Lijiganyo 5

Acimjakwe ŵa Mlungu Cacitama mu Paladaiso

Paladaiso ngaŵa kuti caciŵa cisawu cilambo catukutama moŵa aganoci. Mlungu nganasakaga kuti cilambo capasici cigumbale ni yipwetesi, kulaga, ni yakudandaulisya. M’bujo muno, Mlungu cacitendesya cilamboci kuŵa paladaiso. Ana Paladaiso caciŵa jwati wuli? Kwende tulole yajikuti Baibulo:

Ŵandu ŵambone. Paladaiso caciŵa malo gakutama acimjakwe ŵa Mlungu. Caciŵa mkutendelana yambone jwine ni mjakwe. Caciŵa mkutama mwakamulana ni ndamo syacilungamo sya Mlungu.—Miyambo 2:21.

Yakulya yejinji. Mu Paladaiso muciŵa mwangali sala. Baibulo jikuti: “Mcilambomo muciŵa yagungula [kapena kuti, yakulya] yejinji.”—Salmo 72:16.

Nyumba syambone ni masengo gakusangalasya. M’cilambo ca Paladaiso, liŵasa lililyose licikola malo gakwegakwepe gakutama. Jwalijose cacikamulaga masengo gakusangalasya kusyesyene.—Yesaya 65:21-23.

Mtendele pacilambo cosope capasi. Ŵandu nganaŵasoni mkumenyana ni kuwila ku ngondo. Maloŵe ga Mlungu gakuti: “[Mlungu] akulekasya ngondo.”—Salmo 46:8, 9.

Umi wambone. Baibulo jikusimicisya kuti: “Ŵakutama mwelemo [mu Paladaiso] nganajila kuti: ‘Une ngulwala.’” (Yesaya 33:24) Soni pangali ŵacaciŵa ŵalemale, kapena ŵangalola, kapena ŵangapikana, kapenasoni ŵangaŵeceta.—Yesaya 35:5, 6.

Kumala kwa yipwetesi, yakudandaulisya, ni ciwa. Maloŵe ga Mlungu gakuti: “Ciwa ngasicipagwasoni, atamuno kulila malilo, kapena kulila kapena kuyiwona [yipwetesi], yindu yandanda yili yipite.”—Cibvumbulutso 21:4.

Ŵandu ŵakusakala kuciŵa kwangali. Yehova akusimicisya kuti: “Ŵakusakala cacakata mcilambomo. Ŵaciwembu cacatupula.”—Miyambo 2:22.

Ŵandu caciŵa mkunonyelana ni kucimbicisyana. Nganikuŵasoni ungali cilungamo, ulamusi wangalwe, kutunduka, ni uŵengani. Ŵandu caciŵa ŵakamulana, acitamaga mwakamulana ni ndamo syacilungamo sya Mlungu.—Yesaya 26:9.