Ana Mpaka Aŵe Paunasi ni Mlungu Chamtuli?

1. Ana Mlungu akusapikanila mapopelo ga ŵandu wosope?

Mlungu akwaŵenda ŵandu ŵa mitundu josope kuti amŵandichile mwipopelo. (Salimo 65:2) Nambope, jwangapikanila, kapena kwitichisya, mapopelo gosope. Mwachisyasyo, Mlungu komboleka ngapikanila mapopelo ga jwamlume jwakwatendela ngalwe ŵamkwakwe. (1 Petulo 3:7) Ayisalayeli paŵatendaga yakusakala, Mlungu nganapikanilaga mapopelo gawo. Yisyene, lipopelo lili upile. Mlungu akusakunda mapopelo atamose ga ŵakulemwa naga apitikwiche mtima.​—Aŵalanje Yesaya 1:15; 55:7.

Alolele fidiyo jakuti Ana Mlungu Akusapikanila Mapopelo Gosope?

2. Ana tupopeleje chamtuli?

Lipopelo lili mbali jimo jatukusamchimbichisya Mlungu. Myoyo tukusosekwa kupopelaga kwa Mkupanganya jwetu jwali Yehofa. (Mateyu 4:10; 6:9) Nambosoni pakuŵa tuli ŵangali umlama, tukusosekwa kupopela kupitila mu lina lya Yesu ligongo jwawile ligongo lya yakulemwa yetu. (Yohane 14:6) Yehofa jwangasaka kuti m’weji tuwilisyeje mapopelo gakutenda kumbuchila kapena gakulemba. Akusasaka kuti tupopeleje kutyochela mumtima.​—Aŵalanje Mateyu 6:7; Afilipi 4:6, 7.

Mkupanganya jwetu komboleka kupikana atamose mapopelo gatukuŵecheta mu nganisyo mwetu mwangakoposya maloŵe. (1 Samueli 1:12, 13) Komboleka kupopela kwa Mlungu ndaŵi jilijose, mpela kundanda kwa lisiku soni kumbesi kwa lisiku, pandaŵi ja chakulya, soni patusimene ni yakusawusya.​—Aŵalanje Salimo 55:22; Mateyu 15:36.

3. Ligongo chichi Aklistu akusasongana pampepe?

Kuŵa paunasi ni Mlungu kuli kwakusawusya ligongo tukutama ni ŵandu ŵakusoŵa chikulupi mwa Mlungu, soni ŵakusanyosya yasasile Mlungu pakwamba ya chilambo chapasi cha mtendele. (2 Timoteo 3:1, 4; 2 Petulo 3:3, 13) Myoyo tukusosekwa kulimbikasyana ni ŵakulupilila achimjetu kupitila m’misonganoji.​—Aŵalanje Ahebeli 10:24, 25.

Kunguluka ni ŵandu ŵakusamnonyela Mlungu kukusatukamuchisya kuŵa paunasi ni jwalakwe. Misongano ja Mboni sya Yehofa jikusakamuchisya kuti ŵane atulimbikasye.​—Aŵalanje Aloma 1:11, 12.

4. Ana mpaka aŵe paunasi ni Mlungu chamtuli?

Kuganichisya mnope yatulijiganyisye m’Maloŵe gakwe komboleka kutukamuchisya kuŵa paunasi ni Yehofa. Tuganichisyeje yampaka tulijiganye kutyochela ku yakusatenda, chikamuchisyo chakwe, soni yilanga yakwe. Kuganichisya soni kupopela mpaka yitukamuchisye kuyamichila chinonyelo soni lunda lwa Mlungu.​—Aŵalanje Yoswa 1:8; Salimo 1:1-3.

Komboleka kuŵa paunasi ni Mlungu naga tukumkulupilila. Nambo chikulupi chili mpela chindu chaumi chachikusasaka kuchilisya. Achilisyeje chikulupi chawo ndaŵi ni katema mwakuganichisyagasoni magongo gagakwatendekasya kola chikulupi.​—Aŵalanje Mateyu 4:4; Ahebeli 11:1, 6.

5. Ana kuŵa paunasi ni Mlungu mpaka kwakamuchisye chamtuli?

Yehofa akusiŵasamalilaga ŵandu ŵakusamnonyela. Komboleka kwachenjela ku chilichose champaka chisokonasye chikulupi chawo ni chembecheyo chawo cha umi wangamala. (Salimo 91:1, 2, 7-10) Jwalakwe akusatukalamusya ku yitendo yampaka yijonanye umi wetu, soni kututendekasya kuŵa ŵangasangalala. Yehofa akusatujiganya ndamo syambone syatukusosekwa kola pa umi wetu.​—Aŵalanje Salimo 73:27, 28; Yakobo 4:4, 8.