Kwasa Upile Wakutama mu Paladaiso

KALAKALA Mlungu mkanapanganye ŵandu, ŵatandite kupanganya misimu jangawoneka ni meso, jajikusakolanjikwa kuŵa malayika. Mu mgunda wa Edeni, lilayika lyakupanduka lilyatandite kolanjikwa kuŵa Satana Jwakulambusya, lyamlambwisye Hawa mwakumnyenjelela kuti alye cisogosi ca m’citela ciŵalamwile Mlungu kuti akalya.

Satana mwakulitendekasya lijoka kuŵeceta, ŵalosisye kuti Mlungu akumsisila jwamkongwejo ni ŵamkwakwe cindu cine cakwe cakusosekwa mnope. Lilayikali lyamsalile Hawa kuti jwalakwejo ni ŵamkwakwe ngaŵa mkuwa ali alile cisogosi ciŵalekasisye Mlungu cila. Mwakutenda yeleyi Satana ŵamjimbile magambo Mlungu gakwalambusya ŵanace Ŵakwe. Jwakulambusyaju ŵatendekasisye ŵandu kuti ayiwoneje kuti naga ngakupikanila Mlungu, yindu ciyajendeleje cenene, soni caŵe ŵakusengwa. Nambo welewu waliji unami. Soni wele unamiwu waliji wandanda pacilambo capasi. Ngani jisyesyene jaliji jakwamba ya ulamusi wekulungwa wa Mlungu, kuti naga Mlungujo akuŵajilwa kulamulila, soni naga akusalamulila mwacilungamo, soni mwakwanonyela ŵane.

Hawa ŵakulupilile unami wa Satana. Ŵatandite kumbila cisogosi cila, ni mpakana ŵalile cisogosico. Kaneko ŵapele ŵamkwakwe, ni ŵalile nombe nawo. Mwakutenda yeleyi ŵaŵele ŵandu ŵaulemwa. Kutenda yeleyi kwaliji kupanduka, atamose kuti kwawonekaga mpela cindu camnono. Mwakusagula mele kasa lilamusi lya Mlungu, Adamu ni Hawa ŵakanile ulamusi wa Mkupanganya juŵapele cilicose, yimpepe ni umi wangali ulemwa.

Mlungu ŵajelwisye ŵandu ŵakupandukawo, ligongo lya yitendo yawo. Ŵasasile ya kwisa kwa Mbeju, kapena kuti Mkulupusyo, jucacimjonanga Satana, jwakukolanjikwa kuŵa lijoka. Mlungu ŵakokweye cilango ca ciwa ca Adamu ni Hawa kwa kandaŵi. Mwakutenda yeleyi, ŵalosisye canasa kwa ŵanace ŵa jemanjaji, ŵaŵaliji mkanapagwe. Ŵanaceŵa ŵaliji ŵakomboleka kola cembeceyo ligongo lya Jwele Mlungu juŵaliji jwakuti cacimtumisya pa cilambo capasi, kukulinganya yakusakala yosope yayayice ligongo lya kupanduka kukwatendece mu Edeni. Ana Mlungu akakwanilisye catuli lisosa lyakweli pakwamba ya Mkulupusyo juŵaliji mkwisaju? Soni jwakamtumisye kwisa pacilambo capasiju ŵaliji Nduni? Yeleyi yamanyice pakwajendelecelaga kulemba Baibulo.

Mlungu ŵakopwesye Adamu ni Hawa mu Paladaiso. Kusa kwa mgunda wa Edeniwu, jemanjaji ŵasosekwe kuti akamuleje mnope masengo gakulima kuti apateje yakusosekwa pa umi wawo. Kaneko Hawa ŵakwete msigo ni kuŵeleka Kayini, juŵaliji mwanace jwandanda jwa Adamu ni Hawa. Liŵasali lyakwetesoni ŵanace ŵane ŵacalume ni ŵacakongwe, kupwatikapo Abele, soni Seti juŵaliji nangolo jwa Nowa.

—Nganiji jityocele pa Genesis caputala 3 mpaka 5; Ciunukuko 12:9