Yiwusyo Yakutyochela kwa Ŵakuŵalanga

Jwaŵalembile Misyungu 30:​18, 19 jwasasile kuti “litala lya jwamlume ni msikana” lyaliji ‘lyakusimonjesya mnope.’ Ana jwalakwe jwagopolelaga chichi?

Ŵandu ŵajinji kupwatikapo ŵamlijiganye ya Baibulo akusasaka kumanyilila ngopolelo ja maloŵega. Lilemba lyosopeli mu Baibulo ja Chilambo Chasambano likusati, “Pana yindu yitatu yayili yakusimonjesya mnope kwa une, Soni yindu mcheche yele une ngangusayipikanichisya. Litala lya ngwasi mwinani, Litala lya lijoka pa lwala, Litala lya sitima pa nyasa, Soni litala lya jwamlume ni msikana.”—Mis. 30:​18, 19.

Munyumamu, twaganisyaga kuti maloŵe gakuti “litala lya jwamlume ni msikana,” gakusalondesya yindu yineyakwe yakusakala. Twaganisyaga myoyo ligongo ndime sine sya mu chaputalachi sikusasala yindu yakusakala yele yangaŵechetaga kuti “basi njikwite!” (Mis. 30:​15, 16) Nambosoni ndime 20 jikusasalaga ya “jwamkongwe jwachikululu” jwakusalambuchisya kuti nganatenda chakulemwa chilichose. Myoyo, yeleyi yatutendekasyaga ganisya kuti ndimeji jikusala ya yindu yayikusatendekwa nambo ŵandu ni ngamanyilila chilichose. Mwamti twaganisyaga kuti mpela mwajikusatendela ngwasi pakuguluchila mwinani, lijoka pakwenda pa lwala, soni sitima pakwenda pasikati pa nyasa, komboleka jwamlumeju jwatendagasoni yine yakwe nambo ŵandu ngamanyilila. Ligongo lya yeleyi, twaganisyaga kuti maloŵe gakuti “litala lya jwamlume ni msikana” gagopolelaga ya jwamlume jwakutenda yindu mwakalamuka mnope pakusaka kumnyenjelela msikana kuti agone najo.

Nambope, pana magongo gampaka gatutendekasye kukulupilila kuti ndimeji ngajikusala yindu yakulemwecheka. Jwakulembaju jwagambaga kusala yindu yayamsimonjesyaga soni kumtesya chidwi.

Yakulemba yandanda ya Chihebeli yikusalosyasoni kuti ndimeji jikusasala ya yindu yambonembonepe. Mwakamulana ni yajikusasala buku jine, (Theological Lexicon of the Old Testament) maloŵe ga Chihebeli ga pa Misyungu 30:​18, gaŵagagopolele kuti “yakusimonjesya mnope,” gakusasala yakutendekwa yele mundu . . . mpaka ayiwone kuŵa yakusimonjesya, kapena yangakomboleka.”

Nombenajo pulofesa jwine lina lyakwe Crawford H. Toy, jwakusajiganya ku yunifesite ja Harvard m’chilambo cha United States, jwasasilesoni kuti ndime ja m’Baibuloji jangasalaga ya yindu yineyakwe yakusakala. Jwalakwe jwatite, “Jwakulembaju jwagambaga kusala kusimonjesya kwa yindu yeleyi.”

Myoyo yili yakupikanika kusala kuti maloŵe gagali pa Misyungu 30:​18, 19 gakusalondesya ya yindu yakutesya chidwi soni yakusimonjesya mnope. Mpela muyaŵelele ni jwakulemba Baibuloju, m’wejisoni tukusatenda chidwi pa yajikusati ngwasi pakuguluchila mwinani mnope, yalikusati lijoka palikukwela pa lwala atamose kuti lyangali ngongolo, yajikusati sitima jakusitopa mnope pakwenda pa nyasa, soni yakusati mnyamata ni msikana pakutanda kunonyelana kaneko ni kutamaga yimpepe mwakusangalala.