Ligongo Chichi Ndamo Syambone Sikumala?—Ana Baibulo Jikusasala Yamti Uli Panganiji?

Masiku agano ndamo syambone sikumala. Mwachisyasyo, kuchipatala ŵakulwala ŵangali ulemu akusagakalipila madokotala, ku lesitilanti, makasitomala gakusakalipila ŵamasengo ŵakupelechela yakulya, ŵandu ŵakwela ndege ŵali ŵaukali akusiŵajimuchila ŵandu ŵakamula masengo mu ndege, ŵanache ŵasukulu ŵa ndamo syakusakala akusiŵanyosya, kwajogoya nambosoni kwajimuchila achiticha; soni ŵandale ŵane akusatandisya yachiwawa pele ŵane akusatenda yindu mwangachimbichisya ŵane.

Baibulo jikwete mfundo syakudalilichika syakumkamuchisya mundu kukola ndamo syambone. Jikusasalasoni ligongo lyakwe masiku agano ndamo syambone sikumala.

Ana ligongo chichi ndamo syambone sikumala?

Kumala kwa ndamo syambone soni syakwitichika kuwandile pachilambopa.

•  Mwakamulana ni kuwungunya kukwatendekwe m’chilambo cha United States, ŵapatile kuti chiŵalanjilo cha ŵandu ŵakwete ndamo syambone chitulwiche mnope pakulekanganya ni yaka 22 yipiteyi.

•  Kuwungunya kwinesoni kukwatendekwe, kwa ŵandu ŵakupunda 32,000 m’yilambo 28, 65 pelesenti ŵasasile kuti kumala kwa ndamo syambone kwakukutendekwa masiku agano chili chindu chakusakala mnope chele nganichitendekweje ni kalakose.

Baibulo jasasile mkanipaŵe yakumala kwa ndamo syambone kwatukukuwona masiku agano.

•  “Masiku gakumalisya jichiŵa ndaŵi jakusawusya soni jakogoya. Pakuŵa ŵandu chachiŵa ŵakulinonyela, ŵakunonyela mbiya, ŵakulipikana, ŵakulikwesya, ŵakunyosya, ŵangapikanila achinangolo, ŵangayamika, . . . ŵanganonyela achalongo achimjawo, . . . [soni] ŵakogoya.”—2 Timoteyo 3:1-3.

Kuti amanyilile yachikuti kwanilichikwa chakulochesyachi aŵalanje ngani ja Chichewa ja mtwe wakuti “Kodi Baibulo Linaneneratu za Mmene Anthu Adzidzaganizira ndi Kuchitira Zinthu Masiku Ano?”

Malangiso gakamuchisya kola ndamo syambone

M’chilambo chakusakalachi, ŵandu ŵajinji ayiweni kuti malangiso gakutyochela m’Baibulo gakusamkamuchisya mundu kola ndamo syambone. Malangisoga gali “gakutamilichika mpaka yaka yosope.” (Salimo 111:8) Kwende tuganichisye yisyasyo yakuyichisyayi:

•  Yajikusasala Baibulo: “Yindu yosope yimkusaka kuti ŵandu amtendele, jemanjasoni mwatendeleje yeleyo.”—Mateyu 7:12.

  Yalikugopolela: Tukusosekwa kwatendelaga ŵane mwachinonyela soni mwauchimbichimbi, mpela mwatukusasachila m’wejo kuti atutendeleje.

•  Yajikusasala Baibulo: “Pakuŵa sambano mlesile yaunami, jwalijose mwa jemanja aŵecheteje yisyesyene kwa mjakwe.”—Aefeso 4:25.

  Yalikugopolela: Tuŵeje ŵakuwona mtima mu yosope yatukusaŵecheta soni kutenda.

Kuti amanyilile yejinji pa nganiji, aŵalanje:

•  Sanja ja Mlonda ja mtwe wakuti, “Ana Mpaka Apate Kwapi Malangiso Gakamuchisya?”

•  Ngani jakuti “Ana Baibulo Mpaka Jitukamuchisye Chamtuli Pangani Jakuŵa Ŵakupikana ya Ŵane?.”