Ana Yindu Yayikupanganyidwa Kuti Yikamuleje Masengo Mmalo mwa Ŵandu Yili Yakamuchisya Kapena Iyayi?—Ana Baibulo Jikusasala Yamtuli Panganiji?

Pachangakaŵapa, ŵakulongolela yilambo, ŵasayansi nambosoni achalijiganye pangani ja yakupanganyapanganya aŵechetepo yakwamba umbone soni kusakala kwa yindu yayikupanganyidwa kuti yikamuleje masengo mmalo mwa ŵandu. Atamose kuti jemanjaji akuyiwona kuti yinduyi yili yakusosekwa, nambope akuyiwona kuti ŵandu ŵane mpaka ayikamulichisyeje masengo mwangaŵajilwa.

• Frederik Federspiel ŵatite, “Atamose kuti yindu yayikupanganyidwa kuti yikamuleje masengo mmalo mwa ŵandu yikukamuchisya mnope pangani ja yachipatala, nambope yinduyi mpaka yiyikasye yakusawusya yejinji paumi wa ŵandu.” Nganiji jakopweche pa Meyi 9, 2023, mu nyusipepala jakuti, BMJ Global Health.a

• Pachangakaŵapa, yinduyi mpaka yitendekasisye kuti ŵandu ŵajinji ŵatyosye masengo. Ŵandu ŵane ŵamlijiganye mnope pangani ja yipangiso yamakono akudandaula kuti yinduyi mpaka yiŵiche umi wa ŵandu pangosi.”

M’kupita kwandaŵi, ŵandu chachimanyilila naga yindu yayikupanganyidwayi mpaka yiŵe yakamuchisya kapena yakuyikasya yakusawusya. Ana Baibulo jikusasala yamtuli panganiji?

Ana ligongo chichi yakupanganyapanganya yikutendekasya kuti ŵandu akoleje woga?

Baibulo jikusasala ligongo lyakwe nganituŵa tudalile yipangiso yamakono yakupanganya ŵandu masiku agano kuti mpaka yitendekasye yindu kwenda chenene pachilambopa.

1. 1. Atamose ŵandu ali akwete nganisyo syambone, nganaŵa amanyilile yakusawusya yampaka yitendekwe msogolo ligongo lya yindu yakutenda apano.

2. 2. Mundu nganakola machili gakwalekasya ŵandu ŵane kukamulichisya masengo mwangaŵajilwa yindu yapanganyisye mundujo.

   • Ana ŵani ŵakumanyilila kuti mundu jwakwinjila m’malo mwangujo tachiŵa jwalunda kapena jwakuloŵela? Nambope jwalakwejo tachiŵa jwakulamulila yosope yene yinatesile pachilambo chapasi panochi ni lunda lwangu.”—Jwakulalichila 2:18, 19.

Yeleyi yikulosya ligongo lyakwe tukusasosekwa kuti Mkupanganya jwetu atulongoleleje.

Ana tukusosekwa kwadalila ŵani?

Yaŵasasile Mkupanganya jwetu kuti chachitutendela yikusatusimichisya kuti jwalakwe ngasakunda kuti ŵandu kapena yindu mpela yipangiso yiliyose yamakono, yijonanje chilambochi kapena mtundu wosope wa ŵandu.

Mkupanganya jwetu akusatupa malangiso kupitila m’Baibulo gampaka gatukamuchisye kuti tutame ni umi wamtendele soni ŵakuteteyeka. Kuti amanyilile yajikusasala Baibulo, aŵalanje ngani ja mtwe wakuti “Ana Chichi Champaka Chakamuchisye Kola Sogolo Jambone?” soni jakuti “Chembecheyo Chisyesyene Chikusatukamuchisya Kola Sogolo Jambone.”