‘Msunjeje Mtendele Wamkwete Wamwawupatile ni Chikamuchisyo cha Msimu Weswela’
Ndumetume Paulo jwalimbikasisye Aklistu ŵa ku Efeso kuti, “Mkundeje yakutenda ya ŵane ni kwanonyelaga. Mlinjelinjeje kuŵa ŵakamulana mwakusunga mtendele wamkwete wawuli mpela chindu chakumjilanya. Mtendele welewu mwawupatile ni chikamuchisyo cha msimu weswela.”—Aef. 4:2, 3.
“Mtendele” watukusasangalala nawo ukusayika ligongo lya “chikamuchisyo cha msimu weswela.” Yeleyi yikulosya kuti mtendele welewu ukusapagwa ni machili ga Yehofa. Nambope, mpela muŵaŵechetele Paulo, mtendele wetu ukusasosekwa kuwusunga. Nambo ana ŵani ŵakusasosekwa kutenda yeleyi? Kusala yisyene, Mklistu jwalijose akusosekwa kutenda mbali jakwe ‘mwakusunga mtendele watwawupatile ni chikamuchisyo cha msimu weswela.’
Tuwanichisye kuti mundu jwine jwapele galimoto jasambano. Ana ni ŵani ŵakwete udindo wakujisamalila soni kujilinganyichisya pajijonasiche? Kwanga kwakwe akumanyi. Wawojo nganaŵa amjimbile magambo mundu juŵapele galimotojo naga jili jijonasiche ligongo lyakuti wawojo nganajisamalilaga.
Mwakulandanamo, atamose kuti mtendele wa Chiklistu watukwete uli mtuka wakutyochela kwa Mlungu, jwalijose akwete udindo wakuwusunga. Myoyo, naga ngatukusakamulana ni m’bale kapena mlongo jwine, mpaka tusosekwe kuliwusya kuti, ‘Ana ngutenda mbali jangu mwakusunga mtendele watwawupatile ligongo lya chikamuchisyo cha msimu weswela mwakumasya nganijo?’
‘ALINJELINJEJE’ KUWUSUNGA MTENDELE
Mpela mwaŵaŵechetele Paulo, ndaŵi sine tukusasosekwa kulimbichila kuti tusunje mtendele watwawupatile ni chikamuchisyo cha msimu weswela. Yeleyi mpaka yitendekwe mnopemnope naga m’bale kapena mlongo atukuŵesye. Ana ndaŵi syosope kusunga mtendele mpaka kusosekwe kuja kusimana ni mundujo ni kukambilana ya nganijo? Ngaŵa myoyo. Aliwusye kuti, ‘Ana kujikandapasya nganiji chikutendekasye kuti paŵe mtendele kapena kuti jisawusye mnope?’ Ndaŵi sine lukusaŵa lunda gamba kujileka nganijo soni kumkululuchila mundujo.—Mis. 19:11; Maliko 11:25.
Aliwusye kuti, ‘Ana kujikandapasya nganiji chikutendekasye kuti paŵe mtendele kapena kuti jisawusye mnope?’
Mpela muŵalembele ndumetume Paulo, kwende tupitilisye ‘kukunda yakutenda ya ŵane ni kwanonyelaga.’ (Aef. 4:2) Buku jine jasasile kuti maloŵega mpaka gagopolele “kwawona jemanjajo kuti ni mwaŵelele.” Yeleyi yikugopolela kuti tukusosekwa kwawona Aklistu achimjetu kuti ali ŵangali umlama mpela mwayiŵelelesoni ni m’weji. Yili yisyene kuti tukulingalinga kuti ‘tuwale umundu wasambano.’ (Aef. 4:23, 24) Nambope, pangali jwalijose jwetuwe jwampaka atende yindu mwangalemwesya chilichose. (Alo. 3:23) Naga tukwitichisya mfundoji, yichiŵa yangasawusya kwakululuchila ŵane yayichikamuchisya kuti ‘tusunje mtendele watukwete watwawupatile ni chikamuchisyo cha msimu weswela.’
Patukulingalinga kwakululuchila ŵandu ŵatuleŵele ni kujiliŵalila nganijo yichitukamuchisya kuti tupitilisye kukola ‘mtendele wawuli mpela chindu chakutujilanya.’ Liloŵe lya Chigiliki lyaŵaligopolele kuti ‘chindu chakutujilanya’ pa Aefeso 4:3, ŵaligopolele kuti “mitasi” pa Akolose 2:19. Mitasi jili jakulimba ligongo ni jajikusalumbikanya liwupa ni liwupa line. Mwakulandanamo, mtendele soni kwanonyela abale ni alongo ŵetu kukusatukamuchisya kuti tukamulaneje nawo mnope mwangasamala kandu kuti tukusalekanganaga pa yindu yine.
Myoyo naga Mklistu mjawo ŵaleŵele kapena kwatengusya, alinjeje kumpikanichisya mmalo mwakumpatila magongo. (Akolo. 3:12) Pakuŵa wosope tuli ŵangali umlama, nombe wawojo ndaŵi sine mpaka ŵaleŵele achimjawo. Kukumbuchila yeleyi kuchakamuchisya kuti atendeje yampaka akombole ‘pakusunga mtendele watwawupatile ni chikamuchisyo cha msimu weswela.’