Apitilisye Kulimbisya Unasi Wawo ni Yehofa

1. Ana ni yindu yine yapi yakusasosechela ŵandu? (Mateyu 5:3)

YEHOFA akusamanyilila yakusasosechela ŵandu. Mwachisyasyo, kuti umi wetu ujende chenene tukusasosechela yakulya, yakuwala soni malo gakutama. Naga tukusoŵechela chimo mwa yindu yakusosekwayi atamose kwa kandaŵi kamnono umi ukusaŵaga wakusawusya. Konjechesya pakutupanganya kuti tusosecheleje yindu ya paumiyi, Yehofa ŵatupanganyisyesoni kuti tusosecheleje kummanyilila jwalakwe soni kumdalila kuti atulongoleleje. (Aŵalanje Mateyu 5:3.) Naga tukusaka kusangalala yisyesyene, tukusosekwa kuŵa paunasi wambone ni Yehofa soni kupitilisya kumkulupilila jwalakwe.

2. Ana ‘kumanyilila kuti Mlungu akusosekwa kutulongolela’ kukusagopolela chichi? Apeleche chisyasyo.

² Ana ‘kumanyilila kuti Mlungu akusosekwa kutulongolela’ kukusagopolela chichi? Maloŵega m’ma Baibulo gane akusagagopolela kuti “ŵandu ŵakusamanyilila kuti ali ŵakulaga mwa usimu.” Aganichisye ya mundu jwakulaga mnope. Jwalakwe awete yakuwala yepapuche soni agambile kutama mungulugulu msewu. Jwalakwe nganakola machili ligongo lyakuti nganalya. Musi, akulaga ni lyuŵa soni chilo akulaga ni mbepo. Ŵandu akumŵambala mwamti jwalakwe ngakusangalala soni akuwoneka kuti apesile. Mundu jwakulagaju akumanyilila kuti akusosechela chikamuchisyo kuti aŵe chijumi soni kuti akole machili. Mwakulandana ni yeleyi, mundu jwakusamanyilila kuti akusosechela Mlungu kuti amlongoleleje, akusamanyilila kuti akusasosechela chikamuchisyo cha Mlungu pa umi wakwe. Myoyo jwalakwe akusaŵa jwakusachilila kukamulichisya masengo malangiso gakusapeleka Yehofa kwa ŵandu ŵakusamnonyela jwalakwe.

3. Ana munganiji chitukambilane chichi?

³ Munganiji, chitutande ni kulola yampaka tulijiganye kutyochela kwa jwamkongwe jwa ku Foinike jwele ŵamŵendile Yesu kuti amkamuchisye. Chisyasyo chakwechi chikulosya ndamo sitatu syakusosekwa kukola mundu jwakusamanyilila kuti akusosekwa Mlungu kuti amlongoleleje. Kaneko chitukambilane chisyasyo cha ndumetume Petulo, ndumetume Paulo soni Mwenye Daudi ŵele ŵamdalilaga mnope Yehofa kuti ŵakamuchisyeje.

YAMPAKA TULIJIGANYE KUTYOCHELA KWA JWAMKONGWE JWA KU FOINIKE

4. Ana jwamkongwe jwa ku Foinike jwasakaga kuti Yesu amtendele chichi?

⁴ Lisiku line jwamkongwe jwa ku Foinike jwayiche kwa Yesu. Mwanache jwakwe jwamkongwe ‘jwakamwilwe ni chiŵanda.’ (Mat. 15:​21-28) Jwamkongweju jwatindiŵele pameso pa Yesu ni kumŵenda kuti amkamuchisye. Mwamtitu jwamkongwe jwa ku Foinikeju jwalosisye ndamo syakusosekwa mnope paŵasimene ni Yesu. Kwende tukambilane sine mwa ndamosi.

5. Ana ni ndamo syapi syaŵalosisye jwamkongwe jwa ku Foinike soni ana Yesu jwatesile chichi? (Alolesoni chiwulili.)

⁵ Jwamkongwe jwa ku Foinikeju jwalosisye ndamo jisyesyene jakulinandiya. Tukuŵecheta yeleyi ligongo lyakuti jwalakwe nganatumbila ni muŵamjanjile Yesu. Yili myoyo ligongo lyakuti jwalakwe ŵamlandenye ni tumbwa twele ŵandu ŵanganaŵa Ayuda ŵalangaga mnyumba syawo. Ana akatesile chichi yikaŵe kuti Yesu aŵechete kwa wawojo maloŵe gelega? Ana akatengwiche ni kuleka kumŵenda Yesujo kuti ŵakamuchisye? Nambotu jwamkongwe jwa ku Foinikeju nganatenda yeleyi. Jwalakwe nganagamba kulosya ndamo jakulinandiya nambo jwalosisyesoni ndamo jakulimbichila. Yeleyitu yawonechele pajwapitilisyaga kumŵenda Yesu kuti amkamuchisye. Ana ni chichi chachamtendekasisye jwalakwe kutenda yeleyi? Chaliji chikulupi chakwe mwa Yesu. Sonitu Yesu paŵayiweni kuti jwamkongweju jwakwete chikulupi chamachili, yamtendekasisye kuti amkamuchisye. Atamose kuti Yesu jwaliji ali amsalile kala jwamkongweju kuti jwalakwe jwayiche kukusikamuchisya “ngondolo syesokonechele sya m’nyumba ja Yisalayeli,” nambope Yesu jwakopwesye msimu wakusakala uwaliji mwa mwanache jwa jwamkongweju.

6. Ana tukulijiganya chichi kutyochela kwa jwamkongwe jwa ku Foinike?

⁶ Naga tukusaka kuti malangiso gakutyochela kwa Yehofa gatukamuchisyeje, tukusosekwa kujigalila chisyasyo cha jwamkongwe jwa ku Foinike. Tukusosekwa kuŵa ŵakulinandiya, ŵakulimbichila soni kukola chikulupi chakulimba. Mundu jwakulinandiyape ni jwakusalimbichila kumŵenda Mlungu kuti amkamuchisye. Tukusosekwasoni kumkulupilila mnope Yesu Klistu soni ŵandu ŵakwakamulichisya masengo kuti atulongoleleje. (Mat. 24:​45-47) Mwamti Yehofa soni Yesu akusasangalala kwalongolela ŵandu ŵakusalosya ndamo syelesi. (Alole Yakobo 1:​5-7.) Sambano kwende tulole yakusatenda Yehofa pakutulongolela soni kutupa yatukusosechela ni chakulinga chakuti tuŵeje ŵakusangalala. Chitulolesoni yampaka tutende kuti tujigalile chisyasyo cha ndumetume Petulo, ndumetume Paulo soni Mwenye Daudi.

APITILISYEJE KULILISYA MWAUSIMU MPELA MUŴATENDELAGA PETULO

7. Ana Petulo jwapochele utumiki wamti uli soni ana jwalakwe jwasosekwagasoni kutenda chichi? Alondesye. (Ahebeli 5:14–6:1)

⁷ Aganichisye ya chisyasyo cha ndumetume Petulo. Jwalakwe jwaliji jumo mwa Ayuda ŵandanda ŵaŵamanyilile kuti Yesu ali Mesiya. Jwalakwe jwamanyilile kuti Yehofa ŵamkamulichisyaga masengo Yesu pakwajiganya ŵandu “maloŵe gakupeleka umi wangamala.” (Yoh. 6:​66-68) Yesu mkanajawule kwinani, ŵamsalile Petulo kuti, “Mlisyeje tuŵanache twangu twa ngondolo.” (Yoh. 21:17) Petulo jwatesile utumiki welewu mwakulupichika soni Yehofa jwayikene pakumkamulichisya masengo jwalakwe kuti alembe yikalata yiŵili yayaŵele mbali jimo ja Baibulo. Nambotu Petulo jwasosekwaga kulijiganya Baibulo pajika. Mwachisyasyo, jwalakwe jwaŵalangaga yikalata yaŵalembile Paulo yele yaliji mbali jimo ja Baibulo. Petulo jwamanyililaga kuti yine mwa yindu yaŵalembile Paulo yaliji “yakusawusya kuyipikanichisya.” (2 Pet. 3:​15, 16) Nambope Petulo ligongo lyakulimbichila kwakwe jwakwete chikulupi chakuti Yehofa chamkamuchisye kuti apikanichisye soni kukamulichisya masengo “chakulya chakulimba” chele Paulo mwakulongoleledwa ni Mlungu jwalembile mu yikalatayi.—Aŵalanje Ahebeli 5:14–6:1.

8. Ana Petulo jwatesile yamti uli paŵapochele malangiso gasambano kutyochela kwa Mlungu?

⁸ Petulo jwalosisye kuti jwamkulupililaga mnope Yehofa mwakupikanila malangiso gaŵapochele. Mwachisyasyo, lisiku line Petulo ŵagaweni mesomkulola soni lilayika lyamsalile kuti asikite chinyama ni kulya. Nambo Chilamusi cha Mose nganichakundaga Ayuda kulya nyama sya mtundu welewu. Mwamti kwa Ayuda malangiso gelega galiji gakusawusya kugakuya. Pandanda Petulo jwajanjile kuti, “Iyayi Ambuje, ligongo une nganindyeje chilichose changaswejela mwakamulana ni chilamusi.” Nambo lilayika lila lyamsalile kuti, “Yindu yayiswejesye Mlungu mleche kuyisala kuti yili yangaswejela.” (Mase. 10:​9-15) Petulo jwatesile yajwasalilidweyi mwamti jwachenjile kaganisye kakwe. Ana tukumanyilila chamti uli yeleyi? Panyuma pakuti jwalakwe agaweni mesomkulolaga, achalume ŵatatu ŵayiche ku nyumba ja Petulo. Jemanjaji ŵaŵechete kuti ambuje ŵawo, lina lyawo Koneliyo ŵasakaga kuti Petulojo ajawule ku nyumba jakwe. Mwamti yikaŵe kuti Petulo nganagawona mesomkulolaga, nikuti ngamkanajawula ku nyumba ja Koneliyo ligongo nganaŵa myuda. Yaliji myoyo ligongo lyakuti Ayuda ŵawonaga ŵandu ŵanganaŵa Ayuda kuti ali ŵangaswejela. (Mase. 10:​28, 29) Nambo panyuma pakuti Yehofa amlosisye Petulo kuti kutandila pandaŵijo kwawulaga msogolo, soni kuti jwalakwe akusaka kuti ŵandu wosope apikane ngani syambone, ndaŵi jijojo jwachenjile nganisyo syakwe mwakutenda yaŵasakaga Yehofa. (Mis. 4:18) Jwalakwe jwamlalichile Koneliyo soni ŵamwiŵasa mwakwe mwamti Petulo jwasangalele mnope kwawona jemanjaji ali mkupikanila ngani syambone, kupochela msimu weswela soni kubatisidwa.—Mase. 10:​44-48.

9. Ana ni maumbone gaŵili gapi gatukusapata naga tukulijiganya yindu yayili yakusawusya kuyipikanichisya?

⁹ Mpela muŵatendele Petulo, ndaŵi syosope tukusosekwa kumwaga mkaka kapena kuti kulijiganya yijiganyo yandanda yayikusasimanikwa m’Maloŵe ga Mlungu. Nambosoni tukusasosekwa kulingalinga kuti tusachilileje kulijiganya yindu yayili yakusawusya kuyipikanichisya. Myoyo tukusasosekwa kulolechesya kuti tukukola ndaŵi jakwanila jakulijiganya mwakusokoka Maloŵe ga Mlungu mwakusamala. Mwamtitu kutenda yeleyi kuli kwakamuchisya. Ana kutenda yeleyi kuli kwakamuchisya chamti uli? Chandanda, tukusalijiganyaga yindu yakwamba Yehofa yayikusatukamuchisya kuti tumnonyeleje mnope soni kumchimbichisya. Chaŵili, tukusaŵa ŵakusachilila mnope kwasalila ŵane yakwamba Atati ŵetu ŵakwinani. (Alo. 11:33; Chiw. 4:11) Chisyasyo cha Petulo chikutukamuchisya kumanyilila chindu chine. Naga pana kuchenga kwasambano pa ngani jakapikanichisye ka Maloŵe ga Mlungu, ndaŵi jijojo tukusosekwa kuchenga kaganisye ketu ni kamulana ni kuchengako. Kutenda yeleyi mpaka kutendekasye kuti Yehofa apitilisye kutulongolela soni tuchipitilisya kumtumichila jwalakwe mwakulupichika.

AMSYASYEJE PAULO MWAKUKUSYA NDAMO SYAMPAKA SIMSANGALASYE YEHOFA

10. Mwakamulana ni yayili pa Akolose 3:​8-10, ana tukusosekwa kutenda chichi kuti tumsangalasyeje Yehofa?

¹⁰ Kuti tumsangalasyeje Mlungu tukusasosekwa kukusya ndamo syampaka simsangalasye jwalakwe. Mwamti ndumetume Paulo jwasasile kuti tukusasosekwa ‘kuwula umundu wakala’ ni ‘kuwala umundu wasambano.’ (Aŵalanje Akolose 3:​8-10.) Nambotu pakusajigala ndaŵi soni tukusasosekwa kulimbichila kuti tukole ndamo syampaka simsangalasye Mlungu. Kwende tulole chisyasyo cha Paulo. Kutandila pajwaliji jwachinandipile, jwalakwe jwatendaga yakomboleka kuti amsangalasyeje Yehofa. (Agal. 1:14; Afil. 3:​4, 5) Nambope, jwalakwe nganamanyililaga mwampaka atendele kuti amtumichileje Mlungu m’litala lyakuŵajilwa. Ligongo lyakuti jwalakwe jwaliji jwakupoka soni nganamanyililaga yindu yaŵajiganyisye Yesu, yamtendekasisye kuti akole ndamo syakusakala soni kuŵa mundu “jwachipongwe.”—1 Tim. 1:13.

11. Ana Paulo jwakwete yakulepela yapi yaŵasosekwaga kulimbichila kuti amalane nayo? Alondesye.

¹¹ Paulo mkanaŵe kuŵa Mklistu, jwaliji jwakwanguya kupya mtima. Ngani jajikusasimanikwa m’buku ja Masengo jikusalondesya kuti Paulo ŵatumbilile mnope ŵakulijiganya ŵa Yesu mwamti “ŵasimichisye yakupitilisya kwalagasya soni kwawulaga.” (Mase. 9:1) Panyuma pakuŵa Mklistu, ngatukukayichila kuti jwalakwe jwasosekwaga kulimbichila kuti awule umundu wakwe wakalawo. (Aef. 4:​22, 31) Atamose yaliji myoyo, nambope pandaŵi jine Paulo ni Balanaba ŵatindene nganisyo mwamti “jemanjaji ŵakanganile mnope.” (Mase. 15:​37-39) Pelepatu Paulo jwawujilesoni kundamo jakwe jakalakala jila. Nambo jwalakwe nganawujila munyuma. Mwamti jwalakwe jwapitilisye ‘kuchiputa chilu chakwe’ soni kulimbana ni ungali umlama wakwe ni chakulinga chakuti Yehofa apitilisye kusangalala najo.—1 Akoli. 9:27.

12. Ana ni chichi chachamkamuchisye Paulo kuti apitilisye kuwula umundu wakwe wakala?

¹² Paulo jwakombwele kuwula umundu wakwe wakala ni kuwala umundu wasambano ligongo lyakuti nganalidalilaga msyene. (Afil. 4:13) Mpela muŵatendele Petulo, nombenajo Paulo jwadalilaga ‘machili gajwapochele kutyochela kwa Mlungu.’ (1 Pet. 4:11) Nambotu ndaŵi sine Paulo jwaliwonaga kuti ali jwakulepela. Nambo jwalakwe patengwiche, jwaganichisyaga yindu yambone yamtendele Atati ŵakwe ŵakwinani. Mwamti yeleyi yamkamuchisye kuti apitilisye kuchenga yindu yine ni chakulinga chakuti amsangalasyeje Yehofa.—Alo. 7:​21-25.

13. Ana mpaka tumsyasye chamti uli Paulo?

¹³ Mwangajigalila kuti tuŵele tuli mkumtumichila Yehofa kwa ndaŵi jelewu chamti uli, mpaka tumsyasye Paulo mwakumanyilila kuti tukusasosekwa kupitilisya kuwula umundu wakala ni kuwala umundu wasambano. Naga ndaŵi sine tukusatendasoni ndamo syakusakala sitwasilesile mpela kupya mtima soni kuŵecheta maloŵe gachipongwe, ngatukusosekwa kuliwonaga kuti tuli ŵandu ŵakulepela. Mmalomwakwe, tukusasosekwa kupitilisya kulingalinga kuchenga kaganisye ketu soni mwatukusatendelaga yindu. (Alo. 12:​1, 2; Aef. 4:24) Yakuwala yikusakomboleka kuja kuyiwusya kuti yitukwaneje. Nambo mwakulekangana ni yeleyi, m’weji ni ŵatukusasosekwa kuchenga kuti tukombole kuwala umundu wasambano wakusapeleka Mlungu. Mwamtitu yili yakupikanika kuti m’weji ni ŵatukusasosekwa kuchenga kuti tukamulane ni yakusasaka Mlungu.

AMSYASYEJE DAUDI SONI AKUNDEJE KUTI YEHOFA ŴACHENJELEJE

14-15. Ana Yehofa akusiŵachenjela ŵakutumichila ŵakwe m’matala gapi? (Salimo 27:5) (Alolesoni chiwulili.)

¹⁴ Kuti tusangalaleje yisyesyene, tukusasosekwasoni kuti Yehofa atuchenjeleje. Ana Yehofa akusatuchenjela m’matala gapi? Soni ana mpaka tutende yamti uli kuti jwalakwe apitilisye kutuchenjela?

¹⁵ Mwenye Daudi jakwete chikulupi chakuti Yehofa chamchenjeleje mu ndaŵi ja yakusawusya. (Aŵalanje Salimo 27:5.) Yehofa akusiŵachenjela ŵakutumichila ŵakwe kwa jwalijose kapena ku chindu chilichose champaka chatendekasye kuti aleche kumkulupilila jwalakwe. Ana jwalakwe akusatuchenjela chamti uli masiku agano? Jwalakwe jwasasile kuti pangali chida chepanganyidwe ni achimmagongo chele chichapweteka ŵakutumichila ŵakwe. (Sal. 34:7; Yes. 54:17) Atamose kuti Satana ni ŵandu ŵali kumbali jakwe ali ŵamachili, nambope jemanjaji nganaŵa akombwele kutugomeka. Mwamti atamose jemanjaji ali atuwuleje, Yehofa chachitujimusya. (1 Akoli. 15:​55-57; Chiw. 21:​3, 4) Yehofa akusatukamuchisyasoni patukulagasika nganisyo ni chakulinga chakuti tukaleka kumtumichila jwalakwe. (Mis. 12:25; Mat. 6:​27-29) Soni Atati ŵetu ŵachinonyelo atupele abale ni alongo kuti atukamuchisyeje soni atupele achakulungwa ŵa mumpingo kuti atulimbikasyeje. (Yes. 32:​1, 2) Mwamti patusimanikwe pamisongano ja mpingo, tukusalijiganya ya matala gane gampaka tukuye kuti Yehofa atukamuchisyeje soni kutuchenjela.—Aheb. 10:​24, 25.

16. Ana Yehofa ŵamchenjelaga Daudi m’matala gapi?

¹⁶ Daudi pajwampikanilaga Yehofa, jwalakwe ŵamchenjelaga kuti akasimana ni yakogoya yakusasimana nayo ŵandu ŵakusatendaga ulemwa mwamele. (Alole Misyungu 5:​1, 2.) Nambo naga Daudi nganapikanila mfundo sya Mlungu, Yehofa nganamchenjelaga jwalakwe kuti akasimana ni yakuyichisya ya yitendo yakwe. (2 Sam. 12:​9, 10) Ndaŵi sine Daudi jwasimanaga ni yakusawusya ligongo lya yindu yangali chilungamo yaŵamtendelaga ŵane. Payitendekwe yeleyi Daudi jwamsalilaga Yehofa yindu yosope yayamlagasyaga nganisyo mwamti Yehofajo ŵamkamuchisyaga mwakumsimichisya kuti akusamnonyela soni kuti chamsamalileje.—Sal. 23:​1-6.

17. Ana mpaka tumsyasye chamti uli Daudi?

¹⁷ Mpaka tumsyasye Daudi mwakumŵenda Yehofa kuti atupe malangiso patukusagula yakutenda. Nambope tumanyilileje kuti ndaŵi sine mpaka tusimaneje ni yakusawusya ngaŵa ligongo lyakuti Yehofa alepele kutuchenjela nambo ligongo lyakuti twasagwile yindu mwakulemwecheka. (Agal. 6:​7, 8) Nambope patukusimana ni yakusawusya atamose yili mkuti pangali chatulemwisye, tukusamsalilaga Yehofa mwatukupikanila mu mtima kwineku tuli tukwete chikulupi chakuti jwalakwe chachichenjela mitima soni nganisyo syetu.—Afil. 4:​6, 7.

APITILISYE KUMDALILA YEHOFA KUTI ŴALONGOLELEJE

18. Ana tukusasimana ni chakusawusya chapi, soni ana tukusosekwa kutenda chichi kuti Yehofa apitilisye kutulongolela? (Alolesoni yiwulili.)

¹⁸ Lilemba lyetu lya chaka cha 2026 lili lyakuti, “Ŵana upile ŵandu ŵakusamanyilila kuti akusosekwa Mlungu kuti ŵalongoleleje.” Kutendatu yeleyi kuli kwakusosekwa mnope kupundana ni kala kose. Ligongo chichi tukuŵecheta yeleyi. Yili myoyo ligongo lyakuti tusungulilidwe ni ŵandu ŵangakusasaka kuti Mlungu ŵalongoleleje soni ŵakusagamba kutenda yakusaka yawo mwakukuya yijiganyo ya unami kapena lunda lwa ŵandu. M’weji ngatukusosekwa kuŵa mpela jemanjaji. Ana mpaka tutende yeleyi mwamti uli? Tukusosekwa kupitilisya kulijiganya Maloŵe ga Mlungu, kuwala umundu wasambano, soni kukunda kuti Yehofa atuchenjeleje.