Kongolela Katende Ketu ka Undumetume—Twajiganyeje Ŵacasambano

Ligongo Lyakwe Kuli Kwakusosekwa: Ŵakulijiganya ŵacasambano ŵa Yesu akusasosekwa kwajiganya kuti ‘asunjeje yindu yosope’ yaŵatulamwile, yayikupwatika kwajiganya ŵane usyesyene. (Mat. 28:19, 20) Ŵajinji mwa ŵacasambano ŵatandite kala kwinjila nawo mu Sukulu ja Undumetume wa Mlungu, soni komboleka kuti ŵane mwa jemanjaji alalicile mwaupile kwa ŵamwiŵasa mwawo kapena acimjawo. Nambope, komboleka kuti apano ali ŵakusacilila kwinjilaga nawo mu undumetume wa mumgunda pakusaka kulosya kuyamicila kwawo pa yindu yalijiganyisye, soni pakumanyilila kuti Yehofa akusaka kuti ŵandu wosope apikane ngani syambone. (Alo. 10:13, 14) Ŵacasambano paŵajilwe kuŵa ŵakulalicila ŵangabatiswa, kwajiganya cenene kucakamucisya kuti aŵeje ŵakulimba mtima pakutenda undumetume wawo wa mumgunda, yampaka yakamucisye kwawula pasogolo mwausimu.—Luka 6:40.

Mwampaka Tutendele:

Amkamucisye jwakulalicila jwacasambano kupata mabuku gakamulicisya masengo pakulalicila soni pakwiganya. Amlosye kaŵice ka mabuku m’cikwama mwawo, soni amsalile cakulinga ca buku jilijose.
Yimpepe, asagule mu Undumetume wa Ucimwene yampaka akaŵecete ni kulinjilila mucakatendele. Amlimbikasye jwacasambanojo kuti akayiŵecete yakoseceleyo m’maloŵe gakwe. Asagule katagulilane kakuŵajilwa mwakamulana ni kumangwawoko m’buku ja Sukulu ya Utumiki pa peji 82 ni kulinjilila mucakatendele. Amsalilesoni kusosekwa kwa kuwala cenene soni kalisalalisye kwakuŵajilwa.—2 Akoli. 6:3, 4.
Ajendelecele kumjiganya yine. Amlosye jwakulalicila jwacasambanojo kadi ja mkuli wakusapeleka kwa mundu. Amlosye soni amjiganye mwatukusalembela pakapepala kakutukamucisya kumbucila lina lya mundu jwalijose jwalosisye lung’wanu. Amjiganye mwampaka akamulicisile masengo jw.org soni kabuku kakuti Uthenga Wabwino wa Anthu a Mitundu Yonse mu undumetume. Amkamucisye kuti alinjejelinjeje kutenda yakomboleka pakusya lung’wanu lwa ŵandu ŵasimene.—1 Akoli. 3:6.
Aŵeje ŵakulitimalika, soni am’yamicileje. (Miy. 25:11) Apeleceje cisyasyo cambone. Kumkamucisya mundujo mwamtawu soni mwakusacilila kuciŵa ni yakuyicisya yambone kusogolo.

Alinje Kutenda Yakuyicisyayi Mwesi Awuno:

Akalalicile ku nyumba ni nyumba yimpepe ni jwakulalicila jwacasambano, soni aŵe yalumo pakwawula ku maulendo gakuwilisya kapena ku lijiganyo lya Baibulo. Naga pangali jwakulalicila jwacasambano jwampaka ajinjile najo mu undumetume, komboleka kum’ŵenda jwakulalicila jwamkombola cenene kulalicila.