Ligongo Chichi Mfundo sya M’Baibulo Sili Syakusosekwa?

1-2. (a) Ligongo chichi Baibulo mpaka tujikolanje kuti jili buku jakalakala mnope? (b) Ligongo chichi yajikusasala Baibulo yili yakamuchisya lelo jino?

BAIBULO jili buku jakalakala mnope. Bukuji jatandite kulembedwa yaka 3,500 yipiteyo soni ŵamalisisye kujilemba chiŵandika yaka 2,000 yipiteyo. Baibulo jili “maloŵe ga Mlungu” mwamti jili ja umi soni ja machili. Atamose kuti jalembedwe kalakala, nambope yajikusasala yili yakamuchisya mpaka lelo. (Aheb. 4:12; 2 Tim. 3:​16, 17) Ŵandu ŵajinji masiku agano, ayiweni kuti kukamulichisya masengo yajikusasala Baibulo kukwakamuchisya kuti asaguleje yindu mwalunda soni aŵeje ŵakusangalala.

² Nambo ana mpaka yikomboleche wuli buku jakalakalaji kuŵa jakamuchisya lelojino? Yeleyi yikusakomboleka pamagongo gaŵili aga. Chandanda, yajikusasala Baibulo yikusatyochela kwa “Mlungu jwa umi.” Jwalakwe ni juŵapanganyisye yindu yosope soni ali jwalunda kumpunda jwalijose. (1 Tim. 4:10; Alo. 16:​26, 27) Chaŵili, yajikusasala Baibulo yikusatyochela kwa Mlungu jwele ngakusachenga mkupita kwa ndaŵi. Ni ligongo lyakwe Baibulo jikusatukamuchisya lelojino kumalana ni yakusawusya yetu mpela yajatite pakwakamuchisya ŵane munyumamu.

3. Ana munganiji chitupate kwanga kwa yiwusyo yapi?

³ Munganiji chitupate kwanga kwa yiwusyo ayi: Ana mfundo sya m’Baibulo sili chichi? Ligongo chichi sili syakusosekwa mnope kwa m’weji masiku agano? Ana mpaka tusimanyilile chamti uli mfundo sya m’Baibulo? Kaneko, chitulolesoni yaŵatesile Yesu pakwakamuchisya ŵandu kuti asiwoneje mfundo sya m’Baibulo kuŵa syakusosekwa mnope.

ANA MFUNDO SYA M’BAIBULO SILI CHICHI?

4. Ana mfundo sya m’Baibulo sili chichi?

⁴ Mfundo sya m’Baibulo sili usyesyene wakusosekwa mnope wele Mlungu akusawukamulichisya masengo pakupanganya malamusi gakwe. Ndaŵi sine mpaka tujimanyilile mfundo ja m’Baibulo kutyochela pa lilamusi lyele Mlungu ŵapeleche. (Mat. 22:37) Malamusi gane gaŵapeleche Mlungu m’Baibulo, gasosekwaga kukamula masengo pachakutendekwa kapena pa ndaŵi jinejakwe basi. Nambope, ligongo lyalyamtendekasisye Yehofa kupeleka malamusigo likusatukamuchisya kumanyilila nganisyo syakwe soni yakusayiwona kuŵa yakusosekwa mnope. Myoyo, yindu yayamtendekasisye Yehofa kupeleka malamusigo nganiyiŵa yichenjile ata panandi. (Sal. 119:111) Malamusi mpaka gachenje soni kuleka kukamula masengo nambo mfundo sya pa lilamusilyo nganisiŵa sichenjile kapena kuleka kukamula masengo.—Yes. 40:8.

5. Apeleche chisyasyo chakulosya kulekangana pasikati pa malamusi soni mfundo? (Alolesoni yiwulili.)

⁵ Pakusaka kutukamuchisya kupikanichisya kulekangana pasikati pa malamusi soni mfundo, kwende tukambilane chisyasyo achi: Mama mpaka amsalile mwanache jwawo kuti, ‘Mkakamula mbawulaji.’ Lyelelitu lili lilamusi. Nambo mfundo ja lilamusili jili jakuti: Mkakamula chilichose chachikwete moto ligongo mpaka mpye. Mfundo jeleji ngaŵa kuti jikwamba kukamula masengo ku mbawulape. Nambo mpaka jikamulesoni masengo ku ayiloni, nambosoni chindu chilichose champaka chimtendekasye mwanachejo kupya ni kuwulala. Mfundoji ngajikusagamba kamula masengo ku yindu yayikusimanikwa mnyumbamo. Mpaka jikamule masengo kulikose kwampaka ajawule mwanachejo. Yisyene kuti mwanachejo pakusile, mpaka akamulichisyeje masengo mbawula. Nambope, mpaka asosekwe kujikamulichisya masengo mwakusamala ni chakulinga chakuti akawulala. Ni atamose kuti nganaŵa yimpepe ni mamagwewo, jwalakwe mpaka asosekwe kukumbuchila mfundo ja pa lilamusi lyaŵampeleli.

LIGONGO CHICHI MFUNDO SYA M’BAIBULO SILI SYAKUSOSEKWA?

6. (a) Ana Yehofa jwatupele chichi m’Maloŵe gakwe? (b) Ana Yehofa jwalosisye chamti uli kuti akusatuchimbichisya?

⁶ Ligongo lyakuti Yehofa akusatunonyela, jwatupele malamusi gakuti tugakuyeje ni chakulinga chakuti tuŵambale kusimana ni yakusawusya. (Yak. 2:11) Kupwatika pelepa, akusatukamuchisyasoni kumanyilila ligongo lyakwe ŵatupele malamusigo. Atamose yili myoyo, Yehofa nganatupa malamusi pa chakutendekwa chilichose. Mmalomwakwe, akusatupa malangiso gakutyochela m’Baibulo gampaka gatukamuchisye kuti tusaguleje yindu mwalunda. Malangisoga gakusatukamuchisya kusagula yindu mwalunda soni kutenda yindu yakuŵajilwa atamose yili mkuti pangali lilamusi lyakamulana ni yindu yatukusaka kusagulayo. Pakutupa mfundosi, jwalosisye kuti akusatuchimbichisya mnope. Soni akusasaka kuti tukamulichisyeje masengo ufulu wetu wakusagula yindu yampaka yilosye kuti tukusapikanila malamusi gakwe soni tukusamnonyela.—Agal. 5:13.

7. Apeleche chisyasyo chakulosya kusosekwa kwa mfundo sya m’Baibulo. (Alolesoni chiwulili.)

⁷ Pakusaka kutukamuchisya kumanyilila kusosekwa kwa mfundo sya m’Baibulo, kwende tukambilane chisyasyo achi: Mu yilambo yine akusaŵika yikwangwani mungulugulu msewu. Yikwangwaniyi yikusiyakamuchisya madalayifala kumanyilila malamusi gakusosekwa kukuya pakwendesya galimoto. Mwachisyasyo, yikwangwani yine mpaka yasalile madalayifalaga naga akusosekwa kwenda panandipanandi kapena kuwutuka mnope. Soni mpaka yamanyisye ndaŵi jakusosekwa kwima. Naga dalayifala nganapikanila malamusiga, mpaka apochele chilango. Nambope, pana yikwangwani yine yayikusiyamanyisya madalayifalaga kuti kusogolo kwawo kwana yindu yakogoya. Mwachisyasyo, mpaka yamanyisye kuti msewuwo uli wakutelesya kapena ŵanache ŵa sukulu akusanonyela komboka. Dalayifala jwalunda akusajendesya galimoto jakwe mwakusamala ni chakulinga chakuti akatenda ngosi. Mwachisyasyo, pajikugwa wula, jwalakwe mpaka ajendesyeje panandipanandi galimoto jakwe. Mwakulandana ni yeleyi Aklistuwe tukusaŵambala kutenda ndamo jilijose jele Maloŵe ga Mlungu gakusalekasya. Kupwatika pelepa, tukusaŵambala kuganichisya kapena kutenda yindu yampaka yitutendekasye kuti tukase malamusi ga Mlungu. Nambo kuti tukombole kutenda yeleyi, tukusasosekwa tumanyilileje mwakusaganichisya Yehofa pangani syakulekanganalekangana.

8. Mwakamulana ni Aloma 12:​1, 2, ana kuŵalanga Baibulo kukusatujiganya kutenda chichi?

⁸ Patukuwungunya mfundo sya m’Baibulo soni kusikamulichisya masengo, yindu yikusatujendela chenene paumi wetu. Mwachisyasyo, tukusalijiganya mwakusaganichisya Yehofa pangani syakulekanganalekangana. Patukuŵalanga Baibulo, tukusosekwa tuwungunyeje soni kuganichisya mfundo syampaka tusikamulichisye masengo. Tuliwusyeje kuti, Ligongo chichi Yehofa jwalembile nganiji m’Maloŵe gakwe? Ana ni yindu yapi yampaka nayikamulichisye masengo pa umi wangu? Naga tukutenda yeleyi tukusalijiganya “kukamulichisya masengo lunda lwetu lwakuganisya” patukumtumichila Yehofa. Nambosoni tukusalosya kuti ‘tukumanyilila chakulinga cha Mlungu chachili chambone chakuŵajilwa soni chakwanila.’—Aŵalanje Aloma 12:​1, 2.a

9. Ana kukamulichisya masengo mfundo sya m’Baibulo kukusatukamuchisyasoni chamti uli? (Ahebeli 5:​13, 14)

⁹ Kukamulichisya masengo Mfundo sya m’Baibulo kukusatukamuchisya kuti tuŵe Aklistu ŵakulimba mwausimu. Patukukamulichisya masengo mfundo sya m’Baibulo, tukusasagula yindu mwalunda soni unasi wetu ni Yehofa ukusaŵa wambone. (Aŵalanje Ahebeli 5:​13, 14.) Achinangolo akusiŵapa ŵanache ŵawo malamusi gejinji ni chakulinga chakuti amanyilileje yakusosekwa kutenda payakutendekwa yakulekanganalekangana. Jemanjaji mpaka apikanileje malamusiga pakogopa kuti achinangolo ŵawo chiŵape chilango. Nambo Yehofa ngakusatenda yindu ni m’weji mpela ŵanache nambo mpela achakulungwa. Jwalakwe akusatukulupilila kuti chitusaguleje yindu yakamulana ni yakusasaka jwalakwejo. Mwamti patukutenda yeleyi akusaŵa jwakusangalala mnope.—Sal. 147:11; Mis. 23:​15, 26; 27:11.

YAMPAKA TUTENDE KUTI TUSIMANYILILE MFUNDO SYA M’BAIBULO

10. Ana mpaka tusimanyilile chamti uli mfundo sya m’Baibulo?

¹⁰ Patukuŵalanga Baibulo, tukusapata mfundo syasikusatukamuchisya kumanyilila mwakusaganichisya Yehofa soni mwakusapikanila pangani syakulekanganalekangana. Tukusamanyililasoni yayamtendekasisye Yehofa kuti apeleche malamusi ganegakwe. Patumanyilile ligongo lyalyamtendekasisye Yehofa kupeleka lilamusilyo, ni patukusammanyilila chenene jwalakwejo. Myoyo, patukulijiganya Baibulo tukusosekwa tutandeje kaje ni kupopela kwa Yehofa, soni kumŵenda kuti atukamuchisye kupikanichisya nganisyo syakwe. Kaneko, tuganichisyeje mwakusokoka yatukuŵalangayo. (Mis. 2:​10-12) Mpaka tuliwusyeje kuti: ‘Ligongo chichi Mlungu jwapeleche lilamusili? Naga Yehofa ngakusakamulana ni ndamoji, ana mpaka apikane wuli naga ndili mkutenda ndamo sine syakulandana ni jeleji? Ana ngani jambalasileji jikunjiganya chichi soni ana mpaka nayikamulichisye masengo chamti uli pa umi wangu?’ Mpaka tukombole kusagula yindu yakamulana ni yakusasaka Yehofa, naga tukumanyilila magongo gagamtendekasisye jwalakwe kupeleka malamusi ganegakwe soni yatukulijiganya kutyochela pa malamusigo.

11. Pa Ulaliki wa Petumbi, ana Yesu jwatukamuchisye chamti uli kumanyilila yampaka tutende kuti tumanyilileje mfundo sya m’Baibulo? (Alolesoni yiwulili.)

¹¹ Pa Ulaliki wakwe wa Petumbi, Yesu jwatukamuchisye kulola yampaka tutende kuti tumanyilileje mfundo sya m’Baibulo. Kwende tukambilane yisyasyo yitatu. Mu chisyasyo chilichose, chituyiwone kuti Yesu jwatandaga ni kusala kaje lilamusi lyaŵapeleche Mlungu. Kaneko, jwalondesyaga yayamtendekasisye Yehofa kupeleka lilamusilyo. Patukuganichisya yaŵajiganyisye Yesuyi, chituyiwone kuti kuganichisya magongo gagamtendekasisye Yehofa kupeleka malamusigo mpaka kutukamuchisye kuti tusaguleje yindu mwalunda.

12. Ana mfundo jajili pa lilamusi lyalili pa Mateyu 5:​21, 22 jili jamti uli? (Alolesoni chiwulili.)

¹² Aŵalanje Mateyu 5:​21, 22. “Mkawulaga mundu.” Ana mfundo ja lilamusi lyeleli jili jamti uli? Yehofa ngakusasaka kuti twaŵenjeje ŵane. Jwalakwe ngakusasaka kuti twaganichisyeje, kwatendela kapena kwaŵechetela ŵane yindu yachabe. Yesu jwalosisye kuti mundu mpaka ‘aleŵe magambo’ atamose yili mkuti nganam’wulaga mundu jwine. Yeleyi mpaka yitendekwe naga jwalakwe ‘akupitilisya kumpila mtima mlongo mjakwe’ kapena kumŵechetela maloŵe gachipongwe. Yili myoyo ligongo lyakuti yindu yeleyi, ni yayikusamtendekasya mundu kumwulaga mjakwe.—1 Yoh. 3:15.

13. Ana mpaka tukamulichisye masengo chamti uli mfundo ja pa Mateyu 5:​21, 22 pa umi wetu? (Alolesoni yiwulili.)

¹³ Ana mpaka tukamulichisye masengo chamti uli mfundo ja pa Mateyu 5:​21, 22? Tukusosekwa tuŵambaleje kutumbila kapena kwasunjila ŵane chakulukosi. (Lef. 19:18; Yob. 36:13) Ligongo chichi? Ligongo lyakuti naga tukutenda yeleyi mpaka yitutendekasye kuti tuŵenganeje ni achimjetu yele yakuyichisya yakwe mpaka yitendekasye kuti tutande kwaŵechetela maloŵe gakupweteka. (Mis. 10:12) Naga tukwatumbilila ŵane, mpaka yitendekasye kuti tutande kwalya miseche kapena kuŵecheta yindu yaunami yakwamba jemanjajo yampaka yisakasye mbili jawo. (Mis. 20:19; 25:23) Masiku agano yili yakuwanda kuti ŵandu ŵaŵechetele achimjawo kapena kwatendela yindu yakusakala pa Intaneti. Mpaka ayiwone kuti Yesu paŵajiganyaga kuti tuŵambaleje kwaŵenga ŵane, kwaliji kuli kwangali mafoni, Intaneti nambosoni makompyuta. Nambope, yaŵajiganyisye jwalakwe, mpaka yitukamuchisye m’weji masiku agano kuŵambala kukamulichisya masengo yindu yeleyi pakuwandisya yindu yaunami yakwamba ŵane. Ni pakuŵapo nganituŵa tum’wuleje mundu jwine, tukusosekwasoni tuŵambaleje kuŵecheta yindu yampaka yisakasye mbili jakwe.

14. Ana mfundo ja pa lilamusi lya pa Mateyu 5:​27, 28 jili jamti uli? (Alolesoni chiwulili.)

¹⁴ Aŵalanje Mateyu 5:​27, 28. “Mkatenda chikululu.” Ana mfundo ja pa lilamusili jili jamti uli? Yehofa akusaŵengana ni kutenda ndamo ja chikululu. Nambosoni akusaŵengana naga mundu akuganichisya ya chikululu ligongo mpaka yimtendekasye kuti atende yakusakala. Yesu jwasasile kuti naga jwamlume akupitilisya kumlolechesya jwamkongwe jwele nganaŵa ŵamkwakwe, mpaka kwika pa kumkumbila ali agonile najo nikuti alemwisye. Myoyo ndaŵi syosope tutendeje yampaka tukombole kuti tuŵambaleje kuganichisya yachikululu. (Mat. 5:​29, 30) Mfundo jeleji jikukamulasoni masengo kwa ŵandu ŵele nganaŵe kulombela.

15. Ana mfundo jajikusimanikwa pa Mateyu 5:​27, 28 mpaka tujikamulichisye masengo chamti uli masiku agano? (Alolesoni yiwulili.)

¹⁵ Ana mpaka tukamulichisye masengo chamti uli mfundo ja pa Mateyu 5:​27, 28? Tukusosekwa tuŵambaleje kuganichisya yakutenda chikululu. (2 Sam. 11:​2-4; Yob. 31:​1-3) Sonitu kusala mwangasisa maloŵe, Mklistu jwakulimba mwausimu akusaŵambala kulolela yakuŵagula yamtundu uliwose. Jwalakwe akusaŵambala kola nganisyo syakuti mpaka ndoleleje yakuŵagulayi bola ngatenda chikululu. Jwalakwe akusaŵambalasoni kola nganisyo sya ŵandu ŵa ku chilamboku syakuti pana yakuŵagula yakusakala mnope soni yine yangasakala mnope. Mwamti naga akulolela yakuŵagula yangasakala mnopeyo nikuti pangali chakusawusya. Mu ndaŵi ja Yesu kwaliji kwangali yipangiso yamakono, mafidiyo kapena yiwulili yakwambula pa kamela. Atamose yili myoyo, yaŵajiganyisye Yesu yikusatukamuchisya kumanyilila mwakusapikanila Yehofa naga mundu akulolela yiwulili soni mafidiyo gakuŵagula. Yeleyi yikutukamuchisya kumanyilila kuti Yehofa mpaka yimsakalisye mnope naga tukwatumichisya ŵane yiwulili kapena mafidiyo gakuŵagula. Kapenasoni naga tukuŵecheta kapena kwatumichisya mautenga gakuŵagula pa foni jetu. Kukuya mfundo jeleji mpaka kwakamuchisye ŵalombele kuŵambala kwatendela ngasa achiŵamkwawo. (Mala. 2:15) Mpaka yakamuchisyesoni Aklistu wosope chinga ŵalombele kapena iyayi kuŵambala chilichose champaka chatendekasye kutenda chikululu.—Mis. 5:​3-14.

16. Ana mfundo ja lilamusi lya pa Mateyu 5:​43, 44 jili jamti uli? (Alolesoni chiwulili.)

¹⁶ Aŵalanje Mateyu 5:​43, 44. “Mumnonyeleje mjenu.” Ana mfundo ja pa lilamusili jili jamti uli? Yehofa akusasaka kuti twawoneje ŵandu wosope kuti ali achalongo achimjetu soni twanonyeleje. Nambo chakutesya chanasa chili chakuti Ayuda ŵa mundaŵi ja Yesu, ŵakulupililaga kuti lilembali lyagopolelaga kuti agambeje kwanonyela Ayuda achimjawo ni kwaŵengaga adani ŵawo. Nambo Yesu jwamanyililaga kuti lilamusili nganiligopolelaga yeleyo. Jwalakwe jwamanyililaga kuti Atati ŵakwe ŵakwinani, akusasaka kuti tumwoneje mundu jwalijose kuti ali mlongo mjetu mwangajigalila mtundu wakwe kapena chilambo chakutyochela.—Mat. 5:​45-48.

17. Ana mfundo jajikusimanikwa pa Mateyu 5:​43, 44 mpaka tujikamulichisye masengo chamti uli pa umi wetu? (Alolesoni yiwulili.)

¹⁷ Ana mpaka tukamulichisye masengo chamti uli mfundo ja pa Mateyu 5:​43, 44? Kwanonyela achimjetu kukusatutendekasya kuti tuŵambaleje kujigala nawo mbali ŵandu pakuputa ngondo kapena kuputa nawo ngondojo. (Yes. 2:4; Mik. 4:3) Kukusatutendekasyasoni kuti twatendeleje yindu yambone ŵandu ŵatukulekangana nawo mtundu, chilambo chakutyochela kapena dini. (Mase. 10:​34, 35) Kukusatukamuchisyasoni kuti twakululuchileje ŵandu ŵatutendele yindu yachipongwe kapena ŵaŵatendele yindu yachipongwe achalongo achimjetu.—Mat. 18:​21, 22; Mak. 11:25; Luk. 17:​3, 4.

APITILISYE KUKAMULICHISYA MASENGO MFUNDO SYA M’BAIBULO

18. (a) Ana ali ŵakusimichisya kutenda chichi? (b) Ana tuchikambilana chichi mungani jakuyichisya?

¹⁸ Kusala yisyene tuli ŵakusangalala mnope kuti Yehofa ngakusatenda yindu ni m’weji mpela kuti tuli ŵanache nambo mpela ŵandu ŵachikulile. Jwalakwe akusasaka kuti tukamulichisyeje masengo mfundo sya m’Baibulo syampaka situkamuchisye kuti tusaguleje chenene yindu. (1 Akoli. 14:20) Myoyo, patukusagula yakutenda pa umi wetu kwende tuŵeje ŵakusimichisya kuti “ndaŵi jilijose tumanyilileje yakusaka Yehofa.” (Aef. 5:17) Tukusamnonyela Yehofa ngaŵa ligongo lyakogopa kuti chatupe chilango. Mwamti yeleyi yikusatukamuchisya kuti tusaguleje yindu mwakamulana ni yakusasaka jwalakwejo. Nambotu panasoni mtuka wine waŵatupele Yehofa wampaka utukamuchisye kuti tusaguleje yindu yakumsangalasya jwalakwe. Mwamti tuchikambilana ya mtukawu mungani jakuyichisya.