Jemanja Ŵachikulile Mli Ŵakusosekwa Mnope mu Mpingo
Mlongo Connie jwa yaka 83 jwatite, “panguganichisya yamunyuma, ngusanyadila ni yindu yanakombwele kutenda ndili jwachinyamata. Nambo apano ngusile mwamti nganimba ngombwele kutenda yejinji.”
Komboleka wawojosoni akulepela kutenda yejinji ligongo lyakuti akalambele. Mwamti mwangasamala kandu kuti kwa yaka yejinji aŵele ali mkumtumichila Yehofa mwakulupichika, mpaka atande kuliwona mwangaŵajilwa ligongo lyakuti apano akulepela kutenda yejinji. Mwachisyasyo, mpaka atande kulandanya yakukombola kutenda apano ni yaŵakombolaga kutenda kala. Naga yili myoyo, ana mpaka atende chichi kuti amalane ni kaganisye keleka?
YAKUSAJEMBECHEYA YEHOFA KWA WAWOJO
Mpaka aliwusye kuti, ‘Ana Yehofa akusajembecheya chichi kwa une?’ Lilemba lya Detulonomo 6:5, mpaka lyalimbikasye mnope. Lilembali likusati, “Mumnonyeleje Yehofa Mlungu jwenu ni mtima wenu wosope, ni umi wenu wosope soni ni machili genu gosope.”
Mwakamulana ni lilembali, Yehofa akusajembecheya kuti wawojo chamtumichileje jwalakwe ni mtima wawo wosope, umi wawo wosope, soni ni machili gawo gosope. Kukumbuchila yeleyi mpaka kwakamuchisye kuti akalilandanyaga ni ŵane kapena kulandanya yakukombola kutenda apano ni yaŵakombolaga kutenda munyuma.
Aganichisye ayi. Paŵaliji ŵachinandipile, ana ŵapelekaga chichi kwa Yehofa? Ŵajinji mwa ŵakutumichila ŵa Yehofa mpaka asale kuti ŵapelekaga yakakombwele. Wawojosoni ŵakombolaga kutenda yejinji ligongo lya muyaŵelele yindu pandaŵijo. Ana apano akukombola kumpa chichi Yehofa? Mwangakayichila, apanosoni akutenda yampaka akombole mwakamulana ni mwayiŵelele yindu paumi wawo. Naga akuyiwona yindu m’litala lyeleli, mpaka asale kuti apano akumpa Yehofa mwakulandana ni muŵatendelaga munyuma. Yili myoyo ligongo lyakuti munyumamu ŵampaga Yehofa yakakombole. Apanosoni akumpa Yehofa yampaka akombole.
Piŵaliji ŵachinyamata ŵampaga Yehofa yakakombwele soni apano pali ŵachikulile akumpaga jwalakwe yindu yampaka akombole
YALIJIGANYISYE MPAKA YAKAMUCHISYE MNOPE ŴANE
Mmalo mwakwamba kuganichisya yindu yakulepela kutenda ligongo lya uchikulile wawo, mpaka alinjelinjeje kupata matala gakwakamuchisya ŵane. Apano mpaka atende yindu yine yele ngamkanatenda yikaŵe kuti ali jwachinandipile. Mwachisyasyo mpaka atende ayi:
Ŵasalileje ŵane yalijiganyisye. Aganichisye ya maloŵe aga gagalembedwe m’Baibulo:
Mwenye Daudi: “Une naliji mwanache nambo apano ngusile, nambo nganinamwoneje mundu jwakulungama ali amjasile, kapena ŵanache ŵakwe ali mkuŵendaŵenda yakulya.”—Sal. 37:25.
Yoswa: “Sambano mlole. Une apano sigele panandi kuwa. Jemanja mkumanyilila chenene ni mtima wenu wosope soni umi wenu wosope kuti pa yindu yosope yambone yaŵamsalile Yehofa Mlungu jwenu, pangali maloŵe atamose gamo gele nganigakwanilichikwa. Maloŵe gosope genego gakwanilichikwe pa jemanja, mwamti pangali maloŵe atamose gamo ganganigatendekwa.”—Yos. 23:14.
Komboleka paŵaliji jwachinandipile ŵasalilagasoni ŵane maloŵe mpela gelega pakusaka kwalimbikasya. Daudi soni Yoswa ŵasasile yindu yaŵasimene nayo. Ŵakutumichila ŵa Mlungu ŵakulupichikaŵa ŵasalaga yaŵayiweni soni kuyipikana kwa yaka yejinji paumi wawo. Yakuyichisya yakwe, ŵaŵechete yindu yayaliji yakulimbikasya mnope.
Naga wawojo aŵele ali mkumtumichila Yehofa kwa yaka yejinji, nikuti mpaka aŵe pamalo gambone gakusala ya maumbone gapatile wawojo kapena ŵandu ŵane ligongo lyakumtumichla Yehofa. Ana akukumbuchila ya ndaŵi jine jele Yehofa ŵakamuchisye ŵakutumichila ŵakwe mwakusimonjesya? Naga yili myoyo, ŵasalileje ŵane yeleyo. Yeleyi mpaka yilimbisye chikulupi cha abale ni alongo wawo soni kwakamuchisya kuŵa ŵakulipeleka pakupitisya kumtumichila Yehofa.—Alo. 1:11, 12.
Chindu chine champaka atende pakwalimbikasya ŵane chili kusimanikwa pamisongano mwampaka akombolele. Kumisonganoku mpaka apate upile wakulimbikasyana ni Aklistu achimjawo. Mlongo Connie jwatumkolasile kundanda kula jwatite, “Kusimanikwa pamisongano kukusangamuchisya kuti ngatengukaga. Yili myoyo ligongo lyakuti ku Nyumba ja Uchimwene, abale ni alongo akusalosyaga une chinonyelo. Ngusalosya kuyamichila kwangu mwakwapa ŵane mituka. Mwamti ngusalolechesya kuti patukutenda yindu ya usimu tukulimbikasyana ni Aklistu achimjangu.”
YEHOFA AKUSAYAMICHILA YAKUSATENDA PAKUMTUMICHILA
M’Baibulo mwana yisyasyo yejinji ya ŵandu ŵaŵalepelaga kutenda yejinji ligongo lya muyaŵelele yindu paumi ŵawo. Nambope Yehofa ŵapitilisyagape kwanonyela. Aganichisye ya mundu jwine jwachikulile lina lyakwe Simiyoni. Jwalakwe jwaŵelepe chiŵela umi Yesu pajwapagwaga. Jwalakwe papite ku Nyumba ja Mlungu, komboleka jwawonaga ŵachinyamata ali mkukamula masengo gakusosekwa mnope pa nyumbaji. Mwine jwalakwe akaliwonaga kuti nganaŵa jwakusosekwa kwa Mlungu ligongo nganakombolaga kumtumichila Yehofa mpela mwaŵatendelaga ŵachinyamata ŵala. Nambotu Yehofa nganayiwonaga yindu m’litala lyeleli. Jwalakwe jwamwonaga Simiyoni kuti ali “jwakulungama soni jwakulipeleka” mwamti ŵampele upile wakuti amwone Yesu ali likandi. Yehofa jwayikene pakumkamulichisya masengo Simiyoni kuti asale yakulochesya yakwamba Yesu jwele jwajembecheyaga kuŵa Mesiya. (Luk. 2:25-35) Kusala yisyene, Yehofa nganalolaga mwaŵawonechelaga Simiyoni. Mmalomwakwe jwalakwe jwalolaga chikulupi chakulimba chajwakwete, mwamti “msimu wa Mlungu waliji pa jwalakwejo.”
Yehofa ŵampele Simiyoni upile wakumwona Yesu ali likandi soni wakusala yakulochesya yakwamba jwalakwe kuti chachiŵa Mesiya
Wawojosoni akusosekwa kuŵa ŵakusimichisya kuti Yehofa akusiŵawonaga kuŵa ŵakusosekwa mwangasamala kandu kuti akulepela kutenda yindu yine. Mwamti kwa jwalakwe mbopesi jikusaŵa jakuŵajilwa “naga mundu akupeleka mwakamulana ni yindu yakwete, ngaŵaga yanganakola.”—2 Akoli. 8:12.
Myoyo, wawojo atendeje yampaka akombole. Mwachisyasyo, atamose kwa kandaŵi kamnono ana mpaka atende nawo ma ulaliki gapi? Ana mpaka akombole kumlimbikasya mundu jwine mwakumjimbila foni kapena kumlembela kadi? Yindu yamwanamwana yampaka atende pakulosya kuti akusiŵanonyela Aklistu achimjawo mpaka yalimbikasye mnope jemanjaji mnopemnope naga jwakutenda yeleyo ali mundu jwatumichile Yehofa kwa ndaŵi jelewu mpela wawojo.
Mwangasamala kandu kuti akulepela kutenda yindu yine ligongo lya uchekulu, mpaka atende yejinji pakumtumichila Yehofa. Alole yaŵasimene nayo mundu jwine jwakusatama kungopokulyuŵa kwa Africa mu libokosi lya mtwe wakuti “Chindu Chachakulupwisye Umi Wakwe.”
Akumbuchileje kuti kulupichika kwalosisye yaka yosopeyi mpaka kwalimbikasye mnope ŵane. Wawojo ali chisyasyo chambone pangani jakupilila. Mwamti mpaka aŵe ŵakusimichisya kuti ‘Mlungu ali jwachilungamo, myoyo ngasaliŵalila masengo gawo soni chinonyelo chaŵalosisye pa lina lyakwe mwakwatumichila ŵaswelawo soni apano akupitilisya kwatumichila.’—Aheb. 6:10
ATENDEJE YAMPAKA AKOMBOLE PAKWAKAMUCHISYA ŴANE
Yaŵapatile ŵakuwungunya yikusalosya kuti ŵachikulile ŵajinji ŵakusiŵakamuchisya ŵane akusakola yilu yambone, akusaganisya chenene soni akusatama kwa ndaŵi jelewu.
Yili yisyene kuti kwatendela ŵane yambone nganikuŵa kumasisye yakusawusya yosope ya uchekulu. Ligongo uli Uchimwene wa Mlungupe wawuchimasya chachikusatandisya kuti ŵandu akalambaleje soni kuwa chachili ulemwa watwajigalile kwa Adamu ni Hawa.—Alo. 5:12.
Nambope yakusatenda pakumtumichila Yehofa yayikupwatikapo kwakamuchisya ŵane kummanyilila jwalakwe, yikusalimbisya chembecheyo chawo soni yikusakamuchisya kuti akole chilu chambone. Jemanja ŵachikulile, amanyilile kuti Yehofa akusayamichila yiliyose yakusatenda pakumtumichila, soni chikulupi chawo chikusakamuchisya mpingo wosope.