Ana Baibulo Mpaka Jakamuchisye Chamtuli Kupilila Nyengo Jakogoya?

Ana ali jumo mwa ŵandu ŵajinji ŵakulaga ni nyengo jakogoya? Nyengo mpaka jiŵe jakogoya ligongo lya mbungo sya machili soni yimbunga. Mbungosi mpaka sitendekasye wula jakogoya jampaka jitendekasye mesi kusewuchila soni kugumuka kwa litaka. Mpaka sitendekasyesoni njasi syampaka sijoche ngalango. Konjechesya pelepa ŵandu akusalagasoni ni kusoŵa kwa ula, nyengo sya chitukuta soni syakusisima mnope.

M’madela gejinji pachilambopa, nyengo syakoya mnope sikutupilatupila soni sikutendekwaga mwakutotoganya. Mwamti bungwe jine jasasile kuti “chiŵalanjilo cha ŵandu ŵakulaga ni nyengo syakogoya chikutupilatupila, mwamti ŵandu ŵajinji akulaga mnope kuti apateje yakusosechela ya paumi soni akusasamaga m’madela gawo ligongo lyakusewuchila kwa mesi, mbungo sya machili soni kusoŵa kwa ula.”—International Federation of Red Cross and Red Crescent Societies.

Yeleyi payitendekwe, ŵandu akusalagasika nganisyo soni akusalaga ni yindu yine. Ŵanduŵa mpaka alajeje ligongo lyakuti chipanje chawo chijonasiche soni ŵachinasi wawo awile.

Nambope Baibulo mpaka jakamuchisye naga wawojo akulaga ligongo lya nyengo syakogoya. Mwamti jakamuchisye ŵandu ŵajinji ŵakulaga ligongo lya nyengo syakogoya. Baibuloji jalimbikasisye ŵanduŵa, kwapa chembecheyo soni kwakamuchisya kumanyilila yampaka atende. (Aloma 15:4) Konjechesya pelepa jikusajangaga chiwusyo chachikwalagasya ŵandu, chakuti, Ana ligongo chichi Mlungu akundile yeleyi kutendekwa, ana kapena akumba une chilango?

Nyengo syakogoyasi nganichiŵa chilango chakutyochela kwa Mlungu

Baibulo jikusasalaga kuti Mlungu jwangatendekasya kuti ŵandu asimaneje ni yipwetesi. Mwamti jikusatusimichisya kuti, “Mlungu ngaŵa mkumlinga ni yakusakala, soni jwalakwejo nganaŵa amlinjile mundu ni yindu yakusakala.” (Yakobo 1:13) Yeleyi yikulosya kuti jwalakwe jwangatendekasya nyengo syakogoya syakusimana nasyo ŵandu masiku agano.

Yili yisyene kuti Mlungu pakwete pakamulichisye masengo nyengo jakogoya pakwajonanga ŵandu ŵakusakala. Nambo yeleyi yili yakulekangana ni nyengo syakogoya syasikutendekwa masiku agano. Yeleyi yili m’yoyo ligongo lyakuti nyengosi sikusayika mwangajembecheya soni sikusajonanga ŵandu ŵambone ni ŵakusakala ŵakwe. Mwakulekangana ni yeleyi, ngani sya m’Baibulo sikusalosya kuti Mlungu akusiŵachenjela ŵandu ŵakwe, akusiŵakalamusya mkanipaŵe soni akusasalaga ligongo lyakutendela yinduyo. Mwachisyasyo, Mlungu jwasasile mkanipaŵe ligongo lyakwe ŵajonasile chilambochi ni mesi mundaŵi ja Nowa. Mwamti jwalakwe ŵakalamwisye ŵandu soni ŵamkulupwisye Nowa yalumo ni liŵasa lyakwe.—Genesesi 6:13; 2 Petulo 2:5.

Kuti amanyilile yejinji yakulosya kuti ngosi sya chelengedwe nganichiŵa chilango chakutyochela kwa Mlungu, aŵalanje ngani ja Chichewa jakuti “Kodi Baibulo Limanena Zotani pa Nkhani ya Ngozi Zadzidzidzi?”

Mlungu akusiŵasamalila ŵandu ŵakulaga ligongo lya nyengo syakogoya

Baibulo jikusasalaga kuti Yehofaa Mlungu akusiŵasamalila soni kwatendela chanasa ŵandu. Aganichisye mfundo sya m’malemba gakuyichisyaga.

• Yesaya 63:9: “Ŵalasile [Mlungu] pakuyiwona yisawusyo yawo yosope.”

  Yayikugopolela: Yehofa yikusamkwayaga mnope pakuyiwona ŵandu ali mkulaga ni yipwetesi.

• 1 Petulo 5:7: “Jwalakwe akusasamala mnope ya jemanja.”

  Yayikugopolela: Yindu yayikututendechela paumi wetu, Yehofa yikusamkwayaga mnope.

Patukulaga, Yehofa akusatendapo kandu ligongo lyakuti akusatuŵalanjila soni kututendela chanasa. Jwalakwe akusatulimbikasya kupitila m’Baibulo. Sonitu Baibulo jikusatusalilaga kuti ngosi syakwika ligongo lya nyengo syagoya kuchiŵa kwangali.—2 Akolinto 1:3, 4.

Ŵandu ngasalagasoni ni nyengo syakogoya

Baibulo jikusasala kuti Yehofa akusaka tukole “chembecheyo chisyesyene pa yamsogolo.” (Yelemiya 29:11) Jwalakwe akwete chakulinga chakuti ŵandu chasangalale ni umi pachilambo chapasi cha paladaiso, ngaŵa kuti chatamejesoni ali mkogopa ngosi sya m’chilengedwe.—Genesesi 1:28; 2:15; Yesaya 32:18

Mlungu chachitenda yeleyi kupitila mu Uchimwene wakwe wakwinani wakulamulidwa ni Yesu. (Mateyu 6:10) Yesu akwete lunda soni machili gakumachisya nyengo syakogoya. Mwamti jwalakwe paŵaliji pachilambo chapasi ŵalosisye kuti akwete machili gakumachisya nyengo syakogoya. (Maliko 4:37-41) Jwalakwe chachiŵa jwakulamulila jwakupikanichisya soni jwalunda. Chachajiganyasoni ŵandu mwampaka atendele pakusamalila yindu yachilengedwe. (Yesaya 11:2) Mu ulamusi wa Yesu ŵandu ngasalagasoni ni nyengo syakogoya.

Nambo mwine mpaka awusye kuti ‘Ana Yesu chachikamulichisya masengo machili gakwega chakachi, pakumasya nyengo syakogoyasi?’ Kuti amanyilile kwanga kwa chiwusyochi, aŵalanje ngani jakuti, “Ana Uchimwene wa Mlungu Uchitanda Chakachi Kulamulila Pachilambopa?”

Yampaka tutende naga tuli mu nyengo jakogoya

Baibulo mpaka jitukamuchisye kumanyilila yampaka tutende nyengo jakogoya mkanijiŵe kutendekwa, pajikutendekwa soni pajitendekwe.

• 

  Nyengo jakogoya mkanijitendekwe: Aŵeje ŵakoseka kutendapo kandu mwachitema.

  Yajikusasalaga Baibulo: Mundu jwakalamuka pati achiweni chindu chakogoya akusajuŵaga, nambo mundu jwakuloŵela akusagambaga kupelenganya ni kutanda kuligamba panyuma pakwe pati asimene ni yisawusyo.”—Misyungu 22:3.

  Yayikugopolela: Amanyilile ngosi syampaka asimane nasyo ni chakulinga chakuti aŵe ŵakoseka kutendapo kandu mwachitema soni kulichenjela liŵasa lyawo

  Yayatendechele ŵane: Tamala jwa ku California ku United States, jwatite “Palisiku litwatilaga moto wawabuchile mu ngalango, twaliji ŵakoseka. Twakwete yikwama yapangosi. Soni twakwete yakuwala. Ŵandu ŵajinji m’delaji lwamalile lunda, mwamti nganamanyililaga yakutenda. Nambo m’weji twakwete chilichose chatwasosechelaga, soni nguyamichila.”

• 

  Nyengo jakogoya pajikutendekwa: Aŵicheje nganisyo pa yindu yakusosekwa mnope.

  Yajikusasalaga Baibulo: “Atamose mundu ali akwete yejinji, umi wakwe wangatyochela mu yindu yakweteyo.”—Luka 12:15.

  Yayikugopolela: Umi uli wakusosekwa mnope kulekangana ni yampaka tukole.

  Yayatendechele ŵane: Lislie jwa ku Philippines jwatite, “Chimbungo chamachilib pachajonasile nyumba jetu, nganimanyililaga yakutenda.. Nambo chindu chimo chanatesile chaliji kupopela mwakutyochela pasi pamtima kwa Yehofa Mlungu. Nayiweni kuti yindu yakuchilu ni yayajasiche ngaŵa maumi getu.”

• 

  Nyengo jakogoya pajitendekwe: Ajikutileje ni yakwete pandaŵijo.

  Yajikusasalaga Baibulo: “Myoyo, mkadandawulaga ya lisiku lyakuyichisya, pakuŵa lisiku lyakuyichisya lichikolasoni yakudandawulisya yakwe.”—Mateyu 6:34.

  Yayikugopolela: Akadandawulaga mnope ni yakusawusya yampaka asimene nayo msogolo.

  Yayatendechele ŵane: Sally jwa ku Frolida ku United States, jwatite “Chimbungo chakolanjikwa Hurricane Irma chayiche ni wula jamachili jajatendekasisye kuti nyumba jangu mujinjile mesi. M’yoyo nasosekwaga kuganichisya mnope yakutenda kupundana ni kalakose mwamti nalagasiche mnope nganisyo.Napikanile malangiso ga m’Baibulo gakuti tuganichisye yayakusawusyo ya palisikulyo. Ligongo lya yeleyi, nayiweni kuti ni chikamuchisyo cha Yehofa mpaka mbilile yakuwusyawusya yanganisimaneje nayo.”

Kuti amanyilile yindu yine yampaka atende, alole ngani ja mtwe wakuti “Pajitendekwe Ngosi—Ana Mpaka Atende Cici Kuti Akulupusye Umi?”