Yampaka Atende Kuti Ajikutileje ni Yakwete

Akamuleje Masengo Mwakulimbichila

“Atande kamula masengo mwakulimbika ni kutenda yambone ni makono gakwe, kuti apate kandu kakwapa ŵakulaga.”—AEFESO 4:28.

Mlungu akusasaka kuti tukuwoneje kukamula masengo kuŵa kwambone. Yili myoyo, ligongo mundu jwakusakamula masengo mwakulimbichila, akusaŵa jwakusangalala. Jwalakwe akusakombola kulisamalila nambosoni kusamalila chenene liŵasa lyakwe. Akusakombolasoni kwakamuchisya ŵakulaga soni abwana ŵakwe akusamyamichila. Mundu jwakulimbichila, masengo ngagakumsamalila. Sonitu Malemba gakusasala kuti yakuyichisya yambone yayikusapagwa ligongo lyakulimbichila masengo uli “mtuka wa Mlungu.”—Jwakulalichila 3:13.

Atendeje Yindu Mwachilungamo

“Pakuti tukwete mtima wangali kandu kakuwusisya, nipo tusimichisye kutenda yosope mwachilungamo.”—AHEBELI 13:18.

Patukutenda yindu mwakuwona mtima, ŵandu akusatuchimbichisya, kutudalila, tukusakola mtendele wamumtima soni tukusagona lugono lwambone. Nambo ŵandu ŵangakulupichika yindu yangajendelaga chenene. Jemanjaji akusalaga mumtima soni akusatenda woga kuti mwine lisiku line chachikamulwa.

Akasinonyelaga Mnope Mbiya

“Mtima wenu ukaŵaga pa mbiya, nipo yele yimkweteyo, mjikutileje nayo.”—AHEBELI 13:5.

Kuti tupate yindu yakusosekwa paumi, tukusasosechela mbiya. Nambope, “kunonyela mbiya” kuli kwakogoya. Mundu pakusaka kuti akole mbiya syejinji mpaka amalileje ndaŵi soni machili gakwe gosope payeleyo. Kusosa mbiya kwamti myiyi, mpaka kusokonasye liŵasa, mundu mpaka alepeleje kupata ndaŵi jakunguluka ni ŵanache ŵakwe soni mwine mpaka ayikane pakulwala. (1 Timoteo 6:9, 10) Nambosoni mundu jwakusanonyela mnope mbiya mpaka atendeje yindu yachinyengo. Mundu jwine jwalunda jwatite, “Mundu jwakulupichika chachikola upile wejinji, nambo mundu jwakupunda kusachilila mnope kusichila mwachitema, ngasalepela kupochela chilango.”—Misyungu 28:20.

Asaguleje Majiganyo Gambone

‘Mlusunje lunda lusyesyene nambosoni ndamo jenu jakupakombola kuganisya chenenepe.’—MISYUNGU 3:21.

Majiganyo gambone mpaka gatukamuchisye kuti tuganisyeje chenene soni kuti tuŵe achinangolo ŵambone. Nambope yatukusalijiganya kusukulu nganiyiŵa yitupele yindu yosope yatukusasaka soni kutukamuchisya kuŵa ŵakusangalala. Kuti yindu yosope yatukusatenda yitujendeleje chenene, tukusasosechela majiganyo gakutyochela kwa Mlungu. Pakusala ya mundu jwakusampikanila Mlungu, Malemba gakusati “jwelejo akusapunda mu yosope yakusatenda.”—Salimo 1:1-3.