Akulupilileje Kuti Yehofa Ŵakululuchile

1-2. Ana kumanyilila kuti Yehofa atukululuchile, kukusatukamuchisya mwamti uli? (Alolesoni chiwulili chapachikuto.)

MWENYE Daudi jwamanyililaga chenene mwayikusaŵela mundu pakulijimba magambo ligongo lya yakulemwa yijwatesile kalakala. (Sal. 40:12; 51:​3, tumaloŵe twapenani) Jwalakwe jwatesile yakulemwa yekulungwa. Nambo pajwapitikwiche mtima, Yehofa ŵamkululuchile. (2 Sam. 12:13) Yeleyi yamtendekasisye Daudi kuŵa jwakusangalala mnope.—Sal. 32:1.

² Mwakulandana ni Daudi, m’wejisoni mpaka tuŵe ŵakusangalala patumanyilile kuti Yehofa atutendele chanasa soni atukululuchile yakulemwa yetu. Kusala yisyene, yikusaŵa yakulimbikasya kumanyilila kuti Yehofa ali jwakusachilila kutukululuchila yakulemwa yetu atamose yiŵe yekulungwakulungwa. Akusatenda yeleyi naga tukupitikuka mtima, kusala yakulemwa yetu kwa achakulungwa soni kutenda yakomboleka kuti tukawilisyasoni yakulemwayo. (Mis. 28:13; Mase. 26:20; 1 Yoh. 1:9) Yikusaŵa yakusangalasya mnope kumanyilila kuti Yehofa patukululuchile, yikusaŵa mpela yakulemwayo nganiyitendekwa kose.—Esek. 33:16.

3-4. Ana mlongo jwine jwapikene wuli mumtima pajwagambile kubatisidwa? Ana chitulijiganye chichi munganiji?

³ Nambope, ndaŵi sine ŵane mpaka akayichileje naga Yehofa ŵakululuchile yisyesyene. Aganichisye yayamtendechele Mlongo Jennifer juŵakulile mu liŵasa lya Mboni. Mlongoju ali jwachinyamata jwatesile chakulemwa kaneko jwatandite kutama umi wapaŵili. Nambo pali papitile yaka, jwalakwe jwachenjile, mwamti jwalipeleche kwa Yehofa kaneko jwabatisidwe. Jwalakwe jwatite, “Kalakala nanonyelaga mnope mbiya, kutenda chikululu, kumwa mnope ukana soni naliji jwaukali mnope. Panapitikwiche mtima namanyilile kuti Yehofa angululuchile, soni kuti mbopesi ja Klistu ni jajakamuchisye kuti yakulemwa yangu yikululuchidwe. Nambope nakayichilaga naga Yehofa ŵangululuchile yisyesyene.”

⁴ Ana wawojosoni ndaŵi sine yikusiyasawusyaga kukulupilila kuti Yehofa ŵakululuchile yakulemwa yiŵatesile kalakala? Pakuŵapo Yehofa ali jwachanasa, jwalakwe akusasaka kuti tusangalaleje mpela muyaŵelele ni Daudi ali apitikwiche mtima. Munganiji, chitukambilane ligongo lyakwe tukusosekwa kukulupilila kuti Yehofa ŵatukululuchile yisyesyene soni yampaka yitukamuchisye kuti tukulupilileje yeleyi.

LIGONGO CHICHI TUKULUPILILEJE KUTI YEHOFA AKUSATUKULULUCHILA YISYESYENE?

5. Ana Satana akusasaka kuti tukulupilileje chichi? Asale chisyasyo.

⁵ Kukulupilila kuti Yehofa akusatukululuchila kukusatukamuchisya kuŵambala yitega ya Satana. Tukaliŵalilaga kuti Satana ngakugona mwamti akutenda yiliyose yakomboleka kuti tuleche kumtumichila Yehofa. Kuti yeleyi yikomboleche, jwalakwe mpaka atutendekasye kukulupilila kuti Yehofa nganaŵa atukululuchile. Aganichisye yayamtendechele jwamlume jwa ku Kolinto juŵamtyosisye mumpingo ligongo lyakutenda chikululu. (1 Akoli. 5:​1, 5, 13) Kaneko jwalakwe ali apitikwiche mtima, Satana jwasakaga kwatendekasya Aklistu ŵa mumpingomo kumjumulila mtima mjawojo nikulepela kumkululuchila. Satana jwasakagasoni kuti jwamlumeju akayichileje naga Yehofa ŵamkululuchile mwakumtendekasya kuti “adandawuleje ni kwika pakwasa mtima.” Satana nganachenga yakulinga yakwe soni mwakusatendela yindu. Nambo chakusangalasya chili chakuti m’weji “tukumanyilila yitega yakwe.”—2 Akoli. 2:​5-11.

6. Ana chichi champaka chitukamuchisye patukulijimba magambo?

⁶ Pakukulupilila kuti Yehofa atukululuchile ni patukusalekasoni kulijimba magambo. Mwachipago, tukusalijimbaga magambo patutesile ulemwa. (Sal. 51:17) Yeleyitu yili yambone ligongo chikumbumtima chetu mpaka chitukamuchisye kulinganya yatulemwisye. (2 Akoli. 7:​10, 11) Nambope, naga tukulijimbape magambo panyuma pakuti tugalawiche mtima, nikuti mpaka tuwujile munyuma. Nambo patukwete chikulupi chakuti Yehofa atukululuchile ni patukusalekasoni kulijimba magambo. Mwamti mpaka tupitilisye kumtumichila Yehofa mwakusangalala tuli tukwete chikulupi chakuti jwalakwe akusangalala ni m’weji. (Akolo. 1:​10, 11; 2 Tim. 1:3) Ana mpaka tutende chichi kuti tukulupilileje kuti Yehofa ŵatukululuchile yakulemwa yetu?

YAMPAKA YITUKAMUCHISYE KUKULUPILILA KUTI YEHOFA JWATUKULULUCHILE

7-8. Ana Yehofa jwalilondesisye chamti uli kwa Mose, soni ana yeleyi yikutusimichisya chichi? (Ekisodo 34:​6, 7)

⁷ Aganichisyeje yatite Yehofa pakulilondesya. Mwachisyasyo, alole yajwasasile Yehofa kwa Mose pa Litumbi lya Sinai.a (Aŵalanje Ekisodo 34:​6, 7.) Atamose kuti Yehofa akwete ndamo syambone syejinji, jwalakwe jwasagwile kumsalila Mose kuti ali “Mlungu jwaumbone mtima soni jwakwatendela ŵane chanasa.” Ana Mlungu jwamti myiyiju mpaka alepele kumkululuchila jwakutumichila jwakwe jwagalawiche mtima yisyesyene? Ngakomboleka. Ligongo naga mpaka atende yeleyo nikuti mpaka aŵe jwangali chanasa soni jwakumula mtima. Nambo Yehofa nganaŵa myoyo.

⁸ Mpaka tuŵe ŵakusimichisya mtima kuti Yehofa pakusala kuti ali jwachanasa akusaŵa ali mkusala yisyesyene, ligongo jwalakwe jwangalambusyaga. (Sal. 31:5) Myoyo tukulupilileje yiliyose yaŵechete. Naga yikwasawusya kuleka kulijimba magambo payaŵalemwisye kalakala, mpaka aliwusye kuti, ‘Ana ngusakulupilila kuti Yehofa ali jwachanasa soni kuti akusamkululuchilaga jwalijose jwagalawiche mtima?’ Naga akusakulupilila, nikuti mpaka aŵe ŵakusimichisya kuti Yehofa ŵakululuchilesoni wawojo.

9. Ana kululuchidwa yakulemwa kukusagopolelaga chichi? (Salimo 32:5)

⁹ Aganichisyeje yaŵasasile ŵakulemba Baibulo payakusati Yehofa pakutukululuchila. Mwachisyasyo, aganichisye yajwalondesisye Daudi pakwamba yakusatenda Yehofa pakutukululuchila. (Aŵalanje Salimo 32:5.) Jwalakwe jwatite, “Ŵawojo ŵangululuchile yakulemwa yangu.” Maloŵe ga Chihebeli gakuti “kululuchila” mpaka gagopolele “kunyakula,” “kutyosya” kapena “kujigala.” Myoyo, Yehofa paŵamkululuchile Daudi, jwalakwe jwayiwonaga mpela kuti Yehofajo anyakwile katundu jakwe jakusitopa mnope juŵatwichile. Kaneko jwalakwe jwapikene chenene mumtima paŵayimanyi kuti Yehofa amkululuchile. (Sal. 32:​2-4) M’wejisoni mpaka tupikane myiyi. Naga tugalawiche mtima yisyesyene, ngatukusasosekwa kupitilisya kulijimbaga magambo ligongo Yehofa akusaŵa kuti atyosisye yakulemwa yetu.

10-11. Ana maloŵe gakuti akusaŵa ‘jwakoseka kululuchila’ gakutusalila yamti uli pakwamba ya Yehofa? (Salimo 86:5)

¹⁰ Aŵalanje Salimo 86:5. Palilembali Daudi akumkolanga Yehofa kuti ali ‘jwakoseka kukululuka.’ Pakulondesya ya maloŵe gelega, buku jine jakulondesya ya m’Baibulo jatite, “[Jwalakwe] ali ‘jwakululuchila’ soni kuti jelejo jili ‘ndamo’” jakwe. Ligongo chichi kululuchila jili ndamo ja Yehofa? Mbali jine ja lilembali jikusati, “Wawojo akusalosya chinonyelo chakulupichika kwa wosope ŵakusaŵilanga pa wawojo.” Mpela mwatwalijiganyichisye mungani jipite jila, chinonyelo chakulupichika chikusamtendekasya Yehofa kuŵa paunasi wangamala ni ŵakutumichila ŵakwe ŵakulupichika. Chinonyelo chakwe chakulupichikachi, chikusamtendekasya jwalakwe ‘kwakululuchila mnope’ ŵandu wosope ŵagalawiche mtima. (Yes. 55:7) Naga yikwasawusya kulupilila kuti Yehofa ŵakululuchile, mpaka aliwusye kuti, ‘Ana ngusakulupilila kuti Yehofa ali jwakululuchila, mwamti akusaŵa jwakoseka kwakululuchila wosope ŵagalawiche mtima soni ŵamŵendile kuti ŵatendele chanasa?’ Naga akusakulupilila yeleyi, nikuti akusosekwa kuŵa ŵakusimichisya mtima kuti Yehofa ŵakululuchile wawojo paŵamŵendile kuti ŵatendele chanasa.

¹¹ Kumanyilila kuti Yehofa akusapikanichisya chenene kuti tuli ŵandu ŵangali umlama, kukusatutamika mtima pasi. (Sal. 139:​1, 2) Yeleyi yikamulanasoni ni yaŵalembile Daudi pa Salimo jine. Salimoji mpaka jitukamuchisye kusimichisya kuti Yehofa akusasaka kutukululuchila.

ANA YEHOFA AKUSAKUMBUCHILAGA YAMTI ULI YA M’WEJO?

12-13. Mwakamulana ni Salimo 103:​14, ana Yehofa akusakumbuchila chichi ya m’weji, soni ana yeleyi yikusamlimbikasya kutenda chichi?

¹² Aŵalanje Salimo 103:14. Palilembali, Daudi jwasasile kuti Yehofa “akusakumbuchila kuti tuli luwundu.” Mwamti maloŵega gagamba kulosya ligongo lyakwe Yehofa akusaŵaga jwakoseka kwakululuchila ŵakutumichila ŵakwe ŵagalawiche mtima. Ligongo lyakwe lili lyakuti, jwalakwe akusamanyilila kuti tuli ŵangali umlama. Kuti tupikanichisye chenene yeleyi, kwende tukambilane panandi ya maloŵe gajwaŵechete Daudiga.

¹³ Daudi jwasasile kuti Yehofa “akusamanyilila yaŵatite pakutupanganya.” Jwalakwe jwampanganyisye Adamu “kutyochela ku luwundu lwa pachilambo chapasi.” Mwamti Yehofa akusamanyilila kuti atamose ŵandu ŵamlama akwete malile gakutendela yindu. Mwachisyasyo, jemanjaji mpaka awe naga ngakulya, ngakugona soni kupumula. (Gen. 2:7) Nambo Adamu ni Hawa paŵalemwisye, yindu yachenjile mnope. Pakuŵa tuli ŵanache ŵawo, twajigalile ulemwa wawukusatutendekasya kuti tusachilileje kutenda yakusakala. Kupwatika pakumanyilila kuti tuli ŵakulemwa, Yehofa ‘akusakumbuchilasoni’ yeleyi mwakamulana ni yajwaŵechete Daudi. Liloŵe lya Chihebeli lyaŵalikamulichisye masengo pa lilembali mpaka ligopolele kutenda yindu mwakuŵajilwa panyuma pakukumbuchila. Mwakata maloŵe ga Daudiga mpaka gagopolele kuti, Yehofa akusapikanichisya kuti ndaŵi sine mpaka tulemwesye. Ni patulemwisye, jwalakwe akusatendapo kandu mwakutukululuchila soni kututendela chanasa panyuma pakuti tupitikwiche mtima.—Sal. 78:​38, 39.

14. (a) Mwakamulana ni yajwaŵechete Daudi, ana Yehofa akusamkululuchila mundu mpaka papi? (Salimo 103:12) (b) Ana mpaka tulijiganye chichi kutyochela pa yajwatile Yehofa pakumkululuchila Daudi? (Alole libokosi lyakuti “Yakusatenda Yehofa Pakutukululuchila soni Pakuliŵalila Yakulemwa Yetu.”)

¹⁴ Ana Yehofa akusamkululuchila mundu mpaka papi? (Aŵalanje Salimo 103:12.) Daudi jwasasile kuti Yehofa patukululuchile yakulemwa, akusayiŵikaga “kwakutalikangana ni m’weji mpela mwayiŵelele kuti kungopokolyuŵa kuli kwakutalikangana ni kungapililolyuŵa,” mwamti mbali siŵilisi nganisiŵa sisimene. Ana yeleyi yikutujiganya chichi pakwamba yakulemwa yakusatukululuchila Yehofa? Buku jine jatite, “Mlungu patyosisye ulemwa, mpaka tuŵe ŵakusimichisya kuti pangali chachikusasigala, atamose kaliwungo.” Pajatu liwungo mpaka limtendekasye mundu kukumbuchila yineyakwe. Nambo Yehofa pakululwiche, yikusaŵa mpela pangali liwungo lyampaka limtendekasye Yehofajo kukumbuchila ulemwawo ni kutanda kumjimba magambo mundujo.—Esek. 18:​21, 22; Mase. 3:19.

15. Ana mpaka tutende chichi naga tukulijimbape magambo pa ulemwa watwatesile munyumamu?

¹⁵ Ana maloŵe ga Daudi pa Salimo 103 mpaka gatukamuchisye chamti uli kukulupilila kuti Yehofa atukululuchile? Naga tukusalijimbaga magambo ligongo lya yakulemwa yakalakala, mpaka tuliwusye kuti, ‘Ana nguliŵalila kuti Yehofa akusakumbuchila kuti ndili jwangali umlama soni akusamkululuchila mundu jwapitikwiche mtima mpela unejo? Ana ngusakumbuchila yakulemwa yaŵangululuchile Yehofa soni kuti nganaŵa anjimbile nayo magambo?’ Yehofa jwangakumbuchilaga yakulemwa yakalakala. M’wejisoni tukayikumbuchilaga. (Sal. 130:3) Patukukulupilila kuti Yehofa atukululuchile yakulemwa yetu, ngasitulijimbaga magambo soni tuchipitilisya kumtumichila jwalakwe.

16. Alondesye kogoya kwampaka kupagwe naga tukulijimbape magambo pa ulemwa watwatesile munyumamu. (Alolesoni chiwulili.)

¹⁶ Aganichisye chisyasyo achi. Kulijimba magambo ligongo lya yakulemwa yakalakala yili mpela kwendesya galimoto aku uli mkulola mwangalechesya paligalasi lyalikusalosya yindu yakunyuma. Ndaŵi sine kulola paligalasili kuli kwambone, ligongo mpaka kutukamuchisye kuŵambala yindu yampaka yitendekasye ngosi. Nambo kuti tujende chenene, tukusosekwa kulolaga kusogolo. Mwakulandana ni yeleyi, kuganichisya yakulemwa yakalakala nganikuŵa kulemwa ligongo mpaka tulijiganye kandu pa yakulemwechekayo ni kuŵa ŵakusimichisya kuti ngasituyiwilisyasoni. Nambo naga tugamba ganichisya mnope yakulemwayo, mpaka tugambeje kulijimba magambo ni kulepelaga kumtumichilaga chenene Yehofa. Mmalomwakwe, kwende tuloleje kusogolo. Pajatu tuli pa msewu wakwawula m’chilambo chasambano mwele yakusakala ‘ngasituyikumbuchilasoni.’—Yes. 65:17; Mis. 4:25

TUŴEJE ŴAKUSIMICHISYA MTIMA

17. Ligongo chichi tukusosekwa kupitilisya kusimichisya kuti Yehofa akusatunonyela soni kuti akusaŵa jwakoseka kutukululuchila?

¹⁷ Tusimichisyeje mtima kuti Yehofa akusatunonyela soni akusaŵa jwakoseka kutukululuchila. (1 Yoh. 3:​19,) Ligongo chichi tukuŵecheta myoyo? Ligongo lyakuti Satana ngasaleka kututengusya soni ali jwakusimichisya kututendekasya kulupilila kuti Yehofa ngakusatunonyela soni nganaŵa atukululuchile. Mulimose mwampaka yiŵele, chakulinga cha Satana chili kutulekasya kumtumichila Yehofa. Mwamti tujembecheyeje kuti jwalakwe chalimbichileje mnope, ligongo akumanyilila kuti jimsigalile ndaŵi ja panandi. (Chiw. 12:12) Nambo tukakunda kuti jwalakwe atugomeche.

18. Ana mpaka asimichisye chamti uli kuti Yehofa akusiŵanonyela soni kuti akusaŵa jwakoseka kwakululuchila?

¹⁸ Kuti tukulupilileje yakuti Yehofa akusatunonyela, tukusosekwa kuya yatwalijiganyisye mungani jipite jila. Mungani ajino, tulijiganyisye yampaka yitukamuchisye kukulupilila kuti Yehofa akusatukululuchila patulemwisye. Aganichisyeje yaŵasasile ŵakulemba Baibulo payakusati Yehofa pakutukululuchila. Tukaliŵalilaga kuti Yehofa akusamanyilila chenene kuti tuli ŵangali umlama soni kuti chachitutendelaga yindu mwachanasa. Soni tukumbuchileje kuti jwalakwe akusatukululuchila ni mtima wosope. Mpaka tuŵe ŵakusangalala ligongo lyakuti tukwete chikulupi chakuti Yehofa akusatutendela chanasa soni mpaka tuŵechete kuti, “Sikomo Yehofa, ‘ŵangululuchile yakulemwa yangu.’”—Sal. 32:5.