Ŵandu Akukulupuka Cikumba

ŴANDU paŵatandite kutupa, ulemwa ni kusakala yatandite kuwanda mwacitema pacilambo capasi. Enoki jwakulocesya juŵapali jika pandaŵijo, ŵagombelecesye kuti Mlungu lisiku line cacajonanga ŵandu ŵakusakala. Nambope kusakala kwajendelecele, soni kwapundile mnope. Malayika gane gampanducile Yehofa ni galesile malo gawo gakwinani. Ligongo lyakusaka kwanilasya yakusaka yawo gawete yilu ya ŵandu ni kwisa kukulombela acakongwe pacilambo capasi. M’maulombela gangaŵajilwaga mwapagwaga ŵanace ŵamacili mnope ŵaŵakolangaga kuti Anefili, soni ŵatendekasyaga kuti kuwulasyana ni kuwulagana kuyice pakusakala mnope. Mlungu yamsakalisye mnope pakuyiwona kuti cilambo cakwe ciŵacipanganyisye cisakele.

Enoki paŵawile, papali mundu jwine juŵatendaga yakulekangana ni ŵandu ŵakusakala. Lina lyakwe ŵaliji Nowa (Nuhu). Jwalakwejo ni liŵasa lyakwe ŵalimbicilaga kutenda yambone pameso pa Mlungu. Paŵaganisisye Mlungu yakwajonanga ŵandu ŵakusakala ŵa ndaŵi jeleji, jwalakwe ŵasacile kumkulupusya Nowa yimpepe ni yinyama. Ni Mlungu ŵamsalile Nowa kuti ataŵe combo, cacaŵajilwe kuŵa ciwato cekulungwa mnope cakuwoneka mpela libokosi. Mwelemo ni mwakakulupucile Nowa ni liŵasa lyakwe, yimpepe ni mitundu jejinji ja yinyama pandaŵi ja cikumba ca pacilambo cosope capasi. Nowa ŵapikanile Mlungu. Paŵaliji mkutaŵa combo kwa yaka 40 kapena 50, Nowa ŵalijisoni ‘mkulalicila ya cilungamo.’ (2 Petulo 2:5) Jwalakwe ŵagombelecesye ŵandu pakwamba ya kwisa kwa cikumbaco, nambo nganampikanila. Kaneko jayice ndaŵi jakuti Nowa ni liŵasa lyakwe ajinjile mu combomo yimpepe ni yinyama. Mlungu ni ŵawugele litanga lya combo cila. Kaneko wula jayice.

Wula jayice jamacili kwa masiku 40 musi ni cilo mpaka cilambo cosope capasi catiŵile. Ŵandu ŵakusakala wosope ŵamasile kuwa. Kaneko miyesi jili jipite, mesi pagatandite kupwa, combo cila cajile kusakama petumbi. Pandaŵi jiŵakopokaga m’combo, Nowa ni liŵasa lyakwe yimpepe ni yinyama yila ŵaliji ali amasile caka camtundu. Pakulosya kutogolela, Nowa ŵapelece mbopesi kwa Yehofa. Mlungu ni ŵamsalile Nowa ni liŵasa lyakwe kuti Jwalakwe ngasajonangasoni yaumi yosope pacilambo capasi ni cikumba. Mlungu pakusaka kupeleka umboni wakuwoneka ni meso, ŵaŵisile ukunje wa ula kuti wakumbusyeje maloŵe gakulimbikasya gaŵasalilego.

Cikumba cili cipite, Mlungu ŵapelesoni ŵandu malamusi gasambano. Ŵakundile kuti alyeje nyama. Nambo ŵalekasisye kulya miyasi. Mlungu ŵalamwilesoni yisukulu ya Nowa kuti yitameje pacilambo cosope capasi, nambo ŵane nganapikanila. Mwakulongolelegwa ni Nimulodi ŵandu ŵakamulene ni kutanda kutaŵa sanja jekulungwa mnope mu msinda wa Babele, wawatandite panyuma pakwe kolanjikwa kuti Babelo. Lisosa lyawo lyaliji kasa mele lilamusi lya Mlungu lila, lyakuti atameje pacilambo cosope capasi. Nambo Mlungu ŵalepelekasisye ŵakupandukaŵa, mwakusokonesya ciŵeceto cawo ciŵaŵecetaga ni kwatendekasya kuti aŵeceteje yiŵeceto yakulekanganalekangana. Ligongo lyangapikangana pakuŵecetana, ŵalesile kutaŵa sanjajo ni ŵapwilingene wosope.

—Nganiji jityocele m’buku ja Genesis, macaputala 6 mpaka 11; Yuda 14, 15