Lijiganyo 3

Mkuŵajilwa Kulijiganya Pakwamba ya Mlungu

Kuti Mlungu aŵe mjenu, mkuŵajilwa kulijiganya ya jwalakwejo. Ana acimjenu akusalimanyilila ni kulikamulicisya masengo lina lyenu? Elo kwene. Mlungu nombe najo akusaka kuti mlimanye lina lyakwe, soni kuti mlikamulicisyeje masengo. Lina lya Mlungu ni Yehova. (Salmo 83:18; Matayo 6:9) Mkuŵajilwasoni kuyimanya yayikusamnonyela, ni yakusaŵengana nayo. Mwamanye ŵali acimjakwe, ni ŵali acimmagongo ŵakwe. Pakusapita ndaŵi kuti mummanyilile cenene mundu. Baibulo jikuti cili calunda kola ndaŵi jakulijiganya pakwamba ya Yehova.—Aefeso 5:15, 16.

Acimjakwe ŵa Mlungu akusatenda yayikusamnonyelesya jwalakwejo. Mganicisye ya acimjenu. Naga mkwatendela yakusakala, ni kutenda yindu yakusaŵengana nayo, ana mpaka ajendelecele kuŵa acimjenu? Mwaciwonecele yeleyo ngakomboleka! Ni naga mkusaka kuti Mlungu aŵe mjenu, mkusacikwa kutenda yayikusamsangalasya.—Yohane 4:24.

Nganisiŵa dini syosope syampaka situtendekasye kuŵa mjakwe jwa Mlungu. Yesu jwali mjakwe jwapamtima jwa Mlungu, ŵaŵecete ya matala gaŵili. Litala line lili lyalikulungwa nipo lyana ŵandu ŵajinji. Litala lyelelyo likulongolela ku konasika. Litala linelyo lili lyamwana, nipo ŵandu ŵakupita mwelemo ali ŵakuŵalanjika. Litala lyelelyo likulongolela ku umi wangamala. Yeleyi yigopolela kuti naga mkusaka kuti Mlungu aŵe mjenu, mkusosekwa kulijiganya pakwamba ya kalambile ka Mlungu kakulondola.—Matayo 7:13, 14.