Lijiganyo 4

Mutimlijiganicisye ya Mlungu

Komboleka kulijiganya pakwamba ya Yehova mwakuŵalanga Baibulo. Kalakalako Mlungu ŵasagwile ŵandu ŵane kuti alembe maloŵe gakwe. Maloŵe gaŵalembilega gakuŵilanjikwa kuti Baibulo. Moŵa agano tukusalijiganyaga ya Mlungu mwakuŵalanga Baibulo. Baibulo jeleji jikuŵilanjikwasoni kuti Maloŵe ga Mlungu, ligongo lyakuti mwelemo alembile maloŵe ga Yehova, kapena kuti utenga wakwe. Mpaka tukulupilile yajikuti Baibulo, ligongo lyakuti Yehova jwangalambusya. “Mlungu ngaŵa kose jwakulambusya.” (Ahebeli 6:18) M’maloŵe ga Mlungu mwana usyesyene.—Yohane 17:17.

Baibulo jili jimo mwa mituka jambone mnope jakutupa Mlungu. Cili cisawu cikalata cakutumisya mtati kwa ŵanace ŵakwe ŵakusaŵanonyela. Jikusatusalila pakwamba yasimicisye Mlungu, yakucisinda cilambo capasici kuti ciŵe malo gakusangalasya kutama ga paladaiso. Jikusatusalila pakwamba ya yaŵatesile kalakala, yakutenda moŵa agano, soni ni yacacitenda m’bujo muno kwa ŵanace ŵakwe ŵakulupicika. Jikusatukamucisyasoni kumasya yakusawusya yatukusasimana nayo, ni kuti tukomboleceje kusangalala.—2 Timoteo 3:16, 17.

Mboni sya Yehova sili acimjakwe wa Mlungu; cacimkamucisya kuti mpikanicisye yajikwiganya Baibulo. Gambani kwasalila kuti mkusaka kulijiganya Baibulo. Ngakusalipisyaga mbiya. (Matayo 10:8) Soni cine ni cakuti mpaka m’ŵeje nawo pa misongano ja Ciklistu. Misongano’ji jikusatendekwa m’malo gakulambilila gakuŵilanjikwa kuti Nyumba ja Ucimwene. Mcisimanikwaga pa misongano ja Ciklistu, nikuti yejinji pakwamba ya Mlungu cimciyimanyilila mwacitema.

Mpaka mlijiganye ya Mlungu kutyocela mu yindu yayipanganyisye. Baibulo jikuti: “Mlungu ŵapanganyisye kwinani ni cilambo capasi.” (Genesis 1:1) Yehova paŵapanganyisye “kwinani,” ŵapanganyisyesoni lyuŵa. Ana sambano yeleyi yikutusalila cici pakwamba ya Mlungu? Yikutusalila kuti Yehova akwete macili gejinji. Ali jwalakwe pejo jwakakombolece kupanganya cindu camacili mnope cisawu mwaliŵelele lyuŵa. Yikutusalilasoni kuti Yehova ali jwalunda. Ligongo pasosecele lunda kuti apanganye lyuŵa, lyalikusatulusya macili ga moto, ni lilanguka. Soni macili gakwego ngagakusamala.

Yaŵapanganyisye Yehova yikulosya kuti jwalakwejo akusatunonyela m’weji. Mganicisye ya mitundu josope jakulekanganalekangana ja yisogosi yayili pacilambo capasi. Yehova akakombolece kwamba kutupanganicisya mtundu umope wa yisogosi—mwine ngatupanganicisya kwene atamose mtundu umo. M’malo mwakwe, Yehova ŵatupele mitundu jejinji ja yisogosi, yayili yakulekanganalekangana kuwoneka kwakwe, kukula kwakwe, mtundu wakwe, soni ni kanonye kakwe. Yeleyi yikulosya kuti Yehova nganagamba kuŵape Mlungu jwakutunonyela, nambosoni jwakupeleka ni jwaganisya cenene, soni jwambone mtima.—Salmo 104:24.