Akakunda Chilichose Kwalepelekasya Kubatisidwa

1. Ana ni magongo gane gapi gambone gakwatendekasya kubatisidwa?

ANA wawojo akusamnonyela Yehofa Mlungu juŵapele mtuka uliwose wambone kupwatikapo umi wawo? Ana akusasaka kulosya kuti akusamnonyela jwalakwe? Litala lyambone lyakutendela yeleyi lili kulipeleka kwa jwalakwe soni kulosya kulipeleka kwawoko mwa kubatisidwa mmesi. Kutenda yeleyi kuchakamuchisya kuti aŵe m’liŵasa lya Yehofa. Mwamti yeleyi, yichitendekasya kuti Yehofa ŵalongoleleje soni kwasamalila. (Sal. 73:24; Yes. 43:​1, 2) Kulipeleka soni kubatisidwa kuchapasoni upile wakola umi wangamala.—1 Pet. 3:21.

2. Ana chitulijiganye chichi mungani ajino?

² Ana pana chachikwalepelekasya kubatisidwa? Naga yili myoyo, amanyilile kuti nganaŵa jika. Ŵandu mamiliyoni gejinji munyumamu, aŵele ali mkulingalinga kuchenga ndamo syawo soni kaganisye kawo kuti aŵajilwe kubatisidwa. Mwamti apano, jemanjaji akumtumichila Yehofa mwakusangalala soni mwakulipeleka. Mpaka alijiganye yejinji kutyochela kwa ŵandu ŵaŵabatisidwe mu yaka 100 yandanda. Kwende tulole yine mwa yakusawusya yaŵasimene nayo jemanjaji soni yatukulijiganya m’weji.

ASAMALIYA ŴABATISIDWE

3. Ana Asamaliya ŵasosekwaga kumalana ni yakusawusya yapi kuti abatisidwe?

³ Asamaliya ŵa mundaŵi ja Yesu ŵakwete dini jawo. Mwamti ŵajinji mwa jemanjaji ŵatamaga kumpoto kwa Yudeya. Kuti mundu jwa ku Samaliya ayiche pa kubatisidwa, jwasosekwaga kaje kugapikanichisya chenene Maloŵe ga Mlungu. Asamaliya ŵakulupililaga kuti Mabuku msanope gandanda ga m’Baibulo ni gagaliji gakutyochela kwa Mlungu. Mabuku gakwe gali Genesesi mpaka Detulonomo mwinesoni buku ja Yoswa. Atamose yaliji myoyo, jemanjaji ŵajembecheyaga kwika kwa Mesiya mwakamulana ni yajwasasile Mlungu pa Detulonomo 18:​18, 19. (Yoh. 4:25) Myoyo, kuti abatisidwe, ŵasosekwaga kwitichisya kuti Yesu jwaliji Mesiya juŵamjembecheyaga ŵandu. Mwamti “Asamaliya ŵajinji” ŵatesile yeleyi. (Yoh. 4:39) Konjechesya pelepa, komboleka kuti papalisoni Asamaliya ŵane ŵaŵasosekwaga kumalana ni lusagu ndamo jijaliji jakuwanda pasikati pa jemanjaji ni Ayuda.—Luk. 9:​52-54.

4. Mwakamulana ni Masengo 8:​5, 6, 14, ana Asamaliya ŵane ŵatesile yamti uli paŵapikene yaŵalalichilaga Filipo?

⁴ Ana chichi chichakamuchisye Asamaliya kuti Abatisidwe? Pandaŵi jele jwakulalichila Filipo jwasalile jemanjaji “ya Klistu,” Asamaliya ŵane ‘ŵapochele maloŵe ga Mlungu.’ (Aŵalanje Masengo 8:​5, 6, 14.) Atamose kuti Filipo jwaliji Myuda, Asamaliyaŵa nganakana kumpikanila. Komboleka jemanjaji ŵakumbuchile ndime sine sya m’mabuku msano gala syasikusalosya kuti Mlungu ali jwangali lusagu. (Det. 10:​17-19) Mu yakutendekwa yejinji, Asamaliyaŵa “ŵaliji mkupikanila yaŵaŵechetaga Filipo” yakwamba Klistu. Mwamti ŵamanyilile kuti Mlungu ni juŵamlongolelaga Filipojo. Jwalakwe jwatendagasoni yakusimonjesya yejinji kupwatikapo kwaposya ŵakulwala soni kutyosya misimu jakusakala.—Mase. 8:7.

5. Ana mpaka alijiganye chichi kutyochela kwa Asamaliya?

⁵ Yikakomboleche Asamaliyaŵa kana kumpikanila Filipo ligongo lyakuti jwaliji Myuda. Mwinesoni yindu yaŵalijiganyagayo akayiwonaga kuŵa yachilendo ni kulepela kuyikulupilila. Nambo jemanjaji nganatenda yeleyi. Myoyo, Asamaliyaŵa nganachelewa kubatisidwa panyuma pakuyiwona kuti yajwajiganyaga Filipo yaliji yisyesyene. Mwamti Baibulo jikusasala kuti, “Filipo paŵalalichile ngani syambone sya Uchimwene wa Mlungu soni ya lina lya Yesu Klistu, jemanjajo ŵamkulupilile mwamti achalume ni achakongwe ŵakwe ŵabatisidwe.” (Mase. 8:12). Ana wawojo akusakulupilila kuti Maloŵe ga Mlungu gali gasyesyene soni yakuti ŵa Mboni sya Yehofa ali ŵangali lusagu mwamti chinonyelo chakusalosyana chikusichamanyikasya kuti ali Aklistu ŵasyesyene? (Yoh. 13:35) Naga yili myoyo, akajogopa kubatisidwa ligongo Yehofa chachakamuchisya.

6. Ana chisyasyo cha Ruben mpaka chakamuchisye chamti uli?

⁶ Mnyamata jwine jwakusatama ku Germany lina lyakwe Ruben, jwakulile m’liŵasa lya Mboni sya Yehofa. Nambope, pajwaliji mchanda, jwakayichilaga yakuti kwana Yehofa. Ana jwamalene chamti uli ni kukayichilaku? Ligongo lyakuti jwamanyilile kuti akupelembela lunda, jwalinganyisye yakutendapo kandu. Jwalakwe jwatite, “Panalijiganyaga Baibulo, natendaga yakomboleka kuti mbate yisyesyene yakwe pa yindu yanayikayichilagayo. Nasosekwaga kulijiganya kwa maulendo gejinji ngani jakwamba muyapagwile ya umi.” Jwaŵalasilesoni kabuku ka Chisungu kakuti, Is There a Creator Who Cares About You? Kabuku keleka kamkamuchisye mnope Ruben. Mwamti jwayikene pakuliŵechetela jika kuti, ‘Eee! Yehofa ali jusyesyene.’ Mwamti pandaŵi jine ali apite kukulola malo ku likulu lyetu lyapachilambo chosope, Ruben jwatandite kujinonyela gulu ja abale ni alongo pachilambo chosope. Ali awujile ku Germany, jwalakwe jwabatisidwe ali akwete yaka 17. Naga wawojo akusakayichila yindu yalijiganyisye, mpaka atende chenene kuwungunya m’mabuku getu. Kayichila mpaka kumale naga ‘tukumanyilila chenene yindu.’ (Aef. 4:​13, 14) Pakupikana yakusati pakunonyelana soni kamulana abale ni alongo pachilambo chosope, soni kuyiwona kuti ni yayikutendekwa mumpingo mwawo, chachitanda kuyamichila mkamulano watukwete pachilambo chosope.

SAULO JWA KU TALISO JWABATISIDWE

7. Ana Saulo jwasosekwaga kuchenga kaganisye kapi kakulemwecheka?

⁷ Aganichisye ya chisyasyo cha Saulo jwa ku Taliso. Jwalakwe jwaliji Myuda jwakumanyika soni jwamlijiganye mnope. (Agal. 1:​13, 14; Afil. 3:5) Pandaŵi jine Saulo jwalagasisye mnope Aklistu ligongo lyakuti pandaŵijo Ayuda ŵajinji ŵawonaga Aklistuwo mpela ŵampatuko. Mwamti Saulo jwaganisyaga kuti yajwatendagayi ni yajwasakaga Mlungu. (Mase. 8:3; 9:​1, 2; 26:​9-11) Myoyo, kuti Saulo amjitichisye Yesu soni kubatisidwa, nombe najo jwasosekwaga kuŵa jwakoseka kulagasidwa.

8. (a) Ana ni chichi chachamkamuchisye Saulo kuti abatisidwe? (b) Mwakamulana ni Masengo 22:​12-16, ana Ananiya jwamkamuchisye chamti uli Saulo? (Alolesoni chiwulili.)

⁸ Ana chichi chachamkamuchisye Saulo kuti abatisidwe? Ambuje Yesu ali awonechele kwa jwalakwe kupitila mu uchimbichimbi wakwe, ndaŵi jijojo Saulo jwalesile kulola. (Mase. 9:​3-9) Kwa masiku gatatu, Saulo nganalya chilichose. Mwamti ngatukukayichila kuti pandaŵi jeleji jwaganichisyaga yayamtendechele yila. Saulo jwakulupilile kuti Yesu jwaliji Mesiya soni kuti ŵakumkuya ŵakwe ni ŵaŵamtumichilaga Mlungu m’litala lyakuŵajilwa. Komboleka Saulo chamkamwile chanasa chekulungwa ligongo lyakuti ni jujwajitichisye yakuti Sitefano awulajidwe. (Mase. 22:20) Kaneko, panyuma pa masiku gatatu gala, jwakulijiganya jwa Yesu lina lyakwe Ananiya jwasimene ni Saulo. Kaneko panyuma pakumkamuchisya kuti atandilesoni kulola, ŵamlimbikasisye kuti abatisidwe mwachitema. (Aŵalanje Masengo 22:​12-16.) Mwakulinandiya, Saulo ŵampikanile Ananiya mwamti jwabatisidwe.—Mase. 9:​17, 18.

9. Ana mpaka alijiganye chichi pa yindu yayamtendechele Saulo?

⁹ Mpaka tulijiganye yejinji pa yindu yayamtendechele Saulo. Yikakomboleche jwalakwe kulepela kubatisidwa ligongo lya kunyada kapena woga. Nambope jwalakwe nganakunda kuti yeleyi yitendekwe. Mwakulinandiya, Saulo jwachenjile umi wakwe soni jwajitichisye yisyesyene yakwamba Klistu. (Mase. 26:​14, 19) Saulo jwaliji jwakusachilila kuŵa Mklistu atamose jwamanyililaga kuti chachilagasidwa. (Mase. 9:​15, 16; 20:​22, 23) Ali abatisidwe, jwalakwe jwapitilisye kumdalila mnope Yehofa kuti ni jwampaka amkamuchisye kuyipilila yakusawusya. (2 Akoli. 4:​7-10) Yisyene kuti nombe wawojo pachachibatisidwa chachisimana ni yakusawusya, soni yakulingwa, nambope nganaŵa jika. Mwamti Mlungu soni Klistu chachakamuchisya.—Afil. 4:13.

10. Ana ngani ja Anna mpaka jakamuchisye chamti uli?

¹⁰ Msikana jwine lina lyakwe Anna jwakulile ku Eastern Europe. Panyuma pakuti mamagwe abatisidwe, jwalakwe jwatandite kulijiganya Baibulo ali akwete yaka 9. Babagwe ŵajitichisye yakuti jwalakweju alijiganyeje Baibulo. Nambope, yeleyi nganiyasangalasya ŵachibalegwe ŵane ŵaŵatamaga nawo. Ŵachibale ŵakwewo ŵayiwonaga kuti nganiyiŵa yakuŵajilwa kuti mundu aleche dini ja babagwe. Ali akwete yaka 12, jwalakwe jwaŵendile babagwe kuti akusaka kubatisidwa. Myoyo, babagwewo ŵasakaga kumanyilila naga Annajo jwasagwile jika yakuti abatisidwe. Nambo jwalakwe jwajanjile babagwewo kuti, “Ngusamnonyela Yehofa.” Myoyo, babagwewo ŵamkundile kuja kubatisidwa. Ali abatisidwe, Anna jwasimene ni yakusawusya yejinji mpela kunyosyedwa soni kutendeledwa yachipongwe. Jwachibale jwakwe jwine jwamsalile Anna kuti, “Yikaliji chenene yikaŵe kuti mkukwemba soona nambosoni kutenda ndamo sine syakusakala kulekangana ni kuŵa jwa Mboni sya Yehofa.” Ana jwalakweju jwakombwele uli kulimbana ni yeleyi? Jwalakwe jwatite, “Yehofa jwangamuchisye kuti mbe jwakulimba. Mwamti mama ni baba ŵangamuchisye mnope.” Anna akusalemba yakutendekwa yele Yehofa ŵamkamuchisye. Yeleyi yikusamkamuchisya kuti ndaŵi syosope akumbuchileje yaŵatite Yehofa pakumkamuchisya. Nombe wawojo naga akogopa kuti chachilagasidwa, akumbuchileje kuti Yehofa chachakamuchisya.—Aheb. 13:6.

KONELIYO JWABATISIDWE

11. Ana chichi chachikamtendekasisye Koneliyo kuchelewa kubatisidwa?

¹¹ Baibulo jikusasalasoni ngani ja Koneliyo. Jwalakwe jwakwete udindo wakulongolela “kagulu ka asilikali” ŵa Chiloma ŵakwana 100. (Mase. 10:1) Ligongo lya yeleyi, ngatukukayichila kuti jwalakwe jwaliji jwakumanyika mudela jawo soni pasikati pa asilikali achimjakwe. Jwalakwe “jwatendelaga yambone ŵandu ŵakulaga.” (Mase. 10:2) Myoyo, Yehofa jwamtumisye ndumetume Petulo kuti akamlalichile jwalakweju ngani syambone. Ana maudindo gajwakwete Koneliyo gamtendekasisye kuchelewa kubatisidwa?

12. Ana chichi chachamkamuchisye Koneliyo kuti abatisidwe?

¹² Ana chichi chachamkamuchisye Koneliyo kuti abatisidwe? Tukusaŵalanga kuti jwalakwe “jwaliji jwakogopa Mlungu yimpepe ni ŵamwiŵasa mwakwe wosope.” Konjechesya pelepa, Koneliyo jwaliji mkupopela kwa Mlungu ndaŵi syosope. (Mase. 10:2) Petulo pajwagambile kumlalichila Koneliyo, jwalakwejo pampepe ni ŵamwiŵasa mwakwe ŵatandite kumkuya Klistu, mwamti ndaŵi jijojo ŵabatisidwe. (Mase. 10:​47, 48) Yili yangakayikasya kuti Koneliyo jwaliji jwakusachilila kutenda chilichose ni chakulinga chakuti amtumichileje Yehofa yimpepe ni liŵasa lyakwe.—Yos. 24:15; Mase. 10:​24, 33.

13. Ana alijiganyisye chichi kwa Koneliyo?

¹³ Mpela muyaŵelele ni Saulo, nombe Koneliyo nganakunda kuti udindo wajwakwete umlepelekasye kuŵa Mklistu. Ana wawojo akusosekwa kuchenga yindu yine paumi wawo kuti aŵajilwe kubatisidwa? Naga yili myoyo, Yehofa chachakamuchisya. Mwamti jwalakwe chachijaliwa yiliyose yakulingalinga kutenda kuti amtumichileje jwalakwe mwakamulana ni mfundo sya m’Baibulo.

14. Ana yayamtendechele Tsuyoshi mpaka yakamuchisye chamti uli?

¹⁴ Jwamlume jwine jwa ku Japan lina lyakwe Tsuyoshi jwasosekwaga kuchenga masengo gakwe kuti aŵajilwe kubatisidwa. Jwamlumeju jwaliji jwaŵili kwa jwakulolela sukulu jinejakwe jakumanyika mnope jakwiganya kaŵiche ka maluŵa. Naga jwamkulungwa jwa pasukuluji alepele kwawula kumalilo, jwamlumeju jwajawulaga mmalo mwa abwana ŵakwewo kuti akatende yiliyose yakwayana ni mwambo wa malilo wakusatenda Abuda. Nambope jwamlumeju pajwalijiganyisye yisyesyene yakwamba ŵandu ŵawe, jwamanyilile kuti naga akupitilisya kutenda nawo mwambowo nikuti nganaŵa aŵajilwe kubatisidwa. Myoyo, jwalakwe jwalinganyisye yakuti aleche kutenda nawo mwambowu. (2 Akoli. 6:​15, 16) Mwamti jwaganisisye yakwasalila abwana ŵakwe ŵala ya nganiji. Ana yakuyichisya yakwe yaliji yamti uli? Jwamlumeju nganamtyosya masengo, nambo ŵamkundile kuti akatendaga nawo mwambo wa malilo waŵatendaga Abudawo. Jwalakwe jwabatisidwe pali papite chaka kutyochela pajwatandite kulijiganya Baibulo.a Naga wawojo akusosekwa kuchenga masengo gawo kuti amsangalasye Mlungu, akusosekwa kulupilila kuti jwalakwe chachakamuchisya kupata yakusosechela ya paumi wawo kapena ya liŵasa lyawo.—Sal. 127:2; Mat. 6:33.

ŴANDU ŴA KU KOLINTO ŴABATISIDWE

15. Ana ni yindu yapi yayikalepelekasisye kubatisidwa ŵandu ŵa ku Kolinto?

¹⁵ Msinda wakala ŵa ku Kolinto wamanyikaga ni kunonyela mnope chipanje soni ndamo syakusakala. Mwamti ŵandu ŵajinji ŵaŵatamaga mumsindawu ŵatendaga yindu yangamsangalasya Mlungu. Yeleyi yatendekasyaga kuti ŵandu ŵa mumsindawu ayiwoneje kuŵa yakusawusya kutanda kumtumichila Yehofa. Nambope, ndumetume Paulo pajwapite kukulalichila ku msindawu ngani syambone syakwamba Yesu Klistu, “ŵandu ŵajinji ŵa ku Kolintoko . . . .ŵakulupilile ni kubatisidwa.” (Mase. 18:​7-11) Kaneko Ambuje Yesu ŵawonechele kwa Paulo kupitila mmesomkulola ni ŵamsalile kuti, “Mumsinda amuno ngwete ŵandu ŵajinji ŵakuti nasonganganye.” Myoyo, Paulo jwapitilisye kulalichila mumsindawo kwa chaka chimpepe ni hafu.

16. Ana chichi chachakamuchisye ŵandu ŵane ŵa ku Kolinto kumalana ni yindu yayikalepelekasisye kubatisidwa? (2 Akolinto 10:​4, 5)

¹⁶ Ana chichi chachakamuchisye ŵandu ŵa ku Kolinto kuti abatisidwe? (Aŵalanje 2 Akolinto 10:​4, 5.) Maloŵe ga Mlungu soni machili ga msimu wakwe weswela ni yayakamuchisye kuti jemanjaji achenje ndamo syawo. (Aheb. 4:12) Mwamti ŵandu ŵa ku Kolinto ŵaŵapikanile ngani syambone syakwamba Klistu ŵalesile ndamo syawo syakusakala. Ndamo syakwe syaliji mpela kumwa mnope ukana, wiyi, soni kugonana kwa achalumepe kapena achakongwepe.—1 Akoli. 6:​9-11.b

17. Ana alijiganyisye chichi pangani ja ŵandu ŵa ku Kolinto?

¹⁷ Atamose kuti ŵane mwa ŵandu ŵa ku Kolintoŵa ŵasosekwaga kuchenga yindu yejinji, jemanjaji nganayiwona kuti yaliji yakusawusya mnope kuti mundu aŵe Mklistu. Mwamti ŵatesile yakomboleka kuti ajendeje pa msewu wamwana wakwalongolela ku umi wangamala. (Mat. 7:​13, 14) Ana wawojo akulingalinga kulimbana ni ndamo jinejakwe ni chakulinga chakuti aŵajilwe kubatisidwa? Naga yili myoyo, akawujila munyuma. Amŵendeje Yehofa kuti ŵape msimu wakwe weswela kuti wakamuchisyeje kuŵambala kutenda yakusakala.

18. Ana alijiganyisye chichi pangani ja Monika?

¹⁸ Monika jwakusatama m’chilambo cha Georgia, jwatesile yakomboleka kuti aleche kuŵecheta maloŵe gakusakala soni kutenda yakusangalasya yangaŵajilwa ni chakulinga chakuti aŵajilwe kubatisidwa. Jwalakwe jwatite, “Panaliji jwachinandipile, chindu chichangamuchisyaga mnope kuti ngombole kuchenga chaliji kupopela. Mwamti Yehofa jwamanyililaga kuti nasachililaga kuti ndendeje yindu yambone, myoyo ndaŵi syosope jwangamuchisyaga soni kulongolela.” Yakuyichisya yakwe, Monika jwabatisidwe ali akwete yaka 16. Ana pana ndamo sine syakusosekwa kusileka ni chakulinga chakuti amtumichileje chenene Yehofa? Akaleka kumŵenda jwalakwe kuti ŵapeje machili gakwakamuchisya kuchenga. Mwamti Yehofa akusapeleka msimu wakwe weswela mwakoloŵa magasa.—Yoh. 3:34.

CHIKULUPI CHAWO MPAKA CHISEJESYE MATUMBI

19. Ana chichi champaka chakamuchisye wawojo kumalana ni yakusawusya yakuwoneka mpela matumbi? (Alolesoni chiwulili.)

¹⁹ Akakayichilaga yakuti Yehofa akusiŵanonyela soni kuti ali jwakusachilila kuti wawojo aŵe mu liŵasa lyakwe. Akulupilileje yeleyi atamose kuti pana yindu yine yayikwalepelekasya kubatisidwa. Yesu ŵasalile ŵakulijiganya ŵakwe kuti, “Naga mkwete chikulupi ukulu wakwe mpela kambeju ka tanaposi, chimchikombola kulisalila litumbi ali kuti, ‘Mtyoche apa mjawule apo,’ soni lichijawula, mwamti pangali chachichiŵa changakomboleka kwa jemanja.” (Mat. 17:20) Ŵandu ŵaŵapali Yesu pajwaŵechetaga yeleyi ŵaliji ali atemi ni jwalakwe kwa yaka yamnono mwamti chikulupi chawo chaliji chili mkupitilisya kula. Nambope Yesu jwasimichisye jemanjajo kuti naga akupitilisya kukola chikulupi, Yehofa chachakamuchisya kwika atamose pakusejesya yakusawusya yakuwoneka mpela matumbi. Mwamti jwalakwe chachakamuchisyasoni wawojo kutenda yakulandanayo.

20. Ana yisyasyo ya ŵandu ŵakala soni ŵa masiku agano yayisasile munganiji yakamuchisye chamti uli wawojo?

²⁰ Naga ayikopochele kuti pana chakusawusya chinechakwe chachikwalepelekasya kubatisidwa, mwachitema atende yakomboleka kuti amalane nacho. Awungunyeje yisyasyo yakulimbikasya ya ŵandu ŵakala soni ŵa masiku agano. Pakulola yisyasyo yeleyi yichalimbikasya soni kwakamuchisya kuti alipeleche kwa Yehofa ni kubatisidwa. Akumbuchileje kuti kulipeleka kwa Yehofa mwa kubatisidwa chili chindu chambone mnope kupundana ni chine chilichose champaka atende.