Yakonjechesya

Utenga kwa Achinangolo ŵa Chiklistu:

Mwangakayichila wawojo mpela nangolo, akusasachilila kwakamuchisya ŵanache ŵawo ŵakunonyelwa kuti amnonyeleje Yehofa soni kuti alipeleche kwa jwalakwe. Ana mpaka ŵakamuchisye chamtuli kuti aŵajilwe kubatisidwa? Ana jemanjaji akusosekwa kwika papi kuti aŵajilwe kutenda chindu chakusosekwachi?

Yesu ŵasalile ŵakumkuya ŵakwe kuti, “Mkajiganye ŵandu ŵa ngosyo syosope. Mkabatisyeje.” (Mat. 28:19) Mwakamulana ni maloŵega, chindu chakusosekwa mnope kuti mundu aŵajilwe kubatisidwa chili kuŵa jwakulijiganya. Jwakulijiganya nganaŵa mundu jwakusagamba kupikanichisya soni kulupilila yijiganyo ya Klistu nambo ali jwakusayikuya mnope. Mwanache mpaka akombolechesoni kutenda yeleyi.

Aŵe chisyasyo chambone kwa ŵanache ŵawo, soni ŵajiganyeje yijiganyo ya Yehofa. (Det. 6:​6-9) Yeleyi yikupwatikapo kamulichisya masengo yayili m’buku jakuti Ana Baibulo Jikusatujiganya Yamtuli? soni ja Yampaka Atende Kuti Mlungu Ŵanonyeleje pakwajiganya usyesyene wa m’Baibulo soni kwakosechelesya kuti aganichisyeje soni kutenda yindu mwakukamulana ni yiwundo ya m’Baibulo. Ŵakamuchisyeje ŵanache ŵawo kuti akomboleje kulondesya yakusakulupilila m’maloŵe gawo. (1 Pet. 3:15) Yindu yakamuchisya yakusalijiganya kwa wawojo, palijiganyo lyapajika, pa kulambila kwapeŵasa, ku misongano jampingo, soni kwa achimjawo ŵambone yichakamuchisya kuti abatisidwe soni kupitilisya kwawula pasogolo. Ŵakamuchisyesoni kuti ndaŵi syosope aganichisyeje yampaka atende kuti aŵe pa unasi wakulimba ni Yehofa.

Lilemba lya Misyungu 20:11 likusati, “Atamose mwanache akusamanyika ni masengo gakwe, naga yakusatendayo yili yambone ni yakulungamika.” Ana yitendo yapi yampaka yilosye kuti mwanache, chinga jwamlume kapena jwamkongwe aŵele jwakulijiganya jwa Yesu Klistu soni ali jwakoseka kubatisidwa?

Mwanache jwakulingalinga kuti abatisidwe akusosekwa kwapikanilaga achinangolo ŵakwe. (Mase. 5:29; Akolo. 3:20) Pakwamba ya Yesu ali akwete yaka 12, Baibulo jikusati, “Ŵaliji mkwapikanila [achinangolo ŵakwe].” (Luk. 2:51) Yili yisyene kuti nganaŵa ajembecheye kuti mwanache jwawo chatendeje yiliyose mwamlama. Nambo mwanache jwakusachilila kubatisidwa chachilingalinga kuya chisyasyo cha Yesu soni chachimanyikwa kuti akusapikanila achinangolo ŵakwe.

Jwalakwe chachilosyasoni chidwi chakulijiganya usyesyene wa m’Baibulo. (Luk. 2:46) Ana mwanache jwawo akusasaka kusimanikwa pa misongano soni kujigala nawo mbali? (Sal. 122:⁠1) Ana akusasachilila kuti aŵalanjeje Baibulo mwakutamilichika soni kutenda lijiganyo lyapajika?​—⁠Mat. 4:⁠4.

Mwanache jwakwawula pasogolo kuti abatisidwe akusalingalinga kuŵika yindu yausimu pamalo gandanda. (Mat. 6:33) Akusamanyilila kuti akwete udindo wakwasalila ŵane ya chikulupi chakwe. Akusatenda nawo mbali syakulekanganalekangana sya utumiki soni ngakusatenda sooni kwamanyisya achitichala soni achimjakwe ŵakusukulu kuti ali jwa Mboni sya Yehofa. Papochele ngani mu Msongano wa Utumiki ni Umi wa Chiklistu akusajikosechela soni kujiŵecheta chenene.

Jwalakwe akusalingalingasoni kuŵa jwachasa mu ndamo mwakuŵambala kunguluka ni ŵandu ŵakusakala. (Mis. 13:20; 1 Akoli. 15:33) Yeleyi yikusawonechela mu yindu yakusanonyela mpela nyimbo, mafilimu, mapologalamu ga pa TV, maseŵelo ga pa kompyuta, soni mwakusakamulichisya masengo Intaneti.

Ŵandu ŵajinji ŵakamulichisye masengo yindu yele achinangolo ŵawo ŵajiganyaga, ŵawutesile usyesyene kuŵa wawowawope, soni ŵaŵajilwe kubatisidwa ali ŵachinandipile. Yehofa ŵape upile pakwakamuchisya ŵanache ŵawo kuti aŵajilwe kutenda chindu chakusosekwa mnopechi pa unasi wawo ni Yehofa.

Utenga kwa Jwakulalichila Jwangabatisidwa:

Uli upile wekulungwa kutumichila ni mpingo mpela jwakulalichila jwangabatisidwa. Tukwayamichila ligongo lya kwawula kwawo pasogolo mwausimu. Ammanyi Mlungu mwakulijiganya Maloŵe gakwe, soni akulupilile yilanga yakwe.​—⁠Yoh. 17:3; Ahe. 11:⁠6.

Komboleka kuti mkanatande kulijiganya ni Mboni sya Yehofa, ŵaliji mu gulu jine ja dini kapena nganaŵa mu dini jilijose. Kapenasoni ŵatendaga yindu yine yangakamulana ni malamusi ga m’Baibulo. Nambo sambano alosisye chikulupi chawo mwakupitikuka mtima, gopolela kulitendela chanasa ligongo lya yakusakala yaŵatendaga kala. Alosisyesoni chikulupi chawo mwakuwujila, gopolela kuleka litala lyakusakala ni kusimichisya mtima kutenda yakuŵajilwa m’meso mwa Mlungu.​—⁠Mase. 3:⁠19.

Mwine ŵatandite kugamanyilila Malemba ga Mlungu “kutandilila pimŵaliji mwanache.” Myoyo yakamuchisye kuti akatenda yindu yangaŵajilwa Aklistu, soni yakulemwa yekulungwa. (2 Tim. 3:15) Alijiganyisye kana yakutenda ya achimjawo ni yindu yine yakusakala m’meso mwa Yehofa. Alosisye chikulupi pakwawusya pasogolo kulambila kusyesyene, soni mwakwasalila ŵane yikulupi yawo ya Chiklistu. Alijiganyisye yejinji mu utumiki wa Chiklistu. Sambano asagwile jika kutumichila Yehofa mpela jwakulalichila jwangabatisidwa.

Mulimosemo, chinga aŵele mkulijiganya matala ga Yehofa kutandilila ali mwanache kapena ammanyilile jwalakwe ali akusile, komboleka kuti akuganichisya yindu yiŵili yakulosya kwawula kwawo pasogolo mwausimu, yayili kulipeleka ni kubatisidwa. Mundu akusalipeleka kwa Yehofa mwakumyichila mwipopelo ni kumsalila yasagwile kutenda kuti chamtumichileje jwalakwe ni mtima wosope mpaka kalakala. (Mat. 16:24) Pakulosya kulipeleka kweleko, mundu akusabatisidwa m’mesi. (Mat. 28:​19, 20) Mundu palipeleche soni kubatisidwa, akusaŵa jwakutumichila jwa Yehofa Mlungu. Welewutu uli upile wekulungwa mnope!

Mwakamulana ni yaŵalijiganyisye m’Baibulo, komboleka kuti chasimaneje ni yakusawusya yakulekanganalekangana. Akumbuchile kuti Yesu ali agambile kubatisidwa kwene, ‘msimu wamlongolele kwawula m’chipululu kuti akalinjidwe ni Satana.’ (Mat. 4:⁠1) Panyuma pa ubatiso wawo mpela jwakumkuya Klistu, komboleka kuti tachipitilisya kusimana ni yakulingwa. (Yoh. 15:20) Yakulingwayi yichiyika m’matala gakulekanganalekangana. Ŵamwiŵasa mwawo komboleka kwasisyaga. (Mat. 10:36) Achimjawo ŵakusukulu, ŵakumasengo kapena ŵane ŵaŵakungulukaga nawo komboleka kwanyosyaga. Nambo ndaŵi syosope akumbuchileje maloŵe ga Yesu gagakusimanikwa pa Maliko 10:​29, 30 gakuti, “Kusyene ngumsalila kuti, jwalijose jwalesile mangwakwe, kapena achalongo achimjakwe, kapena mamagwe, kapena babagwe, kapena ŵanache ŵakwe, kapena migunda ligongo lya une, soni ligongo lya ngani syambonesi, jwalakwejo tachipochela yosopeyo yejinji, pachilambo chapasi panopano. Tachikola mangwakwe gejinji, achalongo achimjakwe, mamagwe, ŵanache ni migunda, nambo mwa yisawusyo yejinji. Nambo pasogolo pakwe tachipochela umi wangamala.” Myoyo apitilisye kulingalinga kuŵa pa unasi ni Yehofa, soni kutenda yindu mwakamulana ni malamusi gakwe gakulungama.

Pachachisaka kubatisidwapo, chachisosekwa kumsalila jwakulondesya masengo ga achakulungwa. Yiwusyo yayili kusogoloku chachiyikamulichisya masengo achakulungwa pakukambilana ni wawojo kuti amanyilile naga akuŵajilwa kubatisidwa. Komboleka kutanda kosechela yiwusyoyi pakutenda lijiganyo lyawo lyapajika.

Pakukosechela kukambilanaku, akole ndaŵi jakuŵalanga ni kulola Malemba gagakamwile maloŵe. Naga akusaka, komboleka kulemba yakusaka kuyikamulichisya masengo m’bukuji kapena pane palipose. Komboleka kamulichisya masengo yalembileyo pandaŵi jakukambilana ni achakulungwa ŵa mumpingo. Naga ngakupikanichisya chiwusyo chine, komboleka kumwusya jwakwajiganya Baibulo kapena achakulungwa ŵa mumpingo.

Pakukambilana ni achakulungwa, akaganisyaga kuti akusosekwa kwanga ni maloŵe gejinji. Kwanga mwachindunji, soni kamulichisya masengo maloŵe gawo kuli kwambone. Yili yambonesoni kuti pakwanga yiwusyo yejinji asaleje lilemba lya m’Baibulo limo kapena gaŵili gagakukamulana ni yakwangayo.

Naga nganaŵe kumanyilila mwakwanila yijiganyo yandanda ya m’Baibulo, achakulungwawo chachilinganyasoni yakuti apochele chikamuchisyo kuti akomboleje kwanga m’maloŵe gawo pakulosya kuti akumanyilila chenene Malemba, soni kuti chaŵajilwe kubatisidwa msogolo.

[Maloŵe kwa achakulungwa ŵa mumpingo: Yampaka akuye pakukambilana ni jwakusaka kubatisidwa yikusimanikwa pa mapeji 208-212.]