Kuŵilanjila Ŵandu ku Msongano Waupande
1. Ana kuŵilanjila ŵandu kumsongano kucitanda cakaci?
1 Mundu pakwaŵilanjila acimjakwe kapena liŵasa line ku cakulya capajika cacimjigalile ndaŵi, soni yindu yejinji pakucilinganya, akusaŵa jwakusangalala mnope pakwaŵilanga ŵanduwo. Mwakulandana ni yeleyi, paliji masengo gamakulungwa gakulinganya cindimba causimu cacicitendekwa pa msongano wetu waupande. Kuli kusigele yijuma yitatu kuti msongano wetu utendekwe, Yehofa atupele upile wakuŵilanjila ŵandu ŵane kuti caŵe nawo pamsonganowo. Ana cici cacicitukamucisya kuŵilanjila ŵanduwo mwakusangalala?
2. Ana cici cacicitutendekasya kamula nawo masengo gakuŵilanjila ŵanduga?
2 Ganicisya yatukusapata pa cindimba causimu cakusatulinganyila Yehofa, kucitulimbikasya kuti tujigale nawo mbali mwakwanila pa masengo gakuŵilanjila ŵanduga. (Yes. 65:13, 14) Tukumbucilejesoni kuti masengo getu ga pacakaga gakusaŵa ni yakuyicisya yambone. (Alole libokosi lyakuti “Gakwete Yakuyicisya Yambone.”) Ŵandu ŵane ŵatucaŵilanjila caciyika kukutenda nawo msonganowo. Mwangasamala kandu ya winji wa ŵandu ŵataciyika ku msonganoko, mtawu wetu watucilosya pa masengo gakuŵilanjila ŵanduga wucimsangalasya Yehofa, soni ucilosya koloŵa magasa kwakwe.—Sal. 145:3, 7; Ciu. 22:17.
3. Ana tucigaŵila catuli tumapepala twakuŵilanjila ŵandu ku msongano?
3 Acakulungwa ŵa mumpingo alinganye mwawucigaŵilila mpingo wawo tumapepala twakuŵilanjila ŵandutu mumkuli wawo wosope. Akusosekwasoni kusala naga caleceje tumapepalato pa nyumba syanganasimana ŵandu kapena ku malo gane. Kumbesi kwa cijuma, cacisosekwa gaŵila magasini pampepe ni tumapepalato naga yili yakomboleka. Patucimalisyaga masengo gakuŵilanjila ŵanduga, tuciŵa ŵakusangalala mnope ligongo lyakuti tukamwile nawo masengogo mwakulipeleka, soni kuti tuŵilanjile ŵandu ŵajinji kuti casimanikwe pa cindimba causimu catulinganyile Yehofa!