Ana Kuŵengana Kuchimala?—Ana Baibulo Jikusasala Yamti Uli?

Masiku agano uŵengani uli palipose. Mwamti ŵandu akusiŵaŵenga achimjawo ligongo lya mtundu wawo, dini jawo, ligongo lyakuti ali jwamlume kapena jwamkongwe, soni mwine pamagongo gane. Yeleyi yikusatendekasya kuti ŵandu atameje mwawoga soni akusalagasika nganisyo. Ŵajinji akusayika pakuwa kwene.

Baibulo jasasile mkanipaŵe kuti ndaŵi jatukutamaji pachipagwa ŵandu ŵachachiŵa “ŵakogoya, ŵanganonyela yindu yambone,” soni “ŵanganonyela achalongo achimjawo.” (2 Timoteyo 3:1-5) Myoyo ana uŵengani uchimala? Ana Baibulo Jikusasala Yamti uli?

Yayichitendekwa kuti kuŵengana kumale

Baibulo jikusatusalila kuti Mlungu mpaka amasye uŵengani, mwamti jwalakwe chachitenda myoyo.

• “Ŵandu ŵakusakala chachajonanga . . . Nambo ŵandu ŵakufasa chachipochela chilambo chapasi, Soni chachisangalalaga mnope ni mtendele wejinji.” (Masalimo 37:9-11) Mlungu ngasakunda kuti ŵandu ŵachiwawa apitilisye kwawulasya achimjawo.

• “[Mlungu] chachipukuta misosi josope m’meso mwa ŵanduwo, mwamti chiwa ngasichipagwasoni. Ngasipapagwasoni yakutesya chanasa, kulila kapena kupikana kupweteka.” (Chiwunukuko 21:4) Mlungu chachityosya yindu yosope yayikusayika ligongo lya kupikana kupweteka soni kulagasika nganisyo.

• “Kuchiŵa kwimuka.” (Masengo 24:15) Mlungu chachajimusya ŵandu mamiliyoni gejinji kuti aŵesoni ni umi, kupwatikapo ŵandu ŵaŵawile ligongo lya yachiwawa.

Yampaka tutende kuti tumalane ni uŵengani

Baibulo jangagamba kusalape ya chembecheyo nambo jikusasalasoni yatukusosekwa kutenda apano kuti tumalane ni uŵengani. Mpaka apate kwanga kwakutyochela m’Baibulo pa yiwusyo yakusosekwa mnope yakuyichisyayi:

• Ana mpaka tutende chichi kuti tuleche kwaŵenga ŵane yayikusatandikasya yachiwawa? Alole yajikusajiganya Baibulo kutyochela m’magasini ga Sanja ja Mlonda ja mtwe wakuti “Yampaka Tutende Kuti Tuleche Kwaŵenga Ŵane.”

• Ana ligongo chichi Mlungu akuyikunda yipwetesi kupitilisyape? Apate kwanga kwakupikanika chenene kwakutyochela m’Baibulo mu fidiyo jakuti, Ana Ligongo Chichi Mlungu Akuyikunda Yipwetesi?