Tugasyasyeje Malayika Gakulupichika

1-2. (a) Ana ŵanduwe tukusalekangana chamti uli ni malayika? (b) Nambi tukusalandana pa yindu yapi?

YEHOFA paŵawutile wawojo mu gulu jakwe, ŵaŵele mu liŵasa lyekulungwa lya ŵandu ŵakunonyelana ŵakusamtumichila jwalakwejo. Muliŵasali mwanasoni malayika mamiliyoni gejinji gakulupichika. (Dan. 7:​9, 10) Patukuganichisya ya malayika, tukusayiwona kuti gali gakulekangana mnope ni m’weji. Mwachisyasyo, malayika gatemi ni umi yaka yejinji kulekangana ni m’weji. (Yob. 38:​4, 7) Malayika gali gamachili mnope kutupunda m’weji. Konjechesya pelepa, malayika gali geswela soni gakulungama mnope mwamti pangani jeleji m’weji ŵandu ŵangali umlama nganituŵa tuyiche pa malayikaga.—Luk. 9:26.

² Atamose kuti pana kulekangana kweleku, pana yindu yejinji yatukusalandana ni malayika. Mwachisyasyo, mpela malayika m’wejisoni mpaka tulosye ndamo syambone syakwete Yehofa. Tukwete ufulu wakusagula yakutenda mpela malayika. Mwakulandana ni malayika, m’weji tukwete mena, tukwete umundu wakulekangana ni ŵane, nambosoni maudindo gakulekanganalekangana. Konjechesya pelepa, mwakulandana ni malayika, wosopewe tukusasosekwa kumtumichilaga Yehofa Mlungu juŵatupanganyisye.—1 Pet. 1:12.

3. Ana mpaka tulijiganye chichi kutyochela kwa malayika gakulupichika?

³ Ligongo lyakuti tukusalandana ni malayika mmatala gejinji, yisyasyo yambone ya malayikaga mpaka yitulimbikasye soni kutujiganya yindu yejinji yakusosekwa mnope. Munganiji, chitukambilane yampaka tutende pakusyasya kulinandiya kwa malayika, chinonyelo chawo pa ŵandu, kupilila kwawo nambosoni kulimbichila kwawo pakuwukamuchisya mpingo kuŵa weswela.

MALAYIKA GALI GAKULINANDIYA

4. (a) Ana malayika gakusalosya chamti uli kulinandiya? (b) Ligongo chichi malayika gali gakulinandiya? (Salimo 89:7)

⁴ Malayika gakulupichika gali gakulinandiya. Atamose kuti malayikaga gakusamanyilila yejinji, gali gamachili soni galunda, ndaŵi syosope gakusapikanila malangiso ga Yehofa. (Sal. 103:20) Malayikaga pagakukamula masengo gawo, gangapokaga payindu yagakombwele kutenda, kapena kutenda yindu yakwagomeka ŵandu pakusaka kuti gapochele ulemu. Gakusasangalala kutenda yindu yagasalilidwe ni Yehofa atamose yili mkuti lina lyawo ngalimanyika.a (Gen. 32:​24, 29; 2 Ayi. 19:35) Konjechesya pelepa, malayika gakusakana kupochela ulemu wawukusasosekwa kwawula kwa Yehofa. Ligongo chichi malayikaga gali gakulinandiya chamti myiyi? Yili myoyo ligongo lyakuti malayikaga gakusamnonyela soni kumchimbichisya mnope Yehofa.—Aŵalanje Salimo 89:7.

5. Ana lilayika lyalosisye chamti uli kulinandiya palyamjamukaga ndumetume Yohane? (Alolesoni chiwulili.)

⁵ Kwende tukambilane ngani jine jajikusalosya kuti malayika gali gakulinandiya. Cha mu 96 C.E., lilayika line lyele lina lyakwe lyangamanyikaga lyamlosisye ndumetume Yohane yindu yakusimonjesya mnope. (Chiw. 1:1) Ana Yohane jwatesile yamti uli pajwayiweni yakusimonjesyayo? Jwalakwe jwatindiŵele pakusaka kupeleka ulemu kwa lilayikalyo. Nambo ndaŵi jijojo, lilayika lyakulupichikalyo lyamlekasisye jwalakwe mwakumsalila kuti, “Iyayi, mkatenda yeleyo. Unetu ngambile kuŵa kapolo mpela mwamŵelele mmwejo ni achalongo achimjenu . . . Mumtindiŵalileje Mlungu.” (Chiw. 19:10) Kusala yisyene, lilayikali lyalosisye kulinandiya mnope. Mwamti nganililinga ata panandi kutenda yindu yakulosya kuti likusaka kupochela ulemu. Mmalomwakwe lyamsalile Yohane kuti amtindiŵalileje Yehofa. Konjechesya pelepa, lilayikali nganilitenda yindu yakulosya kuti lyaliji lyapenani mnope kumpunda Yohane. Agambe ganisya, atamose kuti lilayika lila lyamtumichile Yehofa kwandaŵi jelewu, soni lyaliji lyamachili pakulandanya ni Yohane, nambope lyasasile kuti ligambile kuŵa kapolo mpela mwajwaŵelele Yohanejo. Nambosoni atamose kuti lilayikali lyasakaga kumjongolela Yohane, nganilitenda yindu mwangamchimbichisya Yohane jwele pandaŵijo jwaliji jwachikulile. Mmalomwakwe lyaŵechetene najo mwachinonyelo. Lilayikali lyamanyilile kuti Yohane jwasakaga kulitindiŵalila ligongo lya yakusimonjesya yajwayiweni.

6. Ana mpaka tugasyasye chamti uli malayika pangani ja kulinandiya?

⁶ Ana mpaka tusyasye chamti uli kulinandiya kwa malayika? M’wejisoni mpaka tukombole kutenda utumiki watupegwile mwangapoka soni mwangasaka kuti ŵandu atulapilileje. (1 Akoli. 4:7) Konjechesya pelepa, tukaliwonaga kuŵa ŵakusosekwa mnope ligongo lyakuti tutumichile kwandaŵi jelewu kwapunda ŵane. Kapena ligongo lyakuti tukwete mautumiki gane ganganakola ŵane. Mfundo jine jakusosekwa jili jakuti, patukutenda yejinji pakumtumichila Yehofa, ni patukusasosekwasoni kuŵa ŵakulinandiya mnope. (Luk. 9:48) Tukoleje mtima wakusaka kwatumichila ŵane mpela lilayika lila. Ndaŵi syosope tuŵambaleje kwatendekasya ŵane kuganisyaga kuti tuli ŵakusosekwa mnope kwapunda jemanjajo.

7. Ana mpaka tulosye chamti uli kulinandiya patukusaka kumjamuka kapena kumpa malangiso mundu jwine?

⁷ Mpaka tulosyesoni kulinandiya pandaŵi jatukusaka kupeleka malangiso kapena kumjamuka Mklistu mjetu kapena mwanache jwetu. Yisyene kuti ndaŵi sine mpaka tusosekwe kumjamuka mundu mwangapita mumbali. Nambope mpela mwalyatendele lilayika lila pakumjamuka Yohane mwachinonyelo, m’wejisoni mpaka tumjamuche mundu mwangapita mumbali nambo ni kuŵambalasoni kumtengusya mundujo. Naga tukuŵambala kuliwona kuŵa ŵapenani kwapunda ŵane, tuchipeleka malangiso gakutyochela m’Baibulo mwakulinandiya soni mwakumchimbichisya mundu jwatukumpa malangisojo.—Akolo. 4:6.

MALAYIKA GAKUSIGANONYELA ŴANDU

8. (a) Mwakamulana ni Luka 15:​10, ana malayika gakusalosya chamti uli kwanonyela ŵandu? (b) Ana malayika gakusatukamuchisya chamti uli pa masengo gakulalichila? (Alolesoni chiwulili chapachikuto.)

⁸ Malayika ganganyosyaga ŵandu kapena kwawona kuti ali ŵangasosekwa. Mmalomwakwe, gakusatunonyela mnope. Malayika gakusasangalala mundu jwakulemwa pagalawiche mtima, kapena kuti ngondolo jesokonechele pajiwujile kwa Yehofa. Gakusasangalalasoni mundu jwine patandite kuchenga umi wakwe ni chakulinga chakuti amtumichileje Yehofa. (Aŵalanje Luka 15:10.) Konjechesya pelepa, malayika gakusakamuchisya nawosoni pa masengo gakulalichila ngani sya Uchimwene. (Chiw. 14:6) Atamose kuti malayika gangalalichila ŵandu pameso ni pameso, nambope gakusakamula masengo gakwalongolela ŵakulalichila kwa ŵandu ŵakusaka kulijiganya yakwamba Yehofa. Yisyene kuti nganituŵa tusasile kuti malayika gatulongolele kwa mundu jwamtijwamti. Yili myoyo ligongo lyakuti ndaŵi sine Yehofa mpaka akamulichisye masengo msimu wakwe weswela pakwakamuchisya kapena kwalongolela ŵakutumichila ŵakwe kwa ŵandu ŵakusaka kumanyilila yejinji. (Mase. 16:​6, 7) Atamose yili myoyo, jwalakwe akusagakamulichisya masengo mnope malayika pakutukamuchisya patukulalichila. Myoyo, patukulalichila ngani syambone, tukusosekwa tukulupilileje yakuti tukusaŵa yimpepe ni malayika kuti gatukamuchisyeje.—Alole libokosi lyakuti “Mapopelo Gawo Gajanjidwe.”b

9. Ana mpaka tugasyasye chamti uli malayika pangani jakwanonyela ŵandu?

⁹ Ana mpaka tugasyasye chamti uli malayikaga pangani jakwanonyela ŵandu? Patupikene chimanyisyo chakuti mundu jwine juwujile mumpingo, tukusasosekwa kusangalala mpela mwagakusatendela malayikaga. Tukusasosekwa kutenda yakomboleka kuti mundu jwawujile mumpingojo ayiwoneje kuti tukusamnonyela. (Luk. 15:​4-7; 2 Akoli. 2:​6-8) Mpaka tugasyasyesoni malayika mwakutenda yampaka tukombole pamasengo gakulalichila. (Jwak. 11:6) Nambosoni mpela yagakusati malayikaga pakutukamuchisya patukulalichila, m’wejisoni mpaka tutende chenene kusosagasosaga mapesa gakwakamuchisya abale ni alongo ŵetu pakulalichila. Mpaka tutende yeleyi, mwakulinganya yakulalichila yimpepe ni Aklistu ŵangamanyilila yejinji. Nambosoni mpaka tulinganye yakwakamuchisya Aklistu ŵachikulile kapena ŵakulwala kuti nombe alalichileje nawo.

10. Ana yajwasimene nayo Mlongo Sara yikutujiganya chichi?

¹⁰ Nambi uli naga mwayiŵelele yindu paumi wetu nganituŵa tukombwele kutenda yejinji? Atamose yili myoyo, mpaka tupatepe mapesa gakukamula masengo gakulalichila yimpepe ni malayika. Aganichisye yayamtendechele mlongo jwine jwa ku India lina lyakwe Sara.c Panyuma pakutenda upayiniya kwa yaka 20, Mlongo Sara jwatandite kulwala mwamti ndaŵi syosope jwaŵaga chigonele. Ngatukukayichila kuti yeleyi yamtendekasyaga mlongoju kulagasika nganisyo. Nambope, ligongo lyakuti abale ni alongo ŵamkamuchisyaga mlongoju soni jwaŵalangaga Baibulo ndaŵi syosope, yamkamuchisye jwalakwe kuti atandilesoni kusangalala. Ligongo lyakuti mlongoju jwalepelaga kwimuka kuti alembe yikalata, jwagambaga kulalichila pakamulichisya masengo foni. Mwamti mlongoju pajimbile foni kwa ŵandu ŵaŵalosisye chidwi, jemanjajo ŵamsalilagasoni ŵandu ŵane ŵampaka asache kumanyilila yejinji. Ana yakuyichisya yakwe yaliji yamti uli? Kwa mwesi umpepe, Mlongo Sara jwakwete majiganyo ga Baibulo gakwana 70. Mwamti ngamkanakombolaga kutendesya majiganyo gosopega. Myoyo, mlongoju jwaŵendile abale ni alongo ŵane kuti atendesyeje majiganyo ganego. Mwamti apano, ŵajinji mwa ŵandu ŵelewo akusasimanikwa pamisongano jetu. Kusala yisyene, malayika gakusasangalala mnope kukamula masengo yimpepe ni ŵandu mpela Mlongo Sara ŵakusatenda yampaka akombole pamasengo gakulalichila.

MALAYIKA GAKUSALOSYA KUPILILA

11. Ana malayika gakulupichika gaŵele gali mkulosya chamti uli kuti gali gakupilila?

¹¹ Malayika gakulupichika gakusapeleka chisyasyo chambone mnope pangani ja kupilila. Kwa yaka masausande gejinji, malayikaga gaŵele gali mkupilila yindu yangali chilungamo soni yakusakala. Malayikaga galolite ni meso gawo pandaŵi jele Satana soni yakupanganyikwa yejinji yausimu yamjimuchilaga Yehofa. (Gen. 3:1; 6:​1, 2; Yud. 6) Baibulo jikusatusalila ya lilayika line lyakulupichika lyalyalimbene ni chiŵanda chamachili mnope. (Dan. 10:13) Nambosoni kutandila kalakala, malayika gaŵele gali mkwawona ŵandu ŵamnono ali mkusagula kumtumichila Yehofa. Atamose kuti malayikaga gaŵele gali mkuyiwona yindu yosopeyi, gakupitilisyape kumtumichila Yehofa mwakusangalala soni mwakulipeleka mnope. Mwamti gakusamanyilila kuti pandaŵi jakwe, Mlungu chachityosya yindu yosope yangali chilungamo.

12. Ana chichi champaka chitukamuchisye kuti tupilileje?

¹² Ana mpaka tugasyasyeje chamti uli malayikaga pangani ja kupilila? Mpela mwayaŵelele ni malayikaga, m’wejisoni mpaka tuyiwoneje yindu yangali chilungamo mwinesoni ŵandu mpaka atusisyeje. Nambope mpela mwagakusatendela malayika, tukusakulupilila kuti pandaŵi jakwe, Mlungu chachityosya yindu yosope yangali chilungamo. Mwamti mwakulandana ni malayika gakulupichika, m’wejisoni ‘ngatukusaleka kutenda yambone.’ (Agal. 6:9) Konjechesya pelepa, Mlungu atusalile kuti chachitukamuchisya kuti tukombole kupilila. (1 Akoli. 10:13) Myoyo, tukusasosekwa kumŵenda Yehofa kuti atupe msimu wakwe weswela wampaka utukamuchisye kuŵa ŵakuwusimana mtima soni ŵakusangalala. (Agal. 5:22; Akolo. 1:11) Nambi uli naga ŵane akwasisya? Amdalileje mnope Yehofa soni akatendaga woga. Yehofa chachakamuchisya soni kwalimbikasya wawojo ndaŵi jilijose.—Aheb. 13:6.

MALAYIKA GAKUSAWUKAMUCHISYA MPINGO KUŴA WESWELA

13. Ana malayika gakwete masengo gapadela gapi m’masiku gakumalisyaga? (Mateyu 13:​47-49)

¹³ M’masiku gakumalisya gano, Yehofa apelechesoni utumiki wapadela kwa malayika. (Aŵalanje Mateyu 13:​47-49.) Ŵandu mamiliyoni gejinji pachilambo chosope akusasaka kumanyilila ngani syambone. Ŵane mwa ŵandu ŵeleŵa akusatanda kumtumichila Yehofa nambo ŵane ŵangatandaga. Myoyo malayika agapele utumiki ‘wakwalekanganya ŵandu ŵakusakala pasikati pa ŵandu ŵakulungama.’ Yeleyitu yikulosya kuti malayikaga gakwete masengo gakuwukamuchisya mpingo kuti uŵe weswela. Nambotu yeleyi ngayikugopolela kuti mundu jwalijose juŵalesile kutenda yindu ni mpingo nganaŵa awujile. Nambosoni ngayikugopolela kuti mumpingo ngamusimanikwaga yakusawusya. Mmalomwakwe, tukulupilileje yakuti malayika gakukamula masengo mwakulimbichila pakuwukamuchisya mpingo kuti uŵe weswela.

14-15. Ana mpaka tugasyasye chamti uli malayika pangani jakuwukamuchisya mpingo kuŵa weswela? (Alolesoni yiwulili.)

¹⁴ Ana mpaka tugasyasye chamti uli malayika pangani jakuwukamuchisya mpingo kuŵa weswela? Mpaka tutende yeleyi mwakulingalinga kola ndamo syambone soni kuŵa paunasi wambone ni Yehofa. Kuti tukombole kuwukamuchisya mpingo kuŵa weswela, tukusosekwa kulingalinga kuwuchenjela mtima wetu mwakusagula achimjetu ŵambone, soni mwakuŵambala kutenda chilichose champaka chisokonasye unasi wetu ni Yehofa. (Sal. 101:3) Mpaka twakamuchisyesoni Aklistu achimjetu kupitilisya kuŵa ŵakulupichika kwa Yehofa. Mwachisyasyo, ana tukusosekwa kutenda uli patupikene kuti Mklistu mjetu atesile chakulemwa chekulungwa? Naga tukusamnonyela mjetujo, tuchimlimbikasya kuti akasale kwa achakulungwa ŵa mumpingo. Naga jwalakwejo akulepela kuja kukwasalila, m’wejo tuchijawula kukwasalila achakulungwawo ya nganijo. Kutenda yeleyi kuchikamuchisya kuti achakulungwawo amkamuchisye mwachitema Mklistu mjetu jwakulwala mwausimujo.—Yak. 5:​14, 15.

¹⁵ Chakutesya chanasa chili chakuti ŵandu ŵane ŵatesile chakulemwa chekulungwa akusatyosyedwa mumpingo. Mwamti mundu patyosyedwe mumpingo, ‘tukusaleka kukamulana’ najo.d (1 Akoli. 5:​9-13) Dongosolo jeleji jikusakamuchisya kuti mpingo uŵe weswela. Konjechesya pelepa, patukupikanila malangiso gakuŵambala kutenda yindu ni ŵandu ŵatyosyedwe, tukusalosya kuti tukusitwanonyela jemanjajo. Yili myoyo ligongo lyakuti yikusiyakamuchisya ŵanduwo kumanyilila kuti ŵalemwisye soni yikusiyakamuchisya kutenda yakomboleka kuti awujile kwa Yehofa. Mwamti jemanjaji pawujile mumpingo, m’weji pampepe ni Yehofa soni malayika tukusasangalala mnope.—Luk. 15:7.

16. Ana akusosekwa kulingalinga kugasyasya malayika m’matala gapi?

¹⁶ Kusala yisyene, uli upile wekulungwa mnope kuti Yehofa atukundile kulijiganya yejinji kutyochela kwa malayika soni kukamula nago masengo yimpepe. Myoyo kwende ndaŵi syosope tusyasyeje ndamo syambone sya malayikaga mpela kulinandiya, chinonyelo chawo pa ŵandu, kupilila kwawo, soni kulingalinga kwawo kuti mpingo uŵe weswela. Mwamti naga tukugasyasya malayika gakulupichikaga, m’wejisoni tuchiŵa mu liŵasa lya ŵakutumichila ŵa Yehofa mpaka kalakala.