Ana Baibulo Jikusasala Yamtuli Pakwamba ya Kusoŵa kwa Yakulya Masiku Agano?

“Kumasya sala.” Achimlongola ŵa yilambo akusasala maloŵega pakusaka kumalana ni yakusawusya yekulungwa. Yeleyi yikupwatikapo kwapa ŵandu wosope yakulya.a Nambo ana yeleyi mpaka yimasye sala pachilambo? Ana Baibulo jikusasala yamtuli panganiji?

Baibulo jasasile mkanipaŵe yakusoŵa kwa yakulya masiku agano

Baibulo jasasile kuti kusowa kwa yakulya kuchitendekwa mu “masiku gakumalisya” gano. (2 Timoteyo 3:1) Mlungu jwangatendekasya kuti yakulya yisoŵeje, nambo jwalakwe jwatusalile kala kuti yeleyi yichitendekwa. (Yakobo 1:13) Kwende tulole yakulochesya yiŵili ya m’Baibulo.

“Kuchiŵa sala . . . m’malo gakulekanganalekangana.” (Mateyu 24:7) Yakulochesya ya m’Baibulo yaŵechete kala kuti kuchiŵa sala m’malo gakulekanganalekangana. Lipoti lya pachangakaŵapa lyakutyochela kwa ŵandu ŵakusalolela yakulya pachilambopa lyasasile kuti: “Chilambo chikulepela kwanilisya chakulinga chakwe chakumasya sala, kuyisunga yakulya soni ulwele wawukusayika ligongo lyakusoŵa kwa yakulya.”b Ŵandu mamiliyoni gejinji pachilambopa ngakusakombola kupata yakulya yakusasosechelaga paumi wawo. Yakutesya chanasa yili yakuti ŵandu ŵane akusayikana pakuwa.

“Ndaŵi jijojo najiweni hachi jepiliwu, juŵakwesile hachijo ŵajigele sikelo jakupimila mmyala mwakwe.” (Chiwunukuko 6:5) Mu yakulochesyayi, hachiji soni jwakwesilepo yikwimila sala jajikutendekwa masiku gakumalisya gano.c Sikelo jajigele munduju jikwimila kukwela mitengo kwa yakulya kwakukutendekwa masiku agano. Jwakwesile hachiji, jwaŵechete maloŵe gakuti mitengo ja yakulya jichiŵa jakudula mnope soni ŵakalamwisye ŵandu kuti asamaleje yakulya. (Chiwunukuko 6:6) Maloŵega gakukwanilichikwa masiku agano pele yakulya yikusoŵa mnope. Mwamti ŵandu mabiliyoni gejinji akulepela kupata yakulya yambone.

Ana kusoŵa kwa yakulya kuchimala wuli

Achinamatetule akusasala kuti chilambo chikusapanganya yakulya yakwanila yampaka yikwane kumpa mundu jwalijose. Nambo, ana ni chichi chachikutendekasya kuti yakulya yisoŵeje? Ana Baibulo jikusasala yamtuli pakwamba yachachitenda Mkupanganya, jwetu Yehofa,d pakumasya sala?

Chakusawusya: Maboma nganigaŵa gakombwele kumasya sala nambosoni ungali chilungamo wawukwatendekasya ŵandu kuti alajeje.

Kumasya: Boma ja Mlungu jichijinjila m’malo mwa maboma gangali umlama ga ŵanduga. (Daniele 2:44; Mateyu 6:10) Masiku agano, ŵandu ŵajinji ŵali ŵakulaga akulepela kupata yakulya. Nambo mu Uchimwene wa Mlungu yindu yichiŵa chenene. Baibulo jikusati Yesu jwali Mwenye jwa Uchimwene wa Mlungu, jwalakwe “Chachimkulupusya jwausawuchi jwakulilajo. Soni jwele jwakulaga jwanganakola jwakumkamucisya. . . . Pacilambo chapasi pachiŵa yagungula yejinji. Pachanya pa matumbi pachiŵa yagungula yejinji.”—Salimo 72:12, 16.

Chakusawusya: Ngondo sikusayikasya yakusawusya soni kusoŵa kwa mbiya. Yeleyi yikusatendekasya kuti pachilambopa pasoŵeje yakulya yakwanila.

Kumasya: “[Yehofa] akulekasya ngondo mpaka kumbesi kwa chilambo chapasi, akutemanya ukunje, kuposokolanya lipanga, akusajocha magaleta ga ngondo ni moto.” (Salimo 46:9) Mlungu chachajonanga ŵandu ŵakusatandikasya ngondo soni yida yakwe. Yakuyichisya yakwe ŵandu wosope chachipataga yakulya mwangasawusya. Baibulo jikusasala kuti: “Mtendele uŵe wejinji pa ndaŵi ja umi wakwe ni yindu yambone yakupochela ŵandu.”—Salimo 72:7.

Chakusawusya: Nyengo syakogoya soni ngosi syachilengedwe sijonasile yakumela soni yinyama.

Kumasya: Mlungu chachilamulila machili ga chilengedwe ga pachilambo chapasi soni kujitendekasya nyengo kuti jipelecheje yakulya yakwanila. Baibulo jikusati: “[Yehofa] ŵachitulesye chimbunga; mpaka matumbela ga pa nyasa gatesile bata. . . . Ŵagalawisye chipululu kuti chikole matanda ga mesi, ni chilambo chachijumu kuti chiŵe ni mesi.  .  Ŵaŵisile ŵandu ŵa sala kuti atame. Ŵamisile mbeju m’migunda ni kupanda mipeleya, ni ŵagoŵele yindu yejinji.”—Salimo 107:29, 35-37.

Chakusawusya: Ŵandu ŵaumbombo soni ŵakusatenda yachinyengo akutendekasya kuti yakulya yikasimanaga ŵandu ŵakusosechela.

Kumasya: Uchimwene ŵa Mlungu uchijonanga ŵandu ŵakusatendaga yindu mwachinyengo. (Salimo 37:10, 11; Yesaya 61:8) Baibulo jikusasala kuti Yehofa ali Mlungu jwakusiŵatendela “yagoloka ŵandu ŵangali machili, akusiŵapa yakulya ŵandu ŵa sala.”—Salimo 146:7.

Chakusawusya: Chaka chilichose ŵandu akonanga mnope yakulya pachilambopa.

Kumasya: Uchimwene wa Mlungu uchitendekasya kuti yakulya yikajonasikaga. Yesu paŵaliji pachilambo chapasi, ŵaŵambele kuyijonanga yakulya. Mwachisyasyo, jwalakwe ŵalisisye ŵandu ŵakupunda 5,000 mwakusimonjesya. Kaneko ŵasalile ŵakulijiganya ŵakwe kuti: “Mlokotele yakusigala yosope, kuti pakasimanikwa yakonasika.”—Yohane 6:5-13.

Ligongo lyakuti Uchimwene wa Mlungu uchimasya yindu yayikusatandikasyaga sala, ŵandu wosope chachisangalalaga ni yakulya yambone yejinji. (Yesaya 25:6) Kuti amanyilile ndaŵi jele Uchimwene wa Mlungu uchitenda yeleyi, aŵalanje ngani jakuti “Ana Uchimwene wa Mlungu Uchitanda Chakachi Kulamulila Pachilambopa?”