“Tuli Tukwete Mtawu Soni Cinonyelo Mumtima Mwetu Kupundana ni Kala Kose”

LYALIJI Lyamsano kundaŵi mu September 1922. Mu holo jakutendela msongano mwatandite kutenda citukuta pandaŵi jele ŵandu ŵakwana 8,000 ŵasongenemo. Ceyamani jwapelece cimanyisyo cakuti mkati mwa cakutendekwa cakusosekwa mnopeco, jwalijose ŵakwete ufulu wakopoka mu holomo, nambo nganamkundaga kwinjilasoni.

Nyimbo syakuwugulila msongano pasyamasile kwimbidwa, M’bale Joseph F. Rutherford ŵajimi papulatifomu. Ŵakupikanila ŵajinji nganamanyilila cacicitendekwe. Ŵane ŵagambaga kwendajenda. M’bale Rutherford ŵasalile ŵanduwo kuti atame pasi kuti apikanileje. Pajatandaga ngani, ana pana jwalijose juŵaciweni cinguwo ciŵacikulunjile ni kucitaŵilila mwinani?

M’bale Rutherford ŵaŵecete ngani ja mtwe wakuti, “Ucimwene wakwinani uŵandicile.” Ciŵandika kwa awala ni hafu, maloŵe gakwe gamaciligo gapikanikaga palipose mu holomo paŵatagulilaga yaŵatesile ŵakulocesya ŵakala pakulalicila mwangali woga ya kwika kwa Ucimwene. Mkanamalisye ngani jakwe, jwalakwe ŵawusisye ŵanduwo kuti, “Ana akukulupilila kuti Mwenye jwa ucimbicimbi jutandite kulamulila?” Ŵanduwo ŵajanjile mwagumila kuti, “Elo!”

M’bale Rutherford ŵaŵecete mwakulimbika kuti, ‘M’yoyo, atandesoni kulalicila, jemanja ŵanace ŵa Mlungu jwakwinani mnope!  . . Sambano, Mwenye akulamulila! Jemanja ali ŵakulalicila Ucimwenewo. M’yoyo, alalicile, alalicile, alalicile.’

Ndaŵi jijojo, cinguwo caŵacitaŵilile mwinani cila, ŵacigopwele ni cakwete maloŵe gakuti, “Alalicile yakwamba Mwenye ni Ucimwene.”

M’bale jwine lina lyakwe, Ray Bopp ŵaŵecete kuti, “Likuga lya ŵanduwo lyasangalele mnope.” Anna Gardner ŵasasile yayatendekwe kuti, “ligongo lyagombela m’miyala migomba jatenganyice.” Fred Twarosh ŵasasile kuti, “Likuga lyosope lya ŵanduwo lyajimi pandaŵi jimo.” Evangelos Scouffas ŵaŵecete kuti, “Yaliji mpela kuti macili ganegakwe gatesile kutuwuta m’mipando jatwatemi, ni twajimi soni m’meso mwetu mwagumbele ni misosi.”

Ŵandu ŵajinji ŵaŵayice pa msonganowo ŵaliji ali atandite kala kulalicila ngani syambone sya Ucimwene. Nambo pandaŵiji ŵalipikene kuti akwete lisosa lyasambano lyakulalicilila. Ethel Bennecoff ŵasasile kuti Ŵakulijiganya Baibulo ŵajawile ‘ali akwete mtawu soni cinonyelo mumtima mwawo kupundana ni kala kose.’ Odessa Tuck, juŵakwete yaka 18, jwatyosile pa msonganopo ali jwakusimucisya kwanga ciŵilanjo cakuti, “Ŵani ŵacajawule?” Jwalakwe jwaŵecete kuti, “Nganimanyililaga kuti cingalalicileje kwapi, cingalalicileje camtuli, soni cingalalicileje cici. Canamanyililaga ni cakuti nasacililaga kuŵa mpela Yesaya juŵaŵecete kuti, ‘Une apano! Andumisye une!’” (Yes. 6:8) Ralph Leffler jwaŵecete kuti “Lisiku lyeleli lyaliji lyakutanda kwa masengo gakulalicila ya Ucimwene gagakutendekwa pacilambo cosope masiku agano.”

Yili yangasimonjesya kuti msongano wawatendekwe ku Cedar Point, Ohio mu 1922, uŵele wangaliŵalicika mu mbili ja ŵandu ŵa Mlungu. George Gangas ŵaŵecete kuti, “Msongano welewu walimbikasisye mnope kuti ngalepelaga kusimanikwa pa msongano wuliwose.” Mwakamulana ni yaŵaŵeceteyi nganalepelaga kusimanikwa pa msongano wuliwose. Julia Wilcox ŵalembile kuti, “Ngusalepela kutagulila mwangusapikanila mumtima pakolasile m’mabuku mwetu yakwamba msongano wuwatendekwe ku Cedar Point mu 1922. Ndaŵi syosope ngusanonyela kuŵeceta kuti, ‘Sikomo Yehofa pakungunda kuti simanikwe pamsonganowo.’”

Mwakulandana ni yeleyi, m’wejisoni masiku agano tukusakumbucila msongano wawatulimbikasisye kuti tukole mtawu soni cinonyelo pa Mlungu jwetu jwamkulungwa ni Mwenye jwakwe. Patukuganicisya ya msonganowo tukusaŵecetasoni kuti, “Sikomo Yehofa pakungunda kuti simanikwe pamsonganowo.”