MBALI 1
Mkupanganya Akumpa Mundu Paladaiso
Mlungu akupanganya yindu yosope yakuwoneka ni meso, soni akupanganya umi pacilambo capasi. Akupanganya ŵandu ŵangali ulemwa, jwamlume ni jwamkongwe, ni kwaŵika mu mgunda wakusalala mnope, soni akwapa malamusi gakuti agakuyeje
MALOŴE gakuti: “Pandanda, Mlungu ŵapanganyisye kwinani ni cilambo capasi,” gali gakumanyika mnope kupunda maloŵe gane gosope. (Genesis 1:1) Kutyocela m’maloŵe gakupikanika cenenega, Baibulo jikutumanyisya ya Mundu jwakusosekwa mnope m’Malemba gosope Geswela, jwali Yehofa, Mlungu jwamaciligose. Maloŵe ga mu ndime jandandaji gakulosya kuti Mlungu ni jwali Mkupanganya jwa yakupanganyikwa yosope yakuwoneka ni meso, soni cilambo catukutamaci. Kaneko ndime syakuyicisya sikusala kuti mundaŵi syelewu syakuyicisyana, syakusikolanga kuŵa masiku, Mlungu ŵalinganyisye cilambo capasici kuti ciŵe malo getu gakutama. Ni ŵapanganyisye yindu yosope yakusangalasya yayili m’cilambo mwetu.
Cindu cakupunda yine yosope ciŵapanganyisye Mlungu pacilambo capasi caliji mundu. Mundu ŵampanganyisye m’cilandanicisyo ca Mlungu, jwakomboleka kulosya ndamo sya Yehofa, cisawu cinonyelo cakwe, soni lunda. Mlungu ŵampanganyisye mundu pakamulicisya masengo litaka. Mlungu ŵamkolasile munduju kuŵa Adamu, ni ŵam’ŵisile mu paladaiso, uwaliji mgunda wa Edeni. Mlungu ni juŵapandile mgunda welewu, aciwumelesyaga yitela yakusalala yakusogola yisogosi.
Mlungu ŵakuweni kusosekwa kwakuti mundu akole ŵamkwakwe. Pakamulicisya masengo mbalati jimo ja Adamu, Mlungu ŵapanganyisye jwamkongwe ni kwisa najo kwa jwamlumejo kuti aŵe ŵamkwakwe, ni kaneko ŵampele lina lyakuti Hawa. Ligongo lyakusangalala, Adamu ŵaŵecete maloŵe gakuti: “Aju sambano ni liwupa lya maupa gangu, soni mnowu wa mnowu wangu.” Mlungu ni ŵatite kuti: “Ni ligongo lyakwe jwamlume cacaleka baba ni mama ŵakwe, ni kulipwatika kwa ŵamkwakwe, nipo caciŵa cilu cimo.”—Genesis 2:22-24; 3:20.
Mlungu ŵapele Adamu ni Hawa malamusi gaŵili. Candanda ŵasalile kuti alimileje ni kusamala malo gawo gakutama, soni pambesi pakwe acigumbasye cilambo capasi ni ŵanace ŵawo. Caŵili ŵasalile kuti mu mgunda wosopewo akalya cisogosi ca citela cimope basi, “citela cakumanyisya yambone ni yakusakala.” (Genesis 2:17) Ŵasalile kuti naga ngakupikanila caciwa. Kutyocela m’malamusi gelega Mlungu ŵampele jwamlume ni jwamkongwejo upile ŵakulosya kuti akum’wona Mlungu kuŵa Jwakulamulila jwawo. Mwakupikanila malamusiga akalosisye cinonyelo ni kuyamicila kwawo. Jemanjaji ŵakwete magongo gambone gakuŵela ŵakupikanila ulamusi wakwe wambonewo. Paliji pangali cakulemweceka pa umi wa jemanjaji. Baibulo jikutusalila kuti: “Nipo wayiweni Mlungu yosope yiŵapanganyisye kuti yaliji yambone nditu.”—Genesis 1:31.
—Nganiji jityocele m’buku ja Genesis, macaputala 1 ni 2.