Yisyesyene Yakwamba Mlungu Soni Klistu

Ana Mlungu Ali Ŵani?

Ana Mlungu Lina Lyakwe Ŵani? Mlungu akusasala kuti, “Une ndili Ambuje [Yehofa, NW]. Lina lyangu ni lyelelyo.” (Yesaya 42:8) M’Baibulo lina lya Mlungu likusasimanikwa maulendo gakwana 7,000. Nambope, ŵagopolela Mabaibulo ŵajinji akusatyosya lina lyakuti Yehofa, ni kuŵikapo lina line lya udindo mpela lyakuti “Ambuje.” Mlungu akusasaka kuti tuŵe mjakwe, myoyo akusatulimbikasya kuti akusatulimbikasya kuti ‘tulikolanjeje lina lyakwe.’—Salimo 105:1.

Mena ga Udindo ga Yehofa. Baibulo jikusamsala Yehofa ni mena gane udindo mpela “Mlungu,” “Jwamachiligosope,” “Jwakupanganya,” “Atati,” “Ambuje,” soni “Jwakulamulila Jwamkulungwa.” Mapopelo gejinji galembedwe m’baibulo mwele Yehofa akusamanyika ni lina lya udindo soni lina lyakwe lisyesyene lyakuti Yehofa.—Daniele 9:4

Mwaŵelele Mlungu. Mlungu ali msimu. (Yohane 4:24) Baibulo jikusasimichisya kuti “pangali atamose jumo juŵam’weni Mlungu.” (Yohane 1:18) Baibulo jikusasala mwakusapikanila jwalakwe mumtima. Ŵandu mpaka amtumbilikasye Mlungu kapena ‘kumsangalasya’ jwalakwe.—Misyungu 11:20; Masalimo 78:40, 41.

Ndamo Syapenani Sya Mlungu. Mlungu ali jwangali lusagu kwa ŵandu ŵamitundu josope soni ŵa ndamo syakulekanganalekangana. (Masengo 10:34, 35) Jwalakwe alisoni “jwachanasa ni jwambone mtima, jwangatumbila chitema, ŵakugumbala ni chinonyelo changamala soni jwakulupichika kwa ŵandu ŵakwe.” (Ekisodo 34:6, 7) Nambope, pana ndamo mcheche sya Mlungu syakutesya lung’wanu mnope.

Machili. Pakuŵa jwalakwe ali “Mlungu jwamachiligosope,” yeleyi yikugopolela kuti jwalakwe akwete machili gangali malile, mwamti mpaka akombole kutenda chilichose chasasile.—Genesesi 17:1.

Lunda. Lunda lwa Mlungu luli lwakupunda mundu jwalijose. Ni ligongo lyakwe Baibulo jikusasala kuti jwalakwe “jumopejo, jwali jwalunda.”—Aloma 16:27.

Chilungamo. Ndaŵi syosope Mlungu akusatenda yindu yambone. Yitendo yakwe yili “yagoloka” soni “yachilungamo.”—Detulonomo 32:4.

Chinonyelo. Baibulo jikusasala kuti “Mlungu ali chinonyelo.” (1 Yohane 4:8) Mlungu akusalosya chinonyelo chisyesyene. Chinonyelo chakwe chapenanichi, chikusakwaya chilichose chakusatenda jwalakwe, soni chikusatukamuchisya m’matala gejinji.

Unasi wa Mlungu ni Ŵandu. Mlungu ali Atati ŵetu ŵakwinani ŵachinonyelo. (Mateyu 6:9) Naga tukumkulupilila jwalakwe, tuchiŵa mjakwe. (Salimo 25:14) Myoyo, Mlungu akutulimbikasya kuti tuŵe najo paunasi mwakupopela soni ‘kutula pajwalakwe yidandawulo yetu yosope, pakuti jwalakwejo ni jwakusatusamalila’ m’weji.—1 Petulo 5:7; Yakobo 4:8.

Kulekangana Pasikati pa Mlungu ni Yesu

Yesu Ngaŵa Mlungu. Yesu ni jwele pejo juŵapanganyidwe ni Mlungu mwachindunji. Niligongo lyakwe Baibulo jikusaŵecheta kuti jwalakwe ali mwanache jwa Mlungu. (Yohane 1:14) Panyuma pakumpanganya Yesu, Yehofa ŵamkamulichisye masengo jwalakwe mpela jwandanda kupagwa jwa yakupanganyikwa yosope. Jwalakweju jwaliji mpela m’misili pakupanganya yindu yosope kupwatikapo m’weji.—Misyungu 8:30, 31; Akolose 1:15, 16.

Yesu Klistu nganaŵecheteje kuti jwalakwe ali Mlungu. Mmalo mwakwe, jwasasile kuti, “Natyochele kwa jwalakwe [Mlungu] soni jwalakwejo ni juŵandumile.” (Yohane 7:29) Yesu pijwaŵechetaga ni jumo mwa ŵakulijiganya ŵakwe, ŵamkolasile Yehofa kuti “Atati ŵangu ni Atati ŵenu,” soni “Mlungu jwangu ni Mlungu jwenu.” (Yohane 20:17) Yesu ali awile, Yehofa ŵamjimwisye ku ŵawe ni jwapite kwinani soni ŵampele udindo wekulungwa kumkono wa Yehofa wamlyo.—Mateyu 28:18; Masengo 2:32, 33.

Yesu Klistu Mpaka Atukamuchisye Kumŵandichila Mlungu

Yesu jwayiche pachilambo chapasi kukutujiganya yakwamba Atati ŵakwe. Yehofa jwasasile yakwamba Yesu kuti, “Aju ni Mwanangu ngusinamnonyela. Mumpikanileje.” (Maliko 9:7) Yesu akusammanyilila chenene Mlungu kupunda jwalijose. Jwalakwe jwatite, “Ŵelewo ni ŵakum’manyilila Mwanache. Ŵanesoni ŵakwamanyilila Atati ali Mwanache. Nambo Mwanache akusaka kwasalila ŵandu ŵane kwambaga ya Atati.”—Luka 10:22.

Yesu jwalosyaga chenene ndamo sya Mlungu. Yesu jwasyasyaga mnope ndamo sya Atati ŵakwe, mwamti jwasasile kuti, “Mundu jwambweni une ŵaweni soni Atati.” (Yohane 14:9) Yesu jwawutile ŵandu kwa Mlungu mwakulosya chinonyelo cha Atati ŵakwe. Jwatesile yeleyi kupitila mu yakuŵecheta yakwe soni mu yitendo yakwe. Jwalakwe jwatite, “Une ndili litala, usyesyene, ni umi, pangali mundu jwakwawula kwa Atati akaŵe kupitila mwa une basi.” (Yohane 14:6) Jwasasilesoni kuti, ‘Ŵandu tachalambila Atati mwakulongoleledwa ni msimu soni usyesyene. Atati akusachilila kuti ŵandu ŵamti myoyo amlambileje. (Yohane 4:23, NW) Tuganichisyeje kuti Yehofa akusosasosa ŵandu mpela m’weji ŵatukusaka kumanyilila yisyesyene yakwamba jwalakwe.