Tulijiganyeje Kutyocela kwa Ŵandu Ŵakupakombola Cenene Kulalicila

Uli upile kola ŵandu ŵakupakombola cenene kulalicila pampingo. Ŵane mwa jemanjaji aŵele ali mkumtumicila Yehofa mwakulupicika kwa yaka yejinji. Ŵane atandite kupakombola kulalicila cenene pacangakaŵapa. Ŵakulalicilaŵa akuweni kwawula pasogolo kwa masengo gakulalicila ni kupanganya ŵakulijiganya gawukutenda mpingo wa Ciklistu m’masiku gambesi gano mwakulongoleledwa ni Yesu. (Mat. 28:19, 20) Pakutenda nawo undumetumewu, akusapocela “macili gakupunda gacipagwa” gagakusakamucisya kupilila pasimene ni yindu yakusawusya kapena yakulingwa. (2 Akoli. 4:7) Mpaka tulijiganye yejinji kutyocela kwa ŵanduŵa. Jemanjaji akusasangalalasoni kwajiganya ŵane yalijiganyisye. (Sal. 71:18) M’yoyo, tukusosekwa kupata mapesa gakuti tulijiganyeje kwa jemanjaji. Nambo ana mpaka tutende yeleyi mwatuli?

Patuli mu Undumetume. Ŵacasambano soni ŵakulalicila ŵangapakombola cenene kulalicila, akusosekwa kulijiganya kuti alalicileje mwakamula mtima. Mpaka atende yeleyi pakulola mwakusatendela undumetume wawo ŵandu ŵakupakombola kulalicila cenene. (Alole ngani ja mtwe wakuti “Kodi Tingatani Kuti Tizikondabe Kulalikira?” mu Sanja ja Mlonda ja Ciceŵa, ja February 15, 2015, pa ndime jatatu pasi pa ka mtwe kakuti “Tizithandiza Atsopano.”) Ana kulalicila yimpepe ni ŵandu ŵakupakombola kulalicila cenene kwakamucisye catuli?

Ana mpaka am’ŵende jwakulalicila jwakusapakombola cenene kulalicila kuti ajende najo mu undumetume lisiku line? Naga yikusamlema kwenda, mwine ligongo lya ucekulu kapena ulwele, ndaŵi sine mpaka asaguleje kuti lijiganyo line lyakwe atendele kumangwakwe. Pambesi pa lijiganyolyo, am’ŵende kuti ŵasalile mwaliwonele soni yampaka ajongolele.

Tukunguluceje Nawo: Kuti ŵamanyilileje ŵandu ŵakupakombola cenene kulalicila akusosekwa kupata ndaŵi jakunguluka nawo. Ŵaŵilanjileje pa kulambila kwawo ka peŵasa ni kwawusya yine ni yine. Naga mundujo yikusamlema kwenda, mpaka alinganye yakuti lisiku line catendele kulambila kwa peŵasa kumangwakwe. Am’wusye mwaŵatandile usyesyene, majali gapatile, yindu yayiweni yili mkwawula pasogolo mumkuli mwawo, soni cacikusamsangalasya mnope ni kutumicila Yehofa.

Aŵe ŵakupikanicisya, soni akajembeceya kuti mundujo ciŵakamucisye pa cilicose. Mpela mwatuŵelele wosope, nombe nawo ŵakulalicila ŵakupakombola cenene kulalicila akwete mituka jakulekanganalekangana. (Alo. 12:6-8) Ŵane ali ŵacikulile mwati ngakomboleka kunguluka nawo kwandaŵi jelewu. Nambo atamose yili m’yoyo, mpaka tulijiganye yejinji kwa jemanjaji ligongo aŵele ali mkutumicila Yehofa mwakulupicika kwa yaka yejinji.