Chembecheyo Chisyesyene Chikusatukamuchisya Kola Sogolo Jambone

Ana akuganisya kuti kusogoloku yindu yichiŵa chenene? Ŵandu ŵajinji atamose kuti akusimana ni yipwetesi, nambope akusakolaga chembecheyo. Nambo ana yili yisyene kuti kusogoloku yindu yichiŵa chenene? Elo yili yisyene. Baibulo jikusatupaga maumboni gamachili gakulosya kuti tukwete sogolo jambone.

Ana Baibulo Jikusasalaga yamtuli payatukwembecheya kusogoluku?

Baibulo jikusajitichisya kuti ŵandu akusimana ni yipwetesi yejinji. Nambope jikusasalasoni kuti yipwetesiyi yana pakumalila pakwe. Kwende tulole yisyasyo panganiji.

Chakusawusya: Kusoŵa Malo Gakutama

Yajikusasalaga Baibulo: “Ŵandu ŵangu tachitaŵa nyumba nipo tachitamamo.”—Yesaya 65:21.

Ana yeleyi yikugopolela chichi? Ŵandu tachikola nyumba syawosyawope.
Chakusawusya: Kusoŵa kwa Masengo soni Usawuchi

Yajikusasalaga Baibulo: “Ŵandu ŵangu ŵakusagulidwa tachisangalalila masengo ga makono gawo kwa ndaŵi jajilewu.”—Yesaya 65:22.

Ana yeleyi yikugopolela chichi? Mundu jwalijose chachisangalalaga ni masengo gakwe soni gachimpindulilaga.
Chakusawusya: Kusoŵa kwa chilungamo

Yajikusasalaga Baibulo: “Lisiku line kuchiŵa . . . . achimlongola ŵane ŵakulamulila mwa chilungamo.”—Yesaya 32:1.

Ana yeleyi yikugopolela chichi? Ŵandu ngasalagasoni ni ngani sya lusagu ligongo lya mtundu soni kapate kawo. Pangali juchachiŵa jwakulaga.
Chakusawusya: Ulwele wakupelembela yakulya m’chilu soni Sala

Yajikusasala ga Baibulo: “Mchilambomo muŵe yakulya yejinji; atamose pachanya pa matumbi paŵe yakulya yejinji.”—Salimo 72:16.

Ana yeleyi yikugopolela chichi? Jwalijose chachikolaga yakulya yambone yakwanila. Pangali juchachigonaga ni sala kapena kulwala ulwele wakupelembela yakulya m’chilu.
Chakusawusya: Kasa malamusi soni yachiwawa

Yajikusasalaga Baibulo: “Jwalijose tachitama mu mtendele pasikati pa mgunda wakwe wa mipeleya ni nguju, soni pangali jutachajogoya.”—Mika 4:4.

Ana yeleyi yikugopolela chichi? Jwalijose tachiŵa pamtendele ligongo ŵandu ŵakusakala kuchiŵa kwangali, soni “ŵandu ŵambone tachipochela chilambo.”—Salimo 37:10, 29.
Chakusawusya: Ngondo

Yajikusasalaga Baibulo: “Mitundu ja ŵandu ngasijijimuchilana ni mawupanga, soni ngasijilijiganya soni kuputa ngondo.”—Yesaya 2:4.

Ana yeleyi yikugopolela chichi? Mtendele uchiŵa posepose pachilambopa. (Salimo 72:7) Kuchiŵa kwangali kuwulajidwa pangondo kapena ŵandu kutila kumangwawo ligongo lya ngondo.
Chakusawusya: Yilwele

Yajikusasalaga Baibulo: “Pangali atamose jumo mchilambomo jutachiŵecheta kuti, ‘Une ngulwala.’”—Yesaya 33:24.

Ana yeleyi yikugopolela chichi? Pangali mundu juchachilagaga ni umi ligongo lyakuti ali jwamlemale soni jwakulwala. (Yesaya 35:5, 6) Baibulo jikusasalasoni kuti atamose chiwa ‘ngasichipagwasoni.’—Chiwunukuko 21:4.
Chakusawusya: Konasika kwa yindu yachilengedwe

Yajikusasalaga Baibulo: “Chipululu ni chilambo changali mesi yichisangalala, chilambo chejumu chichisengwa ni kusipuka maluŵa.”—Yesaya 35:1.

Ana yeleyi yikugopolela chichi? Chilambo chosopechi chichiŵa malo gakusalala soni gakusangalasya mundu kutama. Yeleyitu ni yaŵasakaga Mlungu pandanda.—Genesesi 2:15; Yesaya 45:18.

Ana yisyene tukulupilileje yajikusasalaga Baibulo pakwamba ya msogolo?

Yili yakupikanika kulupilila yajikusasalaga Baibulo. Nambo tukwalimbikasya kuti awungunyesoni yindu yine yajikusasalaga Baibulo pakwamba ya kusogolo. Ligongo chichi? Ligongo lyakuti yajikusasalaga Baibulo yikusaŵaga yakulekangana ni yakusatusalilaga ŵandu pakwamba yamsogolo. Yajikusasalaga Baibulo yili yakutyochela kwa Mlungu. Kwende tulole ligongo lyakwe tukuŵecheta kuti yajikusasalaga Baibulo yikusaŵaga yakulekangana ni yakusatusalilaga ŵandu:

Mlungu ali jwakudalilichika. Baibulo jikusatusalila kuti “Mlungu ali jwangalambusya.” (Tito 1:2) Konjechesya pelepa, Mlungupe ni jwampaka akombole kutusalila yachiyitendekwe kusogolo. (Yesaya 46:10) M’Baibulo mwana yisyasyo yejinji yakulosya kuti yakusasala Mlungu yikusatendekwa. Kuti amanyilile yejinji panganiji alolele fidiyo jakuti Ana Mpaka Tusimicisye Camtuli Kuti Baibulo Jikusasala Yisyesyene?
Mlungu akwete machili gakumasya yakusawusya yetu. Baibulo jikusasala kuti Mlungu akwete machili gakutenda ‘chilichose chakusaka.’ (Salimo 135:5, 6) Pelepatu mpaka tujile kuti pangali champaka chimlepelekasye Mlungu kutenda yasasile. Konjechesya pelepa, Mlungu akusaka kutukamuchisya ligongo lyakuti akusatunonyela.—Yohane 3:16.

Nambo mwine komboleka kuliwusya kuti, ‘Naga Mlungu akusaka kutukamuchisya soni naga akwete machili, ligongo chichi tukusasimana ni yipwetesi yejinji?’ Kuti apate kwanga kwa chiwusyochi, alolele fidiyo jakuti, Ana Ligongo Chichi Mlungu Akuyikunda Yipwetesi?

Ana yindu yambone yajikusasalaga Baibulo kuti chiyitendekwe kusogoluku yichitendekwa mwamtuli?

Mlungu chachikamulichisya masengo Uchimwene kapena kuti boma jakwe jakwinani pakusaka kwanilisya yakusaka yakwe. Jwalakwe asagwile Yesu Klistu kuŵa Jwakulamulila mu Uchimwenewu. Soni Mlungu ampele Yesuju machili gakuti aloleleleje chilambo soni ŵandu ŵali m’chilambomo. Yesu paŵaliji pachilambo chapasi, ŵaposisye ŵakulwala, ŵalisisye ŵandu ŵasala, ŵakwete ulamusi pa machili ga m’chilengedwe soni ŵayikene pakwajimusya ŵandu ku chiwa. (Maliko 4:39; 6:41-44; Luka 4:40; Yohane 11:43, 44) Pelepatu Yesu jwalosisye yachachitenda pachichiŵa Mwenye jwa Uchimwene wa Mlungu.

Alolele fidiyo jakuti Ana Uchimwene wa Mlungu Uli Cici? kuti amanyilile yejinji yawuchitenda Uchimwene wa Mlungu.

Ana yeleyi yichitendekwa chakachi?

Pachangakaŵa. Ana mpaka tusimichisye yeleyi mwamtuli? Baibulo jasasile mkanipaŵe ya yindu yayichilosya kuti Uchimwene wa Mlungu usigele panandi kulamulila chilambo chapasi. (Luka 21:10, 11) Yajasasile Baibulo ni yayikutendekwa pachilambopa.

Kuti amanyilile yejinji, aŵalanje ngani jakuti, “Ana Uchimwene wa Mlungu Uchitanda Chakachi Kulamulila Pachilambopa?”

Ana yindu yajikusasalaga Baibulo kuti chiyitendekwe kusogoloku mpaka yitukamuchisye chamtuli apano?

Baibulo jikusalandanya yindu yatukwembecheya kusogolo ni “nangula jwa umi wetu.” (Ahebeli 6:19) Mpela mwayikusaŵelaga kuti nangula akusakamuchisyaga kuti sitima jikajigalika ni mbungo jamachili, nombe mwejisoni patukwembecheya mwangakayika yindu yajikutusalila Baibulo, tuchikombola kupilila yakusawusya yatukusimana nayo. Chembecheyo mpaka chitukamuchisye kuti tuŵeje ŵakusangalala soni kola umi wambone.—1 Atesalonika 5:8.