Nyimbo Syasambano Syakwimba Pakulambila!
1 Pamsongano wa pacaka wa pacangakaŵapa wa Watch Tower Bible and Tract Society of Pennsylvania, wawatendece pa October 4, 2014, ŵapelece cimanyisyo cakuti akulinganya yakulembasoni buku jetu ja nyimbo. Jeleji jaliji ngani jakusangalasya! Pamsonganowu ŵakumbwisye ŵandu wosope kusosekwa kwa nyimbo syetu sya Ucimwene pakulambila kwetu.—Sal. 96:2.
2 Mwine wawojo mpaka aliwusye kuti, ‘Ligongo cici buku jetu ja nyimbo jikusosekwa kulembedwasoni?’ Pana magongo gakwe. Candanda, tukwendelecela kugapikanicisya cenene Malemba, ni yeleyi yikukwayasoni maloŵe ga mu nyimbo syetu. (Miy. 4:18) Ligongo line lili lyakuti, maloŵe gejinji ga mu buku ja nyimbo jatukukamulicisya masengo apanopano gali gakutyocela mu Baibulo ja New World Translation jakala. Maloŵe gelega gakusosekwa galandaneje ni ga mu Baibulo jasampanoji. Ligongo lyakuti cipaŵe masengo gekulungwa mnope kuti yeleyi yikombolece, likuga liganisisye yakupwatika nyimbo sine syasambano m’buku jetu ja nyimboji.
3 Ana tukusosekwa kulindilila kuti buku jasambano ja nyimbo cijikopoce ni citutande kwimba nyimbo syasambanosi? Iyayi. Tuli ŵakusangalala kwamanyisya kuti m’miyesi jajikwisaji, nyimbo sine syasambanosi cisitande kusimanikwa pa Webusayiti jetu ja jw.org. Nyimbo jasambano pajikopwece, cijiŵeje nyimbo jakumalisya pa Msongano wa Undumetume, ni cajilembeje kuti “nyimbo jasambano.”
4 Ana Citulijiganyeje Catuli Nyimbo Syasambanosi?: Kulijiganya nyimbo syasambano mpaka kuŵe kwakusawusya. Nambope, mpela jwamalumbo, tukusaka kuti tujimbeje nyimbo pa misongano jetu ja mpingo ngaŵaga ‘kwamba kutama jii.’ (Sal. 30:12) Kuti akombole kulijiganya nyimbo syasambanosi, akuye yakuyicisyayi.
Apikanile mwakuwilisyawilisya nyimbo jakwimbigwa ni piyano, jacaŵiceje pa Webusayiti jetu. Naga akupikanila mwakuwisyawilisya nyimbo ja piyanojo, yiciŵa yangasawusya kujikumbucila nyimbojo.
Alijiganye maloŵe ga mu nyimbojo, ni kulinjilila kwimba mwangalolela.
Ajimbe nyimbojo mwakuya piyano jakwe. Atendeje yeleyi mpaka pacakombolele kujijimba cenene.
Ajimbeje nyimbo syasambanosi pa ndaŵi jawo ja Kulambila kwa Peŵasa mpaka wosope mwiŵasamo asikomboleje kwimba cenene.
5 M’miyesi jajikwisaji, naga aŵisile nyimbo jasambano kuti tujimbe pambesi pa Msongano wa Undumetume, candanda, mpingo wosope ciwupikanileje kaje yida ya piyano ya nyimbojo. Kaneko tucijimba mwakuya piyanojo, mpela mwatukusatendela ni nyimbo sine syosope.
6 Kwimba pamisongano jetu kukusatukamucisya wosope kwesya maloŵe getu mwakusangalala pakumlumba Yehofa. M’yoyo, ndaŵi jakwimba nyimbo pajikwanile ngatukusosekwa kola cisyoŵe cakopoka pasa.
7 Panasoni yine yampaka tutende kuti tulosye kuyamicila nyimbo syetu syapajikasi. Pa misongano jetu jekulungwa pakusapagwa nyimbo syakupikanila mkanijitande mbali jilijose ja msonganowo. Kaŵili pacaka, abale ni alongo ŵakulipeleka ŵakutyocela ku yilambo yakulekanganalekangana akusajawula ku Patterson, New York, pakamulicisya masengo mbiya syawo, kuti akalinganye nyimbo syambone kuti tukamulicisyeje masengo pakulambila kwetu. M’yoyo, ceyamani pasasile kuti tutame pasi kuti tupikanile nyimbosi, tukusosekwa kupikanila. Kutenda yeleyi kucitukamucisya kosecelesya mitima jetu kuti tulijiganye cenene mbali sya msonganowo.—Ezara 7:10.
8 Misongano jetu lelo citumalisye ni kwimba jimo mwa nyimbo syasambanosi, ja mtwe wakuti “Sambano Jili Ndaŵi Jakuti Ucimwene Uyice.” Nyimbo jajakopwece pa msongano wa pacaka wawutendekwe pacangakaŵaji, ŵajilembile kuti jilosye kuti papite yaka 100 kutyocela pawapagwile Ucimwene.
9 Mwangakayicila, nyimbo syasambanosi sili “yindu yambone” yakutyocela kwa Yehofa. (Mat. 12:35a) Kwende tusimicisye kuti tulijiganye nyimbo syasambanosi, soni tusijimbeje ni mtima wosope kuti tumlumbe, soni kumpa ucimbicimbi Mlungu jwetu!—Sal. 147:1.