Ana Mbiya Uli Mchiga Wayakusakala Yosope?

Kwanga kwakutyochela m’Baibulo

Iyayi. Baibulo jangasala kuti mbiya sili syakusakala kapena kuti ni syasikusatandikasya yakusawusya yosope. Yakusaŵecheta ŵandu ŵajinji yikusalosya kuti “mbiya uli m’chiga wa yakusakala yosope.” Nambo jemanjaji ŵangapikanisya yajikusalala Baibulo pangani ja mbiya. Baibulo jikusati, “kunonyela mbiya uli m’chiga wa yakusakala yosope.”—1 Timoteo 6:10, Buku Jeswela.

Ana Baibulo jikusasala yamtuli pangani ja mbiya?

Baibulo jikusati naga mundu akukamulichisya masengo mbiya mwakuŵajilwa mpaka simkamuchisye nambosoni “kumchinjilichisya.” (Jwakulalichila 7:12) Nambosoni Mlungu akusiŵamichila ŵandu ŵakoloŵa magasa ŵakusiŵakamuchisya ŵandu ŵane, kupwatikapo kwapa mbiya.—Misyungu 11:25.

Atamose yili myoyo, Baibulo jikusatukalamusya kuti tukanonyelaga mnope mbiya. Jikusati, “Mtima wenu ukaŵaga pa mbiya, nipo yele yimkweteyo, mjikutileje nayo.” (Ahebeli 13:5) Myoyo tukusosekwa kusiwonaga mwakuŵajilwa mbiya ligongo nganisiŵa simkamuchisye mundu kukola umi wambone. Mmalo mwakwe tukusosekwa kuŵa ŵakwikutila ni yindu yatukwete. Yine mwa yindu yakusosekwa mnope yili yakulya, yakuwala nambosoni pagona.—1 Timoteo 6:8.

**Ligongo chichi Baibulo jikusatukalamusya pangani ja kunonyela mbiya?**

Ŵandu ŵa umbombo ngasapata umi wangamala. (Aefeso 5:5) Yili myoyo ligongo lyakuti umbombo uli mpela kulambila mafano kapena kulambila kwa unami. (Akolose 3:5) Nambosoni ŵandu ŵa umbombo pakusaka kupata chindu ŵangakamulichisya masengo mfundo sya m’Baibulo. Pa Misyungu 28:20, pakusati, “jwakupunda kusachilila mnope kusichila mwachitema, ngasalepela kupochela chilango.” Jemanjaji akusatenda yakuti apate yindu mwachitema, akusatenda yindu mwachinyengo, akusasumula yindu ya ŵane, kwiŵa, kuwulaga nambosoni akusiŵasungaga ŵandu ŵane mwakwakanganichisya.

Atamose kuti ŵandu ŵane akusaganisya kuti kunonyela mbiya ngaŵa mkwatendekasya kuti aŵe ni ndamo syakusakala, nambope kukwete yakuyichisya yakwe. Baibulo jikusasala kuti, “Ŵandu ŵakusaka kusichila akusagwaga mkulingwa, akusasimanikwa kuti atanjile mu lwawu lwa yakusakala yejinji yakuloŵela nambosoni yakonanga.”—1 Timoteo 6:9.

Pangani ja mbiya, ana Baibulo jikusasala yamtuli yampaka yitukamuchisye?

Patukukola ndamo syambone soni kukuya yajikusasala Baibulo pangani ja mbiya, Mlungu chachisangalala nawe nambosoni chachitukamuchisya. Ŵandu ŵakusatenda yakumsangalasya Mlungu, jwalakwe akwasimichisya kuti, “Ngasinamleka kapena kumjasa kose.” (Ahebeli 13:5, 6) Jwalakwe akutusimichisyasoni kuti, “mundu jwakulupichika tachikola upile wejinji.”—Misyungu 28:20.

Malemba ga m’Baibulo pangani jakwamba mbiya

Jwakulalichila 7:12: ‘Sikumsamchinjilichisya mundu mbiya’

Ngopolelo jakwe: Mbiya mpaka simchinjilichisye mundu naga akusikamulichisya masengo mwakuŵajilwa.

Luka 12:15: “Atamose mundu akole yipanje yijinji, yeleyo ngaŵa kumkulupusya umi wa mundujo.”

Ngopolelo jakwe: Mbiya nganisiŵa syakusosekwa mnope pa umi wetu soni ngaŵa mkutukamuchisya kuti tukulupuche.

1 Timoteo 6:10: “Pakuti kunonyela mbiya uli mchiga wa yakusakala yosope. Ligongo lyakuŵika mtima pa mbiya, ŵandu ŵane ŵasochelele, ni kuleka litala lya chikulupusyo, nipo m’malo mwakwe ŵalijigalile yipwetesi m’mitima mwawo.”

Ngopolelo jakwe: Kola mbiya ngaŵa kwakulemwecheka. Nambo ŵakusanonyela mnope soni kutamila kusisosasosa sikusamjigalila yakupweteka yejinji mpela kusokonechela kwa ulombela nambosoni jwangakola chilu chambone ligongo lyakuti akusagamba kutamila kukamula masengo.

Ahebeli 13:5: “Mtima wenu ukaŵaga pa mbiya, nipo yele yimkweteyo, mjikutileje nayo.”

Ngopolelo jakwe: Mmalo mwakwamba kutamila kusosasosa mbiya tujikutileje ni yatukwete.

Mateyu 19:24: “Chili chindu chakusawusya kuti mundu jwakusichila akajinjile mu Uchimwene wa Mlungu kulekangana ni kuti ngamila njijile pebowo lya singano.”

Ngopolelo jakwe: Pa ndaŵi jine Yesu jwamsalile jwachinyamata jwine juŵaliji jwakusichila kuti aŵe jwakulijiganya jwakwe. Mnyamatajo jwakanile ligongo lyakuti jwanonyelaga chipanje chakwe. Ni Yesu jwasasile mwamachili kuti mundu jwakusanonyela mnope chipanje chakwe kupunda Mlungu, nganaŵa apatile umi wangamala.