Yindu Yisyesyene Yachiyitendekwe Kusogoloku

Ana pakwete paganisisye yachiyitendekwe kusogoloku? Baibulo jikusasala yindu yambone yachiyitendekwe pachangakaŵapa yachiyikwaye ŵandu wosope.

Yesu jwasasile mwampaka tumanyililile kuti “Mlungu asigele panandi kutamilikasya Uchimwene wakwe.” (Luka 21:31) Jwalakwe jwasasile yine mwa yeleyi kuti yichiŵa ngondo jekulungwa, yisichinya, sala soni yilwele. Yindu yeleyi ni yatukuyiwona masiku agano.—Luka 21:10-17.

Baibulo jikusasala chindu chimo chachikutendekwa “masiku gambesi” gano pangani ja ulamusi wa ŵandu kuti uchiŵa wakusakala. Mpaka aŵalanje yeleyi pa 2 Timoteo 3:1-5. Patukuyiwona yakutendekwayi, mwangakayichila mpaka tujitichisye kuti yakulochesya ya m’Baibuloyi yikamulana ni yayikutendekwa apano.

Ana yeleyi yikugopolela chichi? Ndaŵi jiŵandichile jakuti Uchimwene wa Mlungu uchenje umi wa ŵandu pachilambopa ni kuŵa wambone mnope. (Luka 21:36) Kupitila m’Baibulo, Mlungu akutusalila yindu yambone yachachatendela ŵandu ŵachachitama pachilambo chapasi. Kwende tulole yisyasyo yakuyichisyayi.

JWAKULAMULILA JWAMBONE

“Ŵapegwile [Yesu] ulamusi, lumbili ni Uchimwene, kuti ŵandu ŵamitundu josope, ngosyo syosyope ni ŵa yiŵecheto yakulekanganalekangana amtumichileje jwalakwejo. Ulamusi wakwe uli wampaka kalakala, Uchimwene wakwe ngisiwumala soni ngasiwujonasika.”—DANIELE 7:14.

Yayikugopolela: Mpaka tusangalale ni umi pasi pa ulamusi wa boma japachilambo chosope chapasi jele Mlungu ajitamilikasisye kupitila mwa Mwanache jwakwe jwali Mwenye.

CHILU CHAMBONE

Kamsikana kakutuluka pa njinga ja ŵalemale ni kakwenda

“Pangali atamose jumo mchilambomo jutachiŵecheta kuti, ‘Une ngulwala.’”—YESAYA 33:24.

Yayikugopolela: Ngasitulwalaga kapena kulemala, tuchitamaga mpaka kalakala.

MTENDELE WEJINJI

“Akulekasya ngondo mpaka kumbesi kwa chilambo chapasi.”—SALIMO 46:9.

Yayikugopolela: Ngasikupagwa ngondo soni yakutandikasya.

CHILAMBOCHI CHICHIGUMBALA NI ŴANDU ŴAMBONE

“Ŵangalumbana ngasawoneka . . . Ŵakulitulusya tachipochela chilambo kuti chiŵe chawo.”—SALIMO 37:10, 11.

Yayikugopolela: Ngasipasimanikwa ŵandu ŵakusakala, nambo ŵele pewo ŵali ŵakusachilila kumpikanila Mlungu.

CHILAMBO CHOSOPE CHICHIŴA PALADAISO

Ŵandu ŵangu tachitaŵa nyumba nipo tachitamamo, tachipanda migunda ja mipeleya, tachilya yisogosi yakwe.”—YESAYA 65:21, 22.

Yayikugopolela: Chilambo chosope chichiŵa chakusalala. Mlungu tachikwanilisya yatukusamŵenda kuti chakulinga chakwe chitendekwe “pachilambo chapasi.”—Mateyu 6:10.