Manayeni Jwakuwonaga Kutumichila Yehofa Kuŵa Kwakusosekwa Mnope

Manayeni jwaliji jumo mwa abale ŵaŵalongolelaga mumpingo wa ku Antiyokeya. Jwalakwe “ŵalijiganyisye pampepe ni Helodi jwakulamulila.” (Mase. 13:1) Yeleyi yikulosya kuti jwaliji jwamlijiganye mnope soni jwakulile m’liŵasa lyakusichila.

Atamose yaliji myoyo, jwalakwe jwasagwile yakuŵa Mklistu soni kuti akamuchisyeje mumpingo. Manayeni nganasaka kukamulichisya masengo majiganyo gakwe kapena upile waŵakwete wakumanyigana ni ŵakulamulila pakusaka kuti jwalakwejo aŵe jwakumanyika. Mmalomwakwe, jwalipeleche mnope pakwakamuchisya abale ni alongo.

Chisyasyo cha Manayeni chikulosya kuti kumtumichila Yehofa kuli kwakusosekwa mnope kulekangana ni kusaka kuŵa jwakumanyika kapena jwakusichila. Mwakulandana ni Manayeni, nombe m’weji tukusosekwa tukuwoneje kumtumichila Yehofa kuŵa kwakusosekwa mnope soni tuŵambaleje kusaka kuŵa ŵakumanyika. (Mat. 6:33) Yili yisyene kuti majiganyo gali gakusosekwa, nambope tumanyilileje yindu “yayili yakusosekwa mnope” soni tukakundaga kuti majiganyogo gatusokonasyeje patukumtumichila Yehofa.—Afil. 1:​9, 10.