EPULO 13-19, 2026
NYIMBO NA. 52 Kulipeleka Kwachiklistu
Kupikanichisya Ngopolelo ja Ubatiso
“Mkajiganye ŵandu . . . , mkabatisyeje.”—MAT. 28:19.
CHAKULINGA CHA NGANIJI
Kumanyilila ngopolelo ja ubatiso, kusosekwa kwakwe, soni yayikusapwatika.
1. Ana chichi chachikulosya kuti ubatiso chili chijiganyo chandanda cha m’Baibulo?
TUKUSASANGALALA mnope ŵachasambano pabatisidwe. Mwelemutu ni muŵapikanilesoni Aklistu ŵa m’yaka 100 yandanda paŵaweni ŵandu ŵajinji ali abatisidwe pa Pentekosite mu 33 C.E. Pandaŵi jeleji, ndumetume Petulo jwaŵechete ngani jakusala ya chijiganyo chandanda cha m’Baibulo chakwamba ubatiso. (Mase. 2:38, 40, 41) Ndumetume Paulo jwalembile kuti “yijiganyo yandanda yakwamba Klistu” yikusapwatikapo “chijiganyo chakwamba ubatiso.” (Aheb. 6:1, 2) Myoyo, ligongo lyakuti ngani ja ubatiso jili jakusosekwa mnope, tukusosekwa kujipikanichisya chenene. Ligongo chichi?
2. Ligongo chichi tukusosekwa kujipikanichisya chenene ngani ja ubatiso?
2 Mpela mwayikusaŵela kuti fendeshoni jakulimba jikusatendekasya kuti nyumba jiŵe jakulimbangana, kujipikanichisya chenene ngani ja ubatiso mpaka kutukamuchisye kuti tukole chikulupi chakulimba. Chinga twabatisidwe kalakala kapena tukusaka kubatisidwa, tukusosekwa kujipikanichisyape nganiji. Myoyo, mu ngani ajino chitukambilane yiwusyo yakuyichisyayi. Ana ubatiso ukusagopolela chichi? Ana ubatiso wa Chiklistu ukusapwatikapo chichi? Soni ligongo chichi tukusabatisidwa mu lina lya Atati, lya Mwanache, soni lya msimu weswela?
NGOPOLELO JA UBATISO
3. Ana ubatiso ukusajimila chichi?
3 Mundu pakubatisidwa akusalosya pa gulu ja ŵandu kuti ajitichisye yisyesyene yakwamba Yehofa Mlungu soni Yesu Klistu. Akusalosyasoni kuti agalawiche mtima, alesile yindu yine kuti amtumichileje Yehofa, amanyilile kuti Mlungu akukamulichisya masengo Yesu kuti ŵakulupusye ŵandu, soni kuti amsalile Mlungu mu lipopelo kuti akusachilila kutenda yakusaka yakwe yimpepe ni likuga lyakwe. Myoyo, mundu palipeleche kwa jYehofa soni kubatisidwa, yikusaŵa kuti atandite kwenda pa litala lyakwawula ku umi wangamala.
4. Ana kutiŵila yisyesyene mmesi kukusajimila chichi? (Alolesoni chiwulili.)
4 Pakubatisidwa, akusatiŵila yisyesyene mmesi kaneko ni kuchuwukamo,a yayikusaŵa mpela kuti awile ni kwimuka ku chiwa. (Alole Akolose 2:12.) Mwakuŵanichisya, ubatiso ukusalosya kuti achenjile yindu yine pa umi wawo. Ana yeleyi yikusatendekwa chamti uli? Pagambile kutiŵila mmesi, yikusaŵa kuti alesile umi wawo wakala. Soni pagambile kuchuwuka mmesimo, yikusaŵa kuti awutandite umi wasambano wakutenda yakusasaka Mlungu.
Pabatisidwe, akusaŵa kuti alesile umi wawo wakalakala ni kutanda umi wasambano mwakukuya yakusasaka Mlungu (Alole ndime 4)
5. Ana yindu yakusatenda pakukosechela ubatiso yikusalandana chamti uli ni masengo gaŵakamwile Nowa pakutaŵa chombo? (1 Petulo 3:18-21)
5 Aŵalanje 1 Petulo 3:18-21. Masengo gaŵakamwile Nowa pakutaŵa chombo mpaka tugalandanye ni yindu yakusatenda mundu pakusaka kubatisidwa. Naga atandite kwene kulijiganya yakwamba Yehofa, mpaka ayiwone kuti yindu yakusosekwa kuchenga pa umi wawo yili yekulungwa mnope mpela masengo gaŵakamwile Nowa pakutaŵa chombo. Nambope, yili yakomboleka kuti achenje yindu pa umi wawo. Tukuŵecheta yeleyi ligongo lyakuti nombenajo Nowa jwakombwele kukamula masengo gakutaŵa chombo. Mlungu ni juŵalinganyisye pulani ja chombo. Myoyo, Nowa jwagambaga kusosekwa kukuya mwakusamala yindu yaŵamsalile Mlungu kuti atende ni chakulinga chakuti akulupusye umi wa ŵandu soni yinyama pandaŵi ja chikugumula. Ligongo lyakuti Nowa jwakwete chikulupi soni kuti Mlungu ŵamkamuchisyaga, jwalakwe jwapikanile soni jwataŵile chombocho. Mpela Nowa, wawojosoni mpaka akombole kutenda yindu ‘yaŵalamwile Mlungu kuti ayitende.’—Gen. 6:22.
6. Ana ubatiso mpaka wakulupusye chamti uli?
6 Pa 1 Petulo 3 ndime 21, ndumetume Petulo jwalembile kuti ubatiso “ukumkulupusya jemanja.” Yili yisyene kuti kutiŵila mmesi, ngakukusamkulupusya mundu kapena kutyosya yakulemwa yakwe. Nambo myasi ja Yesupe ni jajikusatendekasya kuti akululuchidweje yakulemwa yakwe. (1 Yoh. 1:7) Nambope, ubatiso chili chindu chakusosekwa mnope ligongo lyakuti Mlungu ni juŵalamwile kuti tubatisidweje. Mwamti patutesile yeleyi, yikusaŵa kuti ‘tumŵendile Mlungu kuti atupe chikumbumtima chambone.’ Yehofa ali jwakusachila kwapa chilichose champaka amŵende. Pelepatu, yikusaŵa kuti ubatiso ‘ukwakulupusya wawojo’ kapena kuti ukwalongolela ku litala lya ku umi wangamala.
ANA UBATISO WA CHIKLISTU UKUSAPWATIKAPO CHICHI?
7. Ana ubatiso ukusosekwa kutendekwa chamti uli?
7 Baibulo jikusasala kuti mundu pakubatisidwa akusasosekwa kutiŵila chilu chosope. Nambope, ngajikusasala yosope yayikusasosekwa kutendekwa pa ubatiso. Atamose kuti yili myoyo, malemba gakusatusalila yindu yakamuchisya kuti ubatiso ujende chenene. Mwachisyasyo, mfundo sya m’Baibulo sikusakamuchisya ŵakusaka kubatisidwa kumanyilila mwakusosekwa kuwalila soni yakusosekwa kutenda ŵandu ŵakulolela ubatisowo. (1 Akoli. 14:40; 1 Tim. 2:9) Ndaŵi syejinji, jwamkulungwa jwa mu mpingo ni jwakusiŵabatisyaga ŵandu, nambope ngatukusosekwa kwapaga jemanjaji uchimbichimbi wakupundanganya. (1 Akoli. 1:14, 15) Ubatiso ukusaŵa wakusosekwape atamose yili mkuti ŵandu ŵachalolele ali ŵamnono.—Mase. 8:36.
8. Ana ŵakusaka kubatisidwa akusiŵawusya yiwusyo yapi, soni ligongo chichi? (Masengo 2:38-42) (Alolesoni chiwulili.)
8 Baibulo jikusasala kuti tukusasosekwa kulosya chikulupi chetu pagulu ja ŵandu kuti chitukulupuche. (Alo. 10:9, 10) Yeleyitu ni yatukusatenda pandaŵi ja ubatiso wetu, wele ukusatukamuchisya kuti chitukulupuche. Paligongo lyeleli, ŵakusaka kubatisidwa akusiŵawusya yiwusyo yiŵili ayi. Chandanda chili chakuti, “Ana alesile yakulemwa yawo, alipeleche asyene kwa Yehofa soni kwitichisya litala lyakwe lyakutukulupuchisya kupitila mwa Yesu Klistu?” Chiwusyo chelechi chikusakamuchisya kumanyilila naga ŵakusaka kubatisidwawo akoseche, sonitu chikulandana ni maloŵe gajwaŵechete Petulo kwa ŵandu ŵaŵasongene pa lisiku lya Pentekosite. Chiwusyo chaŵili chili chakuti, “Ana akumanyilila kuti kubatisidwa kwawo kukwatendekasya wawojo kuŵa jumo jwa Mboni sya Yehofa jwakamulana ni gulu ja Yehofa?” Chiwusyo chelechi chikusatukumbusya kuti tukusasosekwa kutenda yitwamsalile Yehofa yakuti tuchikuyaga yakusatusalila jwalakwe kupitila mu gulu jakwe. Chikusatukumbusyasoni kuti chitutumichileje yimpepe ni abale ni alongo, mpela muŵatendele ŵakulijiganya ŵa m’yaka 100 yandanda. (Aŵalanje Masengo 2:38-42.) Myoyo, jwalijose jwakusajanga ni mtima wosope kuti elo pa yiwusyo yosopeyi akusaŵajilwa kubatisidwa.
Kubatisidwa kwawo kukusapwatikapo ‘kuŵecheta ni pakamwa pawo ya chikulupi chawo kwa ŵane’ kuti chakulupuche (Alole ndime 8)d
9. Ana jwalijose akusasosekwa kutenda chichi kuti amsangalasyeje Yehofa?
9 Komboleka kuti mkanaŵe kulijiganya yisyesyene ŵakwete ndamo syambone soni mwine nganatendaga yakulemwa yekulungwa. Kombolekasoni mpaka yiŵe kuti achinangolo ŵawo ali ŵa Mboni, soni kuti jemanjaji ni ŵaŵakamuchisye kuti amnonyeleje Yehofa. Ana nikuti akusosekwa kubatisidwape kuti amsangalasyeje Yehofa? Elo. Chinga tuŵele tuli mkutenda yamti uli, tukusasosekwa kumanyilila kuti wosopewe twajigalile ulemwa wele watutendekasisye kuti tutalikangane ni Mlungu. (Sal. 51:5) Patummanyilile chenene Yehofa, tukusatendaga yindu yakusasaka jwalakwe ngaŵaga yetu. Myoyo, patutesile yeleyi tukusalitendela chanasa ni kuleka yakulemwa yetu ni kutendaga yindu yakumsangalasya jwalakwejo soni kutanda kwenda pa litala lyakwawula ku umi. Mwamti kaneko tukusaŵaga ŵakuŵajilwa kubatisidwa.—Mase. 3:19.
10. Ana akusosekwa kutenda chichi naga ŵabatisidwe ali ku dini jine?
10 Naga ŵabatisidwe ali ku dini jine, nikuti akusosekwa kubatisidwasoni kuti aŵe jwa Mboni sya Yehofa. Yili myoyo ligongo lyakuti kweleko nganayipikanichisya chenene yisyesyene yakwamba Yehofa Mlungu soni Yesu Klistu. Atamose yili mkuti ŵalipeleche kwa Yehofa mu lipopelo, yisyesyene yakwe yili yakuti ŵatesile yeleyi ali ngakumanyilila yisyesyene yakwamba chakulinga chakwe. Ndumetume Paulo ali asimene ni ŵandu ŵa ku Efeso ŵaŵabatisidwe ali ngakumanyilila yijiganyo ya Chiklistu, jwatesile yakuti jemanjajo abatisidwesoni.b (Mase. 19:1-5) Masiku aganosoni, ubatiso ukusaŵa wakuŵajilwa naga mundu jwakubatisidwajo akumanyilila yakusaka Mlungu kuti jwalakwejo atendeje.
KUBATISIDWA “M’LINA LYA ATATI, LYA MWANACHE SONI LYA MSIMU WESWELA”
11. Ana kubatisidwa “m’lina lya Atati, lya Mwanache soni lya msimu weswela” kukusagopolela chichi? (Mateyu 28:18-20)
11 Yesu jwasasile kuti ŵakulijiganya ŵasambano abatisidweje “m’lina lya Atati, lya Mwanache soni lya msimu weswela.” (Aŵalanje Mateyu 28:18-20.) Ana jwalakwe jwagopolelaga chichi? Ndaŵi syejinji m’Baibulo, maloŵe gakuti “lina” gakusagopolela mbili ja mundu. Mpaka gagopolelesoni udindo soni machili gakwete mundujo. Myoyo, patukutenda yindu “m’lina lya” mundu jwine kapena chindu chine chakwe, tukusamanyililaga machili ga msyene linalyo. (Alole Mateyu 10:41.) Kwende tulole yampaka tutende kuti tumanyilile udindo soni machili ga Atati ni Mwanache kupwatikapo udindo wa msimu weswela wa Mlungu.
12. Ana tukusabatisidwa chamti uli m’lina lya Atati? (Chiwunukuko 4:11) (Alolesoni yiwulili.)
12 M’lina lya Atati. Tukusamanyilila kuti Yehofa ali Atati ŵetu ŵakwinani, kapena Jwakupeleka Umi. Jwalakwe ali Mlungu jwamachili gosope soni Mkupanganya jwa yindu yosope. (Aŵalanje Chiwunukuko 4:11.) Tukusamanyililasoni kuti jwalakwe ali jwakupikana mapopelo. Mwaulemu tukusakamulichisya masengo lina lyakwe patukupopela ndaŵi jilijose soni patukukwasalila ŵane yakwamba jwalakwe. (Sal. 65:2) Nambope, tukusasosekwa kutenda yejinji kuti tubatisidwe m’lina lya Atati. Ŵandu ŵaŵampikanilaga Petulo pa lisiku lya Pentekosite ŵamanyililaga kala yakwamba Yehofa, nambope ŵasosekwagasoni kumanyilila kuti Yehofa ni jwampaka ŵape umi wangamala kupitila mwa Yesu Klistu.—Alo. 5:8.
Panyuma pakubatisidwa, apitilisyejepe kukumbuchila machili soni udindo wa Atati ni Mwanache kupwatikapo udindo wa msimu weswela wa Mlungu (Alole ndime 12)
13. Ana tukusabatisidwa chamti uli m’lina lya Mwanache? (Alolesoni chiwulili.)
13 M’lina lya Mwanache. Tukusamanyilila kuti Yesu ali Mwanache jwakunonyelwa jumopejo jwa Mlungu. Yesu ali “litala,” soni kupitila mwa jwalakwe pejo yikusakomboleka kuŵa pa unasi wambone ni Yehofa. (Yoh. 14:6) Nambosoni, Yesu ali jwakutuwombola mwamti jwalakwe jwawile ni chakulinga chakuti chitupate umi wangamala. Sonitu kumanyilila yeleyi, kukusatutendekasya kuti tukuyeje chisyasyo chakwe lisiku lililyose, atamose panyuma pakubatisidwa. (1 Yoh. 2:6) Myoyo, tukusalalichila mwakulipeleka mpela mwajwatendele jwalakwe soni ngatukusakunda kuti chilichose chitusokonasye. (Luk. 4:43) Nambosoni tukusakunda kulagasidwa ligongo lyakusachilila kumtumichila Mlungu mwakulupichika. (2 Tim. 3:12) Kupwatika pelepa, tukusamchimbichisya Yesu ligongo ali “mtwe wa mpingo.” Mwamti tukusitwapikanila mwakulupichika ŵandu ŵaŵasagwile kuti ŵaloleleje soni kwasamalila ŵakumkuya ŵakwe.—Aef. 4:8, 11, 12; 5:23.
Panyuma pakubatisidwa, apitilisyejepe kukumbuchila machili soni udindo wakwete Mwanache (Alole ndime 13)
14. (a) Ana tukusabasitidwa chamti uli m’lina lya msimu weswela? (Alolesoni chiwulili.) (b) Ana ni maubatiso gane gapi gakusatendaga ŵasagulwe? (Alole libokosi lyakuti “Maubatiso Gakusatenda Ŵasagulwe.”)
14 M’lina lya msimu weswela. Tukusajitichisya yisyesyene yakwamba msimu weswela. Msimu weswelawu, nganiwuŵa mundu kapena Mlungu, nambo gali machili ga Mlungujo. Tukusamanyilila kuti msimu weswela ni wawalongolele ŵakulochesya soni ŵandu ŵaŵalembile Baibulo, mwamti ndaŵi syosope tukusaŵalanga soni kukuya yajikusajiganya Baibulo. (2 Pet. 1:20, 21) Nambosoni tukusaŵambala kutenda maulemwa gekulungwakulungwa ligongo mpaka yitendekasye kuti msimu wa Mlungu uleche kukamula masengo pa m’weji atamose ni mu mpingo mwakwe.—Aef. 4:30.
Panyuma pakubatisidwa, apitilisyejepe kukumbuchila udindo wa wa msimu weswela wa Mlungu (Alole ndime 14)
15. Ana tukusosekwa kusimichisya ya chichi?
15 Naga wawojo ali Mklistu jwam’batisidwe, akusosekwa kupikanichisya mbali syosope syakwamba “chijiganyo cha ubatiso”c soni kutendaga yindu mwakamulana ni yaŵamsalile Yehofa paŵalipelekaga kwa jwalakwe soni kubatisidwa. Nambi uli naga wawojo nganaŵepe kubatisidwa? Ana pana chindu chachikwalepelekasya kutenda yeleyi? Mungani jakuyichisya tuchikambilana yampaka atende kuti chaŵajilwe kubatisidwa.
NYIMBO NA. 161 Ngusasangalala Kutenda Yakusasaka Wawojo
a Maloŵe ga Chigiliki gakuti ba’pti-sma, gaŵagagopolele kuti “ubatiso” gakusagopolela “kutiŵila,” kapena “kuchuya.” Myoyo, ubatiso ukusagopolela kutiŵila yisyesyene mmesi, ngaŵaga kummisila mundu mesi mpelaga mwagakusajiganyichisya ma dini gane.
b Ŵandu ŵa ku Efesoŵa ŵaliji ali abatisidwe ni “ubatiso wa Yohane.” (Mase. 19:3) Yohane M’batisi jwalimbikasyaga Ayuda kuti agalawuche mtima mwakamulana ni Chilamusi cha Mose, mwamti jwalakwe jwabatisyaga ŵandu ŵaŵatendaga yeleyi. (Maliko 1:4, 5) Nambope, ubatisowu walesile kukamula masengo Chilamusi cha Mose pachamasile. Kutandila pandaŵi jeleji, Mlungu jwatandite kwitichisya “ubatiso umo” wawukusamlongolela mundu ku umi wangamala.—Aef. 4:5.
c Alole pa jw.org soni pa JW Library® ngani ja mtwe wakuti “Ana Ubatiso Ukusagopolela Chichi?” Mpaka ajipate nganiji pambali jakuti “Kwanga Kwa Yiwusyo Ya m’Baibulo.”
d KULONDESYA CHIWULILI: Pa msongano wadela, ŵandu ŵakusaka kubatisidwa ajimi kuti asale ya chikulupi chawo pameso pa ŵandu.