Ana Ubatiso Ukusagopolela Chichi?
Kwanga kwakutyochela m’Baibulo
Ubatiso kuli kumtiŵisya mundu mmesi ni kumchuwula.a Ni ligongo lyakwe Yesu jwabatisidwe mu lusulo lwa mesi gejinji. (Mateyu 3:13, 16) Nombenajo jwamlume jwine jwa ku Ifiyopiya jwasachile kubatisidwa ali agaweni mesi gejinji.—Masengo 8:36-40, NW.
Ngopolelo ja ubatiso
Baibulo jikusalandanya ubatiso ni kumsika mundu m’malembe. (Aloma 6:4; Akolose 2:12) Kum’batisya mundu mmesi yikusaŵa mpela kuti mundujo awile, alesile umi wakwe wakala ni akutanda umi wasambano mpela Mklistu jwakulipeleka kwa Mlungu. Mlungu jwatesile yakuti mundu abatisidweje kuti akole chikumbumtima chambone ligongo lya kukulupilila mbopesi ja Yesu Klistu. (1 Petulo 3:21) Ni ligongo lyakwe Yesu ŵasalile ŵakulijiganya ŵakwe kuti akusosekwa abatisidweje.—Mateyu 28:19, 20.
Ana Kubatisidwa mmesi kukusatyosya ulemwa wosope?
Iyayi. Baibulo jikusajiganya kuti yakulemwa yetu mpaka yityoche ligongo lya miyasi ja Yesu. (Aloma 5:8, 9; 1 Yohane 1:7) Nambope mundu kuti apindule ni mbopesi ja Yesu, akusosekwa kumkulupilila jwalakwe, kuchenga umi wakwe ni kutendaga yindu mwakamulana ni yaŵajiganyisye Yesu kaneko ni kubatisidwa.—Masengo 2:38; 3:19.
Ana Baibulo jikusajiganya ya ubatiso wa ŵanache?
Iyayi. Baibulo jangajiganya ya ubatiso wa ŵanache. Dini sine sikusatenda mwambo wakwabatisya ŵanache (mwakwataga mesi pamtwe) ni kwapa lina lyasambano. Ubatiso wa Chiklistu uli wa ŵandu ŵakusapikanichisya soni kukulupilila ”ngani syambone syakusala ya Uchimwene wa Mlungu.” (Masengo 8:12) Yikusapwatikapo kupikana maloŵe ga Mlungu, kugajitichisya kaneko ni kupitikuka mtima. Mwanache ngaŵa mkutenda yeleyi.—Masengo 2:22, 38, 41.
Kupwatika pelepa, Baibulo jikusalosya kuti Mlungu akusiŵawona ŵanache Ŵachiklistu kuŵa ŵaswela ligongo lya chikulupi cha achinangolo. (1 Akolinto 7:14) Yikaŵe kuti ubatiso wa ŵanache waliji wakuŵajilwa, nikuti ŵanacheŵa ngamkanaŵa ŵaswela ligongo lya achinangolo ŵawo.b
Nganisyo syaunami syakwamba ubatiso wa Chiklistu
Nganisyo syaunami: Kumtaga mundu mesi pa mtwe lili litala lyakata mmalo mwa kumtiŵisya mmesi.
Yisyesyene yakwe: Ubatiso uliwose wakusawusala m’Baibulo ukusakwayana ni kumtiŵisya mundu mmesi. Mwachisyasyo, Filipi jwajinjile mmesi kuti akam’batisye jwamlume jwa ku Ifiyopiya. Kaneko jemanjaji ‘ŵachuwiche mmesi mula.’—Masengo 8:36-39.c
Nganisyo syaunami: Baibulo jikusalosya kuti pandaŵi jele ŵandu ŵa muliŵasa lyosope ŵabatisidwaga, nombe ŵanache ŵabatisidwagasoni. Mwachisyasyo, pakwamba ya jwakulolela akaidi jwa ku Filipi, Baibulo jikusasala kuti, “Jwalakwe pampepe ni wosope ŵa mwiŵasa mwakwe ŵabatisidwe.”—Masengo 16:31-34.
Yisyesyene yakwe: Ngani jakwamba kupitikuka mtima kwa jwakulolela akayidi jula jikusalosya kuti ŵandu ŵaŵabatisidwe ŵala ŵapikanichisye “maloŵe ga Mlungu” soni jemanjaji “ŵasangalele mnope.” (Masengo 16:32, 34) Myoyo, pelepa mpaka tusale kuti ŵanache ŵa m’nyumba ja jwakulolela akayidi jula nganabatisidwa nawo, ligongo ngamkanapikanichisya maloŵe ga Mlungu.
Nganisyo syaunami: Yesu jwajiganyisye yakwamba ubatiso wa ŵanache pajwatite Uchimwene uli wa jemanjaji.—Mateyu 19:13-15; Maliko 10:13-16.
Yisyesyene yakwe: Yesu pajwasalaga maloŵega nganaŵechetaga ngani jakwamba ubatiso. M’malo mwakwe jwagopolelaga kuti ŵandu ŵakuŵajilwa kuja kwinjila mu Uchimwene wa Mlungu akusosekwa kuŵa mpela ŵanache, ŵakulinandiya soni ŵangasawusya kwajiganya.—Mateyu 18:4; Luka 18:16, 17.
a Mwakamulana ni buku jine maloŵe ga Chigiliki gaŵagagopolele kuti “ubatiso” gakusatyochela ku maloŵe gakuti “kuloŵeka.”—Theological Dictionary of the New Testament, Volume I, peji 529.
b Buku jine jatite, “m’Baibulo ja New Testament, mwangali palembile ya ubatiso wa ŵanache.” Jikusasalasoni kuti ngani jakwamba ubatiso wa ŵanache syaliji “nganisyo syakusakala sya ŵandu pakwamba ya kusosekwa kwa ubatiso.” Jemanjaji ŵaganisyaga kuti ubatiso ukusatyosya ulemwa wosope.—The International Standard Bible Encyclopedia, Volume 1, peji 416-417.
c Buku jine jatite, “Pana umboni wakuti mu Chalichi chandanda ubatiso watendekwaga mwakumtiŵisya mundu mmesi.”—Ne Catholic Encyclopedia, Volume 2, peji 59.