasagwile kuti akambilane yiwusyo ni jwakusaka kubatisidwajo, chachichingangana panyuma pakukambilana mbali jaŵili kuti alole naga mundujo ali jwakuŵajilwa kubatisidwa kapena iyayi. Achakulungwawo chachiganichisya ya mbili jakwe, yakusakombola kutenda, soni mwayiŵelele yindu pa umi wa jwakusaka kubatisidwa jwalijose. Nganisyo syetu siŵeje pa ŵandu ŵakusaka kumtumichila Yehofa soni ŵakupikanichisya usyesyene wa m’Baibulo. Naga akwakamuchisya mwachinonyelo, ŵakusaka kubatisidwa chachiŵa ŵakoseka kwanilisya masengo gawo gakusosekwa mnope mpela ŵakulalichila ngani syambone.

Kaneko, jwamkulungwa jumo kapena wosope chachichingangana ni jwakusaka kubatisidwajo kuti amsalile naga ali jwakuŵajilwa kubatisidwa kapena iyayi. Naga mundujo juŵajilwe, achakulungwawo akusosekwa kukambilana najo mbali jakuti “Maloŵe Gakumalisya Gakukambilana ni Ŵakusaka Kubatisidwa,” jajikusimanikwa pa mapeji 206-207. Naga jwakusaka kubatiswajo nganamalisye kulijiganya buku ja Jikusatujiganya Yamtuli soni Mlungu Ŵanonyeleje, achakulungwawo akusosekwa kumlimbikasya kuti chapitilisye kulijiganyako atamose panyuma pa kubatisidwa. Amsalile mundujo kuti lisiku lya ubatiso wakwe chililembedwe pa Chakulembapo Masengo ga Jwakulalichila jwa Mumpingo. Amkumbusye kuti achakulungwa chajigaleje malipoti gakwe kuti gulu jipitilisye kusamalila masengo ga Mboni sya Yehofa pa chilambo chosope soni kuti jwalakwe akomboleje kujigala mbali mu yakutendekwa ya usimu soni kupochela chikamuchisyo cha usimu. Konjechesya pelepa, achakulungwa akusosekwa kumkumbusya jwakulalichila jwasambanojo kuti malipotiga gakusasunjidwa mwakamulana ni Malamusi Gakusunga Chinsisi ga Mboni sya Yehofa gagakusasimanikwa pa jw.org. Kukambilanaku kukusosekwa kujigala mamisi 10 kapena ngakwana.

Panyuma pa chaka chimo ali abatisidwe, achakulungwa ŵa mumpingo ŵaŵili akusosekwa kuchingangana ni jwalakwe kuti amlimbikasye. Jumo jwa achakulungwawo akusosekwa aŵe jwakulolela kagulu ka utumiki ka mundujo. Naga jwachasambanojo ali mwanache, nangolo jwakwe kapena achinangolo ŵakwe wosope ŵakulupilila akusosekwa kusimanikwapo. Yakukambilanayo yikusosekwa yilosye msimu wachinonyelo soni wakulimbikasya. Achakulungwawo chachikambilana ni mundujo ya kwawula kwakwe pasogolo mwausimu soni chachimkamuchisya mwampaka apitilisye kola ndandanda jambone jakutendela lijiganyo lyapajika, kuŵalanga Baibulo lisiku lililyose, kutenda kulambila kwa peŵasa wiki jilijose, kusimanikwa soni kujigala nawo mbali pa misongano mwakulupichika, soni kulalichila wiki jilijose. (Aef. 5:​15, 16) Naga mundujo nganamalisya kulijiganya mabuku ga Jikusatujiganya Yamtuli soni Mlungu Ŵanonyeleje, achakulungwawo akusosekwa kulinganya yakuti mundu jwine amkamuchisye kumalisya kulijiganya mabukugo. Achakulungwawo akusosekwa kumyamichila mwakutyochela pasi pa mtima. Ndaŵi syejinji, kumsalila mundujo chindu chimo kapena yiŵili yakuti ajongolele mpaka kuŵe kwakwanila.