Kutama Umi Wangasaka Yejinji Kuli Kwakusangalasya Mnope
DANIEL NI MIRIAM ŵalombene mu September m’caka ca 2000. Jemanjaji ŵatamaga mu msinda wa Barcelona, ku Spain. Daniel ŵasasile kuti, “Twatamaga umi wangasoŵa kandu. Masengo getu gatukundaga kulya m’malo gapenani mnope, kwawula kukunguluka m’yilambo yine, soni kuwala yakuwala yambone mnope. Nambosoni twajinjilaga mu undumetume wa mumgunda mwakutamilicika.” Nambo kaneko yindu yacenjile paumi wawo.
Pa msongano waupande wawatendekwe mu 2006, paŵecetedwe ngani jajamkwayiye mnope Daniel. Nganiji jawusisye ciwusyo cakuti, “Ana tukutenda yosope yampaka tukombole kuti twakamucisye ŵandu ‘ŵakwenda mwakulajilila kuja kuwulajidwa,’ kuti apate litala lyakwawula ku umi wangamala?” (Miy. 24:11) Nganijo jasasile ya ukumu watukwete wakulalicila utenga wakulupusya wa m’Baibulo. (Mase. 20:26, 27) Daniel ŵasasile kuti, “Nalipikene kuti Yehofa ŵaŵecetaga ni une.” Nganijo jasasilesoni kuti, konjecesya yakutenda mu undumetume kukusamtendekasya mundu kuŵa jwakusangalala mnope. Daniel ŵakulupilile yeleyi. Pandaŵiji Miriam ŵaliji ali atandite kutenda upayiniya mwamti ŵasangalalaga mnope.
Daniel ŵasasile kuti, “Nayiweni kuti jeleji jaliji ndaŵi jambone jakucenga yindu paumi wangu.” Yeleyi ni yaŵatesile. Jwalakwe ŵanandiye maawala gakamulila masengo, ni kutanda upayiniya, soni ŵaganicisye ya cisangalalo campaka apate jwalakwe ni Miriam mwakusamila kumalo kwakusosecela ŵakulalicila ya Ucimwene ŵajinji.
YINDU YATANDITE KWASAWUSYA NAMBO KANEKO ŴAPOCELE UTENGA WAKUSANGALASYA
Mu May 2007, Daniel ni Miriam ŵalesile masengo ni ŵasamile ku Panama, cilambo cele ŵaliji ali ajawilepo kala kukunguluka. Mkuli wawo wapwatikagapo yilumba yejinji ya ku Bocas del Toro Archipelago yayaliji mu nyasa ja Caribbean. Ŵandu ŵa ku yilumbayi ŵaliji ŵa mtundu wa Guaymi. Daniel ni Miriam ŵaganisisye kuti mpaka atame ku Panama ciŵandika miyesi 8 ali mkukamulicisya masengo mbiya syaŵasunjile.
Daniel ni Miriam ŵatyokaga pa cilumba cine kwawula pa cilumba cine pakamulicisya masengo liboti, nambo payice pa cilumbapo ŵakamulicisyaga masengo njinga. Jemanjaji akukumbucila yayatendekwe pa ulendo wandanda wa makilomita 32 waŵajesile pa njinga m’matumbi gakuseleleka kuli mkutenda citukuta mnope. Daniel ŵasigele panandi komoka ligongo lyakupela. Nambo cakusangalasya caliji cakuti ŵandu ŵa kweleko ŵapocelaga cenene, mnopemnope paŵalijiganyisye maloŵe gane ga m’ciŵeceto ca kweleko. Mkanipapite ndaŵi, jemanjaji ŵatendesyaga majiganyo ga Baibulo gakwana 23.
Pasyamasile mbiya syawo, liŵasali lyatandite kudandawula. Daniel ŵaŵecete kuti, “Twatandite kuganicisya yakuwujila ku Spain misosi jili m’meso. Nganitusakaga kutyoka ni kuleka majiganyo getu ga Baibulo.” Nambo panyuma pa mwesi umo, ŵapocele utenga wakusangalasya. Miriam ŵatite, “Ŵatusalile kuti tutumicileje mpela apayiniya ŵapajika. Twasangalele mnope kwendelecela kutumicila mumkuliwo!”
APANO AKUSANGALALA MNOPE
M’caka ca 2015, likuga lyacenjile yindu yine, yakuyicisya yakwe Daniel ni Miriam ŵasalile kuti akajendelecele kutenda upayiniya wakutamilicika. Ana akatesile cici? Daniel ni Miriam ŵakulupilile lilemba lya Salimo 37:5 lyalikusati, ‘Amkunde Yehofa kuti ŵalongoleleje, Amjegamile, soni jwalakwe tacitendapo kandu.’ Jemanjaji ŵapatile masengo gakwakamucisya kupata yakusosecela ya paumi pakutenda upayiniya soni apano akutumicila mumpingo wawuli mu upande wa Veraguas ku Panama.
Daniel ŵaŵecetesoni kuti, “Mkanitutyoce ku Spain, nganitumanyililaga naga citukakombole kutama umi wangasaka yejinji. Nambo apano tukupakombola kutama umiwu soni ngatukusasoŵa yindu yakusosekwa mnope paumi.” Ana cici cacikwasangasya mnope? Liŵasali lyaŵecete kuti, “Kwakamucisya ŵandu ŵakwete mtima wambone kulijiganya ya Yehofa kuli kwakusangalasya mnope!”